Librarya
Pagdapit sa Tanan nga Modawat sa Ebanghelyo

“Pagdapit sa Tanan nga Modawat sa Ebanghelyo,” Mga Hilisgotan ug mga Pangutana (2023)

mga batan-ong lalaki nga naglakaw ug nag-istorya

Giya sa Pagtuon sa Ebanghelyo

Pagdapit sa Tanan nga Modawat sa Ebanghelyo

Sa unsa nga paagi kita mahigugmaong modapit sa mga anak sa Dios nga modawat sa Iyang mga panalangin

Hunahunaa nga naglakaw kamo sa usa ka dalan kuyog sa usa ka higala. Ngitngit ang agianan, apan kamo adunay ispat aron modan-ag sa dalan. Mahimo ninyong gamiton ang ispat aron mas sayon ninyong makita unsay anaa sa unahan. Apan tungod kay gusto man ninyo nga ang panaw sa inyong higala mas mahimong sayon, inyong gipakigbahin usab ang inyong kahayag ngadto kanila.

Kita nagdapit sa tanan nga modawat sa ebanghelyo ni Jesukristo sa sama nga rason: ang ebanghelyo makadan-ag sa atong panaw sa kinabuhi. Motubag kini sa mga pangutana sa kinabuhi ug maghatag nato og panglantaw, kalinaw, ug kalipay. Mao nga ipakigbahin nato kini ngadto sa mga anak sa Dios tungod kay kita nahigugma nila ug gusto nga ang tanan makapahimulos sa Iyang kahayag (tan-awa sa 3 Nephi 18:24).

Unsa ang Ipasabot sa Pagdapit sa Tanan nga Modawat sa Ebanghelyo ni Jesukristo?

Isip mga Santos sa Ulahing mga Adlaw, maningkamot kita sa pagdapit sa tanan nga modawat sa ebanghelyo ni Jesukristo tungod kay mao kini ang “[ebanghelyo sa kalinaw], ug ang maayong balita” (Mga Taga-Roma 10:15). Atong dapiton ang uban sa pagdawat sa ebanghelyo “pinaagi sa pulong ug pinaagi sa panig-ingnan.” Ingon niini tan-awon ang pagpakigbahin sa ebanghelyo sa matag adlaw nga kinabuhi, pagserbisyo isip mga misyonaryo, ug “pagtabang sa bag-o ug mibalik nga mga miyembro sa Simbahan nga mouswag subay sa dalan sa pakigsaad.” Kon kita motabang sa uban nga “makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan,” kita makasinati og tinuod nga kalipay.

Kinatibuk-ang pagpasabot sa hilisgotan: Missionary Work [Misyonaryo nga Buhat]

May kalabotan nga mga giya sa pagkat-on sa ebanghelyo: Church of Jesus Christ [Simbahan ni Jesukristo], Conversion [Pagkakabig], Everlasting Covenant [Mahangtorong Pakigsaad], Gathering of Israel [Pagpundok sa Israel]

Seksiyon 1

Kita Nagtabang sa Dios nga Matuman ang Iyang Buhat Kon Kita Nagdapit sa Tanan nga Modawat sa Ebanghelyo ni Jesukristo

mga babaye nga nag-istoryahanay diha sa simbahan

Gusto sa Dios nga ang Iyang tanang anak makadungog sa ebanghelyo ni Jesukristo aron ang tanan makadawat sa mga panalangin niini. Usa ka paagi sa Dios sa pagdala sa Iyang ebanghelyo ngadto sa uban mao ang pagtawag nato sa “pagpahayag sa iyang pulong taliwala sa iyang katawhan” (3 Nephi 5:13). Mobati kita og kalipay samtang atong ipakigbahin ang Iyang pulong, naghatag og oportunidad sa uban sa pagduol ngadto kang Jesukristo ug mobati sa Iyang kahupayan, paglaom, ug kalinaw.

Mga butang nga angayang hunahunaon

  • Matag kalag bililhon ngadto sa Dios. Gusto Niya nga kitang tanan makabalik ngadto Kaniya. Basaha ang Doktrina ug mga Pakigsaad 18:10–16, ug hunahunaa ang bili sa mga anak sa Dios. Nganong gusto man sa Ginoo nga inyong ipakigbahin ang ebanghelyo ngadto sa uban? Paghunahuna og usa ka tawo nga mipakigbahin sa ebanghelyo nganha kaninyo o mitabang ninyo sa pagduol ngadto kang Kristo. Unsa kaha ang kalainan sa inyong kinabuhi kon kana nga tawo wala mopakigbahin sa kahayag sa Manluluwas nganha kaninyo? Irekord ang inyong mga hunahuna ug dayon isulat kon sa unsang paagi nga kamo makapakigbahin sa Iyang pulong ngadto sa uban.

  • Nagmalamposon kita sa pagpakigbahin sa ebanghelyo kon kita modapit sa uban sa pagkat-on mahitungod niini o sa pag-adto lang ug sa pagsusi kon bahin sa unsa kini. Mahimo nilang dawaton ang atong pagdapit—o mahimong dili. Basaha ang seksiyon nga gitawag og “Ipaambit ang Inyong Istorya” sa mensahe ni Elder Dieter F. Uchtdorf “Ang Inyong Mahinungdanong Pagpanimpalad.” Hunahunaa kon kinsa ang inyong mahimong dapiton sa pagkat-on sa ebanghelyo o kinsa ang mahimo ninyong dapiton pag-usab. Sa unsang paagi nga inyong mapakita ang inyong gugma ug pagtahod alang niana nga tawo samtang kamo modapit kanila? Sa unsang paagi nga kini makatabang nila nga mobati sa gugma sa Manluluwas alang nila?

Mga kalihokan alang sa pagkat-on kauban ang laing mga tawo

  • Kon mopakigbahin kita sa ebanghelyo ni Jesukristo, importante nga mokonektar sa uban sa paagi nga ilang ganahan o gikinahanglan. Basaha og dungan ang pipila ka ideya kon unsaon sa paghimo niini diha sa “Pangita og mga Tawo kon Hain Sila” sa kapitulo 9 sa Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo. Hisgoti ang mahitungod sa mga pangutana ug mga ideya niini nga seksiyon ug mag-brainstorm sa uban. Dayon idrama-drama ang panagsultihanay diin nagdapit kamo og usa ka tawo sa pagkat-on sa ebanghelyo. Human niana, gamita kini nga mga baroganan sa inyong kaugalingong kinabuhi samtang magdapit kamo sa uban sa pagduol ngadto kang Kristo.

  • Basaha og dungan ang Doktrina ug mga Pakigsaad 4, ug hisgoti kon kinsa ang gitawag sa pagpakigbahin sa ebanghelyo ni Jesukristo (tan-awa sa bersikulo 3). Dayon hisgoti ang Kristohanon nga mga kinaiya nga gilista diha sa mga bersikulo 5–6 ug kon sa unsang paagi nga sila makatabang nato sa pagpakigbahin sa Iyang pulong. Mahimo kamo nga magdula aron matabangan kamo nga mahinumdoman kini nga mga kinaiya. Sugdi pinaagi sa pag-itsa sa bola ngadto sa usa ka tawo diha sa inyong grupo. Kon kana nga tawo mosalo sa bola, pasultiha sila og usa sa mga kinaiya nga inyong gihisgotan. Ipadayon ang dula hangtod nga masulti ang tanang kinaiya. Makabalik-balik kamo sa pagdula ug tan-awon kon mas mopaspas ba kamo. Pagpili og usa ka kinaiya nga buhaton, ug obserbahi sa paglabay sa panahon kon sa unsang paagi nga kini makatabang ninyo sa pagdapit sa uban nga modawat sa ebanghelyo ni Jesukristo.

Pagkat-on pa og dugang

Seksiyon 2

Makatabang Kita sa Uban nga Modawat sa Ebanghelyo ni Jesukristo kon Kita Mohigugma, Mopakigbahin, ug Modapit

babaye nga nakigsulti sa laing babaye sa gawas sa bilding

Isip mga miyembro sa Simbahan, gusto nato nga ang tanan makadawat sa ebanghelyo ni Jesukristo “tungod kay gihigugma nato ang Dios ug ang Iyang mga anak” ug gusto nato nga bation sa uban ang sama nga kalipay nga atong gibati. Ang pagdala sa ebanghelyo ngadto sa uban sayon ra—nagkinahanglan lang kita nga mohigugma, mopakigbahin, ug modapit. Usahay nagbuhat kita niini pinaagi sa misyonaryo nga pagserbisyo diha sa Simbahan. Kasagaran, kita naghigugma, nagpakigbahin, ug nagdapit pinaagi sa pagsunod mga baroganan sa ebanghelyo ug sa paghisgot sa atong tinuohan sa normal ug natural nga mga paagi. Sa atong pagpakigbahin ngadto sa mga tawo sa tanang dapit, kita nagtabang sa pag-andam sa mga anak sa Dios alang sa kinabuhing dayon.

Mga butang nga angayang hunahunaon

  • Usahay tingali gusto kita nga mopakigbahin sa ebanghelyo ni Jesukristo apan dili kita segurado kon asa magsugod. Rebyoha ang mensahe ni Elder Gary E. Stevenson “Paghigugma, Pagpaambit, Pagdapit” alang sa inspirasyon kon unsaon sa pagpakigbahin sa ebanghelyo sa normal ug natural nga mga paagi. Dayon basaha ang Mateo 7:7 ug 3 Nephi 18:20 ug pamalandongi kon unsaon nimo sa pagpangayo og tabang sa Ginoo sa pagpakigbahin sa Iyang ebanghelyo ngadto sa uban, lakip na sa inyong mga higala, mga silingan, ug mga minahal. Pag-ampo alang sa Iyang giya, ug dayon pangita og pangmisyonaryo nga mga oportunidad. Irekord kon sa unsang paagi nga inyong nakita ang tabang sa Ginoo samtang mahigugmaon kamo nga nagdapit sa uban sa pagkat-on sa Iyang ebanghelyo.

  • Diha sa Ang Simbahan ni Jesukristo sa mga Santos sa Ulahing mga Adlaw, kita adunay oportunidad sa pagserbisyo isip mga misyonaryo. Basaha ang “Pagsangyaw sa Ebanghelyo sa Kalinaw” ni Presidente Russell M. Nelson ug “Unsa kaha Kadako ang Imong Hingpit nga Kalipay” ni Elder Ronald A. Rasband. Ngano nga ang Ginoo nagkinahanglan og mga misyonaryo sa tanang edad sa pagdala sa Iyang ebanghelyo ngadto sa uban? Sa unsang paagi nga Siya mopanalangin nila alang sa ilang mga paningkamot? Hunahunaa kon sa unsang paagi nga inyong nakita ang mga misyonaryo nga nagsunod sa mga baroganan sa paghigugma, pagpakigbahin, ug pagdapit sa uban sa pagduol ngadto kang Kristo. Unsa ang inyong mabuhat aron mosunod sa ilang ehemplo? Mahimo usab ninyong pamalandongan kon mahimo ba kamo nga magserbiyo og misyon ug magsugod sa pagpangandam alang niana nga oportunidad.

Mga kalihokan alang sa pagkat-on kauban ang laing mga tawo

Pagkat-on pa og dugang