Te Oranga o Ihu Karaiti

I whakaae a Ihu hei Kaiwhakaora mō tātou. I kōrero Ia, ka haramai Ia ki te ao, kia whakaatu mai ki a tātou me pēhea e hoki atu ki tō tātou Matua i te Rangi. He tokomaha ngā tāngata i whānau mai i mua i te whānautanga mai o Ihu, ā, i whakapono rātou ka haramai Ia hei Kaiwhakaora mō rātou. I hihiri ai rātou i Tana haeretanga mai. I mōhio rātou, ka taea e Ia te whakaora i a rātou i te whiunga āke ake tonu atu mō ō rātou hara.

I whakamōhiotia ngā tāngata e ngā poropiti katoa i ora ai i mua i te whānautanga mai o Ihu, ka haramai Ia. I tuku tō tātou Matua i te Rangi i tētahi anahera kia kōrero atu ki a Ārama, ka haramai a Ihu ki te ao.

I ngā tau maha i mua i te whānautanga mai o Ihu, i kite ā-whakakitenga nei tētahi poropiti e kīa nei ko Ihāia, ka whakamamaetia a Ihu hei utu mō ō rātou hara. I kōrero a Ihāia ka kino atu, ā, ka whakaparahakotia a Ihu e ngā tāngata, ā, ka rongo a Ihu i te pōuri nui.

I kite a Nīwhai, he poropiti ka mōhiotia ai ki Te Pukapuka a Moromona, i ngā mea ka mahia ai e Ihu. I kite a Nīwhai i ēnei mea i ngā tau maha i mua i te whānautanga mai o Ihu. I kite Ia i a Ihu ā-pēpē i ngā ringa o Tōna māmā. I kōrero atu tētahi anahera ki a Nīwhai, ko taua pēpē rā te Tama o tō tātou Matua i te Rangi.

Ka pānui tātou e pā ana ki tētahi poropiti e kīa nei ko Peneāmine tōna īngoa, ki Te Pukapuka a Moromona. I kōrero Ia ki ngā tāngata, hei ākuanei haere mai ai a Ihu ki te ao. I kī atu a Peneāmine ki a rātou, ka whakaora a Ihu i ngā tūroro, ka whakahīkoi i ngā waehauā, ka whakatikahia te kitenga o te matapō, ā, Māna anō e whakarongo ai hoki te turi. Ka peia atu hoki e Ia ngā wairua kino, ā, ka whakaorangia anōtia te hunga mate. I kī a Peneāmine, ka whakaako a Ihu i ngā tāngata kia arohatia tō tātou Matua i te Rangi, ā, kia aroha tētahi ki tētahi.

Kua whakamōhio mai ngā poropiti katoa i ora i muri i te whānautanga mai o Ihu, i haramai tonu Ia. Mei kore ake a Ihu Karaiti, kua rahua te mahere o tō tātou Matua i te Rangi.

I whānau mai a Ihu i tētahi tāone iti e kīa nei ko Peterehema. I waiata ngā anahera i Tōna whānautanga mai, nā tō rātou tino harikoa. I puta mai tētahi whetū hou i te rangi. I haere ētahi hēpera me ētahi ruānuku, ki te kite me te koropiko ki a Ia. He tokomaha ngā tāngata puta noa i te ao, ka whakanui tonu i Tōna whānautanga mai.

He rerekē a Ihu i ērā atu o ngā tamariki i whānau mai. Ko tō tātou Matua i te Rangi te matua o Ihu. Ehara anake tō tātou Matua i te Rangi i te matua o te wairua o Ihu, heoi, ko Ia hoki te matua o tōna tinana kikōiwi I whiwhi kaha a Ihu i Tōna matua, kāore nei i whiwhia ai e ētahi atu. Tē taea e te tangata te tango i Tōna oranga, Māna anō Tōna oranga e whakaaetia nei kia tangohia ai. I muri i Tōna matenga, i Ia te kaha, kia whakaorangia anōtia Tōna tinana.

Ko Mere te māmā o Ihu. He wahine urutapu Ia i ora ai, tata ki te 2,000 tau ki muri, i tētahi tāone e kīa nei ko Nahareta. E Ia e puhi rangatahi tonu ana, kāore anō kia mārena, i haere mai tētahi anahera na tō tātou Matua i te Rangi ki a Ia. I kōrero te anahera ki a Ia, ka meinga Ia he māmā mō Ihu Karaiti. I kōrero te anahera ki a Ia, ka meinga tonu ko tō tātou Matua i te Rangi te matua o Ihu. Kāore he tāne i te ao e meinga ai hei matua Māna.

I haramai hoki te anahera ki te tāne ka mārena atu ki a Mere. Ko Hōhepa te īngoa o te tāne nei. I kōrero te anahera ki a Hōhepa, ko te tamaiti ka whānau mai, ko te Tama a tō tātou Matua i te Rangi, ehara nā tētahi tāne i te ao. I kōrero te anahera ki a Ia, me mārena Ia ki a Mere. Nō reira, i mārena a Hōhepa rāua ko Mere. I muri i te whānautanga mai o Ihu, i tiakina Ia e Hōhepa me te mea nei ko tana ake tama.

Nō te mea he tangata tonu tana māmā, i rongo tonu a Ihu i te matekai, i te matewai, i te mamae, ā, ka taea hoki Ia te mate.

I āwhina a Ihu i tēnā me tēna o tātou, mā te whakaatu mai i te āhua kia ora ai. Ki te ako tātou me pēhea e meinga ai pērā ki a Ia, ka ako tātou ki te mahi i ngā mahi ka whakaharikoa i a tātou. Ka taea hoki e tātou te ako i ngā mea ka āwhina i a tātou ki te hoki atu ki tō tātou Matua i te Rangi.

Kia mōhio tātou e aroha ana a Ihu ki a tātou, ka rongo tātou i te rongomau. Ka rongo tātou i te haumarutanga, ā, e kore tātou e mataku. Ka mōhio tātou, ka taea e tātou te whakawhirinaki atu ki a Ia hei kaiārahi mō tātou. Ka mōhio tātou, e mārama ana Ia ki ō tātou raruraru. Ka āwhina Āna akoranga i a tātou ki te whakatika i ō tātou raruraru. Kia mārama ai tātou ki ngā mea katoa i mahi a Ihu mō tātou, ka nui ake tō tātou aroha Mōna. Nā tō tātou aroha e piki ai te hiahia, kia whakarongo ki a Ia. Ka tiro whakamua tātou e whakaneinei ana i te wā e noho tahi anō ki a Ia.