« ដង្វាយមួយភាគក្នុងដប់ » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
ដង្វាយមួយភាគក្នុងដប់
ការផ្តល់មួយភាគដប់នៃប្រាក់ចំណូលរបស់យើងដើម្បីជួយកសាងនគររបស់ព្រះអម្ចាស់នៅលើផែនដី
វាមិនច្រើនទេ ។ បើប្រៀបធៀបទៅនឹងទ្រព្យសម្បត្តិដែលអ្នកដទៃដាក់ចូលទៅក្នុងឃ្លាំង ពីរស្លឹងរបស់ស្ត្រីមេម៉ាយគឺគ្រាន់តែជាការរួមចំណែកតិចតួចប៉ុណ្ណោះ ។ ប៉ុន្តែតម្លៃនៃការលះបង់របស់នាងគឺអស្ចារ្យណាស់ ។ ព្រះអង្គសង្គ្រោះបានបង្រៀន « ស្រីមេម៉ាយក្រនេះ បានថ្វាយលើសជាងអ្នកទាំងអស់ ដែលដាក់ក្នុងឃ្លាំង » ( ម៉ាកុស ១២:៤៣ ) ។ ហេតុអ្វីបានជាការលះបង់របស់ស្ត្រីមេម៉ាយមានតម្លៃដូច្នេះ ? ដោយសារតែ « ស្ដ្រីនេះបានយកពីសេចក្ដីកំសត់ខ្លួនមកថ្វាយវិញ គឺជារបស់ដែលនាងមានទាំងប៉ុន្មានសម្រាប់ចិញ្ចឹមជីវិតខ្លួនផង » ( ម៉ាកុស ១២:៤៤ ) ។
សព្វថ្ងៃនេះ យើងមិនបានផ្តល់អ្វីទាំងអស់ដែលយើងមាន នៅពេលដែលយើងបង់ដង្វាយមួយភាគក្នុងដប់ដើម្បីជួយកសាងនគរព្រះនោះទេ ។ ទ្រង់សុំតែ១០ ភាគរយប៉ុណ្ណោះនៃប្រាក់ចំណូលរបស់យើង ។ ប៉ុន្តែយើងអាចរៀនបានច្រើនពីការលះបង់របស់ស្ត្រីមេម៉ាយនោះ ។ មិនថាចំនួន ១០ ភាគរយរបស់យើងមានចំនួនប៉ុន្មាននោះទេ យើងអាចធ្វើឲ្យការថ្វាយដង្វាយមួយភាគក្នុងដប់ទៅជាកិច្ចការនៃសេចក្ដីជំនឿ និងការថ្វាយនូវអ្វីដែលយើងមានសម្រាប់ព្រះអម្ចាស់ ទោះបីជាវាមិនមែនងាយស្រួលក្នុងការលះបង់ក៏ដោយ ។
តើដង្វាយមួយភាគក្នុងដប់ជាអ្វី ?
ដង្វាយមួយភាគក្នុងដប់គឺជាការថ្វាយមួយភាគដប់នៃប្រាក់ចំណូលរបស់យើងដល់ព្រះអម្ចាស់តាមរយៈសាសនាចក្រ ។ ការផ្ដល់នូវការថ្វាយនេះទៅកាន់ព្រះគឺជារបៀបមួយដែលយើងអាច « ដាក់ព្រះអម្ចាស់ទីមួយក្នុងជីវិត លើសពីការខ្វល់ខ្វាយ និងចំណាប់អារម្មណ៍របស់យើងផ្ទាល់ » ។ ដង្វាយមួយភាគក្នុងដប់ជួយស្ថាបនានគររបស់ព្រះនៅលើផែនដី ។ ដង្វាយមួយភាគក្នុងដប់ត្រូវបានប្រើសម្រាប់គោលបំណងជាច្រើន រួមទាំងការសាងសង់ និងការថែទាំព្រះវិហារបរិសុទ្ធ និងសាលាប្រជុំ ការគាំទ្រកិច្ចការផ្សព្វផ្សាយសាសនា និងការឧបត្ថម្ភដល់ស្ថាប័នអប់រំដែលគ្រប់គ្រងដោយសាសនាចក្រ ។ ព្រះអម្ចាស់បញ្ជាពួកបរិសុទ្ធថ្ងៃចុងក្រោយឲ្យរស់នៅតាមក្រឹត្យវិន័យដង្វាយមួយភាគក្នងដប់ ដោយមិនគិតពីស្ថានភាពសេដ្ឋកិច្ចបច្ចុប្បន្នរបស់ពួកគេឡើយ ។ ប្រសិនបើយើងបង្ហាញសេចក្តីជំនឿរបស់យើងចំពោះព្រះតាមរបៀបនេះ ទ្រង់សន្យាថានឹងប្រទានពរដល់យើងយ៉ាងច្រើន ( សូមមើល ម៉ាឡាគី ៣:១០ ) ។
ទិដ្ឋភាពទូទៅនៃប្រធានបទ ៖ ដង្វាយមួយភាគក្នុងដប់
មគ្គទេសក៍សិក្សាដំណឹងល្អដែលជាប់ទាក់ទង ៖ បទបញ្ញត្ដិ ការតមអាហារ សេចក្តីជំនឿលើព្រះយេស៊ូវគ្រីស្ទ ការគោរពប្រតិបត្ដិ
ផ្នែកទី ១
ដង្វាយមួយភាគក្នុងដប់គឺជាបទបញ្ញត្ដិបុរាណមួយដែលត្រូវបានស្ដារឡើងវិញនៅក្នុងសម័យរបស់យើង
រាស្ដ្ររបស់ព្រះកាលពីបុរាណបានរស់នៅតាមក្រឹត្យវិន័យនៃដង្វាយមួយភាគក្នុងដប់ ហើយច្បាប់នេះត្រូវបានស្ដារឡើងវិញតាមរយៈព្យាការី យ៉ូសែប ស្ម៊ីធ ( សូមមើល លោកុប្បត្តិ ១៤:១៨–២០; នីហ្វៃទី៣ ២៤:៨–១២; គោលលទ្ធិ និងសេចក្ដីសញ្ញា ១១៩:៣–៤ ) ។ ច្បាប់នេះតម្រូវឲ្យពួកបរិសុទ្ធផ្តល់មួយភាគដប់នៃកំណើនប្រចាំឆ្នាំរបស់ពួកគេដល់ព្រះអម្ចាស់ ដើម្បីស្ថាបនានគររបស់ព្រះនៅលើផែនដី និងដើម្បីជួយផ្គត់ផ្គង់តម្រូវការរបស់បុត្រាបុត្រីរបស់ទ្រង់ ។
ទោះបីជាការថ្វាយដង្វាយមួយភាគក្នុងដប់ជាច្បាប់ខាងសាច់ឈាមក្ដី តែវាក៏ជាច្បាប់ខាងវិញ្ញាណផងដែរ ។ ការឧទ្ទិស ឬការថ្វាយមួយផ្នែកនៃប្រាក់ចំណូលរបស់យើងដល់ព្រះអម្ចាស់ គឺជារបៀបមួយដែលយើងអាចដាក់ទ្រង់ជាអាទិភាពនៅក្នុងជីវិតរបស់យើង ។ ការដាក់អាទិភាពដល់កិច្ចការរបស់ទ្រង់លើសពីបំណងប្រាថ្នាផ្ទាល់ខ្លួនរបស់យើង ជួយយើងឲ្យក្លាយជាកាន់តែបរិសុទ្ធ និងកាន់តែជិតស្និទ្ធនឹងទ្រង់ ។
រឿងទាំងឡាយដែលត្រូវពិចារណា
-
សូមពិចារណាអាន លោកុប្បត្តិ ១៤:១៨–២០; ២៨:២០–២២ ខណៈពេលដែលពិចារណាថា ហេតុអ្វីបានជារាស្ដ្ររបស់ព្រះត្រូវបានស្នើសុំឲ្យរស់នៅតាមក្រឹត្យវិន័យនៃដង្វាយមួយភាគក្នុងដប់តាំងពីបុរាណកាលមក ។ បន្ទាប់មកសូមអានដំណើររឿងផ្ទាល់ខ្លួនមកពីសារលិខិតរបស់ប្រធាន រ័សុល អិម ណិលសុន « គិតដល់សេឡេស្ទាល ! » អំពីពេលមួយដែលលោកបានជ្រើសរើសដាក់ព្រះអម្ចាស់ជាទីមួយ ដោយការថ្វាយដង្វាយមួយភាគក្នុងដប់ពេញលេញ ទោះបីជាលោករកលុយមិនបានច្រើនក៏ដោយ ។ លោកបានបង្រៀន « ការថ្វាយដង្វាយមួយភាគក្នុងដប់តម្រូវឲ្យមានសេចក្តីជំនឿ ហើយវាក៏ ស្ថាបនា សេចក្តីជំនឿលើព្រះ និងព្រះរាជបុត្រាស្ងួនភ្ងារបស់ទ្រង់ផងដែរ » ។ តើការរស់នៅតាមក្រឹត្យវិន័យនៃដង្វាយមួយភាគក្នុងដប់តម្រូវឲ្យអ្នកមានសេចក្ដីជំនឿលើព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្តេច ? តើវាបង្កើននូវសេចក្ដីជំនឿរបស់អ្នកលើទ្រង់ទាំងទ្វេតាមរបៀបណាដែរ ?
សកម្មភាពសម្រាប់ការរៀនជាមួយគ្នា
-
សូមអាន លេវីវិន័យ ២៧:៣០–៣២ និង របាក្សត្រទី ២ ៣១:៥–៦ ដើម្បីស្វែងយល់អំពីរបៀបដែលក្រឹត្យវិន័យនៃដង្វាយមួយភាគក្នុងដប់ត្រូវបានធ្វើតាមកាលពីបុរាណ ។ ហេតុអ្វីបានជាអ្នកគិតថាដង្វាយមួយភាគក្នុងដប់គឺបរិសុទ្ធចំពោះព្រះអម្ចាស់ ? សូមអាន គោលលទ្ធិ និងសេចក្ដីសញ្ញា ៩៧:១០–១២ ដើម្បីស្វែងយល់ពីរបៀបដែលការថ្វាយដង្វាយមួយភាគក្នុងដប់បានជួយពួកបរិសុទ្ធដំបូងឲ្យសម្រេចកិច្ចការរបស់ព្រះអម្ចាស់ ។ តើពួកគេបានទទួលពរជ័យអ្វីខ្លះតាមរយៈការគោរពតាមក្រឹត្យវិន័យនេះ ? សូមនិយាយអំពីរបៀបដែលការថ្វាយដង្វាយមួយភាគក្នុងដប់អាចជួយពង្រឹងបំណងប្រាថ្នារបស់យើងផ្ទាល់ដើម្បីស្ថាបនានគររបស់ព្រះ ។
-
ពិភាក្សាអំពីរបៀបដែលការថ្វាយដង្វាយមួយភាគក្នុងដប់គឺជាច្បាប់ខាងសាច់ឈាមផង និងជាច្បាប់ខាងវិញ្ញាណផង ។ បន្ទាប់មកសូមអាន ម៉ាកុស ១២:៤១–៤៤ ជាមួយគ្នា ហើយនិយាយអំពីរបៀបដែលការថ្វាយដង្វាយមួយភាគក្នុងដប់គឺជាបញ្ហានៃសេចក្ដីជំនឿ ។ អ្នកក៏អាចមើលវីដេអូ « The Widow’s Mite » ( នាទី ១:៥៧ ) ឬ « Jesus Teaches about the Widow’s Mites » ( នាទី ១:១៤ ) ជាមួយគ្នាផងដែរ ។ តើវាមានន័យដូចម្តេចក្នុងការថ្វាយទាំងអស់នៃផ្នែកខាងវិញ្ញាណរបស់អ្នក ពេលដែលថ្វាយដង្វាយមួយភាគក្នុងដប់ដល់ព្រះអម្ចាស់ ? តើការថ្វាយដល់ទ្រង់ទាំងអស់ពង្រឹងសេចក្ដីជំនឿរបស់អ្នក និងផ្លាស់ប្ដូរអ្នកខាងវិញ្ញាណដោយរបៀបណា ?
ស្វែងយល់បន្ថែមទៀត
-
ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣៤.៣.១ នៅលើបណ្ណាល័យដំណឹងល្អ
-
ប្រធានបទប្រវត្ដិសាសនាចក្រ « Tithing » នៅលើបណ្ណាល័យដំណឹងល្អ
-
ស្ទេវិន ស៊ី ហាភើរ « The Tithing of My People » នៅក្នុង Revelations in Context ( ឆ្នាំ២០១៦ ) ទំព័រ ២៥០–២៥៥
ផ្នែកទី ២
ព្រះអម្ចាស់សន្យាប្រទានពរជ័យដល់អស់អ្នកដែលគោរពតាមក្រឹត្យវិន័យនៃដង្វាយមួយភាគក្នុងដប់
យើងទទួលពរជ័យជាច្រើនពីព្រះអម្ចាស់នៅពេលយើងរស់នៅតាមក្រឹត្យវិន័យនៃដង្វាយមួយភាគក្នុងដប់ ។ អែលឌើរ នែល អិល អាន់ឌើរសិន បានមានប្រសាសន៍ ៖ « ទ្វារនៃស្ថានសួគ៌បើកឡើងតាមរបៀបជាច្រើន ។ ខ្លះជាខាងសាច់ឈាម ប៉ុន្តែភាគច្រើនជាខាងវិញ្ញាណ ។ ខ្លះមានលក្ខណៈតូចតាច និងងាយមើលរំលង ។ សូមទុកចិត្តលើពេលវេលារបស់ព្រះអម្ចាស់ ពរជ័យជាច្រើនតែងមកដល់ » ។ ពេលយើងសង្កេត និងទទួលស្គាល់ទាំងពរជ័យដែលឃើញច្បាស់ និងពរជ័យដែលមិននឹកស្មានដល់ពីការថ្វាយដង្វាយមួយភាគក្នុងដប់ នោះយើងអាចមានអារម្មណ៍ដឹងគុណ និងសេចក្តីស្រឡាញ់នៅក្នុងដួងចិត្ដរបស់យើង ហើយខិតកាន់តែជិតព្រះយេស៊ូវគ្រីស្ទ ។
រឿងទាំងឡាយដែលត្រូវពិចារណា
-
នៅក្នុង ម៉ាឡាគី ៣:៨–១២ យើងត្រូវបានសន្យាថាមានពរជ័យដ៏អស្ចារ្យសម្រាប់ការគោរពប្រតិបត្ដិតាមក្រឹត្យវិន័យនៃដង្វាយមួយភាគក្នុងដប់ ។ តើអ្នកអាចយល់ដឹងកាន់តែច្បាស់អំពីពរជ័យទាំងនេះនៅក្នុងជីវិតរបស់អ្នកនៅសព្វថ្ងៃនេះដោយរបៀបណា ? សូមពិនិត្យមើលសារលិខិតរបស់អែលឌើរ ដេវីឌ អេ បែដណា « បង្អួចនៃស្ថានសួគ៌ » ហើយបន្ទាប់មកពិចារណាអំពីរបៀបសាមញ្ញមួយចំនួនដែលអ្នកធ្លាប់ ឬអាចទទួលបានពរជ័យដោយការថ្វាយដង្វាយមួយភាគក្នុងដប់ ។ ប្រហែលជាអ្នកអាចសរសេរបញ្ជីនៃពរជ័យដែលព្រះអម្ចាស់បានប្រទានដល់អ្នក ហើយពិចារណាថាតើពរជ័យណាដែលជាលទ្ធផលបានមកពីការគោរពប្រតិបត្ដិតាមក្រឹត្យវិន័យនៃការថ្វាយដង្វាយមួយភាគក្នុងដប់ ។ តើចំណេះដឹងដែលថាអ្នកត្រូវបានប្រទានពរសម្រាប់ការរស់នៅតាមក្រឹត្យវិន័យនៃការថ្វាយដង្វាយមួយភាគក្នុងដប់ ធ្វើឲ្យបំណងប្រាថ្នារបស់អ្នកក្នុងការថ្វាយដង្វាយមួយភាគក្នុងដប់ពេញលេញ និងការមករកព្រះគ្រីស្ទកាន់តែស៊ីជម្រៅដោយរបៀបណា ?
-
នៅពេលដែលយើងអនុវត្តសេចក្តីជំនឿ និងថ្វាយដង្វាយមួយភាគក្នុងដប់ យើងអាចរំពឹងថានឹងមានពរជ័យមកពីព្រះអម្ចាស់ ។ នៅក្នុងសុន្ទរកថារបស់លោក « Like a Watered Garden » ប្រធាន ជែហ្វ្រី អ័រ ហូឡិន បានពន្យល់ពីរបៀបដែលម៉ារី ហ្វីលឌីង ស្ម៊ីធ បានបន្ដការបង់ដង្វាយមួយភាគក្នុងដប់ពេញលេញ បន្ទាប់ពីស្វាមីរបស់គាត់ ហៃរ៉ុម ស្ម៊ីធ ត្រូវបានគេសម្លាប់ ។ សូមពិចារណាអានដំណើររឿងនេះនៅក្នុងសារលិខិតរបស់ប្រធាន ហូឡិន ។ តើអ្នករៀនអ្វីខ្លះមកពីគំរូរបស់ ម៉ារី ? តើអ្នកអាចទទួលបានពរជ័យអ្វីខ្លះនៅពេលដែលអ្នកចាប់ផ្តើម ឬបន្តរស់នៅតាមក្រឹត្យវិន័យនៃការបង់ដង្វាយមួយភាគក្នុងដប់ ?
សកម្មភាពសម្រាប់ការរៀនសូត្រជាមួយអ្នកដទៃ
-
ព្រះអម្ចាស់បានសន្យានឹងយើងថា ពេលដែលយើងរស់នៅតាមក្រឹត្យវិន័យនៃការថ្វាយដង្វាយមួយភាគក្នុងដប់ ទ្រង់នឹង « បើក …ទ្វារស្ថានសួគ៌ » និង « ចាក់ …ព្រះពរ » មកលើយើង ( ម៉ាឡាគី ៣:១០ ) ។ តើវាមានន័យដូចម្តេចដែលថា បង្អួចនៃស្ថានសួគ៌នឹងបើកនៅពេលយើងគោរពប្រតិបត្ដិតាមក្រឹត្យវិន័យនេះ ? សូមអានប្រសាសន៍ទាំងនេះមកពីអែលឌើរ បែដណា ជាមួយគ្នា ៖ « បង្អួចអនុញ្ញាតឲ្យពន្លឺពីធម្មជាតិជះចូលទៅក្នុងអគារ ។ តាមរបៀបដូចគ្នានេះដែរ ការបំផុសគំនិត និងទស្សនវិស័យខាងវិញ្ញាណ គឺចាក់ស្រោចតាមបង្អួចនៃស្ថានសួគ៌ចូលមកក្នុងជីវិតរបស់យើង កាលណាយើងគោរពក្រឹត្យវិន័យនៃដង្វាយមួយភាគក្នុងដប់ » ។ ប្រហែលជាអ្នកអាចបិទពន្លឺដែលចូលទៅក្នុងបន្ទប់ពីតាមបង្អួច ឬតាមចន្លោះផ្សេងៗទៀតពីមុនអនុញ្ញាតឲ្យពន្លឺចូលមកម្ដងទៀត ។ ពិភាក្សាអំពីភាពខុសគ្នាដែលកើតមានឡើងដោយសារពន្លឺ និងរបៀបដែលការថ្វាយដង្វាយមួយភាគក្នុងដប់អាចនាំយកពន្លឺ ឬការបំភ្លឺខាងវិញ្ញាណមកដល់អ្នក ។ អ្នកក៏អាចចែកចាយជាមួយគ្នានូវរបៀបដែលអ្នកបានដកពិសោធន៍ការបំភ្លឺខាងវិញ្ញាណនៅក្នុងជីវិតរបស់អ្នក កាលអ្នកបានគោរពប្រតិបត្ដិតាមក្រឹត្យវិន័យនៃការថ្វាយដង្វាយមួយភាគក្នុងដប់ ។
ស្វែងយល់បន្ថែមទៀត
-
រ៉ូបឺត ឌី ហែល « Tithing: A Test of Faith with Eternal Blessings » Liahona ខែវិច្ឆិកា ឆ្នាំ២០០២ ទំព័រ ២៦–២៩
-
ស្សែលឌិន អេហ្វ ឆាល « The Best Investment » Liahona ខែឧសភា ឆ្នាំ២០០៨ ទំព័រ ៧៩–៨១
-
យូស៊ីហ៊ីហ្គូ ហ្គីហ្គុឈី « Will a Man Rob God? » Liahona ខែឧសភា ឆ្នាំ២០០៧ ទំព័រ ៩៧–៩៨
-
វ៉ាលើរី វី ខរដុន « The Language of the Gospel » Liahona ខែឧសភា ឆ្នាំ២០១៧ ទំព័រ ៥៥–៥៧
ផ្នែកទី ៣
មូលនិធិដង្វាយមួយភាគក្នុងដប់ជាកម្មសិទ្ធិរបស់ព្រះអម្ចាស់ ហើយនឹងត្រូវបែងចែកដោយអ្នកបម្រើទាំងឡាយរបស់ទ្រង់
ដង្វាយមួយភាគក្នុងដប់ គឺប្រើប្រាស់ដើម្បីប្រទានពរជ័យដល់បុត្រាបុត្រីរបស់ព្រះខាងសាច់ឈាម និងខាងវិញ្ញាណផងដែរ ពេលដែលដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទបានចែកចាយទៅទូទាំងពិភពលោក ។ ការណ៍នេះត្រូវបានធ្វើឡើងនៅពេលដែលសមាជិកបរិច្ចាគដង្វាយមួយភាគក្នុងដប់ដល់សាសនាចក្រ។ ក្រុមប្រឹក្សាមួយដែលមានគណៈប្រធានទីមួយ កូរ៉ុមនៃពួកសាវកដប់ពីរនាក់ និងគណៈប៊ីស្សពជាអធិបតីកំណត់ពីរបៀបដែលល្អបំផុតដើម្បីបែងចែកមូលនិធិដ៏ពិសិដ្ឋទាំងនេះ ( សូមមើល គោលលទ្ធិ និងសេចក្តីសញ្ញា ១២០:១ ) ។
អែលឌើរ នែល អិល អាន់ឌើរសិន បានបង្រៀន ៖ « មូលនិធិពិសិដ្ឋទាំងនេះពុំមែនជាកម្មសិទ្ធិរបស់ថ្នាក់ដឹកនាំសាសនាចក្រទេ ។ វាគឺជាកម្មសិទ្ធិរបស់ព្រះអម្ចាស់ ។ ពួកអ្នកបម្រើទ្រង់ដឹងយ៉ាងច្បាស់ពីលក្ខណៈដ៏ពិសិដ្ឋនៃការទទួលខុសត្រូវរបស់ពួកគេ » ។ ថ្នាក់ដឹកនាំសាសនាចក្រស្វែងរកឆន្ទៈរបស់ព្រះអម្ចាស់ និងធ្វើការសម្រេចចិត្តទាក់ទងនឹងដង្វាយមួយភាគក្នុងដប់ ស្របតាមការណែនាំដែលពួកលោកទទួលពីព្រះអម្ចាស់ ។
រឿងទាំងឡាយដែលត្រូវពិចារណា
-
អ្នកបម្រើដែលបានជ្រើសរើសរបស់ព្រះអម្ចាស់ គឺជាអ្នកគ្រប់គ្រងលើការបរិច្ចាគដង្វាយមួយភាគក្នុងដប់ ។ ប៊ីស្សព ហ្គែរ៉ល កូសសេ បានពន្យល់ « នៅក្នុងវាក្យសព្ទនៃដំណឹងល្អ ពាក្យ ការកាន់កាប់ត្រួតត្រា បានកំណត់នូវការទទួលខុសត្រូវខាងវិញ្ញាណ ឬខាងសាច់ឈាមដ៏ពិសិដ្ឋ ដើម្បីថែរក្សាអ្វីមួយដែលជាកម្មសិទ្ធិរបស់ព្រះ ដែលយើងមានទំនួលខុសត្រូវ » ។ តើការកាន់កាប់ត្រួតត្រាលើដង្វាយមួយភាគក្នុងដប់ គឺជាការទទួលខុសត្រូវទាំងខាងសាច់ឈាម និងខាងវិញ្ញាណសម្រាប់អ្នកបម្រើរបស់ព្រះអម្ចាស់ដោយរបៀបណា ? សូមអាន គោលលទ្ធិ និងសេចក្តីសញ្ញា ១០៤:១១–១៧ ។ តើអ្នករៀនអ្វីខ្លះចេញពីខគម្ពីរទាំងនេះ អំពីបំណងប្រាថ្នារបស់ព្រះអម្ចាស់ដើម្បី « ប្រទានពរសម្រាប់ពួកបរិសុទ្ធ [ របស់ទ្រង់ ] » តាមរយៈការកាន់កាប់ត្រួតត្រា ?
សកម្មភាពសម្រាប់ការរៀនសូត្រជាមួយអ្នកដទៃ
-
ពរជ័យជាច្រើនដែលយើងរីករាយនៅក្នុងសាសនាចក្រគឺដោយសារតែការបរិច្ចាគដង្វាយមួយភាគក្នុងដប់ដែលត្រូវបានប្រើដើម្បីកសាងនគររបស់ព្រះនៅជុំវិញពិភពលោក ។ ប្រធាន ជែហ្វ្រី អ័រ ហូឡិន បានបង្រៀនថា « ព្រះវិហារបរិសុទ្ធ សាលប្រជុំ ថ្នាក់សិក្ខាសាលា និងសង្គម » គឺអាចកើតមានឡើងបានដោយសារតែដង្វាយមួយភាគក្នុងដប់ដែលសមាជិកបានចូលរួមចំណែក ហើយថា « ពរជ័យ » ទាំងនេះមិនអាចកើតឡើងតាមរបៀបណាផ្សេងទៀតឡើយ ។ សូមនិយាយជាមួយគ្នាអំពីពរជ័យដែលអាចកើតមានដោយសារតែដង្វាយមួយភាគក្នុងដប់ ។ តើពរជ័យទាំងនេះអាចជួយផ្ដល់ដល់យើងនូវទស្សនវិស័យដ៏អស់កល្ប និងនាំយើងឲ្យខិតកាន់តែជិតព្រះដោយរបៀបណា ? តើពរជ័យទាំងនេះអាចធ្វើឲ្យការតាំងចិត្ដរបស់យើងដើម្បីថ្វាយដង្វាយមួយភាគក្នុងដប់ពេញលេញ និងដោយស្មោះត្រង់កាន់តែខ្លាំងដោយរបៀបណា ?
ស្វែងយល់បន្ថែមទៀត
-
« Tithing and Charitable Donations » newsroom.ChurchofJesusChrist.org
-
« How the Church of Jesus Christ Uses Tithes and Donations » ថ្ងៃទី២០ ខែធ្នូ ឆ្នាំ២០១៩ newsroom.ChurchofJesusChrist.org