Te Oranga Tonutanga

Ko tā Ihu i whakaako nei, he maha ngā wāhi kua whakaritea e tō tātou Matua i te Rangi hei wāhi noho mō tātou. Ka whakatauhia tātou katoa ki tētahi o ngā wāhi e whā, e ai ki tā tātou ū ki a Ihu Karaiti. Ka haere tātou ki te kīngitanga kua whakaritea e tātou nā ā tātou kōwhiringa i kōwhiria ai e tātou. Ko ngā wāhi e whā ēnei ko te kīngitanga o tikitiki o rangi, ko te kīngitanga rangitūhāhā, ko te kīngitanga ranginui, me te pōuritanga kei tua.

Kua whakapuarehia e tō tātou Matua i te Rangi tētahi huarahi ki a tātou katoa kia whiwhi ai i te oranga tonutanga me Ia. Ko te oranga tonutanga te āhua o te oranga o tō tātou Matua i te Rangi rāua ko Ihu. He koha kore tō tātou Matua i te Rangi. E mōhio ana Ia i ngā mea katoa. He mana Tōna i runga i ngā mea katoa. E whakahaere ana Ia i runga i ngā mea katoa. E ora ana Ia e ai ki ngā pono me ngā ture mutunga kore.

I whakarongo a Ihu ki tō tātou Matua i te Rangi, nā reira, e noho tahi ana Ia me tō tātou Matua i te Rangi. Mēnā ka mahi tātou i ngā mea i whakaako mai a Ihu hei mahi, ka taea e tātou te noho pērā i a rāua ko tō tātou Matua i te Rangi. Ko te oranga tonutanga i te taha o tō tātou Matua i te Rangi te taonga tino nui rawa atu e taea ana e Ia te tuku mai ki a tātou. Mā konā tātou whiwhi ai i te harikoa nui rawa.

E kōrero mai ana te rongopai he aha ngā mea me mōhio tātou, he aha hoki ngā mea me mahi tātou kia whiwhi ai i te oranga tonutanga. E āwhina ana te rongopai i a tātou kia pai ake tā tātou mōhio ki tō tātou Matua i te Rangi rāua ko Ihu. E whakaakona ana tātou me pēhea ō tātou oranga e rite ai ki tō Rāua. Mā te inoi me te pānui i ngā karaipiture tātou e mōhio ake ai tātou ki a Rāua. Ina mōhio, ina aroha tātou ki a Rāua, ka hiahia tātou ki te whakarongo ki ā Rāua kupu. I a tātou e ngohengohe ana, ka āhei tātou kia pērā ki a Rāua, ā, ka tika anō tātou kia noho tahi ai me Rāua mō āke tonu atu.

E mōhio ana tō tātou Matua i te Rangi e taea ana e tātou te whai i te rongopai me te whiwhi i te oranga tonutanga. Nā te mea ko Āna tamariki tātou, kei a tātou te mana kia rite ki a Ia. E mōhio ana Ia i ō tātou ngoikoretanga, ā, he aha hoki ngā mea e whakawai i a tātou. Kua tukuna tātou e Ia kia haere mai ai ki tēnei ao i tētahi wā, ki tētahi wāhi e puta mai ai ki a tātou ētahi huarahi ki te mahi i ngā mahi pai me te ako.

Koinei te wā kia mahi tātou i ngā mea katoa ki te whiwhi i te oranga tonutanga. E aroha ana tō tātou Matua i te Rangi i a tātou, e hiahia ana Ia kia whai oranga tātou. Kua mahia e Ia ngā mea katoa e taea ana e Ia. Kua homai e Ia tēnei ao e āhei ai i a tātou ki te ako me te tupu. Kua tukuna mai Tana Tama, a Ihu Karaiti, hei Kaiwhakaora mō tātou, ā, hei whakaako ki a tātou te rongopai. Kua tono Ia ki a tātou kia inoi ki a Ia. Kua whakaritea e Ia te Wairua Tapu hei kaiārahi mō tātou. Ināianei me mahi tātou i ngā mea e tika ana. Mēnā ka whiriwhiri tātou kia whakapono ki a Ihu Karaiti me te whakarongo ki a Ia, Māna tātou e āwhina, e whakakaha kia turakina e tātou ō tātou whakawai me ngā raruraru e tūpono mai ki a tātou.

Kua tonoa tātou e tō tātou Matua i te Rangi kia whakaae ai ki te rongopai. Me whakapono tuatahi tātou i a Ihu Karaiti kia pēnei ai. Kātahi ka rīpenetā i ō tātou hara kia rumakina, kia whakaūngia tātou hei mema o Te Hāhi o Ihu Karaiti o te Hunga Tapu o ngā Rā o Muri Nei. Ina whakaūngia tātou, ka whakawhiwhia ki te takoha o te Wairua Tapu mai i tētahi kei a Ia te tohungatanga. Ka kōrero mai te Wairua Tapu ki a tātou he aha tā Ihu hiahia hei mahi mā tātou, ā, me whakapau te toenga o ō tātou rā i runga i te whakarongo me te mahi Mōna kia whiwhi ai i te oranga tonutanga.

Ko tā Ihu whakatau, me ngohengohe tātou katoa ki ngā whakahaunga kia whakarite ai i a tātou kia noho tahi ai me tō tātou Matua i te Rangi. Ko te ū ki te ture o te tapu o te tinana tētahi, tuku i te whakatekau me ngā tāpaenga nohopuku, te ū ki te Kupu Whai Mātauranga, te mahi pono i ngā wā katoa, me te aro ki te tapu o te Hāpati.

Me whakawhiwhi anō tātou i ngā tikanga tapu e meatia ana i te temepara kia meinga kia rite tātou ki tō tātou Matua i te Rangi, e mōhiotia ana ko te hoatutanga tapu.* Me hīri tātou i reira kia noho tahi ai hei whānau kotahi mō āke tonu atu. Me kimi anō e tātou ngā ingoa me ngā mōhiohio e pā ana ki ō tātou whanaunga kua mate me te tuku atu ki te Hāhi, kia taea te mahi i ngā tikanga tapu mō rātou i te temepara.

Kua whakahaungia tātou e Ihu kia mahi i ngā mea maha. Ko ētahi o ēnei mea ko te kōrero atu ki ētahi atu mō te rongopai, e arohaina ana rātou, ā, e āwhinatia ana rātou, me te whakatauira i te āhuatanga tika ki a rātou.

Me pupuri katoa tātou ki ngā kawenata e meatia ai e tātou ki tō tātou Matua i te Rangi, me haere putuputu atu ki ngā huinga Hāhi, whakaakona ō tātou whānau te rongopai mā te rangahau i ngā karaipiture ia rā, ia rā, me te inoi takitahi, ā, taki whānau hoki ia rā, ia rā.

Ki te whakapono tātou i a Ihu Karaiti me te ngana ki te ngohengohe ki Āna whakahaunga, ka whiwhi tātou i te oranga tonutanga, ā, ka meinga kia rite tātou ki tō tātou Matua i te Rangi.

He rite tā tātou meinga haeretanga kia rite ki tō tātou Matua i te Rangi ki te piki i tētahi arawhata. Me tīmata tātou i raro iho kātahi ka piki i ia tepe kia tae atu ki runga. I kī mai te Poropiti Hōhepa Mete ki te hiahia tātou kia meinga kia rite tātou ki tō tātou Matua i te Rangi me ako tātou e pēhea ana Ōna kare ā-roto, whakaaro, me Āna mahinga. Ina mārama tātou ki ēnei mea e pā ana ki a Ia, kātahi ka taea te ako i ērā atu mea Mōna, tae atu ki te wā e mōhio ana me pēhea e meinga ai kia rite ki a Ia.

Ka āwhinatia tātou mēnā ka mahara he tangata tō tātou Matua i te Rangi i tōna wā i noho ai i tētahi ao, e rite ana ki a tātou. Nā Tana wikitōria i runga i ngā raruraru i meinga ai tō tātou Matua i te Rangi, e pērā ana i a tātou i tēnei ao. Heoi, i kī mai te Poropiti Hōhepa Mete e kore tātou e ako i ngā mea katoa i a tātou i tēnei ao. Ka roa ake i te otinga o ō tātou oranga ki te ako i ngā mea katoa me mōhio kia meinga kia rite ki tō tātou Matua i te Rangi.

Hei āhea tātou ako ai ki te pupuri i ngā whakahaunga a tō tātou Matua i te Rangi, me whakaaro e tātou ka pēhea tō tātou hari ina hoki atu ki a Ia kātahi ka kī mai Ia kei te harikoa Ia nā te oranga i meatia ai e tātou me Tana whakatau ka meinga tātou kia rite ki a Ia, ā, ka noho tahi me Ia mō āke tonu atu.