Parau fa’ati’a nō te hiero

E ti’a i te feiā fa’atere o te autahu’ara’a tei fa’ati’ahia ’ia fāri’i i te mau buka o te mau parau fa’ati’a nō te hiero, ’ia pāruru māite i te reira. ’Aita te ta’ata ’ē atu e ti’a ’ia fāri’i i te reira. ’Ia fa’a’āpī ana’e te ’Ēkālesia i te mau buka nō te mau parau fa’ati’a nō te hiero, e ha’amou te feiā fa’atere i te mau buka tahito.

’Ia ara ato’a te feiā fa’atere autahu’ara’a ē, ’eiaha te ta’ata fa’ati’a-’ore-hia ’ia fāna’o i te mau ha’amāramaramara’a nō te parau fa’ati’a nō te hiero i ni’a i te DDG.

E ani te ’episekōpo i te mau melo ’ia fa’aara ’oi’oi atu iāna, ’ia mo’e noa atu ’aore rā ’ia ’eiāhia te parau fa’ati’a. Mai te peu e mea ti’a mā noa ā te melo, e tūhono te ’episekōpo ’aore rā te tauturu i fa’auehia ’aore rā te pāpa’i parau i ni’a i te DDG nō te nene’i fa’ahou i te parau fa’ati’a. E hope te parau fa’ati’a ’āpī i te hō’ē ā tai’o mahana mai te ’ōmuara’a.

I te tahi taime, ’aita fa’ahou te hō’ē melo tei mo’e ’aore rā tei ’eiāhia te parau fa’ati’a, e ora fa’ahou nei i te mau ture nō te vai-ti’a-mā-ra’a. I terā vaira’a, e fa’a’ore te ’episekōpo i te parau fa’ati’a i reira ra (hi’o 26.2.3).

Mai te peu e ’ite mai te ’episekōpo ē, ’aita te hō’ē melo ma te parau fa’ati’a mana e ora nei i te mau ture nō te vai-ti’a-mā-ra’a (hi’o 26.3), e fa’a’ohipa ’oia i te DDG nō te fa’a’ore i terā parau fa’ati’a. Mai te mea ’aita e vai ra teie fa’anahora’a, e fārerei atu te ’episekōpo i te piha tōro’a o te hiero nō te fa’a’ore i te parau fa’ati’a. Mai te mea e parau fa’ati’a pāpie tā te melo, e tītau te ’episekōpo i te reira mai roto mai i te melo.

Maoti te parau fa’ati’a nō te hiero nō te mau bāpetizora’a ’e te mau ha’amaura’a ta’ata mono e ti’a ai i te mau melo ’ia rave i te mau bāpetizora’a ’e te mau ha’amaura’a nō te feiā pohe. E hōro’ahia te reira i te mau melo ’aita i fa’ari’i i tō rātou ’ōro’a hiero, ’ua bāpetizohia rā ’e ’ua ha’amauhia.

’Aita te mau melo tei fa’ari’i a’ena i tō rātou ’ōro’a hiero e hōro’ahia te parau fa’ati’a nō te mau bāpetizora’a ’e te mau ha’amaura’a ta’ata mono.

E nehenehe e hōro’a i teie mau parau fa’ati’a i te mau melo, ha’amata i te ’āva’e nō Tēnuare o te matahiti e ra’ehia tō rātou 12 matahiti. Tītau-roa-hia i te hō’ē tāne o te ’Ēkālesia ’ia fa’atōro’ahia i te hō’ē tōro’a nō te autahu’ara’a hou ’oia ’a fa’ari’i i te hō’ē parau fa’ati’a nō te hiero.

I roto i te hō’ē pāroita, nā te ’episekōpo ’aore rā te hō’ē tauturu tei fa’auehia, e uiui i te mau melo tei ’ore i fa’ari’i i tō rātou ’ōro’a hiero, nō te hō’ē parau fa’ati’a hiero nō te mau bāpetizora’a ’e te mau ha’amaura’a ta’ata mono. I roto i te hō’ē ’āma’a, nā te peresideni ’āma’a ana’e e fa’atere i te mau uiuira’a nō te parau fa’ati’a nō te hiero. (Nō te ’ōpaera’a, hi’o 23.6.1.)

E pe’e te ti’a fa’atere ’o tē fa’atere i te uiuira’a i te mau parau arata’i i roto i te 26.4. ’Eiaha e rū noa te mau uiuira’a nō te parau fa’ati’a nō te hiero. ’Ia vai ’ōmo’e noa rātou e ti’a ai. Terā rā, e nehenehe te ta’ata e uiuihia e ani i te hō’ē metua ’aore rā i te tahi atu ta’ata pa’ari, ’ia ’āmui ato’a mai.

E hōro’a te ti’a fa’atere i te hō’ē parau fa’ati’a nā roto i te DDG mai te mea ’ua ti’a mā te melo. E tītau noa teie mau parau fa’ati’a i te tu’urimara’a a te melo ’e a te hō’ē melo ato’a o te ’episekōpora’a ’aore rā a te peresideni ’āma’a.

E fa’ahaerehia te mau parau fa’ati’a nō te mau bāpetizora’a ’e te mau ha’amaura’a ta’ata mono nā roto i te DDG e te hō’ē melo nō te ’episekōpora’a ’aore rā nā te peresideni ’āma’a.

Nō te mau ha’amāramaramara’a nō ni’a i te hōro’ara’a i te parau fa’ati’a i te mau melo e fa’aineine ra nō te fa’ari’i i tō rātou ’ōro’a hiero ’aore rā ’o tē tā’atihia i te hoa fa’aipoipo, i nā metua, ’aore rā i te tamari’i, hi’o 26.3.3.

Maoti te parau fa’ati’a nō te hiero nō te mau melo tei fa’ari’i i tō rātou ’ōro’a hiero, e ti’a ai i te mau melo ’ia rave i te tā’āto’ara’a o te mau ’ōro’a o te hiero nō te feiā pohe. E hōro’ahia te reira i te mau melo tei fa’ari’i a’ena i tō rātou ’ōro’a hiero. (Nō te mau melo e fa’ari’i i tō rātou iho ’ōro’a hiero, hi’o 26.3.3.)

I roto i te hō’ē pāroita, e fa’atere te ’episekōpo ’aore rā te hō’ē tauturu tei fa’auehia, i te mau uiuira’a nō te parau fa’ati’a nō te hiero ma te hōro’a i te mau parau fa’ati’a. I roto i te hō’ē ’āma’a, nā te peresideni ’āma’a ana’e e fa’atere i te mau uiuira’a nō te parau fa’ati’a nō te hiero ’e e hōro’a i te mau parau fa’ati’a.

E pe’e te ti’a fa’atere ’o tē fa’atere i te uiuira’a i te mau parau arata’i i roto i te 26.4. ’Eiaha e rū noa te mau uiuira’a nō te parau fa’ati’a nō te hiero. ’Ia vai ’ōmo’e noa rātou e ti’a ai. Terā rā, e nehenehe te ta’ata e uiuihia e ani i tōna hoa fa’aipoipo, te hō’ē metua ’aore rā te tahi atu ta’ata pa’ari ’ia tae ato’a mai.

E hōro’a te ti’a fa’atere i te hō’ē parau fa’ati’a nā roto i te DDG mai te mea ’ua ti’a mā te melo.

I muri a’e i te uiuira’a a te hō’ē melo o te ’episekōpora’a ’aore rā a te peresideni ’āma’a, e uiui te hō’ē melo o te peresidenira’a titi i te mau melo e ora ra i roto i te hō’ē titi. E tārima ’oia i te parau fa’ati’a a te feiā tei ti’a-mā. Nā te hō’ē melo o te peresidenira’a misiōni e arata’i i te piti o te uiuira’a nō te mau melo e ora ra i roto i te hō’ē mata’eina’a. E tārima ato’a ’oia i te mau parau fa’ati’a a te feiā ti’a-mā. E’ita te hō’ē peresideni mata’eina’a e arata’i i te mau uiuira’a nō te parau fa’ati’a nō te hiero, maori rā e parau fa’ati’a nā te Peresidenira’a Mātāmua.

I roto i te mau titi, nā te hō’ē melo nō te peresidenira’a titi ’aore rā te hō’ē pāpa’i parau o te titi e fa’ahaere i te parau fa’ati’a nō te hiero i ni’a i te DDG. I roto i te mau mata’eina’a, nā te hō’ē melo nō te peresidenira’a misiōni ’aore rā nā te hō’ē pāpa’i parau o te misiōni e ha’amana i te parau fa’ati’a.

Nō te mau ha’amāramaramara’a nō ni’a i te hōro’ara’a i te parau fa’ati’a nō te hiero i te mau melo e fa’aineine ra nō te fa’ari’i i tō rātou ’ōro’a hiero ’aore rā ’o tē tā’atihia i te hoa fa’aipoipo, i nā metua, ’aore rā i te tamari’i, hi’o 26.3.3.

E hōro’ahia te parau fa’ati’a nō te hiero nō te mau ’ōro’a ta’ata ora ’ia fa’aineine ana’e te mau melo nō te :

• Fa’ari’i i tō rātou iho ’ōro’a hiero (hi’o 27.2).

• Tā’ati ia rātou i te hoa fa’aipoipo (hi’o 27.3).

• Tā’ati ia rātou i te metua (hi’o 27.4).

• Tā’ati i tā rāua nā tamari’i ia rāua (hi’o 27.4).

Nō te tomo i roto i te hiero, tītau-roa-hia i te mau melo e ti’ahia te 12 matahiti ’e ni’a atu i roto i terā matahiti e tupu ai te ’ōro’a, ’ia mau i te hō’ē parau fa’ati’a nō te mau bāpetizora’a ’e ha’amaura’a ta’ata mono, ’aore rā te parau fa’ati’a nō te mau melo tei fa’ari’i i tō rātou ’ōro’a hiero. Mai te mea e hina’arohia, e nehenehe te feiā fa’atere autahu’ara’a e hōro’a i te hō’ē o teie nā parau fa’ati’a ’e te parau fa’ati’a nō te mau ’ōro’a ta’ata ora i roto i te hō’ē ā uiuira’a.

E uiui te ’episekōpo iho ’aore rā te peresideni ’āma’a iho ’e te peresideni titi iho i te mau melo e fa’aineine ra nō te fa’ari’i i te mau ’ōro’a o te hiero.

I te mau taime rū ’aita te ’episekōpo ’aore rā te peresideni titi i vata, e nehenehe tāna e fa’ati’a i te hō’ē o tōna nā tauturu ’ia fa’atere i teie mau uiuira’a. I roto i te hō’ē ’āma’a, nā te peresideni ’āma’a ana’e e fa’atere i teie mau uiuira’a.

I roto i te mau pāroita rarahi ’e te mau titi rarahi nō te feiā ’āpī pa’ari ’ōtahi, e nehenehe te mau ’episekōpo ’e te mau peresideni titi e fa’ati’a i te mau tauturu mātau maita’i ’ia fa’atere i teie mau uiuira’a.

I roto i te hō’ē mata’eina’a, nā te peresideni misiōni ’aore rā te hō’ē tauturu i fa’auehia e fa’atere i teie mau uiuira’a. E’ita te mau peresideni mata’eina’a e fa’atere i teie mau uiuira’a maori rā ’ua fa’ati’a te Peresidenira’a Mātāmua ia rātou ’ia hōro’a i te mau parau fa’ati’a nō te hiero.

E pe’e te ti’a fa’atere ’o tē fa’atere i te uiuira’a i te mau parau arata’i i roto i te 26.4. ’Eiaha e rū noa te mau uiuira’a nō te parau fa’ati’a nō te hiero. ’Ia vai ’ōmo’e noa rātou e ti’a ai. Terā rā, e nehenehe te ta’ata e uiuihia e ani i tōna hoa fa’aipoipo, te hō’ē metua ’aore rā te tahi atu ta’ata pa’ari ’ia tae ato’a mai.

Hou ’a hōro’a ai i te hō’ē parau fa’ati’a nō te mau ’ōro’a ta’ata ora, e hi’opo’a te ’episekōpo, ’aore rā te peresideni ’āma’a, i te parau melora’a nō te ha’apāpū ē, ’aita e tāpa’opa’ora’a nō ni’a i te mau tā’ōti’ara’a ti’ara’a melo o te ’Ēkālesia. E hi’opo’a ato’a ’oia i te mau ha’amāramaramara’a nō te melo ma te fa’a’ohipa i te Fa’aineinera’a nō te ’ōro’a i ni’a i te DDG. E tu’urima nūmeri ’oia i te parau fa’ati’a nō te mau ’ōro’a ta’ata ora mai te peu e mea ti’a mā te melo ’e ’ua ineine nō te fa’ari’i i te mau ’ōro’a o te hiero. I muri iho e hāpono ’oia i te reira i te peresideni titi ’aore rā misiōni ma te fa’a’ohipa i te Fa’aineinera’a nō te ’ōro’a i ni’a i te DDG.

I muri iho, e uiui te peresideni titi ’aore rā, te hō’ē melo o te peresidenira’a misiōni i te melo. E tu’urima nūmeri ’oia i te parau fa’ati’a mai te peu e mea ti’a mā te melo ’e ’ua ineine nō te fa’ari’i i te mau ’ōro’a o te hiero. I muri iho e hāpono ’oia i te reira i te hiero ma te fa’a’ohipa i te Fa’aineinera’a nō te ’ōro’a i ni’a i te DDG. Mai te mea e tītauhia, e tu’urima ato’a ’oia i te parau fa’ati’a a te melo nō te mau melo tei fa’ari’i i tō rātou ’ōro’a hiero (hi’o 26.3.2).

Nō te mau ha’amāramaramara’a nō ni’a i te mau melo e fa’aineine ra nō te fa’ari’i i te mau ’ōro’a o te hiero, hi’o 27.1.1 ’e 27.1.2.

Nō te mau ha’amāramaramara’a nō ni’a i te mau melo e fa’aineine ra nō te fa’ari’i i tō rātou iho ’ōro’a hiero, hi’o 27.2.

Nō te mau ha’amāramaramara’a nō ni’a i te mau melo e fa’aineine ra nō te tā’ati ia rātou i te hoa fa’aipoipo, hi’o 27.3.

Nō te mau ha’amāramaramara’a nō ni’a i te mau melo e fa’aineine ra nō te tā’ati ia rātou i tnā metua, hi’o 27.4.

Hi’o 27.4.5 ’e 38.4.2 nō te tahi atu mau fa’aturera’a nō ni’a i te hi’ora’a i te mau tā’atira’a ’e te tā’atira’a i nā metua.

Tē ora nei vetahi mau melo i te mau vāhi e tītauhia te ha’amau’ara’a rahi nō te rātere ’aore rā e mea fifi roa nō te fārerei i te hō’ē melo nō te peresidenira’a titi ’aore rā misiōni. I terā vaira’a, e nehenehe te hō’ē melo nō te peresidenira’a titi ’aore rā misiōni e fārerei tu’urēni i te melo nō te fa’atere i te hō’ē uiuira’a parau fa’ati’a nō te hiero (hi’o 31.4).

E hōro’a te ti’a fa’atere i te parau fa’ati’a mai te peu e mea ti’a mā te melo. Mai te mea e tītau te melo i te hō’ē parau fa’ati’a pāpie, e nene’i te hō’ē melo nō te ’episekōpora’a ’aore rā te peresideni ’āma’a i te parau fa’ati’a nō te melo.

E tano ato’a teie fa’aturera’a nō te mau melo i roto te nu’u fa’ehau i te mau vāhi ātea.

1. E fa’aro’o ānei tō ’oe ’e te ’itera’a pāpū nō ni’a i te Atua, te Metua Mure ’Ore ; i tāna Tamaiti, ’o Iesu Mesia ; ’e i te Vārua Maita’i ?

2. E ’itera’a pāpū ānei tō ’oe nō ni’a i te tāra’ehara a Iesu Mesia ’e i tōna ti’ara’a ’ei Fa’aora ’e ’ei Ora ?

3. E ’itera’a pāpū ānei tō ’oe nō ni’a i te fa’aho’i-fa’ahou-ra’a mai o te ’evanelia a Iesu Mesia ?

4. Tē pāturu ra ānei ’oe i te Peresideni o Te ’Ēkālesia a Iesu Mesia i te Feiā Mo’a i te mau Mahana Hope’a nei ’ei peropheta, ’ei ’ite ’e ’ei heheu parau ’e ’o ’oia ana’e te ta’ata i ni’a i te fenua nei tei ha’amanahia nō te fa’a’ohipa i te mau tāviri ato’a o te autahu’ara’a ?

   Tē pāturu ra ānei ’oe i te mau melo nō te Peresidenira’a Mātāmua ’e nō te pupu nō te Tino ’Ahuru ma Piti ’āpōsetolo ’ei peropheta, ’ei hi’o ’e ’ei heheu parau ?

   Tē pāturu ra ānei ’oe i te tahi atu huimana fa’atere rahi ’e te feiā fa’atere o te ’Ēkālesia i te fenua nei ?

5. ’Ua parau te Fatu ē, ’ia « rave-mā-hia » te mau mea ato’a i mua iāna (Te Ha’api’ira’a Tumu ’e te mau Fafaura’a 42:41).

   Tē tūtava ra ānei ’oe ’ia vai mā i te pae mōrare, i roto i tō ’oe mau mana’o ’e te mau haere’a ?

   Tē ha’apa’o ra ānei ’oe i te ture nō te vi’ivi’i ’ore ?

6. Tē pe’e ra ānei ’oe i te mau ha’api’ira’a a te ’Ēkālesia a Iesu Mesia i roto i tā ’oe mau peu i ni’a i te mau melo o tō ’oe ’utuāfare ’e i ni’a ia vetahi ’ē, i te vāhi ’ōmo’e ’e i te vāhi ta’ata ?

7. Tē pāturu ra ānei ’oe ’aore rā tē fa’aitoito ra ānei ’oe i te tahi noa atu ha’api’ira’a, ravera’a ’aore rā ha’api’ira’a tumu e pāto’i nei i tā Te ’Ēkālesia a Iesu Mesia i te Feiā Mo’a i te mau Mahana Hope’a nei ?

8. Tē tūtava ra ānei ’oe i te ha’amo’a i te mahana Sābati, i te fare ’e i te fare purera’a ; i te haere i tā ’oe mau rurura’a ; i te fa’aineine nō te rave ti’amā i te ’ōro’a ’e nō te ora i te orara’a e au i te mau ture ’e te mau fa’auera’a o te ’evanelia ?

9. Tē tūtava ra ānei ’oe ’eiaha e ha’avare i roto i te mau mea ato’a tā ’oe e rave ?

10. E ta’ata ’aufau tuha’a ’ahuru ti’a ānei ’oe ?

    Nō te mau melo ’āpī e tītau nei i te parau fa’ati’a nō te rave i te mau bāpetizora’a ’e te mau ha’amaura’a feiā mono : ’Ua ineine ānei ’oe nō te ha’apa’o i te fa’auera’a ’ia ’aufau i te tuha’a ’ahuru ?

11. Tē māramarama ra ānei ’oe i te parau pa’ari ’e tē ha’apa’o ra ānei ’oe i te reira ?

12. (E fa’a’orehia teie uira’a nō te uiuira’a i te tamari’i ’e i te taure’are’a.) Tē vai ra ānei tā ’oe i te hō’ē noa atu utu’a ’aore rā tītaura’a i te hō’ē hoa fa’aipoipo mātāmua ’aore rā, i tā ’oe mau tamari’i mātāmua ?

    Mai te mea ē ’Ē, tē ’aufau ra ānei ’oe i tā ’oe mau utu’a ?

13. (E fa’a’orehia teie uira’a nō te uiuira’a i te hō’ē melo tei ’ore i fa’ari’i i tōna ’ōro’a hiero.) Tē ha’apa’o ra ānei ’oe i te mau fafaura’a tā ’oe i rave i roto i te hiero ?

14. (E fa’a’orehia teie uira’a nō te uiuira’a i te hō’ē melo tei ’ore i fa’ari’i i tōna ’ōro’a hiero.) Tē fa’atura ra ānei ’oe i te fāna’ora’a mo’a ’ia ’ō’omo i te ’ahu roto o te hiero mai tei parauhia i roto i te mau ’ōro’a fa’aineinera’a ? (’A tai’o i te fa’ahitira’a parau « Te ’ō’omora’a i te ’ahu roto nō te hiero », i raro nei ato’a, i te melo tāta’itahi.)

15. Tē vai ra ānei te tahi mau hara teimaha o tō ’oe orara’a tei tītauhia e fa’a’āfaro ’e te mau ti’a mana o te autahu’ara’a ’ei tuha’a nō tō ’oe tātarahapara’a ?

16. ’Ia mana’o ’oe, e mea ti’a mā ānei ’oe ’ia tomo i roto i te fare o te Fatu ’e ’ia rave i te mau ’ōro’a o te hiero ?

’Ua hōro’a mai te Peresidenira’a Mātāmua i teie arata’ira’a i muri nei nō ni’a i te ’ō’omora’a i te ’ahu roto :

« Tē fa’aha’amana’o nei te ’ahu roto o te autahu’ara’a mo’a ia tātou i te pāruru i roto i te hiero, ’e teie pāruru e taipe ïa nō Iesu Mesia. ’Ia ’ō’omo ana’e ’oe i tō ’oe ’ahu roto nō te hiero, tē ’ō’omo nei ’oe i te hō’ē taipe mo’a nō Iesu Mesia. Te ’ō’omora’a i te reira, e fa’a’itera’a ’o rāpae ïa nō tā ’oe parau fafau ’o roto, e pe’e iāna. E fa’aha’amana’ora’a ato’a te ’ahu roto nō te hiero nō tā ’oe mau fafaura’a i te hiero. ’Ia ’ō’omo ’oe i te ’ahu roto nō te hiero i te ao ’e te pō i te roara’a o te orara’a e ti’a ai. I te taime e tītau-roa-hia ’ia tātara i te reira nō te mau ’ohipa ri’i e’ita e tano ’ia rave ma te ’ō’omo i te ’ahu roto nō te hiero, e ’imi i te rāve’a ’ia ’ō’omo fa’ahou i te reira i muri noa iho. ’Ia ha’apa’o ’oe i tā ’oe mau fafaura’a, mai te fāna’ora’a mo’a e ’ō’omo i te ’ahu roto nō te hiero mai tei parauhia mai i roto i te mau ’ōro’a fa’aineinera’a, e rahi atu ā ïa te hāmani maita’i, te pārurura’a, te pūai ’e te mana o te Fa’aora e noa’a mai ia ’oe. »

Mai te mea e uira’a tā te mau melo nō ni’a i te ’ō’omora’a i te ’ahu roto, ’a hi’o i te reira i te 38.5.

E tūra’i te ti’a fa’atere autahu’ara’a i te parau nō te tītaura’a ’ia ’ia pāruru i tāna parau fa’ati’a. ’Eiaha roa te reira ’ia hōro’ahia ia vetahi ’ē ’e ’ia fa’aara-’oi’oi-hia te ta’ata i hōro’a, ’ia mo’e noa atu ’aore rā ’ia ’eiāhia te reira.

E uiui te ’episekōpo i te mau melo ’āpī tei nava’i tō rātou pa’ari, nō te fa’ari’i i te hō’ē parau fa’ati’a hiero nō te mau bāpetizora’a ’e te mau ha’amaura’a ta’ata mono (hi’o 26.3.1). E fa’atere ’oia i teie uiuira’a ma’a taime noa i muri mai i te ha’amaura’a o te melo, tōna tanora’a i te hepetoma nō muri iho. Nō te mau taea’e, e nehenehe teie uiuira’a e ravehia ’ei tuha’a nō te uiuira’a nō te fāri’i i te autahu’ara’a a Aarona. E nehenehe te ’episekōpo ’aore rā te peresideni ’āma’a e fa’aue i te hō’ē o tōna nā tauturu ’ia rave i teie uiuira’a. ’Ia fa’atōro’ahia te mau melo tāne o te ’Ēkālesia i te hō’ē tōro’a o te autahu’ara’a, hou ’oia ’a fāri’i ai i te hō’ē parau fa’ati’a nō te hiero.

i roto i te uiuira’a, e nehenehe te ’episekōpo e hōro’a i te mana’o e fa’a’ohipa i te tauturu nō te i’oa ’utuāfare [Family Name Assist] nō te tauturu i te melo ’āpī ’ia nene’i i te i’oa o te hō’ē melo o te ’utuāfare tei pohe, ’o tā te melo ’āpī e nehenehe e rave i te mau ’ōro’a o te hiero (hi’o « Family Name Assist [Tauturu nō te i’oa ’utuāfare] » i roto i te 25.4.1).

E nehenehe te mau melo ta’ata pa’ari ti’a-mā e fāri’i i tō rātou iho ’ōro’a hiero, hō’ē matahiti i muri a’e i tō rātou ha’amaura’ahia ’ei melo nō te ’Ēkālesia (hi’o 27.2.1.1). E ha’apāpū te feiā fa’atere o te autahu’ara’a ē, te tai’o mahana e fāri’i ai te melo i te ’ōro’a hiero, ’ua rae’ahia hō’ē a’e matahiti ti’a i muri mai i te tai’o mahana nō tōna ha’amaura’ahia, ’eiaha rā te tai’o mahana nō tōna bāpetizora’ahia. Nā te Peresideniraʼa Mātāmua anaʼe e fa’ati’a i te mau ’ōpaera’a.

Hou te hō’ē taure’are’a misiōnare ’a fa’aoti ai i tāna tāvinira’a i te fenua ātea, e rave te peresideni misiōni i te hō’ē uiuira’a nō te parau fa’ati’a nō te hiero. Mai te mea ’ua ti’a-mā te misiōnare, e hōro’a ’oia i te parau fa’ati’a. Nā te peresideni misiōni e tu’u i te tai’o mahana ’e e ha’amana te parau fa’ati’a, ’ia nehenehe te reira e hope e toru ’āva’e i muri iho i te tai’o mahana i ho’i ai te misiōnare i te fare.

E uiui te ’episekōpo i te mau misiōnare tei ho’i mai, nō te hōro’a i te parau fa’ati’a ’āpī nō te hiero, ’ia fātata ana’e nā ’āva’e e toru i te hope. I te mau taime rū ’aita te ’episekōpo e vata, e nehenehe ’oia e fa’atia i te hō’ē o tōna nā tauturu ’ia fa’atere i teie mau uiuira’a.

I roto i te mau pāroita rahi nā te feiā ’āpī pa’ari ’ōtahi, e nehenehe te mau ’episekōpo e fa’ati’a i te mau tauturu ’ia fa’atere i teie mau uiuira’a.

E fārerei atu te mau misiōnare tei ho’i mai i muri iho, i te hō’ē melo o tō rātou peresidenira’a titi nō te hō’ē uiuira’a nō te parau fa’ati’a nō te hiero.

I roto i teie mau uiuira’a nō te parau fa’ati’a nō te hiero, e hi’o fa’ahou ato’a te ’episekōpo ’e te melo o te peresidenira’a titi i te mana’o tauturu i hōro’ahia i roto i te uiuira’a nō te ha’amāuruurura’a i te misiōnare (hi’o 24.8.2). E ’āparau rātou nō ni’a i te nu’ura’a i mua o te misiōnare tei ho’i mai, tōna aumaita’ira’a o te tino ’e tōna pi’ira’a i teienei i roto i te ’Ēkālesia. E fa’aitoito ato’a rātou iāna ’ia tāmau noa i te haere nā ni’a i te ’ē’a nō te tupura’a i te pae vārua ’e i te tāvinira’a i te roara’a o tōna orara’a.

Mai te mea ’aita tō te misiōnare tei ho’i mai e pi’ira’a i roto i te ’Ēkālesia, e ha’apāpū te ’episekōpo ’e te peresideni titi ē, e hōro’ahia te reira. E nehenehe te mau misiōnare tei ho’i mai e anihia ’ia tāvini ’ei rave ’ohipa hiero, mai te mea tei pīha’i iho noa te hō’ē hiero (hi’o 25.5).

Mai te mea ’aita hō’ē melo i ora tāmau noa i roto hō’ē ā pāroita hō’ē a’e matahiti te maoro, e hi’o te ’episekōpo i te parau melora’a o te melo nō te ha’apāpū ē, ’aita e tāpa’opa’ora’a nō te mau tā’ōti’ara’a o te ti’ara’a melo o te ’Ēkālesia i roto.

E fārerei atu te ’episekōpo ’aore rā te hō’ē tauturu tei fa’auehia i te ’episekōpo nā mua atu, hou ’oia ’a fa’atere ai i te hō’ē uiuira’a nō te parau fa’ati’a nō te hiero. Mai te mea e ’ite te hō’ē tauturu ē e ’ohipa ’ōmo’e teie, e tāpe’a ’oia i te ’āparaura’a i reira ra. E fa’aara ’oia i tōna ’episekōpo ’ia fārerei atu i te ’episekōpo nā mua atu, hou te uiuira’a.

E nehenehe te ’episekōpo ’e te peresideni titi e fa’auruhia ’ia uiui i te hō’ē melo tei fa’ata’ahia, ’aore rā tei ta’a ’ia au i te ture ’aore rā tei fa’a’orehia te fa’aipoipora’a, mai te taime hope’a ’a fāri’i ai ’oia i te hō’ē parau fa’ati’a nō te hiero. I roto i teie uiuira’a, e tauturu rātou i te ha’apūai i te melo i te pae vārua. E hi’o ato’a rātou i te ti’a-mā-ra’a tāmau o te melo nō te haere i te hiero.

E ara maita’i te mau ’episekōpo ’e tō rātou nā tauturu ’ia hōro’a ana’e rātou i te mau parau fa’ati’a i te mau melo e fēti’i tō rātou e pāto’i ’ū’ana nei i te ’Ēkālesia i mua i te huira’atira ’aore rā e melo rātou nō te mau pupu tāiva ’Eiaha te mau melo i roto i teie huru orara’a e fa’atupu i te mana’o ē, e’ita rātou e nehenehe e fāri’i i te parau fa’ati’a nō te hiero, te tumu nō tā rātou paera’a fēti’i. E ti’a ’ia fa’aitoitohia rātou ’ia tāmau noa i te here i tō rātou mau feti’i piri. E nehenehe rātou e fāri’i i te hō’ē parau fa’ati’a nō te hiero, mai te mea e pāhono ti’a rātou ’e ma te ’ā’au tae i te mau uira’a ato’a nō te parau fa’ati’a hiero.

E fāri’ihia te mau ’ōro’a hiero ’ia au i te ’āpeni i fānauhia ai te ta’ata. Nō te melo ti’a mā ’aita e tītau i te hurira’a ihota’ata mai tō rātou ’āpeni ihiora i te fānaura’a, nā roto i te tāpū, te rāpa’aura’a ’aore rā te hurira’a ihota’ata tōtiare, e nehenehe rātou e fa’ari’i i te hō’ē parau fa’ati’a nō te hiero ’e i te mau ’ōro’a o te hiero. (Nō te hō’ē tātarara’a nō te hurira’a ihota’ata tōtiare, hi’o 38.6.23.)

Nō te mau melo tei rave i te mau ta’ahira’a nō te huri i te ihota’ata ’e i muri iho ’ua fa’aho’i i ni’a i tō rātou ’āpeni ihiora i te fānaura’a, ’e ’ua ti’a mā ’e ’ua parau fafau e ha’apa’o i te mau fa’auera’a a te Atua, e nehenehe tā rātou e fa’ari’i i te hō’ē parau fa’ati’a nō te hiero ’e i te mau ’ōro’a o te hiero.

E ’āpo’o te mau ’episekōpo ’e te peresideni titi nō te hi’o i te vaira’a o te ta’ata tāta’itahi ma te vai ara ’e te here huru Mesia. E tītau te mau peresideni titi ’e misiōni i te parau a’o a te peresidenira’a ārea.

Nō te mau ha’amāramaramara’a hau atu, ’a hi’o 38.6.23

E’ita te hō’ē melo tei rave i te hō’ē hara rahi e fāri’i i te parau fa’ati’a nō te hiero, ’aita ana’e ’oia i tātarahapa mau (hi’o 32.6). Te taime i roto i te hara ’e te hōro’ara’a i te hō’ē parau fa’ati’a, e vaiihohia te reira i roto i te ihi’ōre’a [discretion] o te ’episekōpo ’e o te peresideni titi. E nava’i noa te reira nō te fa’ata’a ē, ’ua tātarahapa mau te ta’ata.