Te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai

E mau tamari’i pā’āto’a tātou nā te Metua i te ao ra tei here maita’i roa i tāna mau tamari’i. Tē pūpū nei ’oia i te mau ta’ata ato’a i te rāve’a ’ia ’ī rātou i tōna here nā roto ia Iesu Mesia ’e tāna ’evanelia (hi’o Ioane 3:16 ; 2 Nephi 26:24–28 ; Alama 26:37 ; Te mau Hīro’a Fa’aro’o 1:3).

Hō’ē rāve’a nā tātou nō te fa’a’ite i tō tātou here i te Atua, ’o te herera’a ïa ’e te tāvinira’a i tāna mau tamari’i (hi’o Mataio 22:36–39 ; 25:40). E fa’auru teie here ia tātou ’ia fārerei i te feiā ’ati a’e ia tātou ’e ’ia toro i te rima i te mau ta’ata nō te mau huru orara’a ato’a, te mau ta’ere ’e te mau ti’aturira’a (hi’o Te ’Ohipa 10:34 ; 2 Nephi 26:33 ; Iakoba 2:17). E pure tātou ma te ’imi i te mau rāve’a nō te fa’a’ite i te ’evanelia ia vetahi ’ē (hi’o Alama 6:6 ; 8:10).

Nō tō tātou here i te Atua ’e i tāna mau tamari’i, e hina’aro iho ā tātou e fa’a’ite i te mau ha’amaita’ira’a tāna i hōro’a mai ia tātou (hi’o Ioane 13:34–35) ’e e tauturu i te ha’aputuputura’a ia ’Īserā’ela. E ’imi tātou i te tauturu i te ta’ata ’ia putapū i te ’oa’oa tā tātou e putapū nei (hi’o Alama 36:24). ’Ei pipi nā Iesu Mesia, e fa’ateitei tātou i tōna māramarama (hi’o 3 Nephi 18:24–25). E parau tātou i mua i te ta’ata nō ni’a i te Fa’aora ’e tōna mana i roto i tō tātou orara’a (hi’o Te Ha’api’ira’a Tumu ’e te mau Fafaura’a 60:2).

E pūpū tātou i tō tātou here, i te mau parau mau o te ’evanelia, i tō tātou taime, i tā tātou i ’ite, ’e i te mau fa’anahora’a a te ’Ēkālesia nō te ha’amaita’i i te mau tamari’i a te Atua ’e nō te tauturu ia rātou ’ia ha’afātata atu ā i te Fa’aora. E fa’a’ite tātou i teie mau mea nā roto i te mau rāve’a tano noa ’e mai terā noa, i roto i tā tātou mau ’āpaura’a i te ta’ata, ’e nā ni’a i te natirara ’e nā roto i te tahi atu mau ’ohipa.

E nehenehe te mau pāroita ’e te mau titi e fa’atupu i te mau rāve’a mai terā noa nō te mau melo nō te pūpū haere ia vetahi ’ē. Hō’ē rāve’a nō te rave i te reira ’o te fa’atupura’a ïa i te tahi mau ’ohipa ta’a ’ē ’e te mau ’ātivite. Nō te tahi atu ā ha’amāramaramara’a, hi’o « Share Ward Activities [Fa’a’ite i te mau ’ātivite a te pāroita] » i roto i te Vaira’a buka ’evanelia.

E ’āpo’o ’āmui ato’a te feiā fa’atere o te pāroita ’e o te titi nō te hi’o e aha (1) te mau hina’aro i roto i te huira’atira i reira ’e (2) te mau mātēria a te ’Ēkālesia e pūpū atu nō te tauturu i te pāhonora’a i te reira mau hina’aro. Nō te tahi atu ā ha’amāramaramara’a, hi’o « Share Church Resources [Fa’a’ite i te mau mātēria a te ’Ēkālesia] » i roto i te Vaira’a buka ’evanelia.

Tē tītau manihini nei te Fa’aora i te tā’āto’ara’a ’ia fāri’i i tāna ’evanelia ’e ’ia fa’aineine nō te ora mure ’ore (hi’o Alama 5:33–34). ’Ei pipi nāna, tē pe’e nei tātou i tōna hi’ora’a, ma te ani manihini i te tā’āto’ara’a ’ia « nā roto i tōna maita’i e riro ai ’outou ’ei mea maita’i roa i te Mesia ra » (Moroni 10:32).

E pure tātou nō te fa’aurura’a ’e te arata’ira’a e nāhea i te ani manihini ia vetahi ’ē ’ia :

• Haere mai e hi’o i te mau ha’amaita’ira’a e roa’a nā roto ia Iesu Mesia, tāna ’evanelia, ’e tāna ’Ēkālesia (hi’o Ioane 1:37–39, 45–46).

• Haere mai e tāvini i te mau ta’ata tei hina’aro i te tauturu.

• Haere mai e ’ite i te tā’amura’a i te ’Ēkālesia a Iesu Mesia i fa’aho’i-fa’ahou-hia mai.

Pinepine te tītaura’a manihini ’o tē ’āmui-noa-ra’a ïa i tō tātou ’utuāfare, tō tātou mau hoa ’e tō tātou ta’ata tupu i roto i te ’ohipa tā tātou e rave a’ena nei. ’Ei hi’ora’a, mai te au i tō rātou mau hina’aro ’e tā rātou e hina’aro, e nehenehe e ani i te ta’ata i :

• Te mau purera’a ’ōro’a ’e te tahi atu mau rurura’a i te sābati. Te hō’ē o te mau ’ohipa faufa’a roa a’e tā tātou e nehenehe e pūpū ia vetahi ’ē, ’o te haere-’āmui-ra’a ïa i te purera’a ’ōro’a ’e te tauturura’a ia rātou ’ia fa’ari’i-maita’i-hia ’e ’ia tupu te tahi ’ohipa pae vārua (hi’o 3 Nephi 18:22–23).

• Te mau ’ohipa ta’a ’ē a te ’Ēkālesia, mai te mau ha’amaita’ira’a ’aiū ’aore rā te mau bāpetizora’a.

• Te mau ’ātivite a te pāroita ’e a te titi, mau te mau ’ātivite Paraimere ’e a te feiā ’āpī (hi’o « Share Ward Activities [Fa’a’ite i te mau ’ātivite pāroita] » i roto i te Vaira’a buka ’evanelia).

• Te mau ’ātivite i tō tātou fare.

• Te mau fa’anahora’a a te ’Ēkālesia, mai te séminaire, te institut, te ’ā’amu ’utuāfare, te mau piha fa’arava’ira’a iāna iho ’e te mau ’ōpuara’a JustServe.org (i te mau vāhi tē vai ra).

• Te mau ha’api’ira’a ’e te mau misiōnare.

Nō te tahi atu ā mana’o ’e mātēria, hi’o :

• share.ChurchofJesusChrist.org.

• « Sharing the Gospel [Fa’a’ite i te ’evanelia] » i roto i te Vaira’a buka ’evanelia.

• Te tuha’a « Tāhō’ē ’e te mau melo » o te pene 9 nō te ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia.

’A here ai tātou, ’a fa’a’ite ai ’e ’a tītau manihini ai mai tā te Mesia i rave, e tu’u te Atua i te mau rāve’a i ni’a i tō tātou ’ē’a (hi’o Te Ha’api’ira’a Tumu ’e te mau Fafaura’a 11:3–5, 8). Te mau huru tauto’ora’a ato’a nō te ora i te mau parau tumu nō te here, te fa’a’ite ’e te tītau manihini, e mea maita’i ïa, fārerei noa atu ai te ta’ata i te mau misiōnare ’aore rā ’aita, ’aore rā tomo noa atu ai i roto i te ’Ēkālesia ’aore rā ’aita.

E tano ato’a te mau parau tumu nō te here, te fa’a’itera’a ’e te tītau-manihini-ra’a, nō te ha’apūai i te mau melo ’āpī ’e tei ho’i mai.

2:46

E nehenehe te mau mātēria i muri nei e tauturu i te arata’i i te mau ’āparaura’a i roto i te mau rurura’a fa’aaura’a misiōnare tāhepetoma :

• Tō’u ’ē’a nō te fafaura’a. E tauturu teie mātēria i te mau melo ’āpī ’e rātou ’o tē ho’i mai nei, ’ia haere i mua i ni’a i te ’ē’a nō te fafaura’a i roto i nā ’āva’e mātāmua e 12 ’aore rā e 24 i muri a’e i te bāpetizora’a ’aore rā i muri a’e i tō rātou ho’ira’a mai i roto i te ’evanelia. E noa’a Tō’u ’ē’a nō te fafaura’a i roto i te Vaira’a buka ’evanelia.

• Parau fa’a’ite nō te nu’ura’a i ni’a i te ’ē’a nō te fafaura’a. E fa’a’ohipa te feiā fa’atere o te pāroita i teie mātēria nō te tāputa ’e nō te hi’o i te haerera’a i mua o te mau melo ’āpī ’e rātou e ho’i mai nei, ’e nō te mau ta’ata e ha’api’ihia ra e te mau misiōnare. E nehenehe te nu’ura’a i ni’a i te ’ē’a nō te fafaura’a e hi’ohia ’e e fa’atano-’āpī-hia e te feiā fa’atere o te pāroita nā roto i te fa’aaura’a rorouira Mauiha’a ’e te Rāve’a tauturu a te ti’a fa’atere ’e te pāpa’i parau (DDG). E noa’a ’e e fa’atano ’āpī te mau misiōnare rave tāmau i te nu’ura’a i ni’a i te ’ē’a nō te fafaura’a nā roto i te fa’aaura’a rorouira ’Ia poro haere i tā’u nei ’Evanelia.

Tei te peresideni titi te mau tāviri o te titi nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E hōro’a ’oia ’e tōna nā tauturu i te ’avei’a nō teie mau tauto’ora’a. E ha’apāpū ’oia ē, e paraparau-pinepine-hia teie ’ohipa i roto i te mau rurura’a titi.

Hō’ē taime i roto i te ’āva’e, i te rahira’a taime, e fārerei te peresideni titi i te peresideni misiōni nō te fa’aau i te mau tauto’ora’a i rotopū i te feiā fa’atere o te titi ’e te pāroita ’e te mau misiōnare rave tāmau. Teie te tahi atu mau ta’ata e nehenehe e haere mai :

• Nā tauturu i roto i nā peresidenira’a titi ’e misiōni.

• Te mau melo o te ’āpo’ora’a teitei tei fa’auehia.

• Te peresideni Sōtaiete Tauturu o te titi.

• Te mau misiōnare tei fa’auehia e te peresideni misiōni.

Tei roto i te tōmite fa’atere o te feiā pa’ari o te titi :

• Te peresidenira’a titi.

• Te peresidenira’a Sōtaiete Tauturu a te titi.

• Te mau melo o te ’āpo’ora’a teitei tei fa’ata’ahia nō te ’ohipa ’e te mau pupu peresibutero.

E ha’api’i ’e e turu teie feiā fa’atere i te mau peresidenira’a pupu peresibutero ’e Sōtaiete Tauturu o te pāroita i roto i tā rātou mau tauto’ora’a nō te fa’a’ite i te ’evanelia ’e nō te ha’apūai i te mau melo ’āpī ’e ’o tē ho’i mai nei (hi’o 23.6.2). E nehenehe e fa’atupu i te ha’api’ira’a nō te hō’ē pupu ’e ’aore rā nō te ta’ata hō’ē. E nehenehe te mau fa’atere misiōni pāroita e anihia ’ia fāri’i i teie ha’api’ira’a.

Nō te tahi atu ā ha’amāramaramara’a nō ni’a i te mau ’āpo’ora’a a teie tōmite, hi’o 29.3.8.

E nehenehe te peresidenira’a titi e fa’aue i te mau melo o te ’āpo’ora’a teitei ’ia ha’api’i e ’ia pāturu i te mau peresidenira’a pupu peresibutero ’e te mau fa’atere misiōni pāroita. E fa’auehia te hō’ē melo o te ’āpo’ora’a teitei ’aore rā hau atu, ’ia arata’i i teie mau tauto’ora’a. Terā rā, e amo te mau melo o te ’āpo’ora’a teitei ato’a i teie mau hōpoi’a nō te mau pāroita ’e te mau pupu autahu’ara’a tei fa’ata’ahia nā rātou.

I raro a’e i te arata’ira’a a te peresideni titi, e ha’api’i ’e e pāturu te peresidenira’a Sōtaiete Tauturu titi i te mau peresidenira’a Sōtaiete Tauturu o te pāroita i roto i tā rātou mau hōpoi’a nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai.

Nā te ’episekōpora’a e fa’aau i te mau peresidenira’a pupu peresibutero ’e Sōtaiete Tauturu i te arata’ira’a i te mau tauto’ora’a a te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E ’āpo’o tāmau teie feiā fa’atere.

E ha’apāpū te ’episekōpora’a ē, e tāu’aparauhia ’e e fa’aauhia teie mau tauto’ora’a i roto i te ’āpo’ora’a pāroita ’e te mau rurura’a ’āpo’ora’a feiā ’āpī pāroita. E hi’o ’e e ha’amana ato’a te ’episekōpora’a i te fa’anahora’a pāroita nō te fa’a’itera’a i te ’evanelia ’e nō te ha’apūaira’a i te mau melo ’āpī ’e ’o tē ho’i mai nei (hi’o 23.6.6).

E paraparau te ’episekōpora’a i te peresideni titi nō te fa’aoti ē, e pi’i ānei i te hō’ē fa’atere misiōni pāroita (hi’o 23.6.3 nō te tahi atu ā ha’amāramaramara’a).

E uiui te ’episekōpo i te mau melo ’āpī tei ti’a te matahiti nō te hō’ē parau fa’ati’a nō te hiero, nō te rave i te mau bāpetizora’a ’e te mau ha’amaura’a ta’ata mono (hi’o 26.5.1). E uiui ato’a ’oia i te mau taea’e ’ua ti’a tō rātou matahiti nō te fāri’i i te Autahu’ara’a a Aarona (hi’o 38.2.9.1 E nehenehe tāna e rave i nā fā e piti i roto i te hō’ē ā uiuira’a. Tōna tanora’a, e fa’atere ’oia i teie uiuira’a i te hepetoma i muri mai i te ha’amaura’a o terā melo. E nehenehe te ’episekōpo ’aore rā te peresideni ’āma’a e fa’aue i te hō’ē o tōna nā tauturu ’ia rave i teie uiuira’a. I muri iho, e nehenehe te ’episekōpo e hōro’a i te mana’o e fa’a’ohipa i te tauturu nō te i’oa ’utuāfare [Family Name Assist] nō te tauturu i te melo ’āpī ’ia nene’i i te i’oa o te hō’ē melo o te ’utuāfare tei pohe, ’o tā te melo ’āpī e nehenehe e rave i te mau ’ōro’a o te hiero (hi’o « Family Name Assist [Tauturu nō te i’oa ’utuāfare] » i roto i te 25.4.1).

Nā te ’episekōpora’a e fa’aau i te tahi atu feiā fa’atere nō te hi’o ē, e mau rāve’a tō te mau melo ’āpī ’e ’o tei ho’i mai, nō te tāvini. E nehenehe te reira mau rāve’a e tauturu i teie mau melo ’ia tupu i te rahi i te pae vārua ’e ’ia ’ite i te mana o te Fatu i roto i tō rātou orara’a. E nehenehe ato’a te tāvinira’a e tauturu i te mau melo ’ia ’ite i te ’oa’oa ’e ’ia patu i te mau tā’amura’a fātata ’e vetahi ’ē i roto i te pāroita.

’Ia hi’ohia te mau rāve’a tāvinira’a ’ia au i te mau hina’aro ’e te ’aravihi o te melo. I te tahi taime, e mea tano te pi’ira’a. I te tahi atu taime, e mea maita’i a’e te hō’ē fa’auera’a ’ohipa pāpū.

E arata’i te mau peresidenira’a pupu peresibutero ’e Sōtaiete Tauturu i te mau tauto’ora’a tāmau a te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai (hi’o 8.2.3 ’e 9.2.3). E fa’atere te peresidenira’a pupu peresibutero i teie mau tauto’ora’a nō te mau melo o te pupu peresibutero. E arata’i te peresidenira’a Sōtaiete Tauturu i te mau tauto’ora’a nō te mau melo o te Sōtaiete Tauturu. E ’ohipa ’āmui rātou nō te fa’atere i teie mau tauto’ora’a e te ’āpo’ora’a pāroita, i raro a’e i te fa’aaura’a a te ’episekōpo.

Teie te mau hōpoi’a a teie mau ti’a fa’atere :

• Tauturu i te mau melo ’ia here i te mau tamari’i a te Atua, ’ia fa’a’ite i te ’evanelia, ’e ’ia tītau manihini ia vetahi ’ē ’ia fāri’i i te mau ha’amaita’ira’a a te Fa’aora (hi’o 23.1).

• ’Āpo’o ’e te mau melo o te pupu autahu’ara’a ’aore rā o te Sōtaiete Tauturu e nāhea i te fa’a’ite i te ’evanelia. ’Āparau nāhea i te ’imi i te mau ta’ata nā te mau misiōnare e ha’api’i ’e nāhea i te pāturu i te mau ta’ata e ha’api’ihia ra. ’Āpo’o ’āmui nō ni’a i te mau hina’aro o te mau melo ’āpī ’e ’o tei ho’i mai, ’e nāhea i te tauturu atu.

• Fa’ata’a i te mau taea’e ’e te mau tuahine aupuru nō te mau melo ’āpī ’e ’o tei ho’i mai (hi’o 21.2.1). E nehenehe ato’a te mau taea’e ’e te mau tuahine aupuru e fa’ata’ahia nō te mau ta’ata tā te mau misiōnare e ha’api’i ra (e ravehia te reira nā roto i te fa’aaura’a i te mau misiōnare). Mai te mea e nehenehe, e fa’ata’a te feiā fa’atere i te mau melo e tā’amura’a ’aore rā ’o tē nehenehe e fa’atupu i te tā’amura’a fātata i teie mau ta’ata. E fa’aitoito te feiā fa’atere i te mau taea’e ’e te mau tuahine aupuru ’ia hōro’a i te here mai tō te Mesia te huru ’e te pāturura’a.

• Hōro’a i te mau melo ’āpī ’e ’o tei ho’i mai i te mau rāve’a nō te tāvini ’ei tuahine aupuru ’aore rā, ’ei taea’e aupuru. Nō te tahi atu mau ha’amāramaramara’a, ’a hi’o pene 21.

• Tauturu i te ’āpo’ora’a pāroita ’ia fa’anaho i te hō’ē ’ōpuara’a nō te fa’a’itera’a i te ’evanelia ’e nō te ha’apūaira’a i te mau melo ’āpī ’e ’o tei ho’i mai (hi’o 23.6.6).

• Arata’i i te ’ohipa a te fa’atere misiōni pāroita. Mai te mea ’aita teie ti’a fa’atere i pi’ihia, e amo ïa te hō’ē melo nō te peresidenira’a pupu peresibutero i teie ti’ara’a (hi’o 23.6.3).

E fa’aue tāta’itahi te peresideni pupu peresibutero ’e te peresideni Sōtaiete Tauturu i te hō’ē melo nō te peresidenira’a ’ia tauturu i te arata’ira’a i teie mau tauto’ora’a. E rave ’āmui teie nā melo o nā peresidenira’a. E haere rāua i te mau rurura’a fa’aaura’a tāhepetoma (hi’o 23.4).

E paraparau te ’episekōpora’a i te peresideni titi nō te fa’aoti ē, e pi’i ānei i te hō’ē fa’atere misiōni pāroita. Mai te mea e fa’aoti rātou e hōro’a i teie pi’ira’a, e paraparau te ’episekōpora’a i te mau peresideni pupu peresibutero ’e Sōtaiete Tauturu nō te fa’aoti ’o vai tē pi’i atu.

’Ei ta’ata tei mau i te Autahu’ara’a a Melehizedeka te fa’atere misiōni pāroita. ’Aita ana’e te fa’atere misiōni pāroita i pi’ihia, nā te hō’ē melo nō te peresidenira’a pupu peresibutero e amo i teie ti’ara’a.

E turu te fa’atere misiōni pāroita i te peresidenira’a pupu peresibutero ’e te peresidenira’a Sōtaiete Tauturu i roto i tā rātou mau hōpoi’a misiōnare. Teie ato’a tāna mau hōpoi’a i muri nei :

• Fa’aau i te ’ohipa a te mau melo ’e te feiā fa’atere o te pāroita, te mau misiōnare pāroita ’e te mau misiōnare rave tāmau. E nehenehe ïa e fa’aau i te mau tauto’ora’a ha’api’ira’a, te mau purera’a bāpetizora’a, ’e te mau tauto’ora’a nō te ha’apūai i te mau melo ’āpī. E nehenehe ato’a e fa’anaho i te mau rāve’a nō te tauturu i te mau melo o te pāroita ’ia fa’a’ite i te ’evanelia.

• Fa’atere i te mau rurura’a fa’aaura’a tāhepetoma (hi’o 23.4).

• Haere i te mau ’āpo’ora’a pāroita mai te mea e anihia.

• Tauturu i te ’āpo’ora’a pāroita ’ia ha’amau ’e ’ia fa’atupu haere i te fa’anahora’a pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tē ho’i mai nei (hi’o 23.6.6).

• ’Imi i te mau rāve’a nō te tauturu i te mau misiōnare rave tāmau ’ia fa’atupu i tā rātou ’ōpuara’a nā roto i te fa’a’itera’a i te ’evanelia ’e te patura’a i te mau tā’amura’a ’e te mau melo. I te vāhi ’ua ha’amanahia, tei roto ato’a ïa te tāmā’ara’a ’e te mau melo (e mea au a’e e mau ’utuāfare ’āfa melo, e mau melo ’āpī ’e ’o tē ho’i mai nei, mai te mea e nehenehe ; hi’o 24.6.2.3).

• ’Ohipa ’e te ti’a fa’atere ’e te mau tauturu ’ohipa hiero ’e ’ā’amu ’utuāfare nō te tauturu i te ta’ata e ha’api’i ra i te ’evanelia, i te mau melo ’āpī ’e i te mau melo e ho’i mai nei, ’ia fa’aō ia rātou i roto i te mau tauto’ora’a hiero ’e te ’ā’amu ’utuāfare.

E tauturu te mau misiōnare pāroita i te mau melo o te pāroita ’ia ’ite i te ’oa’oa nō te fa’a’itera’a i te ’evanelia, mai tei fa’a’itehia i roto i te 23.1. E tāvini rātou i raro a’e i te fa’aterera’a a te fa’atere mīsioni pāroita, ’aore rā te melo o te peresidenira’a pupu peresibutero e amo i te reira hōpoi’a. E nehenehe te mau peresideni pupu peresibutero ’e Sōtaiete Tauturu e tu’u i te i’oa o te mau melo e nehenehe e tāvini.

E ha’api’i te mau misiōnare pāroita i te ta’ata nā roto i te parau ’e te hi’ora’a maita’i, e nāhea i te here ia vetahi ’ē, i te fa’a’ite i tō rātou fa’aro’o, ’e i te tītau manihini ia vetahi ’ē ’ia fāri’i i te mau ha’amaita’ira’a o te ’evanelia. E tauturu ato’a rātou i te mau melo o te pāroita ’ia aupuru i te mau melo ’āpī ’e ’o tei ho’i mai.

E haere mai te mau misiōnare pāroita i te mau rurura’a fa’aaura’a tāhepetoma (hi’o 23.4).

’Ia paraparau-pinepine-hia te parau nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai, i roto i te mau rurura’a ’āpo’ora’a pāroita. E nehenehe te ’episekōpo e ani i te fa’atere misiōni pāroita (’aore rā, i te melo o te peresidenira’a pupu peresibutero e amo i teie ti’ara’a), i te peresideni pupu peresibutero, ’aore rā i te peresideni Sōtaiete Tauturu ’ia arata’i i teie mau ’āparaura’a. (Hi’o 23.4.)

E nehenehe te ’āpo’ora’a e paraparau nō ni’a i te fa’anahora’a a te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E fa’aau rātou i te mau fa’auera’a ’ohipa i roto i te mau ’āvirira’a.

E nehenehe te mau rāve’a mai Tō’u ’ē’a nō te fafaura’a ’e te parau fa’a’ite nō te nu’ura’a i ni’a i te ’ē’a nō te fafaura’a, e tauturu i teie mau ’āparaura’a (hi’o 23.4.1).

Nō te tahi atu ā parau nō ni’a i te ’āpo’ora’a pāroita, hi’o 29.2.5

E ha’apa’o ta’a ’ē te ’āpo’ora’a feiā ’āpī pāroita i te feiā ’āpī :

• E melo ’āpī ’e e melo ’o tē ho’i mai nei.

• Tei roto i te ’utuāfare ’āfa melo.

• Tē ha’api’ihia ra e te mau misiōnare.

• E hoa nō te tahi atu fa’aro’o ’aore rā te tahi atu ha’apa’ora’a.

’Ia vai te hō’ē fa’anahora’a ’ōhie nā te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E nehenehe teie fa’anahora’a e tauturu i te arata’i i te mau rurura’a, te ’ohipa tāvinira’a ’e te mau ’ātivite. E nehenehe e hōro’a i te mau fa’anahora’a ’e te mau mana’o nō te :

• Tauturu i te mau ta’ata ato’a ’ia ’ite ē, ’ua fāri’i-maita’i-hia rātou i roto i te mau rurura’a ’e te mau ’ātivite.

• Tauturu i te mau melo ’ia ’ite i te ’oa’oa nō te fa’a’itera’a i te ’evanelia.

• Turu i te ta’ata e ha’api’ihia ra e te mau misiōnare.

• Tauturu i te mau melo ’āpī ’e ’o tei ho’i mai, ’ia haere i mua i te pae vārua.

E tauturu te mau peresideni pupu peresibutero ’e Sōtaiete Tauturu i te ’āpo’ora’a pāroita ’ia ha’amau i terā fa’anahora’a. E tauturu ato’a te fa’atere misiōni pāroita. E hi’opo’a ’e e fa’ati’a te ’episekōpo i te reira.

Nā te mau melo o te ’āpo’ora’a pāroita e feruri mai e nāhea i te fa’atupu haere i terā fa’anahora’a. E fa’a’ite rātou i te nu’ura’a i mua i roto i te mau ’āpo’ora’a pāroisa. E fa’a’āpi ato’a rātou i te fa’anahora’a mai te mea e hina’arohia.