Te mau melo ’ōtahi

E mea faufa’a ta’a ’ē te ’ohipa a te peresidenira’a titi nō te fa’aōra’a i te mau melo ’ōtahi i roto i te ’ohipa nō te fa’aorara’a ’e te fa’ateiteira’a.

E nehenehe te peresideni titi e fa’aue i te hō’ē o tōna nā tauturu ’e hō’ē melo ’āpo’ora’a teitei ’ia tāvini i pīha’i iho i te feiā pa’ari ’ōtahi. E nehenehe ato’a ’oia e fa’aue i te hō’ē tauturu ’e te hō’ē melo ’āpo’ora’a teitei ’ia tāvini i pīha’i iho i te feiā ’āpī pa’ari ’ōtahi. E nehenehe e fa’aue i te hō’ē ā tauturu ’e te hō’ē ā melo ’āpo’ora’a teitei ’ia tāvini i pīha’i iho i nā pupu e piti.

E ha’apa’o ta’a ’ē te peresidenira’a titi i te feiā ’āpī pa’ari ’ōtahi—mai tā rātou e nā reira nei nō te tā’āto’ara’a o te mau melo nō te u’i ’āpī.

E fa’aoti ato’a te peresidenira’a titi e fa’atupu ānei i te mau ’ātivite nō te feiā ’āpī pa’ari ’ōtahi i te fāito nō te pāroita, nō te titi, ’aore rā i nā fāito e piti. E ravehia te mau ’ātivite nō te feiā pa’ari ’ōtahi i te fāito nō te titi ’e nō te titi rau. (Hi’o pene 20.)

’Ia nava’i ana’e te rahira’a melo ’ōtahi i te hō’ē vāhi, e nehenehe te mau peresideni titi e ani ’ia fa’anahohia te hō’ē pāroita feiā ’āpī pa’ari ’ōtahi ’aore rā, te hō’ē pāroita feiā pa’ari ’ōtahi (hi’o 14.3).

Pēnei a’e e’ita e nava’i te melo ’ōtahi i roto i te hō’ē titi (’aore rā te hō’ē pupu nō te titi tāpiri mai), nō te ha’amau i te hō’ē pāroita feiā ’āpī pa’ari ’ōtahi ’aore te hō’ē pāroita feiā pa’ari ’ōtahi. ’Ia tupu te reira, e nehenehe te peresidenira’a ārea e fa’ati’a i te hō’ē peresideni titi ’ia tītau manihini i teie mau melo ato’a ’ia riro ’ei melo nō te hō’ē pāroita ta’a ’ē nā ni’a i te vāhi. Maoti te reira e ti’a ai i te feiā pa’ari ’ōtahi ’e i te feiā ’āpī pa’ari ’ōtahi ’ia tāvini ’e ’ia ha’amori ’āmui. E paraparau atu te peresidenira’a ārea nō ni’a i te reira, i te melo nō te peresidenira’a nō te Hitu ’Ahuru ’e nō te pupu nō te Tino ’Ahuru ma Piti, tei fa’ata’ahia nō rātou.

E tāvini te mau melo ’ōtahi i te mau tamari’i a te Atua nā roto i te ravera’a i te ’ohipa nō te fa’aorara’a ’e te fa’ateiteira’a (hi’o 1.2 ’e 14.2). Nō te tauturu ia rātou ’ia nā reira, e nehenehe te peresidenira’a titi e ha’amau i te hō’ē tōmite feiā pa’ari ’ōtahi (31 matahiti ’e ni’a atu). E nehenehe ato’a rātou e ha’amau i te hō’ē tōmite feiā ’āpī pa’ari ’ōtahi (18–30 matahiti). E hōro’a tāmau teie nā tōmite i tā rātou parau fa’a’ite i roto i te mau rurura’a ’āpo’ora’a titi. E nehenehe te mau melo nō teie mau tōmite e anihia ’ia haere mai i te mau rurura’a ’āpo’ora’a titi mai te mea e hina’arohia.

Nā te hō’ē tauturu o te peresidenira’a titi e fa’atere i te tōmite tāta’itahi. Tei roto i te mau tōmite ma’a feiā pa’ari ’ōtahi ’aore rā ma’a feiā ’āpī pa’ari ’ōtahi nō te pāroita tāta’itahi. Tei roto ato’a te hō’ē melo ’āpo’ora’a teitei ’e te hō’ē melo nō te peresidenira’a Sōtaiete Tauturu nō te titi.

E ’imi te mau tōmite i te pāturu i te mau melo nā roto i te auhoara’a ’e te mau rāve’a nō te fa’aō i roto i te ’ohipa nō te fa’aorara’a ’e te fa’ateiteira’a (hi’o 14.2). E fa’anaho rātou i te mau rāve’a nō te ’apora’a i te ’evanelia ’e nō te tāvinira’a i te ta’ata, nā reira ato’a te mau ’ātivite. E ruru te tōmite ’ia au i te hina’aro.

E fa’aau te mau tōmite feiā ’āpī pa’ari ’ōtahi ’e te mau fa’anahora’a institut i te mau fare ha’api’ira’a tuatoru, mai te mea tē vai ra.

Tōna tanora’a, e mea ta’a ’ē te ’ohipa a te tōmite feiā pa’ari ’ōtahi i te ’ohipa a te tōmite feiā ’āpī pa’ari ’ōtahi.

’Ua riro te ’episekōpora’a ’ei tāviri nō te fa’aō i te mau melo ’ōtahi i roto i te ’ohipa nō te fa’aorara’a ’e te fa’ateiteira’a. E ’ohipa rātou ’e te ’āpo’ora’a pāroita nō te hi’o e aha te mau pi’ira’a ’e te mau fa’auera’a ’ohipa au nō te mau melo ’ōtahi. ’Ua ta’a ia rātou ’e e tūtava ho’i rātou i te tauturu i te pāhono i te mau hina’aro o te mau metua ’ōtahi.

Tei mātauhia, e pāturu te ’episekōpora’a i te mau melo ’ōtahi ’a pāturu ai i te mau melo ato’a nō te pupu peresibutero ’e nō te Sōtaiete Tauturu. Terā rā, nō te mea e hōpoi’a rahi roa ’ino tā rātou i pīha’i iho i te u’i ’āpī, tē rave ato’a nei te ’episekōpora’a i te mau mea i muri nei :

• E fārerei te hō’ē melo nō te ’episekōpora’a i te feiā ’āpī pa’ari ’ōtahi tāta’itahi, hō’ē a’e taime i roto i te matahiti.

• E fāri’i tāmau te ’episekōpora’a i te mau parau ’āpī nō ni’a i te maita’i o te feiā ’āpī pa’ari ’ōtahi. E ’āparau te peresideni pupu peresibutero ’e te peresideni Sōtaiete Tauturu i te mau hina’aro o te feiā ’āpī pa’ari ’ōtahi i roto i te rurura’a ’āpo’ora’a pāroita. E nehenehe te feiā fa’atere nō te tōmite feiā ’āpī pa’ari ’ōtahi e anihia ’ia haere mai.

• E nehenehe te ’episekōpora’a e ha’amau i te hō’ē tōmite feiā ’āpī pa’ari ’ōtahi nō te pāroita (hi’o 14.1.2.4). (E ha’amauhia te mau tōmite feiā pa’ari ’ōtahi, matahiti 31 ’e ni’a atu, i te fāito o te titi.)

E nehenehe te mau peresideni pupu peresibutero ’e Sōtaiete Tauturu e fa’aue i te hō’ē melo nō tā rātou peresidenira’a ’ia tāvini i pīha’i iho i te feiā ’āpī pa’ari ’ōtahi. E ’apo mai teie mau melo nō te peresidenira’a i te pūai o te feiā ’āpī pa’ari ’ōtahi ma te tauturu i te pāhono i tō rātou mau hina’aro.

E nehenehe te peresideni o te pupu peresibutero ’e o te Sōtaiete Tauturu e hōro’a i tā rāua parau fa’a’ite nō ni’a i teie mau tauto’ora’a i roto i te rurura’a a te ’āpo’ora’a pāroita. E nehenehe te feiā fa’atere nō te tōmite feiā ’āpī pa’ari ’ōtahi e anihia ’ia haere mai.

Tei roto teie nau melo nō te peresidenira’a i te tōmite feiā ’āpī pa’ari ’ōtahi o te pāroita, mai te mea ’ua ha’amauhia te reira.

I roto i te hō’ē pāroita e rave rahi feiā ’āpī pa’ari ’ōtahi, e nehenehe te ’episekōpora’a e pi’i i te hō’ē taure’are’a tamāroa ’ōtahi ’e te hō’ē taure’are’a tamāhine ’ōtahi ’ei feiā fa’atere nō te feiā ’āpī pa’ari ’ōtahi. Teie tā rāua mau hōpoi’a :

• Tauturu i te feiā ’āpī pa’ari ’ōtahi ’ia ’āmui mai i roto i te ’ohipa nō te fa’aorara’a ’e te fa’ateiteira’a (hi’o 14.2).

• Fa’atere i te tōmite feiā ’āpī pa’ari ’ōtahi o te pāroita mai te mea ’ua ha’amauhia te hō’ē.

• Ruru tāmau ’e te peresidenira’a pupu peresibutero ’e te peresidenira’a Sōtaiete Tauturu. I roto i teie mau rurura’a, e ’āparau rātou i te mau pūai o te feiā ’āpī pa’ari ’ōtahi ’e te mau rāve’a nō te pāhono i tō rātou mau hina’aro. E rōtahi ato’a rātou i ni’a i te aupurura’a i te feiā ’āpī pa’ari ’ōtahi.

• Tāvini i roto i te tōmite feiā ’āpī pa’ari ’ōtahi o te titi i te taime e fa’auehia ai.

• Haere i te mau rurura’a ’āpo’ora’a pāroita mai te mea e anihia.

Tē vai ra te tahi mau pāroita e rave rahi feiā ’āpī pa’ari ’ōtahi. I roto i teie mau pāroita, e tupu paha te mana’o o te ’episekōpo e nehenehe e tauturuhia te feiā fa’atere feiā ’āpī pa’ari ’ōtahi e te hō’ē tōmite feiā ’āpī pa’ari ’ōtahi nō te pāroita. (E ha’amauhia te mau tōmite feiā pa’ari ’ōtahi i te fāito o te titi. Hi’o 14.1.1.2.)

Teie te mau melo o te tōmite :

• Te feiā fa’atere nō te feiā ’āpī pa’ari ’ōtahi o te pāroita.

• Te tahi atu feiā ’āpī pa’ari ’ōtahi tei anihia e te ’episekōpora’a.

• Nā melo nō te peresidenira’a pupu peresibutero ’e nō te peresidenira’a Sōtaiete Tauturu tei fa’auehia ’ia ha’apa’o i te feiā ’āpī pa’ari ’ōtahi.

Te feiā fa’atere ’aore rā te mau melo e hina’aro e ’āmui mai, e nehenehe rātou e fa’anaho i te hō’ē pupu pō ’utuāfare ’aore rā hau atu, nō te feiā pa’ari ’ōtahi, ’e te tahi atu mau pupu nō te feiā ’āpī pa’ari ’ōtahi. Tei mātauhia, te feiā e ’āmui mai, ’aita ïa tā rātou e tamari’i i te fare. I roto i te mau titi e mea iti te mau melo ’ōtahi, e nehenehe te mau pupu pō ’utuāfare e fa’anahohia ma te hi’o ’ore i te mau ’ōti’a pāroita.

Hau atu, e nehenehe te mau melo ’ōtahi e mā’iti e ha’aputuputu nā roto i te tu’urēni ’aore rā e tae tino roa mai nō te tuatāpapara’a ’evanelia i te fare. E nehenehe e fa’a’ohipa i te Mai, pe’e mai—nō te ta’ata hō’ē ’e te ’utuāfare.

E fa’aitoitohia te feiā ’āpī pa’ari ’ōtahi ato’a ’ia fa’aō i roto i te mau piha ha’api’ira’a ’evanelia institut (hi’o 15.2).

I raro a’e i te fa’aterera’a a te ’episekōpo, e nehenehe te peresideni Ha’api’ira’a Sābati pāroita e fa’anaho i te hō’ē piha Ha’api’ira’a Sābati nā te feiā ’āpī pa’ari ’ōtahi (hi’o 13.3.2).

I raro a’e i te fa’aterera’a a te feiā fa’atere o te pāroita ’aore rā o te titi, e nehenehe te feiā ’āpī pa’ari ’ōtahi e fa’anaho ’e e ’āmui i roto i te mau ’ātivite ta’a ’ē nō rātou. E nehenehe teie mau ’ātivite e fa’atupuhia i te fāito o te pāroita ’aore rā i te fāito o te titi. Teie te tahi mau hi’ora’a :

• Te mau tere hiero.

• Te ’ohipa ’ā’amu ’utuāfare.

• Te fa’a’itera’a i te ’evanelia.

• Te tāvinira’a i rotopū i te huira’atira.

• Te mau ’ohipa ta’a ’ē nō te pehe ’e te peu tumu.

• Te mau tū’aro.

I raro a’e i te fa’aterera’a a te feiā fa’atere o te titi, e nehenehe te feiā pa’ari ’ōtahi e fa’anaho i te mau ’ātivite mai te reira i te fāito o te titi.

E nehenehe te mau Hitu ’Ahuru ārea e ’ohipa ’e te mau peresideni titi nō te ha’amau i te mau tōmite nō te fa’anaho i te mau ’ātivite titi rau nō te mau melo ’ōtahi.

Te ’aufaura’a i te mau ’ātivite, nō roto mai ïa i te mau tāpura faufa’a a te titi ’aore rā a te pāroita. ’Ia tupu ana’e te mau ’ātivite titi rau ’e te mau ’ātivite ārea, e ha’apāpū te feiā fa’atere ē, e ’ōpere-maita’i-hia te mau ha’amāu’ara’a i roto i te mau titi.

’Ia tū’ati te ’aufaura’a i te mau ’ātivite i te mau fa’aturera’a i roto i te 20.2.6. Fa’anahora’a ta’a ’ē, e nehenehe te mau melo e ’aufau i te tahi tuha’a nō te ha’amāu’ara’a o te mau ’ohipa e ravehia i te fāito o te titi rau ’aore rā i te fāito o te ārea. E ha’apāpū te feiā fa’atere ē, e nehenehe te mau ta’ata ato’a e ’āmui mai.

Nō te tahi atu ā arata’ira’a nō te mau ’ātivite, hi’o 20.2 ’e 20.3.

Mai te mau pipi ato’a a Iesu Mesia, e fāna’o tāmau te mau melo ’ōtahi i te rāve’a nō te tāvini ia vetahi ’ē, ’ei ta’ata hō’ē ’e ’ei pupu. Te tāvinira’a i te huira’atira, ’o te mau rāve’a rahi ïa e ha’apūaihia ai te feiā ’āpī pa’ari ’ōtahi i te pae vārua.

E nehenehe te mau ’ātivite tāvinira’a e fa’atumu i ni’a :

• Te ’ohipa tōtauturu ’e te fa’arava’ira’a iāna iho.

• Te ’ā’amu ’utuāfare

• Te torora’a i te rima i te huira’atira.

• Te fa’a’itera’a i te ’evanelia.

• Te ha’apūaira’a i te mau melo ’āpī ’e rātou e ho’i mai nei.

• Te tauturura’a i te ao nei, i reira iho ’aore rā i te tahi atu vāhi.

Mai te mea tē vai ra, tē hōro’a nei te JustServe.org i te mau rāve’a tāvinira’a nō te ta’ata hō’ē ’e nō te pupu.

E fa’ata’ahia te taea’e aupuru nō te taea’e ’ōtahi tāta’itahi. E fa’ata’ahia te tuahine aupuru ’e te taea’e aupuru nō te tuahine ’ōtahi tāta’itahi. E hōro’ahia te mau fa’auera’a nā ni’a i te ta’ata, ’eiaha nā ni’a i te pupu ’aore rā te vāhi fa’aeara’a. (Hi’o pene 21.)