Rumakitanga

Ko te tikanga o te rumakitanga, ka rumakina ki te wai mō tētahi wā poto, ā, ka whakarewa anōtia e tētahi tangata e mau ana i te mana ki te rumaki. He wāhanga tonu te rumakitanga o te mahere ō tō tātou Matua i te Rangi mō tātou. Ka whakahau Ia i a tātou kia rumakina ai, hei whakaatu i tō tātou whakapono ki a Ihu Karaiti, kia whakaatu hoki i tō tātou aroha Mōna, i tō tātou hiahia ki te whakarongo ki a Ia, ā, hei whakaatu hoki kua rīpenetā ai tātou i ō tātou hara.

I mōhio a Ihu i whakahau tō tātou Matua i te Rangi i Āna tamariki katoa kia rumakina ai rātou. I a Ihu i te ao nei, i rumakina Ia. I pēnei Ia nā Tōna hiahia ki te whakarongo ki tō tātou Matua i te Rangi. I hiahia hoki Ia ki te whakaatu ki a tātou, me whakarongo tātou ki tō tātou Matua i te Rangi, ā, me rumaki.

Me rumaki ngā tāngata katoa kua tae ki te waru tau te pakeke, ā, e mārama ana ki te tika me te hē, he whakapono hoki tōna ki a Ihu, ā, kua rīpenetā ai. Kāore he take kia rumakina ai ngā tamariki iti ake i te waru tau te pakeke. E kore tō tātou Matua i te Rangi e whakawā i a rātou mō ā rātou mahi. Waihoki, kāore he take kia rumakina ai ngā tāngata e mate ā-hinengaro nei, ā, kāore tō rātou māramatanga mō ngā mea pai, mō ngā mea kino rānei. Me rumaki ērā atu tāngata katoa ki te hiahia rātou te hoki atu ki tō tātou Matua i te Rangi noho ai.

Kua kī mai a Ihu āwhea tātou e rumakina ai. I tohutohu Ia i Āna kaiaru kia rumakina ai ngā tāngata i muri i tā rātou akoranga Mōna, ā, i muri hoki i tō rātou whakapono ki a Ia, me tō rātou rīpenetātanga. I hoatu Ia i te mana kia rumakina ai, ki ētahi o ngā tāne o Tōna Hāhi.

Mā te rumakitanga e whakaatu ai tātou ki tō tātou Matua i te Rangi e hiahia ana tātou te whai i Tōna mahere mō tātou. Ka kī taurangi tātou, e whakaae ana ki a Ihu hei kaiārahi mō tātou, ā, kia whakarongo hoki ki ngā mea katoa ka tohutohu mai Ia ki a tātou. Ka kī taurangi tātou ka mahara tonu ki a Ia me ngā mea hoki kua mahia e Ia mō tātou.

Ki te whakapono tātou ki a Ihu Karaiti, ki te rīpenetā i ō tātou hara, ā, kia rumakina ai, ka whakamuru tō tātou Matua i te Rangi i ō tātou hara. Ka kī taurangi mai Ia, ka taea e tātou te hoki atu anō ki a Ia noho ai. Ka whakaae Ia ki a tātou hei mema o te hāhi o Ihu. Ka tono Ia i te Wairua Tapu hei āwhina i a tātou ki te ako e pā ana ki a Ia, ā, me te āwhina i a tātou ki te mahi i ngā mea tika. Ka whiwhi tātou i ēnei manaakitanga katoa ki te ū tonu tātou ki te mahi i ngā mea i kī taurangi ai tātou i tō tātou rumakitanga.

Ka whiwhi anake tātou i ēnei manaakitanga mehemea ka rumakina ai tātou. Ko tēnei anake te huarahi e hoki atu ai tātou ki tō tātou Matua i te Rangi noho ai. Ko tēnei anake te huarahi kia hono atu ai hei mema o te Hāhi o Ihu Karaiti. Ko tēnei anake te huarahi e whiwhi ai ki te takohatanga o te Wairua Tapu, arā, te tika kia āwhinatia ai tātou e te Wairua Tapu mō ō tātou oranga. Ka homai ai tēnei takoha i muri i tō tātou rumakitanga. Ka whai tikanga ēnei mea katoa, kia hoki atu ai tātou ki tō tātou Matua i te Rangi noho ai.

Me mahi tātou i ētahi mea i te tuatahi, kia rite rānō tātou mō te rumakitanga. Me ako tātou mō Ihu Karaiti, me whakapono hoki ki a Ia, me rīpenetā i ō tātou hara, ā, me mahi hoki i ngā mea ka whakahaungia e Ihu ki a tātou.

Nā te rumakitanga e tīmata ai tātou i tētahi oranga hou, he oranga e wātea ana i te hara. I whakatauākitia e Ihu, he pērā tonu ki tō tātou whānautanga mai anō. I kī Ia, ki te kore tātou e whānau mai anō ā-wairua nei, tē taea e tātou te hoki atu ki tō tātou Matua i te Rangi noho ai.

I kī tētahi o ngā kaiaru o Ihu, ko Pāora tōna ingoa, me tīmata tātou i tētahi oranga hou i muri i tō tātou rumakitanga. I kī Ia, he rite tonu tō tātou rumakitanga ki te wai, ki te tāpuketanga o ō tātou hara katoa. Kia whakarewa anōtia tātou i te wai, he rite tonu ki tō tātou meinga kia mā ai, ā, hei tangata hou hoki e rite ana ki te tīmata i tētahi oranga hou. Mā te rumakitanga e tīmata ai tātou i tō tātou haerenga, kia hoki anō ki tō tātou Matua i te Rangi.