« ការពលិកម្ម » ប្រធានបទ និង សំណួរ ( ឆ្នាំ២០២៣ )
មគ្គុទ្ទេសក៍សិក្សាដំណឹងល្អ
ការពលិកម្ម
របៀបដែលយើងបង្ហាញពីអ្វីដែលសំខាន់បំផុតសម្រាប់យើង
សូមគិតពីពេលមួយដែលអ្នកបានបោះបង់អ្វីមួយ ដើម្បីជាផលប្រយោជន៍ដល់នរណាម្នាក់ ។ នេះប្រហែលមិនមែនជារឿងងាយស្រួលដើម្បីធ្វើនោះទេ ប៉ុន្ដែតាមរយៈការធ្វើការលះបង់ នោះអ្នកបានបង្ហាញថាអ្នកមានឆន្ទៈដើម្បីដាក់តម្រូវការរបស់បុគ្គលនោះមុនតម្រូវរបស់ខ្លួនអ្នកផ្ទាល់ ។
ស្រដៀងគ្នានេះដែរ នៅពេលដែលយើងពលិកម្មអ្វីមួយសម្រាប់ព្រះ យើងបង្ហាញថាយើងស្រឡាញ់ទ្រង់ និងមានឆន្ទៈដើម្បីដាក់ទ្រង់ជាទីមួយនៅក្នុងជីវិតរបស់យើង ។ ការបង្ហាញដ៏ខ្ពស់បំផុសនៃការពលិកម្មរបស់យើងកើតមានឡើង នៅពេលយើងធ្វើតាមឆន្ទៈរបស់ព្រះជាជាងឆន្ទៈរបស់ខ្លួនយើងផ្ទាល់ ។ ការពលិកម្មរបស់យើងអាចឆ្លុះបញ្ជាំងពីសេចក្ដីស្រឡាញ់ និងអំណរគុណរបស់យើងចំពោះព្រះយេស៊ូវគ្រីស្ទ ជាអង្គ—នៅក្នុងទម្រង់ដ៏មហិមាបំផុតនៃសេចក្ដីស្រឡាញ់—បានពលិកម្មព្រះជន្មរបស់ទ្រង់ដើម្បីយើងអាចត្រឡប់ទៅរស់នៅជាមួយនឹងព្រះវរបិតាសួគ៌របស់យើងវិញ ។
តើការពលិកម្មគឺជាអ្វី ?
ការពលិកម្មគឺជាសកម្មភាពនៃការបោះបង់របស់អ្វីមួយ ដើម្បីបានអ្វីមួយផ្សេងទៀតដែលជាប្រយោជន៍ ។ រាស្ដ្ររបស់ព្រះបានធ្វើយញ្ញបូជាសម្រាប់ទ្រង់តាំងពីសម័យបុរាណមកម្ល៉េះ ។ នៅជំនាន់នេះយើងធ្វើពលិកម្មដោយថ្វាយឆន្ទៈរបស់យើងទៅព្រះ ហើយប្រែចិត្ដពីអំពើបាបរបស់យើង ដោយមានចិត្ដសង្រេង និងវិញ្ញាណទន់ទាប ។ យើងក៏លះបង់ពេលវេលា និងទេពកោសល្បរបស់យើងដើម្បីគាំទ្រដល់កិច្ចការនៃសេចក្ដីសង្គ្រោះរបស់ព្រះ និងភាពតម្កើងឡើងផងដែរ ( សូមមើល ម៉ាថាយ ៦:៣៣ ) ។ តាមរយៈការលះបង់ យើងបង្ហាញនូវឆន្ទៈរបស់យើងដើម្បីដាក់ព្រះជាទីមួយនៅក្នុងជីវិតរបស់យើង ( សូមមើល ម៉ាថាយ ១៩:២៩ ) ។
ទិដ្ឋភាពទូទៅនៃប្រធានបទ ៖ ការពលិកម្ម
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ការគោរពប្រតិបត្ដិ, ការបង់ដង្វាយមួយភាគក្នុងដប់, ការថ្វាយ, ការបម្រើក្នុងការហៅក្នុងសាសនាចក្រ
ផ្នែកទី ១
ព្រះបានប្រទាននូវច្បាប់នៃការពលិកម្មទុកជាការរំឭកអំពីការពលិកម្មរបស់ព្រះគ្រីស្ទ
បុត្រាបុត្រីរបស់ព្រះបានរស់នៅតាមច្បាប់នៃការពលិកម្មពីបុរាណដោយការបូជាសត្វទុកជាការរំឭកថាកូនចៀមនៃព្រះនឹងប្រោសលោះពួកគេពីការធ្លាក់ ( សូមមើល កូល៉ុស ១:១៣–១៨; ម៉ូសេ ៥:៦–៧ ) ។ បន្ទាប់ពីព្រះយេស៊ូវគ្រីស្ទស្ម័គ្រព្រះទ័យពលិកម្មព្រះជន្មរបស់ទ្រង់នៅលើឈើឆ្កាង ការបូជាសត្វគឺពុំចាំបាច់មានទៀតនោះទេ ( សូមមើល លូកា ២៣:៤៦; នីហ្វៃទី៣ ៩:១៩; នីហ្វៃទី៤ ១:១២ ) ។ ការពលិកម្មរបស់ព្រះអង្គសង្គ្រោះគឺជាសកម្មភាពនៃសេចក្ដីស្រឡាញ់ដ៏មហិមា និងនាំមកនូវការប្រោសលោះ និងសេចក្ដីសង្គ្រោះដល់មនុស្សជាតិ ( សូមមើល អេសាយ ៥៣:៧; នីហ្វៃទី២ ២:៧ ) ។
ដើម្បីស្វែងយល់បន្ថែមអំពីការពលិកម្មរបស់ព្រះអង្គសង្គ្រោះ សូមមើលមគ្គុទ្ទេសក៍សិក្សាស្ដីពី « ដង្វាយធួនរបស់ព្រះយេស៊ូវគ្រីស្ទ » ។
រឿងទាំងឡាយដែលត្រូវពិចារណា
-
សេចក្ដីជំនឿរបស់អ័ប្រាហាំត្រូវបានសាកល្បង នៅពេលព្រះបញ្ជាលោកឲ្យបូជាកូនប្រុសរបស់លោក គឺអ៊ីសាក ។ សូមពិចារណាអាន លោកុប្បត្តិ ២២; ហេព្រើរ ១១:១៧–១៩ និង យ៉ាកុប ៤:៥ អំពីការលះបង់ដែលព្រះបានស្នើឲ្យអ័ប្រាហាំធ្វើ ។ កាលអ្នកអាន សូមជញ្ជឹងគិតអំពីការពលិកម្មដែលព្រះធ្វើនៅក្នុងការលះបង់ព្រះរាជបុត្រាបង្កើតតែមួយរបស់ទ្រង់ គឺព្រះយេស៊ូវគ្រីស្ទ និងពលិកម្មដែលព្រះអង្គសង្គ្រោះបានធ្វើក្នុងការលះបង់ព្រះជន្មរបស់ទ្រង់ ។ តើព្រះវិញ្ញាណបង្រៀនអ្នកអ្វីខ្លះអំពីការលះបង់របស់ព្រះវរបិតា និងព្រះអង្គសង្គ្រោះ នៅពេលអ្នកអានវគ្គបទគម្ពីរទាំងនេះ ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅពេលព្រះយេស៊ូវគ្រីស្ទធ្វើដង្វាយធួនរបស់ទ្រង់ « ពិធីបរិសុទ្ធនៃពិធីសាក្រាម៉ង់បានជំនួសពិធីបរិសុទ្ធនៃការពលិកម្ម » ។ សូមពិចារណាច្រៀងទំនុកតម្កើងសាក្រាម៉ង់ដូចជា « នៅលើឈើឆ្កាងត្រង់កាល់វ៉ារី » ឬ « ឱ!ប្រាជ្ញា និងក្ដីស្នេហ៍ដ៏អស្ចារ្យ » ។ អ្នកក៏អាចអានព្រះគម្ពីរដែលជាប់ទាក់ទងនឹងទំនុកតម្កើងនីមួយៗ ហើយពិភាក្សាពីរបៀបដែលអ្នកអាចរៀបចំខ្លួនសម្រាប់ពិធីសាក្រាម៉ង់ជារៀងរាល់សប្ដាហ៍ផងដែរ ។ តើការគិតអំពិពិធីសាក្រាម៉ង់ថាជាឱកាសនៃការលះបង់អ្វីមួយសម្រាប់ព្រះអម្ចាស់ អាចធ្វើឲ្យការថ្វាយបង្គំរបស់អ្នកកាន់តែមានអត្ថន័យដោយរបៀបណា ?
ស្វែងយល់បន្ថែមទៀត
-
លេវីវិន័យ ១:២–៣ ១០; អាលម៉ា ៣៤:៨–១៤; មាត្រានៃសេចក្តីជំនឿ ១:៣
-
ជែហ្វ្រី អ័រ ហូឡិន « Behold the Lamb of GodLiahona ខែឧសភា ឆ្នាំ២០១៩ ទំព័រ ៤៤–៤៦
-
ត្រេស៊ី វ៉ាយ ប្រោននីង « ការមើលឃើញព្រះយេស៊ូវគ្រីស្ទកាន់តែច្បាស់នៅក្នុងជីវិតរបស់យើង » Liahona ខែវិច្ឆិកា ឆ្នាំ២០២២ ទំព័រ ១៣–១៥
ផ្នែកទី ២
ព្រះសុំឲ្យយើងថ្វាយការបូជានូវចិត្ដសង្រេង និងវិញ្ញាណទន់ទាប
សព្វថ្ងៃនេះយើងនៅតែរស់នៅតាមក្រឹតិ្យវិន័យនៃការពលិកម្មដោយការថ្វាយដល់ព្រះនូវចិត្ដសង្រេង និងវិញ្ញាណ ទន់ទាប ( សូមមើល នីហ្វៃ ទី៣ ៩:១៩–២០; គោលលទ្ធិ និងសេចក្ដីសញ្ញា ៥៩:៨ ) ។ តើយើងអាចថ្វាយការបូជាបែបនេះដោយរបៀបណា ? ដោយការជឿលើព្រះគ្រីស្ទ ការបន្ទាបខ្លួនយើង ការប្រែចិត្ដដ៏ពិតពីអំពើបាប និងការមករកទ្រង់ ( សូមមើល នីហ្វៃទី៣ ១២:១៩; មរ៉ូណៃ ៦:១–៣; គោលលទ្ធិ និងសេចក្ដីសញ្ញា ២០:៣៧ ) ។ ការធ្វើការលះបង់ប្រភេទទាំងនេះបង្ហាញនូវសេចក្ដីស្រឡាញ់របស់យើងចំពោះព្រះ ហើយថាពួកយើងមានឆន្ទៈធ្វើកិច្ចការដែលទ្រង់សុំឲ្យយើងធ្វើ ។ កាលយើងថ្វាយព្រលឹងទាំងមូលរបស់យើងដល់ព្រះ និងកាន់ខ្ជាប់ដរាបដល់ចុងបំផុត នោះយើងអាចបានសង្គ្រោះ និងទទួលជីវិតដ៏អស់កល្បជានិច្ច ( សូមមើល អោមណៃ ១:២៦ ) ។
រឿងទាំងឡាយដែលត្រូវពិចារណា
-
វាជារឿងធម្មតាទេក្នុងការឆ្ងល់ថា តើព្រះអម្ចាស់កត់សម្គាល់ និងទទួលយកការលះបង់ដែលយើងថ្វាយដើម្បីដើរតាមទ្រង់ឬអត់ ។ សូមពិចារណាព្រះបន្ទូលរបស់ព្រះអម្ចាស់ទៅកាន់ យ៉ូសែប ស្ម៊ីធ នៅក្នុង គោលលទ្ធិ និងសេចក្ដីសញ្ញា ១៣២:៤៩–៥០ ។ តើពរជ័យអ្វីខ្លះដែលបានសន្យាដល់ យ៉ូសែប ដោយសារតែការលះបង់របស់លោក ? តើអ្នកបានទទួលពរជ័យដោយរបៀបណា ដោយសារតែការលះបង់ដែលអ្នកបានធ្វើសម្រាប់ព្រះ ? អ្នកអាចសរសេរបញ្ជីនៃពរជ័យដែលអ្នកបានទទួល ហើយបន្ទាប់មកជញ្ជឹងគិតពីពរជ័យទាំងនោះពេញសប្ដាហ៍ ។
-
វិធីមួយដែលយើងអាចបង្ហាញសេចក្ដីស្រឡាញ់ចំពោះព្រះគឺតាមរយៈការធ្វើការលះបង់ដើម្បីមករកទ្រង់ ។ នៅក្នុងសុន្ទរកថារបស់លោក « ដោយស្មោះអស់ពីចិត្ដរបស់យើង » អែលឌើរ ឌៀថើរ អេហ្វ អុជដូហ្វ បានពន្យល់ថាការបូជារបស់យើងអាចជាអ្វីមួយសាមញ្ញដូចជាការលះបង់បំណងប្រាថ្នាផ្ទាល់ខ្លួន និងភាពសុខស្រួលដើម្បីដើរតាមព្រះអង្គសង្គ្រោះឲ្យបានពេញលេញ ។ សូមពិចារណាអានសុន្ទរកថារបស់អែលឌើរ អុជដូហ្វ និងជញ្ជឹងគិតពីរបៀបដែលអ្នកអាចថ្វាយដល់ព្រះយេស៊ូវគ្រីស្ទដោយស្មោះអស់ពីចិត្ដ ។ តើអ្នកអាចលះបង់អ្វីខ្លះដើម្បីធ្វើតាមព្រះអង្គសង្គ្រោះឲ្យបានប្រសើរជាងមុន ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅក្នុងវីដេអូ « A Broken Heart, Contrite Spirit, and Godly Sorrow» ( នាទី ៣:៥៨ ) អែលឌើរ នែល អិល អាន់ឌើរសិន បានពន្យល់ថាការថ្វាយដល់ព្រះអម្ចាស់នូវចិត្ដសង្រេង និងវិញ្ញាណទន់ទាបមានន័យថា « ការក្លាយដូចជាកូនក្មេង » ។ អ្នកអាចមើលវីដេអូនេះ ហើយបន្ទាប់មកពិភាក្សាអំពីលក្ខណៈសម្បត្តិដែលក្មេងៗមាន ដែលយើងគួរមាននៅក្នុងការលះបង់ឆន្ទៈរបស់យើងថ្វាយដល់ព្រះ។ អ្នកក៏អាចចែកចាយបទពិសោធន៍ដែលអ្នកធ្លាប់មានជាមួយក្មេងៗដែលបង្ហាញអ្វីដែលយើងអាចរៀនពីលក្ខណៈសម្បិត្ដិរបស់ពួកគេផងដែរ ។
ស្វែងយល់បន្ថែមទៀត
-
ទំនុកដំកើត ៥១:១៦–១៧; យ៉ូហាន ៦:៣៨; នីហ្វៃទី២ ២:៦–៧; ៤:៣២
-
នែល អេហ្វ ម៉ារីអូត « Yielding Our Hearts to God » Liahona ខែវិច្ឆិកា ឆ្នាំ២០១៥ ទំព័រ ៣០–៣២
ផ្នែកទី ៣
តាមរយៈការលះបង់ប្រចាំថ្ងៃ នោះយើងអាចក្លាយជាបរិសុទ្ធដូចព្រះយេស៊ូវគ្រីស្ទ
ការលះបង់សម្រាប់ព្រះអាចជួយយើងទទួលបានអំណាចរបស់ទ្រង់ ដែលតាមរយៈការណ៍នេះ យើងអាចក្លាយជាបរិសុទ្ធ ។ តាមរយៈការលះបង់សម្រាប់ព្រះអម្ចាស់ នោះយើងបង្ហាញសេចក្ដីស្រឡាញ់របស់យើងចំពោះទ្រង់ និងមនុស្សដទៃ ។ យើងអាចគិតថាការលះបង់គឺជាការលំបាក ឬពិបាកក្នុងការធ្វើ ប៉ុន្ដែមែនទែនទៅវាមានន័យថា « ការរស់នៅពីមួយថ្ងៃទៅមួយថ្ងៃក្នុងនាមជាសិស្សដ៏ពិតរបស់ព្រះគ្រីស្ទ » ។ នៅពេលយើងលះបង់ជារៀងរាល់ថ្ងៃដើម្បីរក្សាសេចក្តីសញ្ញារបស់យើង និងធ្វើតាមព្រះយេស៊ូវគ្រីស្ទ នោះយើងកំពុងជួយជំរុញកិច្ចការរបស់ព្រះទៅមុខ ។
រឿងទាំងឡាយដែលត្រូវពិចារណា
-
របៀបមួយដែលយើងអាចលះបង់ជារៀងរាល់ថ្ងៃគឺតាមរយៈការថ្វាយពេលវេលារបស់យើងដល់ព្រះអម្ចាស់ ។ ការណ៍នេះអាចរួមមានកិច្ចការដូចជាការបំពេញការហៅរបស់យើង ឬធ្វើការងារបម្រើដល់គ្នាទៅវិញទៅមក ។ ប្រធាន ដាល្លិន អេក អូក បានបង្រៀន « ជីវិតនៃការបម្រើ និងការបូជារបស់យើងគឺជាការបង្ហាញដ៏សមគួរបំផុតពីការតាំងចិត្តរបស់យើងក្នុងការបម្រើលោកចៅហ្វាយ និងអ្នកជិតខាងរបស់យើង » ។ តើអ្នកលះបង់ពេលវេលារបស់អ្នកជាប្រចាំដល់ព្រះអម្ចាស់ដោយរបៀបណា ? សូមពិចារណាពីរបៀបដែលការធ្វើដូច្នេះបានជួយអ្នកឲ្យកាន់តែជិតស្និទ្ធនឹងព្រះគ្រីស្ទ និងក្លាយជាកាន់តែបរិសុទ្ធ ។
-
ពេលខ្លះការលះបង់ប្រចាំថ្ងៃដែលយើងធ្វើក្នុងនាមជាសិស្សរបស់ព្រះគ្រីស្ទអាចមានអារម្មណ៍ថាតូចតាច និងមិនសំខាន់សម្រាប់យើងនោះទេ ។ ប៉ុន្តែការលះបង់ទាំងនេះមានសារៈសំខាន់ចំពោះព្រះអម្ចាស់ ។ សូមអាន គោលលទ្ធិ និងសេចក្ដីសញ្ញា ៦៤:៣៣ ដើម្បីស្វែងយល់ពីរបៀបដែលទ្រង់ទតឃើញកិច្ចខិតខំប្រឹងប្រែងរបស់យើង មិនថាកិច្ចការទាំងនោះតូចតាចប៉ុនណានោះទេ ។ តើខគម្ពីរនេះផ្តល់ឲ្យអ្នកនូវភាពក្លាហានដើម្បីបន្តការលះបង់តូចតាច ប្រចាំថ្ងៃដល់ព្រះអម្ចាស់ដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅក្នុងវីដេអូ « A Sacrifice of Time» ( នាទី ២:៥៣ ) ប្រធាន រ័សុល អិម ណិលសុន បានបង្រៀនថា « បុព្វការីជនរបស់យើងមិនអាចបានល្អឥតខ្ចោះដោយពុំមានយើងឡើយ ហើយយើងក៏ពុំអាចល្អឥតខ្ចោះដោយគ្មានពួកគាត់ដែរ » ។ តាមរយៈការធ្វើកិច្ចការព្រះវិហារបរិសុទ្ធ និងពង្សប្រវត្ដិ នោះយើងកាន់តែបរិសុទ្ធ ដូចព្រះយេស៊ូវគ្រីស្ទ ។ សូមមើលវីដេអូ « A Sacrifice of Time » រូមគ្នា ហើយ បន្ទាប់មកចែកចាយពីរបៀបដែលការលះបង់ពេលវេលារបស់ អ្នកដើម្បីធ្វើកិច្ចការពង្សប្រវត្ដិជាញឹកញាប់បាន ផ្ដល់ពរដល់អ្នក ។ តើអ្នករៀនអ្វីខ្លះចេញពីបទពិសោធន៍របស់អ្នកដទៃដែលបំផុសគំនិតដល់អ្នកឲ្យបន្ដ ឬចាប់ផ្ដើមលះបង់ពេលវេលារបស់អ្នកតាមរបៀបនេះ ?
-
មានរបៀបជាច្រើនដែលអ្នកអាចលះបង់អ្វីផ្សេងទៀតសម្រាប់ព្រះអម្ចាស់ និងមនុស្សដទៃដែលអ្នកពុំនឹកស្មានដល់ ។ នៅពេលអ្នករក្សាសេចក្ដីសញ្ញារបស់អ្នក បម្រើដល់មិត្ដភក្ដិ ឬសមាជិកក្រុមគ្រួសារ បង់ដង្វាយមួយភាគក្នុងដប់ ឬចែកចាយទេពកោសល្យរបស់អ្នក គឺអ្នកកំពុងលះបង់សម្រាប់ព្រះ និងសម្រាប់បុត្រាបុត្រីរបស់ទ្រង់ហើយ ។ សូមធ្វើបញ្ជីជាក់លាក់មួយពីរបៀបនានាដែលអ្នកលះបង់ជាប្រចាំដើម្បីក្លាយជាសិស្សរបស់ព្រះគ្រីស្ទ ។ បន្ទាប់មកអ្នកអាចនិយាយអំពីរបៀបដែលការចាត់ទុករឿងទាំងនេះជាការលះបង់ បានជះឥទ្ធិពលដល់ភាពជាសិស្សរបស់អ្នក និងជួយអ្នកខិតកាន់តែជិតទ្រង់ ។
ស្វែងយល់បន្ថែមទៀត
-
របាក្សត្រ ទី១ ១៦:២៩; លូកា ១៨:២២; រ៉ូម ១២:១; គោលលទ្ធិ និងសេចក្ដីសញ្ញា ១៣៨:១២–១៣
-
ជែហ្វី្រ អ័រ ហូឡិន « Called to Serve » Liahona ខែវិច្ឆិកា ឆ្នាំ២០២២ ទំព័រ ៣៦–៣៨