Te orara’a i te ’evanelia a Iesu Mesia

Tē fa’atumu nei te ’ohipa nō te fa’aorara’a ’e te fa’ateiteira’a i ni’a e maha hōpoi’a hanahana i fa’ata’ahia (hi’o 1.2). Te mātāmua o te reira o te orara’a ïa i te ’evanelia a Iesu Mesia. Tē ora nei tātou i te ’evanelia ’ia :

• Fa’a’ohipa tātou i te fa’aro’o ia Iesu Mesia.

• Tātarahapa tātou i te mau mahana ato’a.

• Rave tātou i te mau fafaura’a i te Atua nā roto i te fāri’ira’a i te mau ’ōro’a nō te fa’aorara’a ’e te fa’ateiteira’a.

• Tāmau noa ē tae noa atu i te hope’a nā roto i te ha’apa’ora’a i te reira mau fafaura’a.

’A ora ai tātou i te ’evanelia ’e ’a ’ite ai tātou i te fa’aurura’a a te Vārua Maita’i, e hina’aro tātou i te tauturu i te mau melo o te ’utuāfare ’e ia vetahi ’ē, ’ia fāri’i i te mau ha’amaita’ira’a a te Atua (hi’o 1 Nephi 8:10–12). E ha’api’i mai tātou i te ’evanelia ’e e ha’api’i tātou i te ta’ata i te ’evanelia a Iesu Mesia, i te fare ’e i te fare purera’a. E ’imi ato’a tātou i te fa’arava’i ia tātou iho, e fa’afāna’o i te maita’i ia tātou iho ’e i tō tātou ’utuāfare, i te pae vārua ’e i te pae mātēria.

Tei roto i te orara’a i te ’evanelia te tahi atu mau tuha’a o te ’ohipa nō te fa’aorara’a ’e te fa’ateiteira’a. ’Oia ho’i te ha’apa’ora’a i te feiā tei hina’aro i te tauturu, te anira’a i te mau ta’ata ato’a ’ia fāri’i i te ’evanelia, ’e te tāhō’ēra’a i te mau ’utuāfare nō te tau a muri atu.