Buka arata’i rahi : Tāvini i roto i te ’Ēkālesia a Iesu Mesia i te Feiā Mo’a i te mau Mahana Hope’a nei

Te mau mea i roto
’Api upo’o parau
Ha’apotora’a nō te mau fa’atanora’a ’āpī
0. Vauvaura’a ’ōmuara’a
Te niu o te parau ha’api’ira’a
- 1. Te fa’anahora’a a te Atua ’e tā ’outou ’ohipa i roto i tāna ’ohipa nō te fa’aorara’a ’e te fa’ateiteira’a
- 2. Te turura’a i te ta’ata hō’ē ’e i te mau ’utuāfare i roto i te ’ohipa a te Atua nō te fa’aorara’a ’e te fa’ateiteira’a
- 3. Mau parau tumu o te Autahu’ara’a
- 4. Te feiā fa’atere ’e te mau ’āpo’ora’a i roto i te ’Ēkālesia a Iesu Mesia
Fa’anahonahora’a o te ’Ēkālesia
- 5. Te feiā fa’atere rahi ’e te feiā fa’atere ārea
- 6. Te feiā fa’atere o te titi
- 7. Te ’episekōpora’a
- 8. Pupu peresibutero
- 9. Sōtaiete Tauturu
  - 9.1. Te fā ’e te fa’anahonahora’a
  - 9.2. ’Āmui i roto i te ’ohipa a te Atua nō te fa’aorara’a ’e te fa’ateiteira’a
  - 9.3. Te feiā fa’atere o te Sōtaiete Tauturu
  - 9.4. Tauturura’a i te feiā ’āpī tamāhine ’ia fa’aineine nō te ’āmui atu i roto i te Sōtaiete Tauturu
  - 9.5. Te feiā fa’atere nō te Sōtaiete Tauturu titi
  - 9.6. Te mau arata’ira’a ’e te mau fa’aturera’a hau atu
- 10. Te mau pupu o te Autahu’ara’a a Aarona
- 11. Feiā ’Āpī Tamāhine
- 12. Paraimere
- 12. Ha’api’ira’a Sābati
- 14. Te mau melo ’ōtahi
- 15. Ha’api’ira’a ’evanelia Séminaire ’e te Institut
Te ’ohipa a te Atua nō te fa’aorara’a ’e te fa’ateiteira’a
- Te orara’a i te ’evanelia a Iesu Mesia
  - 16. Te orara’a i te ’evanelia a Iesu Mesia
  - 17. Te ha’api’ira’a i te ta’ata i te ’evanelia
  - 18. Te ravera’a i te mau ’ōro’a ’e te mau ha’amaita’ira’a o te autahu’ara’a
  - 19. Pehe
  - 20. Te mau ’ātivite
- Te ha’apa’ora’a i te feiā tei hina’aro i te tauturu
  - 21. Te aupurura’a
  - 22. Te pāhonora’a i te mau hina’aro pae mātēria ’e te fa’atupura’a i te fa’arava’ira’a iāna iho
- Te anira’a i te mau ta’ata ato’a ’ia fāri’i i te ’evanelia
  - 23. Te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai
  - 24. Te mau pu’e parau misiōnare ’e te tāvinira’a misiōnare
- Te tāhō’ēra’a i te mau ’utuāfare nō te tau a muri atu
  - 25. Te tāhō’ēra’a i te mau ’utuāfare nō te tau a muri atu nā roto i te ’ohipa hiero ’e te ’ā’amu ’utuāfare
  - 26. Parau fa’ati’a nō te hiero
  - 27. Te mau ’ōro’a o te hiero nō te feiā ora
  - 28. Te mau ’ōroa o te hiero nō te feiā pohe
Te fa’aterera’a i te ’Ēkālesia
- 29. Te mau rurura’a a te ’Ēkālesia
- 30. Te mau pi’ira’a i roto i te ’Ēkālesia
- 31. Te mau uiuira’a ’e te tahi atu maufārereira’a ’e te mau melo
- 32.Te tātarahapara’a ’e te mau ’āpo’ora’a hi’opo’ara’a ti’ara’a melo o te ’Ēkālesia
- 33. Te mau pu’e parau ’e te mau parau fa’a’ite
- 34. Te mau faufa’a ’e te mau hi’opo’ara’a
- 35. ’Atu’atura’a ’e fa’a’ohipara’a i te mau fare purera’a
- 36. Ha’amaura’a, tauira’a ’e topara’a te i’oa o te mau ’āmuira’a ’āpī
- 37. Te mau titi, te mau pāroita ’e te mau ’āma’a ta’a ’ē
- 38. Te mau fa’aturera’a ’e te mau arata’ira’a a te ’Ēkālesia

9. Sōtaiete Tauturu

« 9. Sōtaiete Tauturu », Buka arata’i rahi : Tāvini i roto i te ’Ēkālesia a Iesu Mesia i te Feiā Mo’a i te mau Mahana Hope’a nei (2025).

« 9. Sōtaiete Tauturu », Buka arata’i rahi.

Sōtaiete Tauturu

9.1

Te fā ’e te fa’anahonahora’a

E tauturu te Sōtaiete Tauturu i te mau tamari’i a te Atua ’ia fa’aineine nō te ho’i i mua i tōna ’aro. ’Ei mau tamāhine nā te mau metua i te ao ra, e « ha’amāramarama » te mau melo o te Sōtaiete Tauturu « i te mau pāpa’ira’a mo’a » e « fa’aitoito i te ’ēkālesia », e fa’ateitei i te ’ā’au, ’e e « ha’apa’o i te mau fafaura’a tā [rātou] i fa’aau ra » (Te Ha’api’ira’a Tumu ’e te mau Fafaura’a 25:7, 13).

9.1.1.

Fā

E ’āvirira’a te Sōtaiete Tauturu tei ha’amauhia e te Atua nō te mau vahine pa’ari ato’a o te ’Ēkālesia. ’Ua ha’api’i te peropheta Iosepha Semita ē, te fā a te Sōtaiete Tauturu ’o te fa’aorara’a ïa i te mau vairua ’e te tāmarūra’a i te māuiui. ’Ua parau ’oia ē, ’aita te ’Ēkālesia a Iesu Mesia i fa’anaho-hope-hia e tae roa, ’ua fa’anahohia te mau tuahine.

E ’ohipa ’āmui te mau melo o te Sōtaiete Tauturu nō te taurutu i te fa’atupura’a i te ’ohipa a te Atua nō te fa’aorara’a ’e te fa’ateiteira’a. E tāvini rātou ia vetahi ’ē, e rave i te mau hōpoi’a e tū’ati i tā rātou fafaura’a, e patu i te hō’ēra’a, ’e e ’apo mai ’e e ora i te ha’api’ira’a tumu.

Te parau poro a te Sōtaiete Tauturu ’oia ho’i, « E ’ore roa te aroha e mou » (1 Korinetia 13:8). E ’itehia teie parau poro i ni’a i te ’āti’a tītiro a te Sōtaiete Tauturu.

9.1.2

Te ti’ara’a melo i roto i te Sōtaiete Tauturu

Te Sōtaiete Tauturu ’o te hō’ē ïa autuahinera’a nō te orara’a tā’āto’a. Te mau tuahine pa’ari ato’a mai te 18 matahiti e hau atu, e melo rātou nō te Sōtaiete Tauturu. E melo rātou noa atu ē, ’aita rātou e haere mai nei i te mau purera’a a te Sōtaiete Tauturu.

E nehenehe te hō’ē feiā ’āpī tamāhine e ha’amata i te ’āmui mai i roto i te Sōtaiete Tauturu i te 18ra’a o tōna matahiti. E paraparau ’oia i tōna nā metua ’e i te ’episekōpo nō ni’a i te taime ti’a. I te 19ra’a o tōna matahiti ’aore rā, ’a haere ai ’oia i rāpae i te ’utuāfare, mai te haerera’a i te fare ha’api’ira’a tuatoru ’aore rā, e tāvini i te hō’ē misiōni, e ti’a ’ia ’āmui mai ’oia i roto i te Sōtaiete Tauturu.

Te mau vahine fa’aipoipohia i raro mai i te 18 matahiti, e melo ato’a rātou nō te Sōtaiete Tauturu.

Nō te mau ha’amāramaramara’a nō ni’a i te mau metua fa’aipoipo-’ore-hia i raro mai i te 18 matahiti, ’a hi’o 38.1.5.

9.1.3

Te fa’atanora’a i te mau hina’aro o te fenua iho

Vetahi mau pāroita e rave rahi vahine pa’ari ha’apa’o tō roto. Nō teie mau pāroita, e nehenehe te ’episekōpo ’e te peresideni titi e fa’ati’a ’ia ha’amauhia hau atu i te hō’ē noa Sōtaiete Tauturu o te pāroita. E peresidenira’a tō te Sōtaiete Tauturu tāta’itahi. Mai te mea e nehenehe, e mea ti’a ’ia vai i roto i te Sōtaiete Tauturu tāta’itahi, te mau melo nō te mau matahiti rau ’e e mau ’itera’a rau.

9.2

’Āmui i roto i te ’ohipa a te Atua nō te fa’aorara’a ’e te fa’ateiteira’a

3:31

Tē ani nei te Atua i te mau ta’ata ato’a ’ia haere mai i te Mesia ra ’e ’ia ’āmui mai i roto i tāna ’ohipa nō te fa’aorara’a ’e te fa’ateiteira’a nā roto i :

Te orara’a i te ’evanelia a Iesu Mesia.
Te ha’apa’ora’a i te feiā tei hina’aro i te tauturu.
Te anira’a i te mau ta’ata ato’a ’ia fāri’i i te ’evanelia.
Te tāhō’ēra’a i te mau ’utuāfare nō te tau a muri atu.

E fa’anaho te feiā fa’atere o te Sōtaiete Tauturu i te mau rurura’a i te sābati, te mau ’ātivite, te ’ohipa aupurura’a, te ’ohipa tāvinira’a, ’e te tahi atu mau ’ohipa nō te tauturu i te mau vahine ’ia ’āmui mai i roto i te ’ohipa a te Atua nō te fa’aorara’a ’e te fa’ateiteira’a. E ’ohipa te mau melo o te Sōtaiete Tauturu ’e o te pupu peresibutero ma te tāhō’ē, nō te tauturu i te fa’atupu i teie ’ohipa.

Nō te tahi atu ā ha’amāramaramara’a nō ni’a i te ’ohipa a te Atua nō te fa’aorara’a ’e te fa’ateiteira’a, ’a tai’o i te pene 1.

9.2.1

Te orara’a i te ’evanelia a Iesu Mesia

E turu te feiā fa’atere o te Sōtaiete Tauturu i te mau melo i roto i te orara’a i te ’evanelia a Iesu Mesia. E ha’apāpū rātou i te fa’a’ohipara’a i te fa’aro’o, te tātarahapara’a, te fa’arahira’a i te fa’arava’ira’a iāna iho, ’e te ravera’a i te mau fafaura’a ’e te Atua ma te fāri’ira’a i te mau ’ōro’a. Tei roto te ’ōro’a hiero i teie mau ’ōro’a. Hi’o 1.2.1.

9.2.1.1

Te ha’api’ira’a mai i te ’evanelia i te fare

’Ia ’apo ana’e mai ’e ’ia ora ana’e te mau melo i te ’evanelia i te fare, e hōhonu atu ā tō rātou fa’afāriura’a i te Metua i te ao ra ’e ia Iesu Mesia. E fa’aitoito te feiā fa’atere o te Sōtaiete Tauturu i te mau tuahine ’ia tuatāpapa i te mau pāpa’ira’a mo’a ’e i te mau parau a te mau peropheta, te ta’ata hō’ē ’e tō rātou ’utuāfare. E fa’ananea te Mai, peʼe mai ’e te tahi atu mau mātēria i tā rātou ’imira’a.

E rāve’a faufa’a roa te mau purera’a pō ’utuāfare nō te ’apo mai i te ’evanelia i te fare. Mātauhia e fa’atupuhia te reira i te hepetoma tāta’itahi, i te sābati, i te pō monire, ’aore rā, i te tahi atu taime. E ravehia i roto te mau pure, te tuatāpapara’a ’evanelia, te mau ’itera’a pāpū, te mau hīmene ’e te mau ’ātivite ’ārearea.

9.2.1.2

Te ha’api’ira’a mai i te ’evanelia i te mau rurura’a a te Sōtaiete Tauturu

Te mau ’ōpuara’a o te mau purera’a a te Sōtaiete Tauturu i te sābati, teie ïa i muri nei :

Ha’apūai i te fa’aro’o.
Patu i te hō’ēra’a.
Ha’apūai i te mau ’utuāfare ’e te mau nohora’a.
Fa’aau i te mau tauto’ora’a nō te tauturu i te Atua i roto i tāna ’ohipa nō te fa’aorara’a ’e te fa’ateiteira’a i roto i te pāroita.

E tupu teie mau purera’a i te piti ’e te maha o te sābati o te ’āva’e. Nō te roara’a e 50 minuti. E fa’anaho te peresidenira’a o te Sōtaiete Tauturu i teie mau purera’a. Nā te hō’ē melo nō te peresidenira’a e arata’i.

E ha’amata te rurura’a nā roto i te pure. I muri iho, e arata’i te hō’ē melo nō te peresidenira’a i te mau tuahine nō te ’āpo’o ’āmui, e pae ē e ’ahuru minuti, nō ni’a i te mau fifi, te mau hina’aro ’e te mau rāve’a e tano ’ia paraparau. Nā te rōtahira’a i ni’a i te Fa’aora i roto i teie ’āparaura’a e tauturu i te mau tuahine ’ia patu i tō rātou ’itera’a pāpū, ’e ’ia ha’amaita’i i tō rātou ti’ara’a pipi. E mā’iti te peresidenira’a Sōtaiete Tauturu i te mau tumu parau e paraparau, ’ia au i te mau hina’aro o te mau tuahine.

E vaiihohia ma’a taime rava’i maita’i nō te tahi ha’api’ira’a ’evanelia au mau ’e te ’āparaura’a. E mea tano te rōtahi ’ia vai i ni’a i te mau tumu parau i roto i te hō’ē, ’aore rā hau atu a’ora’a o te ’āmuira’a rahi i ma’iri a’enei. Nā roto i te pure, e mā’iti te peresidenira’a Sōtaiete Tauturu i te mau a’ora’a o te ’āmuira’a tā te mau tuahine e paraparau. E rave rātou i teie mau mā’itira’a ’ia au i te mau hina’aro o te mau tuahine.

E nehenehe i te mau hīmene e hīmenehia nō te ha’amaita’i i te ha’api’ira’a.

E mea ti’a i te mau rurura’a ’ia fa’aotihia nā roto i te hō’ē pure.

E nehenehe te Sōtaiete Tauturu ’e te pupu peresibutero e ’āmui i te tahi mau taime ri’i, nō te hō’ē ha’api’ira’a i te sābati. E fa’aauhia teie mau rurura’a e te ’episekōpora’a ’e te mau peresidenira’a sōtaiete Tauturu ’e pupu peresibutero.

Nō te tahi atu ā ha’amāramaramara’a, hi’o « To Sit in Council [Pārahi ’ei ’āpo’ora’a]. »

9.2.1.3

Te mau ’ātivite

E fa’anaho te mau peresidenira’a o te Sōtaiete Tauturu i te mau ’ātivite. Nā te peresideni e hi’o i te mau ’ātivite. E nehenehe ’oia e ani i te hō’ē tauturu ’aore rā, i te tahi atu tuahine ’ia arata’i i te fa’aineinera’a ’e i te fa’atupura’a i te reira (hi’o 9.3.4). E paraparau te mau peresidenira’a i te mau ’ātivite ’e te ’episekōpo ’ei tuha’a nō tā rātou fa’aineinera’a.

E mea tano te mau ’ātivite ’ia ha’apūai i te hina’aro o te mau tuahine ’ia rave ’e ’ia ha’apa’o i te mau fafaura’a, ma te hōro’a ia rātou i te mau rāve’a nō te putuputu ’e nō te tāvini ’āmui. E mea tano te mau ’ātivite ’ia tauturu i te fa’atupu i te mau fā a te Sōtaiete Tauturu (hi’o 9.1 ’e 9.1.1). Nō te mau ha’amāramaramara’a nō ni’a i te mau ’ātivite a te Sōtaiete Tauturu o te titi, hi’o 6.7.1.

9.2.2

Te ha’apa’ora’a i te feiā tei hina’aro i te tauturu

’Ei feiā pe’e ia Iesu Mesia, e hōpoi’a nā te mau tuahine ’ia toro i te rima here i te feiā i roto i te fifi. ’Ei ta’ata hō’ē ’e ’ei Sōtaiete Tauturu, e ’imi rātou i te mau rāve’a nō te tāvini ia vetahi ’ē i roto i te pāroita ’e i te huira’atira. I te vāhi e roa’a te JustServe.org e hōro’a mai te reira i te mau rāve’a nō te tāvinira’a i te huira’atira.

2:46

Nō te tahi atu mau ha’amāramaramara’a nō ni’a e nāhea te mau melo o te Sōtaiete Tauturu ’e o te pupu peresibutero i te ha’apa’o i te feiā i roto i te fifi, hi’o 22.6.2.

9.2.2.1

Te aupururaʼa

Te aupurura’a ’o te ha’apa’ora’a ïa ia vetahi ’ē mai tā te Fa’aora e na reira. E fāri’i te mau tuahine i te mau fa’auera’a nō te aupurura’a nā roto mai i te peresidenira’a o te Sōtaiete Tauturu. Nō te tahi atu mau ha’amāramaramara’a, ’a hi’o pene 21.

9.2.2.2

Te mau hina’aro tau poto

E ’imi te mau tuahine aupuru ’ia māramarama ’e ’ia pāhono i te mau hina’aro o te feiā tā rātou e tāvini ra. E tītau paha te mau melo i te tauturu nō te tau poto i te taime o te ma’i, te fānaura’a, te pohera’a, te ’erera’a i te ’ohipa, ’e te tahi atu mau huru tupura’a.

Mai te mea e tītauhia, e ani te mau tuahine aupuru i te tauturu i te peresidenira’a o te Sōtaiete Tauturu. E nehenehe te peresidenira’a e ani ’ia pi’ihia te hō’ē ti’a’au ’ohipa tāvinira’a nō te fa’anaho i teie mau tauto’ora’a (hi’o 9.3.4).

E fa’aau te Sōtaiete Tauturu ’e te pupu peresibutero i te mau tauto’ora’a nō te pāhono i te mau hina’aro tau poto (hi’o 22.3.2). E nehenehe te ’episekōpo e hōro’a i te tauturu ha’apaera’a mā’a rū mai te mea e tītauhia.

I te tahi mau vāhi, tei te mau ’episekōpo te mā’itira’a nō te hōro’a i te mau melo i roto i te fifi, te tāpura poro’i tao’a a te ’episekōpo, nō te mā’a ’e nō te tahi atu mau tauiha’a tumu. I te rahira’a taime, e fa’aue te ’episekōpo i te peresideni o te Sōtaiete Tauturu ’ia fārerei i te mau melo ’e ’ia fa’a’ī i te tāpura poro’i tao’a. Teie rā, e nehenehe ato’a ’oia e fa’aue i te peresideni o te pupu peresibutero. E nehenehe te hō’ē tauturu i roto i te peresidenira’a o te Sōtaiete Tauturu ’aore rā o te pupu peresibutero e fa’auehia, mai te mea e’ita te peresideni e vata. E fa’aho’i atu teie ta’ata fa’atere tei fa’auehia i te parau poro’ira’a tao’a tei fa’a’īhia i te ’episekōpo ra, nō tāna parau fa’ati’a.

Nō te mau ha’amāramaramara’a hau atu, ’a hi’o 22.6.2 ’e « Te mau rāve’a tōtauturu » i roto Te rāve’a tauturu a te feiā fa’atere ’e te pāpa’i parau [DDG].

9.2.2.3

Te mau hina’aro tau roa ’e te fa’arava’ira’a iāna iho

Mai tei fa’aauhia ’e te ’episekōpo, e tauturu te mau peresidenira’a o te Sōtaiete Tauturu ’e o te pupu peresibutero i te mau melo e hina’aro tau roa tō rātou ’e te fa’arava’ira’a iāna iho. E ha’api’i rātou i te mau parau tumu o te fa’arava’ira’a iāna iho i te pae tino ’e i te pae vārua. ’A hi’o te pene 22 ’e « Te fa’arava’ira’a iāna iho » i roto i te fa’anahora’a Vaira’a buka ’evanelia.

Mai te mea e hina’aro te hō’ē ta’ata ’aore rā, te hō’ē ’utuāfare i te tauturu, e paraparau ’āmui te peresideni o te Sōtaiete Tauturu ’e te peresideni o te pupu peresibutero, mai tei fa’aauhia ’e te ’episekōpo, e nāhea ’ia tauturu (hi’o 22.4).

E tauturu te peresideni o te Sōtaiete Tauturu, te peresideni o te pupu peresibutero, ’aore rā, te tahi atu ti’a fa’atere, i te ta’ata ’aore rā, i te ’utuāfare ’ia hāmani i te hō’ē Fa’anahora’a nō te fa’arava’ira’a iāna iho. E nehenehe ato’a te mau tuahine ’aore rā, te mau taea’e aupuru e tauturu i te reira fa’anahora’a. Pinepine te tahi atu mau melo nō te Sōtaiete Tauturu ’aore rā nō te pupu peresibutero, e mau ’aravihi ’aore rā e mau ’itera’a tō rātou ’o tē nehenehe e tauturu. Te mau ta’ata ato’a e tauturu mai, ’ia tāpe’a ’ōmo’e noa rātou i te mau ha’amāramaramara’a. Nō te mau ha’amāramaramara’a hau atu, hi’o 22.3.3 ’e 22.8.

9.2.2.4

’Ia pohe ana’e te hō’ē melo o te pāroita

’Ia pohe ana’e te hō’ē melo o te pāroita, e pūpū te peresidenira’a o te Sōtaiete Tauturu ’e te peresidenira’a o te pupu peresibutero i te tāmāhanahana ’e te tauturu. I raro a’e i te arata’ira’a a te ’episekōpo, e nehenehe rātou e tauturu i te ’ohipa nō te hunara’a.

Mai te mea e nehenehe, te mau melo pohe tei fāri’i i tō rātou ’ōro’a hiero, ’ia hunahia ’aore rā ’ia tūtu’ihia rātou i roto i tō rātou ’ahu hiero. Nā te tāne fa’aipoipo e fa’a’ahu i te tino o tāna vahine ’aore rā nā te hō’ē vahine melo nō te ’utuāfare tei fāri’i i tōna ’ōro’a hiero. Mai te mea ’aita e vai ra te hō’ē melo o te ’utuāfare ’aore rā ’aita e hina’aro e rave i te fa’a’ahura’a, e nehenehe te ’episekōpo e ani i te peresideni o te Sōtaiete Tauturu ’ia ani i te hō’ē tuahine tei rave i tōna ’ōro’a hiero, ’ia fa’a’ahu i te tino ’aore rā ’ia hi’opo’a i te fa’a’ahura’a. Nō te tahi atu ā ha’amāramaramara’a, hi’o 38.5.10.

E tāmau noa te mau peresidenira’a o te Sōtaiete Tauturu ’e o te pupu peresibutero, te mau taea’e ’e te mau tuahine aupuru, ’e vetahi ’ē i te pūpū i te tāmāhanahana ’e te tauturu i muri a’e i te hunara’a.

9.2.3

Te anira’a i te mau ta’ata ato’a ’ia fāri’i i te ’evanelia

E hōpoi’a nā te mau melo o te Sōtaiete Tauturu ’ia ani manihini i te mau ta’ata ato’a ’ia fāri’i i te mau ha’amaita’ira’a o te ’evanelia a Iesu Mesia (hi’o Mosia 18:9). E rave rātou i te reira nā roto i te fa’a’itera’a i te ’evanelia, te ha’apūaira’a i te mau melo ’āpī, ’e te torora’a i te rima i te feiā e ’ere i te mea itoito roa i roto i te ’Ēkālesia. Hi’o 23.2 ’e 23.3.

I roto i te mau ’āpo’ora’a a te peresidenira’a ’e te Sōtaiete Tauturu, e paraparau te peresidenira’a o te Sōtaiete Tauturu i te mau rāve’a e nehenehe ai i te mau tuahine e ani i te mau ta’ata ato’a ’ia fāri’i i te mau ha’amaita’ira’a o te ’evanelia. Hi’o 23.1.1, 23.1.2, ’e 23.1.3.

E fa’aue te peresideni Sōtaiete Tauturu i te hō’ē melo o te peresidenira’a ’ia tauturu i te arata’ira’a i te mau tauto’ora’a nō te fa’a’ite i te ’evanelia i roto i te pāroita. E ’ohipa ’oia ’e te melo o te peresidenira’a o te pupu peresibutero i fa’auehia nō te fa’aau i teie mau tauto’ora’a (hi’o 23.6.2).

E ’āmui atu te melo o te peresidenira’a Sōtaiete Tauturu tei fa’auehia i roto i te mau rurura’a fa’aaura’a tāhepetoma, nō te fa’aau i te ’ohipa anira’a i te tā’āto’ara’a ’ia fa’ari’i i te mau ha’amaita’ira’a o te ’evanelia. Nā te fa’atere misiōni pāroita, e melo ato’a paha nō te peresidenira’a o te pupu peresibutero, e arata’i i teie mau rurura’a. ’O te mau misiōnare pāroita, te hō’ē rima tauturu nō te pupu tahu’a, te hō’ē melo nō te peresidenira’a piha feiā ’āpī tamāhine pa’ari a’e ’e te mau misiōnare rave tāmau tē tae mai. Hi’o 23.4.

9.2.4

Te tāhō’ēra’a i te mau ’utuāfare nō te tau a muri atu

E turu te mau melo nō te Sōtaiete Tauturu i te mau melo i roto i te tāhō’ēra’a i te mau ’utuāfare nō te tau a muri atu. ’Oia ho’i :

Te ravera’a i te mau fafaura’a ’e te Atua nā roto i te fāri’ira’a i te mau ’ōro’a, tae noa atu te ’ōro’a hiero.
Te ravera’a i te ’ohipa hiero ’e te ’ā’amu ’utuāfare (hi’o 1.2.4).

I roto i te mau ’āpo’ora’a a te peresidenira’a o te Sōtaiete Tauturu, e ’āparau te peresidenira’a o te Sōtaiete Tauturu i te mau rāve’a e ti’a ai i te mau tuahine ’ia ’āmui mai i roto i teie mau tauto’ora’a. E fa’anaho ato’a te mau melo o te peresidenira’a i te mau rāve’a nō te tauturu i te mau melo ’ia fa’arahi i tō rātou hāro’aro’ara’a ’e tō rātou hina’aro ’ia fa’ari’i i te mau ’ōro’a mo’a ’e ’ia rave i te mau fafaura’a ’e te Atua i roto i te hiero. E fa’aitoito rātou i te mau tuahine ’ia ha’amori pinepine i roto i te hiero mai te mea e nehenehe.

E fa’aitoito te peresidenira’a i te mau tuahine ’ia ’apo i te parau nō tō rātou ’ā’amu ’utuāfare. E tauturu rātou i te mau melo ’āpī ’e ’o tē ho’i mai nei, te mau melo ’āpī nō te Sōtaiete Tauturu, ’e te mau misiōnare tei pi’i-’āpī-hia ’ia ’imi ’e ’ia fa’aineine i te mau i’oa o te mau tupuna nō te mau ’ōro’a o te hiero.

E fa’aue te peresideni Sōtaiete Tauturu i te hō’ē melo nō te peresidenira’a ’ia tauturu i te arata’i i te ’ohipa hiero ’e te ’ā’amu ’utuāfare i roto i te pāroita. E ’ohipa ’oia i pīha’i iho i te melo o te peresidenira’a o te pupu peresibutero i fa’ata’ahia nō te fa’aau i te reira mau tauto’ora’a (hi’o 25.2.2).

E ’āmui atu te melo o te peresidenira’a o te Sōtaiete Tauturu tei fa’auehia i roto i te mau rurura’a fa’aaura’a, nō te fa’aau i te mau tauto’ora’a hiero ’e ’ā’amu ’utuāfare. E fa’atupu-tāmau-hia teie mau rurura’a. Nā te ti’a fa’atere nō te hiero ’e nō te ’ā’amu ’utuāfare o te pāroita, e melo paha nō te peresidenira’a pupu peresibutero, e arata’i i te mau rurura’a fa’aaura’a nō te ’ohipa hiero ’e te ’ā’amu (hi’o 25.2.7). E tae ato’a mai i teie mau rurura’a te hō’ē rima tauturu nō te mau tahu’a, te hō’ē melo nō te peresidenira’a piha feiā ’āpī tamāhine pa’ari a’e, ’e te mau tauturu ’ohipa hiero ’e ’ā’amu ’utuāfare.

2:49

9.3

Te feiā fa’atere o te Sōtaiete Tauturu

9.3.1

’Episekōpo

E fārerei te ’episekōpo i te peresideni Sōtaiete Tauturu hō’ē a’e taime i te ’āva’e. E ’āparau rāua i te ’ohipa a te Atua nō te fa’aorara’a ’e te fa’ateiteira’a, tae noa atu te ’ohipa tāvinira’a a te mau tuahine aupuru. E paraparau ato’a rāua i (1) te haerera’a i mua ’e te mau hina’aro o te mau tuahine i roto i te pāroita ’e (2) te mau purera’a a te Sōtaiete Tauturu, te ha’api’ira’a, ’e te mau ’ātivite.

9.3.2

Te peresidenira’a o te Sōtaiete Tauturu

9.3.2.1

Te pi’ira’a i te hō’ē peresidenira’a o te Sōtaiete Tauturu

E pi’i te ’episekōpo i te hō’ē vahine ’ei peresideni nō te Sōtaiete Tauturu o te pāroita. Mai te mea e nava’i te rahi o te ’āmuira’a, e ani ’oia iāna hō’ē ’aore rā, e piti vahine ’ei nā tauturu nōna. E feruri te ’episekōpora’a i tāna anira’a ’e e fa’ahaere i te mau pi’ira’a.

Nā te hō’ē melo o te ’episekōpora’a e vauvau i te i’oa o te mau melo o te peresidenira’a i roto i te hō’ē purera’a ’ōro’a, nō te pāturura’a. Nā te ’episekōpo e fa’ata’a i te peresideni o te Sōtaiete Tauturu. E nehenehe te hō’ē melo o te ’episekōpora’a e fa’ata’a nā tauturu o te peresideni Sōtaiete Tauturu.

E nehenehe te tahi mau ’āmuira’a na’ina’i ’aita tō rātou e peresideni Feiā ’Āpī Tamāhine ’aore rā, peresideni Paraimere. I roto i teie mau ’āmuira’a, e tauturu te peresideni o te Sōtaiete Tauturu i te mau metua ’ia fa’anaho i te ha’api’ira’a nō te feiā ’āpī ’e nō te mau tamari’i.

9.3.2.2

Te mau hōpoi’a

Teie i muri nei te mau hōpoi’a a te peresideni o te Sōtaiete Tauturu. E tauturu tōna nā tauturu iāna.

E tāvini i roto i te ’āpo’ora’a pāroita. E tāvini ’oia ’ei (1) melo nō te ’āpo’ora’a ’o tē tauturu i te pāhonora’a i te mau hina’aro i roto i te pāroita ’e e ’imi i te mau rāve’a ’e (2) ’ei ti’a nō te Sōtaiete Tauturu (hi’o 29.2.5).
E arata’i i te mau tauto’ora’a a te Sōtaiete Tauturu nō te ’āmui i roto i te ’ohipa a te Atua nō te fa’aorara’a ’e te fa’ateiteira’a (hi’o pene 1).
E fa’anaho ’e e hi’opo’a i te ’ohipa tāvinira’a a te mau tuahine aupuru. E ti’a’au i te mau fa’auera’a o te aupurura’a ’e te peresidenira’a o te pupu peresibutero, ma te putuputu hō’ē taime i te toru ’āva’e. E tītau i te parau fa’ati’a a te ’episekōpo nō te mau fa’auera’a nō te aupurura’a. E rave i te mau uiuira’a nō te aupurura’a hō’ē a’e taime i te toru ’āva’e. Hi’o pene 21.
I raro a’e i te arata’ira’a a te ’episekōpo, e paraparau i te mau melo pa’ari o te pāroita (hi’o 31.1 ’e 31.3). ’O te ’episekōpo ana’e te a’o i te mau melo o te pāroita nō ni’a i te parau nō te ti’a-mā-ra’a, te hāmani-’ino-ra’a ’e te parau fa’ati’a nō te fa’a’ohipa i te moni ha’apaera’a mā’a. Hi’o Te mau rāve’a tauturu nō te a’o. Nō te mau ha’amāramaramara’a nō ni’a i te hāmani-’ino-ra’a, hi’o 38.6.2.

3:16
Ia te peresidenira’a o te pupu peresibutero, e tauturu i te arata’ira’a i te mau tauto’ora’a i roto i te pāroita nō te ani i te mau ta’ata ato’a, ’ia fāri’i i te mau ha’amaita’ira’a o te ’evanelia (hi’o 8.2.3 ’e 9.2.3).
Ma te peresidenira’a pupu peresibutero, e tauturu i te arata’ira’a i te mau tauto’ora’a a te pāroita i roto i te ’ohipa hiero ’e te ’ā’amu ’utuāfare (hi’o 8.2.4 ’e 9.2.4).
E fa’aau i te mau tauto’ora’a a te Sōtaiete Tauturu nō te ha’apūai i te mau tuahine feiā ’āpī pa’ari i roto i te pāroita, tei ’ore i fa’aipoipohia ’e tei fa’aipoipohia. E nehenehe te hō’ē tauturu e fa’ata’ahia nō te tāvini i pīha’i iho i te feiā ’āpī pa’ari ’ōtahi (hi’o 14.1.2.2).
E farerei ’oia i te melo tāta’itahi o te Sōtaiete Tauturu hō’ē a’e taime i te matahiti. E tāu’aparau ’oia i te ora maita’i o te tuahine ’e tōna ’utuāfare.
Ha’api’i i te mau tuahine i tā rātou mau hōpoi’a ’e te mau ha’amaita’ira’a nō te fafaura’a, tae noa atu te mau ha’amaita’ira’a e tae mai nā roto i te mana autahu’ara’a a te Atua (hi’o 3.5 ’e 3.6). E tauturu ia rātou ’ia māramarama i te mana, i te pārurura’a, i te arata’ira’a, i te ’oa’oa ’e i te hau e tae mai nā roto i te fa’atupura’a i te tā’amura’a fafaura’a ’e te Metua i te ao ra ’e Iesu Mesia.
E hi’opo’a ’e e tauturu ’oia ’ia ha’amaita’i i te ha’api’ira’a i roto i te Sōtaiete Tauturu (hi’o pene 17).
E fa’anaho ’e e arata’i i te mau putuputura’a a te Sōtaiete Tauturu.
E hi’opo’a i te mau ’ātivite a te Sōtaiete Tauturu (hi’o 9.2.1.3).
E tauturu ’oia i te feiā ’āpī tamāhine ’ia fa’aineine nō te ’āmui mai i roto i te Sōtaiete Tauturu (hi’o 9.4).
E hi’o i te mau pāpa’a parau, i te mau parau fa’a’ite ’e i te faufa’a moni a te Sōtaiete Tauturu (hi’o LCR.ChurchofJesusChrist.org). E nehenehe te hō’ē pāpa’i parau e tauturu (hi’o 9.3.3).

E ha’api’i te peresidenira’a o te Sōtaiete Tauturu titi i te peresidenira’a o te Sōtaiete Tauturu pāroita nō ni’a i teie mau hōpoi’a. E nehenehe rātou e rave i te reira i roto i te mau rurura’a feiā fa’atere o te titi, te mau rurura’a a te peresidenira’a o te Sōtaiete Tauturu o te pāroita, ’e te mau tere fārereira’a iho i te mau peresideni Sōtaiete Tauturu (hi’o 29.3.4).

Nā roto i tāna tāvinira’a, e pāturu te peresideni o te Sōtaiete Tauturu o te pāroita i te ’episekōpo ’ia fa’atumu i ni’a i te feiā ’āpī ’e i ni’a i tāna mau hōpoi’a hō’ē roa.

9.3.2.3

Te rurura’a a te peresidenira’a

E putuputu tāmau te peresidenira’a o te Sōtaiete Tauturu ’e te pāpa’i parau. Nā te peresideni e arata’i i te reira mau rurura’a. Teie te mau mea e nehenehe e tu’u i roto i te tārena ’ohipa :

Fa’anaho nāhea i te ha’apūai i te mau tuahine ’e tō rātou ’utuāfare.
Fa’anaho nāhea i te tauturu i te fa’atupura’a i te ’ohipa a te Atua nō te fa’aorara’a ’e te fa’ateiteira’a.
E fa’aau i te ’ohipa misiōnare ’e te ’ohipa hiero ’e te ’ā’amu ’utuāfare.
Pāhono i te parau a’o ’e te mau fa’auera’a a te ’episekōpo.
Pāhono i te mau fa’auera’a nō roto mai i te mau rurura’a ’āpo’ora’a pāroita.
Feruri nā roto i te pure i te mau fa’auera’a nō te aupurura’a.
Hi’o fa’ahou i te mau ha’amāramaramara’a nō roto mai i te mau uiuira’a nō te aupurura’a. Fa’anaho i te mau rāve’a nō te ’ite mai i te mau vāhi pūai ’e e tauturu i te pāhonora’a i te mau hina’aro. (Hi’o pene 21.)
E feruri i te mau tuahine nō te tāvini i roto i te mau pi’ira’a ’e te mau fa’ata’ara’a ’ohipa a te Sōtaiete Tauturu.
E fa’anaho i te mau rurura’a ’e te mau ’ātivite a te Sōtaiete Tauturu.

9.3.3

Te pāpa’i parau

E nehenehe te peresidenira’a o te Sōtaiete Tauturu e ani i te hō’ē tuahine ’ia tāvini ’ei pāpa’i parau nō te Sōtaiete Tauturu. Nā te hō’ē melo nō te ’episekōpora’a e pi’i iāna, e vauvau i tōna i’oa nō te pāturura’a i roto i te purera’a ’ōro’a ’e e fa’ata’a iāna.

Teie i muri nei te mau hōpoi’a a te pāpa’i parau :

E fa’aineine i te tārena ’ohipa nō te mau rurura’a a te peresidenira’a ’e te mau ’āpo’ora’a a te Sōtaiete Tauturu.
E pāpa’i i te ’ohipa e parauhia i roto i te mau rurura’a ’e e hi’o i te mau tītaura’a ’ohipa.
E tārena i te mau uiuira’a nō te aupurura’a (hi’o 21.3).
E fa’aineine ’e e hāpono i te mau parau fa’a’ite toru ’āva’e, nō te taera’a mai te ta’ata i te purera’a ’e te rahira’a uiuira’a i ravehia nō te aupurura’a. E mea tano ’ia tu’uhia te mau tuahine e tāvini nei i te Paraimere ’e i te Feiā ’Āpī Tamāhine i roto i te mau parau fa’a’ite nō te taera’a mai.
E tauturu i te fa’aineine i te tāpura faufa’a nō te matahiti ’e ’ia hi’o i te mau ha’amāu’ara’a.

9.3.4

Te tahi atu ā mau pi’ira’a ’e mau fa’auera’a ’ohipa

E nehenehe te mau pi’ira’a hau atu i muri nei e riro ’ei tauturura’a. E paraparau te ’episekōpo ’e te peresideni o te Sōtaiete Tauturu e hina’arohia ānei te reira.

Te mau ’orometua nō te ha’api’i i roto i te mau rurura’a a te Sōtaiete Tauturu i te sābati.
Te ti’a’au nō te ’ohipa tāvinira’a nō te tauturu i te fa’anaho ’e i te fa’atupu i te tāvinira’a i te feiā i roto i te fifi (hi’o 9.2.2.2). E nehenehe ato’a e pi’i i te mau tauturu ’e te mau melo nō te tōmite.
Hō’ē ti’a’au nō te ’ātivite nō te tauturu i te fa’anaho ’e i te fa’atupu i te mau ’ātivite a te Sōtaiete Tauturu (hi’o 9.2.1.3). E nehenehe ato’a e pi’i i te mau tauturu ’e i te mau melo nō te tōmite.
Te mau tauturu pāpa’i parau nō te tauturu i te pāpa’i parau o te Sōtaiete Tauturu.
Te mau pāpa’i parau nō te aupurura’a nō te fa’anaho i te mau uiuira’a o te aupurura’a ’e nō te tauturu i te fa’aineine i te mau parau fa’a’ite toru ’āva’e.

Mai te mea e hina’arohia teie mau pi’ira’a ’e te tahi atu mau pi’ira’a, e ani te peresidenira’a o te Sōtaiete Tauturu i te mau tuahine ’ia tāvini. E fa’atae rātou i teie mau anira’a i te ’episekōpora’a. Mai te mea e fāri’i te ’episekōpora’a, nā te hō’ē melo o te ’episekōpora’a e pi’i ia rātou. E tu’u ’oia i tō rātou i’oa nō te pāturura’a i roto i te purera’a ’ōro’a ’e e fa’ata’a ’oia ia rātou.

Mai te mea e hina’arohia, e nehenehe te peresidenira’a o te Sōtaiete Tauturu e tītau i te mau tuahine ’ia tauturu i te mau tauto’ora’a a te Sōtaiete Tauturu, nā roto i te tahi atu mau rāve’a. E nehenehe ato’a ïa e hōro’a i te mau fa’auera’a ’ohipa i muri nei :

Tauturu i te feiā ’āpī tamāhine ’ia haere i te Sōtaiete Tauturu
Tāvini ’ei ta’ata ’aravihi nō te mau tuahine e vaira’a ta’a ’ē tō rātou, mai te mau vahine ’ivi, te feiā ’āpī pa’ari, ’aore rā te mau metua vahine e tamari’i ri’i tā rātou

’Aita e tītauhia ’ia pi’i ’e ’ia fa’ata’a i te mau tuahine e fa’auera’a ’ohipa tau poto tā rātou.

Te piha ha’api’ira’a a te Sōtaiete Tauturu

9.4

Tauturura’a i te feiā ’āpī tamāhine ’ia fa’aineine nō te ’āmui atu i roto i te Sōtaiete Tauturu

E ’ohipa te peresidenira’a o te Sōtaiete Tauturu ’e te feiā ’āpī tamāhine, tō rātou mau metua, ’e te feiā fa’atere o te Feiā ’Āpī Tamāhine, nō te tauturu i te feiā ’āpī tamāhine ’ia fa’aineine nō te ’āmui mai i roto i te Sōtaiete Tauturu.

E hōro’a ato’a te feiā fa’atere i te mau rāve’a tāmau i te feiā ’āpī tamāhine ’e i te mau tuahine nō te Sōtaiete Tauturu, nō te ha’amaita’i atu i te mau tā’amura’a. Te tāvini-’āmui-ra’a ’ei mau tuahine aupuru ’o te hō’ē ïa rāve’a faufa’a roa nō te fa’atupu i te mau tā’amura’a.

E tauturu te feiā fa’atere i te feiā ’āpī tamāhine ’ia māramarama i tā rātou mau hōpoi’a e tū’ati i te mau fafaura’a. Mai te mea e mea maita’i ’ia tu’u i te hō’ē feiā ’āpī tamāhine nō te aupuru i te hō’ē tuahine ta’a ’ē, e nehenehe ’oia e fa’ata’ahia ’ei tuahine aupuru i te taime e hina’aro ’oia, e ti’a iāna ’ia rave, ’e ’ua nava’i tōna pa’ari. E nehenehe ’oia e fa’ata’ahia ’ia tae’ahia tōna matahiti i te 14. E tāvini te feiā ’āpī tamāhine ’ei mau hoa nō te mau tuahine o te Sōtaiete Tauturu (hi’o 21.2.2).

I te taime ’a tomo mai ai te feiā ’āpī pa’ari i roto i te Sōtaiete Tauturu, e hōro’a te peresidenira’a o te Sōtaiete Tauturu ia rātou i te mau rāve’a nō te tāvini ’e nō te fa’a’ite i tō rātou pūai. E tauturu ato’a te peresidenira’a ia rātou ’ia fa’aineine nō te rave ’e nō te ha’apa’o i te mau fafaura’a mo’a o te hiero (hi’o 27.1.1).

9.5

Te feiā fa’atere nō te Sōtaiete Tauturu titi

E pi’i ’e e fa’ata’a te peresideni titi i te hō’ē tuahine ’ei peresideni nō te Sōtaiete Tauturu titi. Mai te mea e titi rahi, e ani ’oia hō’ē ’aore rā, e piti vahine nō te tāvini ’ei tauturu, ’e te tahi atu nō te tāvini ’ei pāpa’i parau. Nā te hō’ē melo o te peresidenira’a titi ’aore rā, hō’ē melo nō te ’āpo’ora’a teitei e pi’i ’e e fa’ata’a i teie mau vahine. Nō te mau ha’amāramaramara’a nō ni’a i te mau hōpoi’a a te peresidenira’a o te Sōtaiete Tauturu titi ’e te pāpa’i parau, hi’o 6.7.1 ’e 6.7.3.

E putuputu pinepine te peresideni titi (hō’ē a’e taime i te ’āva’e) ’e te peresideni ’aore rā te peresidenira’a Sōtaiete Tauturu o te titi. E paraparau ’āmui rātou nō ni’a i te ’ohipa a te Atua nō te fa’aorara’a ’e te fa’ateiteira’a. E ’āparau ato’a rātou i (1) te haerera’a i mua ’e te mau hina’aro o te mau tuahine i roto i te titi ’e i (2) te mau rurura’a a te Sōtaiete Tauturu, te ha’api’ira’a, ’e te mau ’ātivite.

E ha’api’i te peresidenira’a sōtaiete Tauturu titi i te mau peresidenira’a Sōtaiete Tauturu o te pāroita i roto i tā rātou mau hōpoi’a nō te tauturura’a i te arata’ira’a i te mau tauto’ora’a a te pāroita nō te aupurura’a, nō te fa’a’itera’a i te ’evanelia ’e nō te tāhō’ēra’a i te mau ’utuāfare nō te tau a muri atu nā roto i te ’ohipa hiero ’e te ’ā’amu ’utuāfare (hi’o 1.2.4). E rave rātou i te reira i raro a’e i te fa’aterera’a a te peresidenira’a titi. ’Ua fa’ata’ahia te mau melo o te ’āpo’ora’a teitei nō te tauturu. Hi’o 23.1 ’e 25.2.5.

Mai te mea tē vai ra tā te titi hō’ē tōmite feiā ’āpī pa’ari ’ōtahi, e tāvini te hō’ē melo o te peresidenira’a o te Sōtaiete Tauturu titi i roto i te reira tōmite. Mai te reira ato’a mai te mea tē vai ra hō’ē tōmite feiā pa’ari ’ōtahi i roto i te titi. (Hi’o 14.1.1.2.)

9.6

Te mau arata’ira’a ’e te mau fa’aturera’a hau atu

9.6.1

Te mau melo huma

E hōro’a te peresidenira’a o te Sōtaiete Tauturu i te ’atu’atura’a ta’a ’ē i te mau melo huma. Nō te mau ha’amāramaramara’a nō ni’a i te tauturura’a i teie mau melo, hi’o disability.ChurchofJesusChrist.org ; hi’o ato’a 38.8.27 i roto i teie buka arata’i.

9.6.2.

Te ’itera’a i te tai’o ’e te pāpa’i

Mai te mea e hina’arohia, e ’ohipa te peresidenira’a o te Sōtaiete Tauturu ’e te ’episekopo, te peresidenira’a o te pupu peresibutero ’e te ’āpo’ora’a pāroita nō te tauturu i te mau melo ’ia ha’api’i mai i te tai’o ’e i te pāpa’i.