Te tāhō’ēra’a i te mau ’utuāfare nō te tau a muri atu nā roto i te ’ohipa hiero ’e te ’ā’amu ’utuāfare

E fa’aoti te mau melo nō rātou iho i te taime ’e i te pinepinera’a nō te ha’amori i roto i te hiero. E’ita te feiā fa’atere e ha’amau i te fāito nūmera ’aore rā i te mau rāve’a rorouira e fa’a’ite i te fāito ha’amorira’a hiero.

Te mau melo tāta’itahi ’e te mau ’utuāfare e parau fa’ati’a mana tō rātou nō te hiero, e nehenehe rātou e haere i te hiero tā rātou e hina’aro. E nehenehe rātou e fa’aau i te hora fārereira’a ’e te hiero. Hi’o temples.ChurchofJesusChrist.org nō te mau ha’amāramaramara’a hono tāta’itahi.

E fa’ata’ahia te ’āmuira’a tāta’itahi a te ’Ēkālesia nō te hō’ē ’ōti’a hiero. ’Aita te mau tere hiero o te pāroita ’aore rā o te titi i te mau hiero i rāpae mai i te ’ōti’a hiero e fa’aitoitohia.

E mea tano te mau tere hiero ato’a o te pāroita ’e o te titi ’ia fa’aauhia te mahana ’e te hiero. Hi’o temples.ChurchofJesusChrist.org nō te mau ha’amāramaramara’a hono tāta’itahi.

E fa’aau te ’episekōpora’a i te ’ohipa ’e te mau peresidenira’a pupu peresibutero ’e Sōtaiete Tauturu ’a fa’atere ai i te mau tauto’ora’a hiero ’e te ’ā’amu ’utuāfare a te pāroita, ’o tē tauturu i te tāhō’ē i te mau ’utuāfare nō te tau a muri atu. E ’āpo’o tāmau teie feiā fa’atere.

Teie ato’a te tahi atu ā mau hōpoi’a a te ’episekōpora’a :

• E hi’o fa’ahou ’e e fa’ati’a i te fa’anahora’a nō te hiero ’e te ’ā’amu ’utuāfare a te pāroita (hi’o 25.2.6).

• E ara ē, tē fa’aauhia ra te mau tauto’ora’a hiero ’e te ’ā’amu ’utuāfare i roto i te mau rurura’a ’āpo’ora’a pāroita ’e te ’āpo’ora’a feiā ’āpī pāroita.

• E hi’opo’a i te fa’anahora’a o te mau ha’api’ira’a fa’aineinera’a o te hiero (hi’o 25.2.8).

• Hōro’a i te parau fa’ati’a nō te hiero (hi’o pene 26).

E paraparau te ’episekōpora’a i te peresideni titi nō te fa’aoti ē, e pi’i ānei i te hō’ē ti’a fa’atere hiero ’e te ’ā’amu ’utuāfare (hi’o 25.2.3 nō te tahi atu ā ha’amāramaramara’a).

E arata’i te mau peresidenira’a pupu peresibutero ’e Sōtaiete Tauturu i te mau tauto’ora’a tāmahana nō te hiero ’e te ’ā’amu ’utuāfare, ’o tē tauturu i te tāhō’ē i te mau ’utuāfare nō te tau a muri atu (hi’o 8.2.4 ’e 9.2.4). E arata’i te peresidenira’a pupu peresibutero i teie mau tauto’ora’a nō te mau melo o te pupu peresibutero. E arata’i te peresidenira’a Sōtaiete Tauturu i te mau tauto’ora’a nō te mau melo o te Sōtaiete Tauturu. E ’ohipa ’āmui rātou nō te fa’atere i teie mau tauto’ora’a e te ’āpo’ora’a pāroita, i raro a’e i te fa’aaura’a a te ’episekōpo.

Teie i muri nei te mau hōpoi’a a te feiā fa’atere :

• Tauturu i te ’āpo’ora’a pāroita ’ia fa’ananea ’e ’ia fa’atupu haere i te fa’anahora’a nō te hiero ’e te ’ā’amu ’utuāfare a te pāroita (hi’o 25.2.6).

• Ani i te hō’ē tauturu ’ohipa hiero ’e ’ā’amu ’utuāfare o te pāroita ’ia tauturu i te tahi mau melo ta’a ’ē ’ia ’imi mai ’e ’ia fa’aineine i te mau i’oa o te mau tupuna tei pohe nō te mau ’ōro’a o te hiero (hi’o 25.4.1). E rōtahi ta’a ’ē teie mau tauto’ora’a i ni’a ia rātou tei fa’ari’i a’enei i tō rātou pi’ira’a misiōnare, ’e ia rātou tei ’ore i fa’ari’i i tō rātou ’ōro’a hiero.

• E ara ē, ‘ua fa’anahohia te mau tauto’ora’a hiero ’e te ’ā’amu ’utuāfare ’e ’ua fa’a’itehia i roto i te mau rurura’a ’āpo’ora’a pāroita ’e i roto i te mau rurura’a fa’aaura’a ’ohipa hiero ’e ’ā’amu ’utuāfare a te pāroita.

• Arata’i i te ’ohipa a te ta’ata fa’atere hiero ’e te ’ā’amu ’utuāfare o te pāroita. Mai te mea ’aita teie ti’a fa’atere i pi’ihia, e rave ïa te hō’ē melo nō te peresidenira’a pupu peresibutero i teie ti’ara’a (hi’o 25.2.3).

• I te vāhi e nehenehe, ’a fa’aue i te mau tauturu ’ohipa hiero ’e ’ā’amu ’utuāfare o te pāroita ’ia tāvini i te pū FamilySearch (hi’o 25.3.6).

E fa’aue nā peresideni tāta’itahi nō te pupu peresibutero ’e te Sōtaiete Tauturu i te hō’ē melo nō te peresidenira’a ’ia tauturu i te arata’i i te ’ohipa hiero ’e te ’ā’amu ’utuāfare i roto i te pāroita. E rave ’āmui teie nā melo nō te peresidenira’a i te ’ohipa. E hi’o rātou ē tē fa’atupuhia ra te mau rurura’a fa’aaura’a ’ohipa hiero ’e ’ā’amu ’utuāfare a te pāroita (hi’o 25.2.7).

E paraparau te ’episekōpora’a i te peresideni titi nō te fa’aoti ē, e pi’i ānei i te hō’ē ti’a fa’atere hiero ’e te ’ā’amu ’utuāfare nō te pāroita. Mai te mea e fa’aoti rātou ’ia amohia teie pi’ira’a, e paraparau te ’episekōpora’a i te mau peresideni pupu peresibutero ’e te Sōtaiete Tauturu nō te fa’aoti ’o vai tē pi’i atu. ’Ia mau teie ta’ata i te Autahu’ara’a a Melehizedeka. Mai te mea ’aita teie ti’a fa’atere i pi’ihia, e amo ïa te hō’ē melo nō te peresidenira’a pupu peresibutero i teie ti’ara’a.

E turu te ti’a fa’atere hiero ’e te ’ā’amu ’utuāfare o te pāroita i te mau peresidenira’a pupu peresibutero ’e Sōtaiete Tauturu i roto i tā rātou mau hōpoi’a nō te hiero ’e nō te ’ā’amu ’utuāfare. Teie ato’a i muri nei tāna mau hōpoi’a :

• Fa’aau i te mau tauto’ora’a hiero ’e te ’ā’amu ’utuāfare e te feiā fa’atere nō te fa’anahora’a pāroita, tae noa atu i te mau peresidenira’a pupu feiā ’āpī ’e piha tamāhine.

• Fa’atere i te mau rurura’a fa’aaura’a ’ohipa hiero ’e ’ā’amu ’utuāfare a te pāroita (hi’o 25.2.7).

• Haere i te mau ’āpo’ora’a pāroita mai te mea e anihia.

• Tauturu i te ’āpo’ora’a pāroita ’ia fa’ananea ’e ’ia fa’atupu haere i te fa’anahora’a nō te hiero ’e te ’ā’amu ’utuāfare a te pāroita (hi’o 25.2.6).

• Ha’api’i i te mau tauturu ’ohipa hiero ’e ’ā’amu ’utuāfare. Fa’aau i tā rātou mau tauto’ora’a nō te tauturu i te mau melo ’ia ’imi mai i te mau i’oa o te mau tupuna ’e ’ia rave i te mau ’ōro’a o te hiero nā ni’a i tō rātou i’oa.

• ’Ohipa ’e te fa’atere misiōni pāroita ’e te mau misiōnare nō te tauturu ia rātou e ha’api’i ra i te ’evanelia, i te mau melo ’āpī ’e i te mau melo e ho’i mai nei, ’ia fa’aō ia rātou i roto i te ’ohipa hiero ’e te ’ā’amu ’utuāfare (hi’o 23.2 ’e 23.3).

E tāvini te mau tauturu ’ohipa hiero ’e ’ā’amu ’utuāfare o te pāroita i raro a’e i te fa’aterera’a a te ti’a fa’atere hiero ’e ’ā’amu ’utuāfare o te pāroita. E pi’i te ’episekōpora’a i teie mau melo nō te tāvini. E nehenehe te feiā pa’ari ’e te feiā ’āpī ’ia pi’ihia. E nehenehe te mau peresideni pupu peresibutero, Sōtaiete Tauturu, ’e Feiā ’Āpī Tamāhine e hōro’a mai i te i’oa o ’oia tē nehenehe e tāvini.

E ha’api’i te mau tauturu i te ta’ata ma te rāve’a ’ōhie e nāhea i te ’āmui i roto i te ’ohipa hiero ’e te ’ā’amu ’utuāfare, ’o tē tauturu i te tāhō’ē i te mau ’utuāfare nō te tau a muri atu. E rōtahi ta’a ’ē rātou i ni’a i te feiā ’āpī, i te mau melo ’āpī ’e ’o tē ho’i mai nei, ’e i te mau tuahine ’e te mau taea’e tei ’ore i fa’ari’i i tō rātou ’ōro’a hiero. Teie te mau hōpoi’a a te mau tauturu :

• Tauturu i te mau melo ’ia fa’aineine nō te fāri’i i te mau ’ōro’a hiero ’e ’ia rave i te mau fafaura’a o te hiero.

• Tauturu i te mau melo ’ia ’ite i te mau ha’amaita’ira’a nō te ’itera’a mai i tō rātou mau tupuna ’e nō te ravera’a i te mau ’ōro’a hiero nā ni’a i tō rātou i’oa.

• ’Āmui i roto i te mau ’āpo’ora’a fa’aaura’a nō te hiero ’e te ’ā’amu ’utuāfare (hi’o 25.2.7).

• Tāvini i roto i te hō’ē pū ’ā’amu ’utuāfare i reira, ’ia fa’auehia (hi’o 25.3.6).

’Ua tāpurahia te mau mātēria nō te tauturu i te mau tauturu ’ohipa hiero ’e ’ā’amu ’utuāfare i roto i te 25.4.1 ’e te 25.4.2.

E fa’ananea ’e e fa’atupu haere te mau melo o te ’āpo’ora’a pāroita, nā roto i te pure, i te hō’ē fa’anahora’a nō te hiero ’e te ’ā’amu ’utuāfare a te pāroita. Nō te mau ha’amāramaramara’a nō ni’a i te fa’anahora’a, hi’o 25.2.6.

E nehenehe te ’episekōpo e ani i te ti’a fa’atere hiero ’e ’ā’amu ’utuāfare o te pāroita ’ia haere mai i te mau ’āpo’ora’a o te ’āpo’ora’a pāroita.

Teie i muri nei te mau hōpoi’a a te mau melo o ’āpo’ora’a pāroita :

• Tauturu i te mau melo tāta’itahi ’ia fa’aineine nō te rave i te mau fafaura’a ’e te Atua maoti te fa’ari’ira’a i te mau ’ōro’a o te hiero (hi’o 27.1).

• Fa’aitoito i te tā’āto’ara’a o te feiā ’āpī ’e te mau ta’ata pa’ri, tae noa atu te mau melo ’āpī, ’ia fa’ari’i i te hō’ē parau fa’ati’a mana nō te hiero (hi’o 26.0).

• Fa’aitoito i te mau melo ’ia ha’amori i roto i te fare o te Fatu, te pinepine a’e e ti’a ia rātou.

• Ani i te mau ta’ata ’e i te mau ’utuāfare ’ia ha’api’i mai i te ha’api’ira’a tumu ’e i te mau ha’amaita’ira’a nō te ’āmuira’a mai i te ’ohipa nō te tāhō’ēra’a i te mau ’utuāfare nō te tau a muri atu. Tei roto i teie ’ohipa te ha’api’ira’a i te parau nō te mau tupuna ’e te ravera’a i te mau ’ōro’a o te hiero nā ni’a i tō rātou i’oa.

• Turu i te mau metua i roto i te ha’api’ira’a i tā rātou mau tamari’i i te ha’api’ira’a tumu nō te ’ohipa tāhō’ēra’a i te mau ’utuāfare nō te tau a muri atu. Tei roto ato’a te mau ha’amaita’ira’a nō te mau fafaura’a ’e te mau ’ōro’a o te hiero ’e te ravera’a i te mau ’ōro’a o te hiero nō tō rātou mau tupuna i pohe.

• Ha’api’i pinepine i te mau parau tumu o teie ’ohipa i roto i te mau rurura’a a te ’Ēkālesia.

Hi’o pene 26nō te ha’amāramaramara’a nō ni’a i te parau fa’ati’a nō te hiero.

E mea ti’a i te pāroita tāta’itahi ’ia fa’anaho i te hō’ē ’ōpuara’a ’ōhie nō te hiero ’e nō te ’ā’amu ’utuāfare. E tauturu teie fa’anahora’a i te mau melo o te pāroita, tae noa atu i te mau tamari’i ’e i te feiā ’āpī, ’ia fa’aineine nō te ha’amori i roto i te fare o te Fatu ’e ’ia ’āmui pinepine i roto i te ’ohipa hiero ’e te ’ā’amu ’utuāfare mai te mea e nehenehe.

E tauturu te mau peresideni pupu peresibutero ’e Sōtaiete Tauturu i te ’āpo’ora’a pāroita ’ia fa’anaho i te reira ’ōpuara’a. E tauturu ato’a te ti’a fa’atere ’ohipa hiero ’e ’ā’amu ’utuāfare o te pāroita. Nō te fa’ananea i te fa’anahora’a :

• E feruri nā roto i te pure i te mau hina’aro o te mau melo ’e i te mau rāve’a e vai ra.

• E ’imi i te mau ’ohipa e rave i roto i te roara’a o te matahiti.

• E fa’ata’a nāhea i te fa’atupu haere i te fa’anahora’a ’e i te rave i te mau fa’auera’a nō te reira.

Teie te tahi mau hi’ora’a nō te fa’anahora’a tei tāpurahia i raro nei :

• Tauturu i te mau melo ta’a ’ē ’ia māramarama i te mau ha’amaita’ira’a nō te ha’amorira’a i roto i te fare o te Fatu.

• Tauturu i te mau melo ’ia fa’aineine nō te fa’ari’i i te mau ha’amaita’ira’a o te mau ’ōro’a o te hiero.

• Tauturu i te mau melo ’ia fa’a’ohipa i te mau ’ōro’a ineine nō te ’āfa’i i te i’oa o te hō’ē tupuna i te hiero (hi’o 25.4.1).

• Tauturu i te mau melo ’ia fa’a’ohipa i te tahua natirara ’aore rā te fa’aaura’a rorouira FamilySearch nō te tu’u i te mea tā rātou i ’ite nō ni’a i te mau fēti’i pohe tei tītauhia te mau ’ōro’a (hi’o 25.4.1).

• Fa’a’ō i te mau melo ’āpī ’e i te mau melo e ho’i mai nei, i te feiā ’āpī ’e i te mau tamari’i i roto i te ’ohipa hiero ’e te ’ā’amu ’utuāfare. Te tauturu nō te i’oa ’utuāfare, e rāve’a ’ōhie ïa nō te feiā fa’atere nō te tauturu i teie mau melo ’ia fa’aineine i te mau iʼoa ʼutuāfare nō te fa’ari’i i te mau ’ōro’a (hi’o 25.4.1).

• Tauturu i te mau tamari’i Paraimere ’ia fa’aineine nō te fa’ari’i i te hō’ē parau fa’ati’a hiero ’e nō te ha’amori tāmau noa i roto i te fare o te Fatu mai te mea e nehenehe. E fa’atupu te peresidenira’a Paraimere i te hō’ē rurura’a fa’aineinera’a nō te hiero ’e te autahu’ara’a i te matahiti tāta’itahi (hi’o 12.1.7 ’e 12.2.4).

’Eiaha te fa’anahora’a nō te hiero ’e te ’ā’amu ’utuāfare a te pāroita ’ia ha’amau i te fāito nūmera ’aore rā i te mau rāve’a rorouira e fa’a’ite i te fāito ha’amorira’a hiero (hi’o 25.1.1).

E hi’opo’a ’e e fa’ati’a te ’episekōpo i te ’ōpuara’a. Nā te mau melo o te ’āpo’ora’a pāroita e arata’i i te fa’atupu-haere-ra’a i te reira. E fa’aho’i rātou i te parau nō ni’a i te nu’ura’a te ’ohipa i mua i roto i te mau ’āp’oora’a pāroita. E fa’a’āpi ato’a rātou i te fa’anahora’a mai te mea e hina’arohia.

2:49

E fa’atupuhia mai tera noa ’e te tāmau te mau ’āpo’ora’a potopoto nō ni’a i te hiero ’e te ’ā’amu ’utuāfare. E arata’i te ti’a fa’atere nō te ’ohipa hiero ’e te ’ā’amu ’utuāfare o te pāroita i teie mau rurura’a.

Teie te tahi atu ā mau ta’ata tē ani-manihini-hia :

• Te mau melo o te mau peresidenira’a Sōtaiete Tauturu, pupu peresibutero ’e Paraimere tei fa’auehia.

• Te hō’ē rima tauturu nō te pupu tahu’a (’e ’aore rā, te peresideni o te pupu ha’api’i ’e ’aore rā diakono, mai te mea ’aita e tahu’a i roto i te pāroita).

• Hō’ē melo nō te peresidenira’a o te piha feiā ’āpī tamāhine pa’ari a’e.

• Te mau tauturu ’ohipa hiero ’e ’ā’amu ’utuāfare.

Te feiā ato’a e tae mai, nā reira ato’a te feiā ’āpī, ’o tē ’āpo’o ’āmui ’ei tino ’aifāito. E fa’atumu teie mau rurura’a i ni’a i te mau hina’aro o te ta’ata hō’ē ’e nāhea rātou e ha’amaita’ihia ai nō te ’āmuira’a i roto i te ’ohipa hiero ’e te ’ā’amu ’utuāfare. E rōtahi ta’a ’ē rātou i ni’a i te feiā ’āpī, i te mau melo ’āpī ’e ’o tē ho’i mai nei, ’e i te mau tuahine ’e te mau taea’e tei ’ore i fa’ari’i i tō rātou ’ōro’a hiero. I te rahira’a o te taime, e matutu te mau rurura’a i te mau tumu parau i muri nei :

• Nāhea i te fa’atupu haere i te fa’anahora’a nō te hiero ’e te ’ā’amu ’utuāfare a te pāroita (hi’o 25.2.6).

• Nāhea i te tauturu i te tahi mau melo ta’a ’ē o te pāroita ’ia fa’aineine nō te fa’ari’i i tō rātou mau ’ōro’a o te hiero.

• Nāhea i te tauturu i te tahi mau melo ta’a ’ē o te pāroita ’e tā rātou mau tauto’ora’a hiero ’e ’ā’amu ’utuāfare.

E nehenehe teie mau ’āpo’ora’a e fa’atupuhia nā roto i te tae tinora’a mai te ta’ata ’aore rā, nā te ātea noa. E nehenehe ato’a te fa’aaura’a e tupu nā roto i te tahi atu mau rāve’a, mai te niuniu paraparau ’e te mau pupu poro’i pāpā’i.

’A tūtava i te pe’e i te mau parau tumu o te ’ohipa ’e te ti’a’aura’a i roto i te 4.4.5. E nehenehe te hō’ē ta’ata i roto i te rurura’a e fa’auehia ’ia pāpa’i ’e ’ia fa’aha’amana’o i te pupu i te mau ’ohipa i ’ōpuahia.

E nehenehe te mau ’āma’a na’ina’i e mā’iti ’ia rave i tā rātou fa’aaura’a ’ohipa hiero ’e ’ā’amu ’utuāfare i roto i te ’āpo’ora’a ’āma’a.

I raro a’e i te arata’ira’a a te ’episekōpo, e fa’anahohia te ha’api’ira’a fa’aineinera’a nō te hiero nō te tauturu i te mau melo ’ia fa’aineine i te rave i te mau fafaura’a ’a fāri’i ai rātou i te mau ’ōro’a hiero. E fa’aterehia teie mau ha’api’ira’a i rāpae’au i te mau purera’a tāmau i te Sābati i te hō’ē taime e au i te mau melo. E nehenehe te reira e fa’atupuhia i roto i te hō’ē fare purera’a ’aore rā i roto i te hō’ē fare.

E mā’iti te mau melo o te ’āpo’ora’a pāroita nā roto i te pure i te mau melo o te ’āmui mai i roto i te ha’api’ira’a tāta’itahi. E riro teie mau ha’api’ira’a ’ei tauturura’a ta’a ’ē nō te mau ta’ata i muri nei :

• Te mau melo ’āpī

• Te mau melo e fa’aineine ra nō te fāri’i i tō rātou iho ’ōro’a hiero ’aore rā ’ia tā’atihia

• Te mau melo e ho’i fa’ahou mai ra i te ’ohipara’a a te ’Ēkālesia

• Te mau melo tei fāri’i a’e na i tō rātou iho ’ōro’a hiero tei ’ore i fa’a’āpī i tā rātou parau fa’ati’a nō te hiero

E pi’i te ’episekōpora’a hō’ē ’orometua ’aore rā hau atu nō te fa’aineinera’a hiero. Te mau ha’api’ira’a ’e te mau arata’ira’a nō te fa’anaho i te ha’api’ira’a tei roto ïa i te E noa’a ai i te mana nō ni’a mai ra : Buka nā te ’orometua ha’api’ipi’ira’a nō te fa’aineinera’a nō te haerera’a atu i te hiero. E hōro’ahia nā te mau pīahi te buka Fa’aineinera’a nō te tomo i roto i te hiero mo’a Nō te ’imira’a ta’ata hō’ē ’e te mau mātēria ha’api’ira’a, hi’o temples.ChurchofJesusChrist.org.

Tē mau nei te peresideni titi i te mau tāviri nō te ’ohipa a te Atua nō te fa’aorara’a ’e te fa’ateiteira’a i roto i te titi. Teie i muri nei tāna mau hōpoi’a ’e tā tōna ato’a nā tauturu, nō te tauturu i te tāhō’ē i te mau ’utuāfare nō te tau a muri atu :

• Tauturu i te mau melo ’ia fa’aineine nō te rave i te mau fafaura’a mo’a ’a fa’ari’i ai i te mau ’ōro’a o te hiero (hi’o 27.1).

• Fa’aitoito i te tā’āto’ara’a o te mau melo, te mau tuahine ’ōtahi iho ā rā ’e te mau taea’e ’ōtahi, ’e rātou tei ’ore i fa’ari’i i tō rātou ’ōro’a hiero, ’ia fa’ari’i i te hō’ē parau fa’ati’a mana ’e ’ia ha’amori i roto i te fare o te Fatu, te pinepine a’e e ti’a ia rātou.

• ’A ha’apāpū ē, e ha’api’i-tāmau-hia te ha’api’ira’a tumu ’e te mau ha’amaita’ira’a nō te tāhō’ēra’a i te mau ’utuāfare nō te tau a muri atu (mai tei fa’a’itehia i roto i te 1.2.4) i roto i te mau rurura’a titi.

• E fa’aitoito i te mau melo ’ia ha’api’i i te parau nō tō rātou mau tupuna ’e ’ia rave i te mau ’ōro’a o te hiero nā ni’a i tō rātou i’oa.

• E arata’i i te mau uiuira’a nō te parau fa’ati’a nō te hiero (hi’o pene 26

I roto i tāna fārereira’a tāmau ’e te peresideni pupu peresibutero tāta’itahi, e paraparau te hō’ē melo nō te peresidenira’a titi i te mau tauto’ora’a a te pāroita nō te tāhō’ē i te mau ’utuāfare nō te tau a muri atu nā roto i te ’ohipa hiero ’e te ’ā’amu ’utuāfare (hi’o 8.3.1). E nehenehe te mau tauturu o te peresidenira’a pupu peresibutero ’e te melo ’āpo’ora’a teitei tei fa’auehia i te pupu e ’āmui ato’a mai.

Tei roto i te tōmite fa’atere o te feiā pa’ari o te titi :

• Te peresidenira’a titi.

• Te peresidenira’a Sōtaiete Tauturu a te titi.

• Te mau melo o te ’āpo’ora’a teitei tei fa’ata’ahia nō te ’ohipa ’e te mau pupu peresibutero.

E ha’api’i ’e e turu teie feiā fa’atere i te mau peresidenira’a pupu peresibutero ’e Sōtaiete Tauturu i roto i tā rātou mau hōpoi’a e au i te mau tauto’ora’a hiero ’e ’ā’amu ’utuāfare (hi’o 25.2.2). E nehenehe e fa’atere i te arata’ira’a nō te pupu ’aore rā, nō te ta’ata hō’ē. E nehenehe te feiā fa’atere nō te ’ohipa hiero ’e te ’ā’amu ’utuāfare o te pāroita e anihia ’ia fa’ari’i i teie arata’ira’a.

Nō te tahi atu ā ha’amāramaramara’a nō ni’a i te mau ’āpo’ora’a a teie tōmite, hi’o 29.3.8.

E nehenehe te peresidenira’a titi e fa’aue i te mau melo o te ’āpo’ora’a teitei ’ia ha’api’i ’e ’ia turu i te mau ta’ata i muri nei i roto i tā rātou mau tauto’ora’a nō te tāhō’ē i te mau ’utuāfare nō te tau a muri atu nā roto i te ’ohipa hiero ’e te ’ā’amu ’utuāfare :

• Te mau peresidenira’a pupu peresibutero

• Te feiā fa’atere nō te ’ohipa hiero ’e te ’ā’amu ’utuāfare o te pāroita

• Te mau tauturu ’ohipa hiero ’e ’ā’amu ’utuāfare o te titi

• Te mau ta’ata fa’aau ’ohipa nō te pū FamilySearch

E fa’auehia te hō’ē melo o te ’āpo’ora’a teitei ’aore rā hau atu, ’ia arata’i i teie mau tauto’ora’a. Terā rā, e amo te mau melo o te ’āpo’ora’a teitei ato’a i teie mau hōpoi’a nō te mau pāroita ’e te mau pupu autahu’ara’a tei fa’ata’ahia nā rātou.

E nehenehe te mau melo o te ’āpo’ora’a teitei e tauturu i te mau peresidenira’a pupu peresibutero ’e te feiā fa’atere nō te ’ohipa hiero ’e ’ā’amu ’utuāfare o te pāroita, ’ia ha’api’i i te mau tauturu ’ohipa hiero ’e ’ā’amu ’utuāfare o te pāroita. E nehenehe te mau melo o te ’āpo’ora’a teitei e tauturuhia e te mau tauturu ’ohipa hiero ’e ’ā’amu ’utuāfare o te titi.

E nehenehe te peresidenira’a titi e fa’aue i te hō’ē melo ’āpo’ora’a teitei ’ia fa’aau i te mau tauto’ora’a ihotae o te ’ā’amu ’utuāfare a te titi (hi’o 25.4.3). E nehenehe ’oia ’aore rā te tahi atu melo ’āpo’ora’a teitei ’ia fa’auehia e hi’o i te ’ohipa i te mau pū FamilySearch (hi’o 25.3.6).

I raro a’e i te arata’ira’a a te peresideni titi, e ha’api’i ’e e turu te peresidenira’a Sōtaiete Tauturu titi i te mau peresidenira’a Sōtaiete Tauturu pāroita i roto i tā rātou mau tauto’ora’a hiero ’e ’ā’amu ’utuāfare (hi’o 9.2.4).

Nā te mau tauturu ’ohipa hiero ’e ’ā’amu ’utuāfare o te titi e turu i te mau tauto’ora’a hiero ’e ’ā’amu ’utuāfare i roto i te titi. E tāvini rātou i raro a’e i te fa’aterera’a a te peresidenira’a titi ’e te hō’ē melo o te ’āpo’ora’a teitei ’aore rā hau atu, tei fa’auehia nō te mau tauto’ora’a hiero ’e ’ā’amu ’utuāfare.

E turu teie mau tauturu māramarama i te mau melo o te ’āpo’ora’a teitei ’e i te peresidenira’a Sōtaiete Tauturu titi i roto i tā rātou mau tauto’ora’a nō te ha’api’i i te feiā fa’atere o te pāroita i te mau tauto’ora’a hiero ’e ’ā’amu ’utuāfare (hi’o 25.3.3 ’e 25.3.4). E nehenehe ato’a e tu’u i ni’a ia rātou te mau tītaura’a i muri nei :

• Tauturu ’ia ha’api’i ’e ’ia pāturu i te mau melo i roto i te mau pi’ira’a o te ’ohipa hiero ’e te ’ā’amu ’utuāfare o te pāroita.

• Tauturu ’ia fa’aau i te mau tauto’ora’a ihotae (hi’o 25.4.3).

• Tāvini i roto i te mau pū FamilySearch (hi’o 25.3.6).

Mai te mea tē vai ra te mau mātēria, e nehenehe te titi e fa’anaho i te hō’ē pū FamilySearch, ’aore rā hau atu. Te tumu o teie mau pū ’o te tauturura’a ïa i te mau manihini ’ia ’ite mai, ’ia ha’aputu i te parau ’e ’ia tāhō’ē i te mau melo ora o te ’utuāfare ’e tei pohe nā roto i te mau ’ōro’a o te hiero. E fāri’i-poupou-hia te mau ta’ata ato’a ’ia fa’a’ohipa i teie mau pū.

E pi’i te peresideni titi i te hō’ē fa’aau ’ohipa nō te pū FamilySearch nō te hi’o i te mau tauto’ora’a i roto i te pū FamilySearch tāta’itahi. Tei mātauhia, ’o te mau tauturu ’ohipa hiero ’e ’ā’amu ’utuāfare o te titi ’e o te pāroita tei fa’auehia e rave i te ’ohipa i te pū tāta’itahi. E mea tano te mau pū FamilySearch ’ia matara i te mau hora au. E nehenehe te mau pū FamilySearch i pīha’i iho i te mau hiero e fa’atano i tā rātou mau hora i ni’a i te mau hora o te hiero i reira.

Fa’anahora’a ta’a ’ē, e hi’ohia te mau pū FamilySearch rarahi ’e te mau peresidenira’a ārea.

E fa’anaho te ta’ata fa’aau ’ohipa nō te pū FamilySearch i te ’ohipa tāmahana a te pū FamilySearch. E tāvini ’oia i raro a’e i te fa’aterera’a a te peresideni titi ’aore rā te hō’ē melo ’āpo’ora’a teitei tei fa’auehia. Teie te tahi mau hōpoi’a i tāpurahia i raro nei :

• Tauturu i te mau melo ’ia fa’aineine i te mau i’oa ’utuāfare ’ia ti’a ia rātou ’ia rave i te mau ’ōro’a i roto i te fare o te Fatu.

• Fa’aau i te mau ’ohipa a te pū nō te tauturu i te mau melo o te ’Ēkālesia ’e i te huira’atira ’ia ’ite mai ’o vai tō rātou mau tupuna.

• ’Ohipa ’e (1) te melo ’āpo’ora’a teitei tei fa’auehia ’ia turu i te ’ohipa hiero ’e te ’ā’amu ’utuāfare, ’e (2) te tahu’a ihi anoa ha’a o te titi ato’a nō te pāhono i te mau tītaura’a ’ohipa a te pū ’e nō te ’atu’atu i tō te reira mau mātēria.

E hōro’a te Parau arata’i nō te mau ’ohipa i te pū FamilySearch i te arata’ira’a nō te huru e rave i te ’ohipa i te hō’ē pū FamilySearch.

E nehenehe te mau peresidenira’a ārea e pi’i i te mau tauturu ha’amāramarama ārea nō te hiero ’e te ’ā’amu ’utuāfare. Mai te mea e nehenehe, e pi’ihia te hō’ē ta’ata ’aore rā, te tahi nā ta’ata fa’aipoipo nō te ’āpo’ora’a fa’aaura’a tāta’itahi. E tavini te mau tauturu ha’amāramarama e toru ē tae atu e pae matahiti.

E nehenehe te tauturu ha’amāramarama ārea, e ta’ata hō’ē ānei ’aore rā e nā ta’ata fa’aipoipo, e fa’ata’ahia nō te turu i te mau tauto’ora’a a te tahi atu mau tauturu ha’amāramarama ārea tei fa’auehia i te mau ’āpo’ora’a fa’aaura’a o te ārea.

E nehenehe te peresidenira’a ārea e fa’ata’a i te mau Hitu Ahuru ārea nō te fa’aau i te ’ohipa a teie mau tauturu ha’amāramarama i roto i te mau ’āpo’ora’a fa’aaura’a. Tei ni’a te ’ohipa a te mau tauturu ha’amāramarama i te ’āna’ira’a o te mau fā a te ārea.

Mai tei arata’ihia e te peresidenira’a ārea ’aore rā te Hitu ’Ahuru ārea i fa’auehia, e tauturu te mau tauturu ha’amāramarama i te mau peresideni titi ’ia rave i tā rātou mau hōpoi’a nō te tauturu i te tāhō’ē i te mau ’utuāfare nō te tau a muri atu nā roto i te ’ohipa hiero ’e te ’ā’amu ’utuāfare (hi’o 25.3.1). E tauturu te mau tauturu ha’amāramarama i te mau peresideni titi nō te ha’api’ira’a i te mau ta’ata e tāvini nei i roto i te mau pi’ira’a i muri nei, nō ni’a i tā rātou mau hōpoi’a :

• Te mau melo o te ’āpo’ora’a teitei

• Te mau peresidenira’a Sōtaiete Tauturu o te titi

• Te mau tōmite fa’atere nō te feiā pa’ari o te titi

• Te mau tauturu ’ohipa hiero ’e ’ā’amu ’utuāfare o te titi

• Te mau ta’ata fa’aau ’ohipa nō te pū FamilySearch

E nehenehe te mau tauturu ha’amāramarama e fa’ata’ahia ’ia tauturu i te mau peresidenira’a titi ’ia fa’aineine i te mau melo nō te ha’amori i roto i te mau hiero ’āpī tei fa’a’itehia te patura’a i roto i to rātou tuha’a fenua. Te tahi atu mau hōpoi’a, o te ha’api’ira’a ïa i te feiā fa’atere o te titi i te mau parau tumu ’e te mau ravera’a o te ’ohipa hiero ’e te ’ā’amu ’utuāfare. Mai te ’itera’a :

• Nāhea i te tauturu i te mau melo i tō rātou taime mātāmua nō te mau bāpetizora’a ’e te mau ha’amaura’a ta’ata mono (hi’o 23.2).

• Nāhea i te tauturu i te mau melo e fa’aineine ra nō te fa’ari’i i tō rātou iho ’ōro’a hiero ’aore rā ’ia tā’atihia (hi’o 25.2.8, 27.2, 27.3, ’e 27.4).

• Nāhea i te fa’anaho i te ’ohipa hiero ’e te ’ā’amu ’utuāfare i roto i te titi ’e te mau pāroita (hi’o 25.2).

• Nāhea i te pāturu i te mau peresidenira’a pupu peresibutero ’e Sōtaiete Tauturu i roto i tā rātou mau hōpoi’a (hi’o 25.2.2).

• Nāhea te ravera’a i teie ’ohipa e ha’amaita’i ai i te mau tamari’i ’e i te feiā ’āpī (hi’o 10.2.4, 11.2.4, and 12.2.4).

• Nāhea i te fa’atupu i te mau rurura’a fa’aaura’a maitata’i (hi’o 25.2.7).

• Nāhea i te tauturu i te feiā fa’atere o te pāroita ’ia ha’amau i te hō’ē fa’anahora’a nō te hiero ’e te ’ā’amu ’utuāfare manuia (hi’o 25.2.6).

Nō te arata’ira’a nō ni’a i teie ’ohipa, hi’o Arata’i fa’aterera’a nō te hiero ’e te ’ā’amu ’utuāfare.

Tē fa’afāna’o nei te FamilySearch i te mau mātēria nō te tauturu i te mau melo ’ia ’imi ’e ’ia fa’aineine i te mau i’oa ’utuāfare, ’ia nehenehe ia rātou ’ia ’āmui atu i roto i te mau ’ōro’a nō tō rātou mau tupuna i pohe. E tāhō’ē teie mau ’ōro’a i te mau ’utuāfare nō te tau a muri atu. Teie i muri nei te mau mātēria FamilySearch :

• FamilySearch.org. Teie te tahua natirara a te ’Ēkālesia nō te tauturu i te mau melo ’ia ’imi ’e ’ia fa’aineine i te i’oa o tō rātou mau tupuna nō te mau ’ōro’a o te hiero.

• Fa’aaura’a rorouira Tumu rā’au ’utuāfare. E rave rahi ’ohipa i ni’a i te tahua natirara FamilySearch e roa’a ato’a i roto i teie fa’aaura’a rorouira ’āfa’ifa’i.

• ’Ōro’a ineine. E fa’afāna’o teie mauiha’a i te hō’ē rāve’a ’ōhie nō te fa’ari’i i te mau i’oa ’utuāfare ’aore rā te tahi atu i’oa nō te ’āfa’i i te hiero. E roa’a te reira i ni’a ia FamilySearch.org ’e i te fa’aaura’a rorouira Tumu rā’au ’utuāfare.

• Tauturu nō te i’oa ’utuāfare [Family Name Assist]. E fa’a’ohipa te feiā fa’atere i teie mauiha’a nā ni’a i te natirara nō te tauturu i te mau melo ’āpī ’e ’o tē ho’i mai nei, nā reira ato’a te feiā ’āpī, ’ia fa’aineine ’ōhie ’e ’ia nene’i i te mau tāreta i’oa ’utuāfare nō te mau bāpetizora’a ’e te mau ha’amaura’a ta’ata mono.

• Fa’aaura’a rorouira Ha’amana’o [Souvenirs]. E tauturu teie fa’aaura’a rorouira i te mau ta’ata ’e i te mau ’utuāfare ’ia ’ite mai, ’ia fa’a’ite ’e ’ia fa’aherehere i te mau ’ā’amu ’e te mau hōho’a o te mau tupuna.

Hi’o FamilySearch apps nō te mau fa’aaura’a rorouira e vai ra.

E tauturu te buka iti Tō’u ’utuāfare : Te mau ’ā’amu ’o tē ’āmui ia tātou i te ta’ata ’ia ha’aputu ’e ’ia fa’aherehere i te mau i’oa ’utuāfare ’e i te mau ’ā’amu. E nehenehe ato’a te reira e tauturu i te mau melo ’ia ha’amata i te fa’aineine i te mau i’oa ’utuāfare nō te mau ’ōro’a o te hiero.

E nehenehe e poro’i i te mau nene’ira’a pāpie i ni’a ia store.ChurchofJesusChrist.org.

Maoti te fa’aaura’a rorouira Get Involved [Fa’aō iāna] ’aore rā te tāpura ’ohipa o te Get Involved [Fa’aō iāna] i ni’a ia FamilySearch.org e ti’a ai i te mau ihotae e ’āmui i roto i te mau ’ohipa i muri nei :

• Te tānūmerara’a, ’o te ’ohipa patapatara’a ïa i te mau parau tuatāpapara’a pāpa’i ’ei papa ’itepiri e nehenehe e mā’imi i ni’a ia FamilySearch.org.

• Hi’opo’a i te mau pāpa’a parau nō te tanora’a.

• Ha’amaita’i i te tanora’a o te Tumu rā’au ’utuāfare.

Nō te feiā e ’āmui mai i roto i teie mau ’ohipa, e ti’a ia rātou ’e ia vetahi ’ē ’ia ’ite mai i tō rātou mau tupuna ’e ’ia rave i te mau ’ōro’a o te hiero nā ni’a i tō rātou i’oa.

E nehenehe te mau ta’ata ato’a e ’āmui i roto i te mau ’ātivite ihotae maoti te fa’aaura’a rorouira Get Involved ’aore rā te tāpura ’ohipa Get Involved i ni’a ia FamilySearch.org. E nehenehe te reira e riro ’ei ’itera’a ta’a ’ē nō te otira’a te ’ohipa i te ravehia nō rātou i muri nei :

• Te Feiā ’āpī

• Te Feiā ’āpī pa’ari

• Te mau melo e’ita e nehenehe e haere tāmau i te mau rurura’a a te ’Ēkālesia

• Te mau melo ’āpī

• Te mau tuiho ato’a

E nehenehe te peresidenira’a titi e fa’ata’a i te tauturu māramarama titi nō te ’ohipa hiero ’e te ’ā’amu ’utuāfare ’aore rā, te hō’ē melo ’āpo’ora’a teitei nō te fa’aau i teie ’ohipa.

Teie te mau rāve’a e ’itehia ai te mau rave ’ohipa hiero mai teie i muri nei :

• Te mau melo i mana’ohia e te ’episekōpo ’aore rā e te tahi atu ti’a fa’atere pāroita

• Te mau melo e fārerei atu i te ’episekōpo nō ni’a i te tāvinira’a

• Te mau melo i mana’ohia e te peresideni hiero, te matorona, ’aore rā te tahi atu ā ti’a fa’atere hiero

• Te mau melo e fa’aineine nei nō te reira ’aore rā tei ho’i mai nā roto mai i te tāvinira’a misiōnare (hi’o i te pene 24)

E hāponohia te mau i’oa o te mau rave ’ohipa hiero tei mana’ohia mā tē fa’a’ohipa i te Mauha’a nō te mau rave ’ohipa hiero i mana’ohia. E matara teie mauha’a nō te mau ’episekōpo, te mau peresideni titi ’e te mau peresidenira’a hiero. ’Ua fa’ata’ahia i raro nei te fa’anahora’a nō te hāponora’a i te mau i’oa.

’Ia ’ite ana’e te mau melo o te hō’ē peresidenira’a hiero i te hō’ē rave ’ohipa maita’i nō te hiero, e hāpono rātou te i’oa o te reira tuiho i te ’episekōpo mā tē fa’a’ohipa i te Mauha’a nō te mau rave ’ohipa hiero i mana’ohia.

’Ia mana’o ana’e te hō’ē ’episekōpo i te hō’ē rave ’ohipa maita’i nō te hiero ’aore rā e fāri’i ’oia i te hō’ē i’oa i mana’ohia e te hō’ē peresideni hiero, e paraparau ’oia e te reira melo nō ni’a i teie fāna’ora’a nō te tāvinira’a. E hi’opo’a ’oia i te mau tītaura’a nō te mau rave ’ohipa hiero (hi’o 25.5.2). Mai te mea e iho te mana’o i roto i te ’episekōpo ’e i te melo ē, ’ua ti’a i te taime, e fa’a’ī ’e e hāpono te ’episekōpo i te parau anira’a mā tē fa’a’ohipa i te Mauha’a nō te mau rave ’ohipa hiero i mana’ohia. ’Ia ta’a maita’i i te melo ē, ’aita te hō’ē parau anira’a e ha’apāpū ē, e pi’ihia ’aore rā e fā’ri’ihia ’oia ’ei rave ’ohipa nō te hiero.

E hi’opo’ahia te parau anira’a i muri iho e te peresideni titi. Mai te mea e fa’ari’i te peresideni titi i te parau anira’a, e hāpono ’oia i te reira i te peresideni hiero nō te hi’opo’ara’a maoti te Mauha’a nō te mau rave ’ohipa hiero i mana’ohia.

Nō te mau melo tei pi’ihia ’aore rā tei fa’ata’ahia ’ei rave ’ohipa hiero, e fafau rātou ’ia tāvini tāmau i roto i te hiero i te mau hepetoma ato’a. ’Eiaha te feiā fa’atere e hōro’a i te tahi atu mau pi’ira’a e ha’afifi i te ti’ara’a o te mau melo ’ia tāvini i roto i te hiero.

E fa’a’ite ato’a te Mauha’a nō te mau rave ’ohipa hiero i mana’ohia i te mau ’episekōpo ’e i te mau peresideni titi i te hō’ē tāpura nō te mau melo ato’a nō tā rātou iho pāroita ’aore rā titi ’o tē tāvini nei ’ei rave ’ohipa hiero.

E tauturu te mau rave ’ohipa hiero i te ravera’a i te mau ’ōro’a ’aore rā i te tauturura’a i te mau ’ohipa a te hiero, mai te piha tōro’a, te vāhi pu’ara’a ’ahu ’aore rā te mau ’ohipa nō te ’āua. ’Ia tu’uhia tōna i’oa ’ei rave ’ohipa hiero, tītau-roa-hia i te hō’ē melo ’ia pāhono i te mau tītaura’a i muri nei :

• Fa’aea i roto i te mata’eina’a o te hiero i reira ’oia e tāvini ai.

• Fa’ari’i i tōna iho ’ōro’a hiero, fa’atura i te mau fafaura’a o te hiero ’e mau i te hō’ē parau fa’ati’a mana nō te hiero.

• E ’itera’a pāpū pūai nō te ’evanelia a Iesu Mesia tei fa’aho’ihia mai.

• E tino maita’i nō te i tāna ’ohipa i fa’auehia i roto i te hiero. Tītau-roa-hia te tino maita’i nō te rave ’ohipa e tāvini i te mau ta’ata haere hiero, ’aore rā ’o tē fa’atere i te mau ’ōro’a, nō te rave i te reira ma te tauturu-’ore-hia.

• Te vai ti’a-mā noa nei nō te fa’atura i te ’Ēkālesia ’e i roto i tōna ’āmuira’a ’oire.

• E ’ohipa au maita’i e te tahi atu mau ta’ata.

• E nehenehe e ti’aturi iāna ’e e ta’ata ’ēa maita’i.

• ’Aita noa a’e e fa’a’itera’a i tāpa’ohia i ni’a i tāna parau melora’a.

Hau atu, e ha’apāpū te ’episekōpo i te mau mea i muri nei :

• Mai te mea ’ua tā’ōti’a-pāpū-hia te ti’ara’a melo o te hō’ē ta’ata, e nehenehe e tu’u i tōna i’oa ’ei rave ’ohipa hiero ’eiaha rā nā mua a’e i te ma’irira’a e pae matahiti i muri a’e i te tātarara’ahia te mau ’ōpanira’a. (Hi’o 32.11.3 ’e 32.16.1.)

• Mai te mea ’ua ’īritihia te ti’ara’a melo o te hō’ē ta’ata ’aita i fa’ari’i i tōna ’ōro’a hiero, ’aore rā ’ua fa’aho’i i tōna ti’ara’a melo, e nehenehe e tu’u i tōna i’oa ’ei rave ’ohipa hiero ’eiaha rā nā mua a’e i te ma’irira’a e pae matahiti i muri a’e i te fa’ari’i-fa’ahou-ra’a-hia i roto i te ’Ēkālesia. (Hi’o 32.11.4, 32.14.9, 32.16.1, ’e 32.16.2.)

• Mai te mea ’ua ’īritihia te ti’ara’a melo o te hō’ē ta’ata ’aita i fa’ari’i i tōna ’ōro’a hiero, ’aore rā ’ua fa’aho’i i tōna ti’ara’a melo, e nehenehe e tu’u i tōna i’oa ’ei rave ’ohipa hiero ’eiaha rā nā mua a’e i te ma’irira’a e pae matahiti i muri a’e i te fa’ari’ira’a i te fa’aho’i-fa’ahou-ra’a o te mau ha’amaita’ira’a. (Hi’o 32.11.4, 32.14.9, ’e 32.17.2.)

I muri a’e i tō te peresideni hiero fa’ari’ira’a i te parau anira’a nō te hō’ē ta’ata ’ei rave ’ohipa hiero, e uiui te hō’ē melo nō te peresidenira’a hiero ’aore rā te ta’ata tāna e tono atu i te reira ta’ata. Mai tei fa’auruhia, e pi’i te ta’ata e fa’atere ra i te uiuira’a i te feiā e nehenehe e tāvini ’ei rave ’ohipa hiero ma te fa’ata’a ia rātou.