អង្គការ​បឋមសិក្សា

អង្គការ​បឋម​សិក្សា​ជួយ​ដល់​កុមារ​ឲ្យ ៖

• ទទួល​អារម្មណ៍​នូវ​សេចក្ដី​ស្រឡាញ់​របស់​ព្រះវរបិតាសួគ៌ ហើយ​រៀន​អំពី​ផែនការ​នៃ​សុភមង្គល​របស់ទ្រង់ ។

• រៀនសូត្រ​អំពី​ព្រះយេស៊ូវ​គ្រីស្ទ និង​តួនាទី​របស់ទ្រង់​នៅក្នុង​ផែនការ​របស់​ព្រះវរបិតាសួគ៌ ។

• រៀនសូត្រ និង​រស់នៅ​តាម​ដំណឹងល្អ​របស់​ព្រះយេស៊ូវ​គ្រីស្ទ ។

• ទទួល​អារម្មណ៍ ទទួល​ស្គាល់ និង​ធ្វើតាម​ព្រះចេស្ដា​នៃ​ព្រះ​វិញ្ញាណ​បរិសុទ្ធ ។

• រៀបចំខ្លួន ចុះ​សេចក្ដី​សញ្ញា និង​គោរព​តាម​សេចក្តី​សញ្ញា​ដ៏​ពិសិដ្ឋ​ទាំងឡាយ ។

• ចូលរួម​នៅក្នុង​កិច្ចការ​នៃ​សេចក្តី​សង្រ្គោះ និង​ភាពតម្កើងឡើង​របស់​ព្រះ ។

បាវចនា​អង្គការ​បឋម​សិក្សា​គឺជា​ការរំឭក​ដល់​ពរជ័យ​នៃ​ការបម្រើ​នៅក្នុង​អង្គការ​បឋមសិក្សា ៖

« កូនចៅ​ទាំង​ប៉ុន្មាន​របស់​អ្នក នឹង​ធ្វើជា​សិស្ស​របស់​ព្រះអម្ចាស់ ហើយ​វា​រាល់គ្នា​នឹង​មាន​សន្តិសុខ​ជាបរិបូរ » ( អេសាយ ៥៤:១៣; នីហ្វៃ​ទី​៣ ២២:១៣ ) ។

ថ្នាក់​ទារកដ្ឋាន​ជួយ​កុមារ​អាយុ​ពី១៨​ខែ ដល់៣ឆ្នាំ ឲ្យ​ទទួល​អារម្មណ៍​នូវ​សេចក្ដី​ស្រឡាញ់​របស់​ព្រះវរបិតាសួគ៌ ហើយ​រៀន​អំពី​ផែនការ​នៃ​សុភមង្គល​របស់ទ្រង់ ។

អ្នកដឹកនាំ​ថ្នាក់​ទារកដ្ឋាន​ស្រឡាញ់ បង្រៀន និង​ផ្ដល់​ការងារ​បម្រើ​ដល់​កុមារ ។ ពួកគាត់​ត្រូវ​ប្រាកដ​ថា ទារក​ទារិកា​មាន​សុវត្ថិភាព និង​សុខុមាលភាព ។

យ៉ាង​ហោច​ណាស់​មនុស្ស​ពីរនាក់​គួរ​តែ​ត្រូវបាន​ហៅ​បម្រើ​នៅ​ថ្នាក់ទារកដ្ឋាន​នីមួយៗ ។ បើ​ថ្នាក់ដឹកនាំ​ថ្នាក់​ទារកដ្ឋាន​ពុំ​មែន​ជា​ស្វាមី និង​ភរិយា​ទេ នោះ​ពួកគាត់​គួរតែ​មាន​ភេទ​ដូចគ្នា ។

ថ្នាក់ទារកដ្ឋាន​មាន​រយៈពេល​ពេញ​ម៉ោង​ដូច​ម៉ោង​អង្គការ​បឋមសិក្សាដែរ ។ សម្រាប់​ព័ត៌មាន​បន្ថែម សូមមើល ១២.១.៤ និង ១២.៣.៥ ។

ថ្នាក់​អង្គការ​បឋមសិក្សា​ជួយ​កុមារ​ឲ្យ​ដឹង​ពី​សេចក្ដី​ស្រឡាញ់​របស់​ព្រះវរបិតាសួគ៌ ហើយ​រៀន​អំពី​ផែនការ​នៃ​សុភមង្គល​របស់ទ្រង់ ។ មេរៀន​តាម​កម្មវិធី ចូរ​មក​តាម​ខ្ញុំ ។ នៅ​ថ្ងៃអាទិត្យ​ទីប្រាំ គ្រូបង្រៀន​ត្រូវបាន​លើកទឹកចិត្ត​ឲ្យ​ប្រើ « ឧបសម្ព័ន្ធ ខ ៖ សម្រាប់​អង្គការ​បឋមសិក្សា—ការរៀបចំ​កុមារ​ដើរ​នៅលើ​ផ្លូវ​នៃ​សេចក្ដីសញ្ញា​របស់ព្រះ​ពេញ​មួយ​ជីវិត » ។

ថ្នាក់​អង្គការ​បឋម​សិក្សា​ត្រូវបាន​រៀបចំឡើង​តាម​អាយុ និង​ចំនួន​គ្រូបង្រៀន​ដែល​មាន ។ អង្គភាព​ដែល​មាន​កុមារ ឬ​គ្រូតិច​អាច​ដាក់​ក្រុមអាយុ​ពីរ ឬ​ច្រើន​បញ្ចូល​គ្នា​ឲ្យ​ទៅជា​ថ្នាក់​មួយ​បាន ។ នៅក្នុង​អង្គភាពធំ ថ្នាក់​ដឹកនាំ​អង្គការ​បឋម​សិក្សា​អាច​បង្កើត​ថ្នាក់​ច្រើន​ជាង​មួយ​សម្រាប់​ក្រុម​អាយុ​មួយ ហើយ​មាន​ថ្នាក់​ទារកដ្ឋាន​ច្រើន​ជាង​មួយ ។

នៅពេល​មាន​ចំនួន​កុមារ​គ្រប់គ្រាន់ ពួកគេ​ត្រូវ​បំបែក​ទៅជា​ថ្នាក់រៀន​ជាច្រើន​តាម​អាយុ​របស់​ពួកគេ​នៅ​ថ្ងៃទី ៣១ ខែ​ធ្នូ នៃ​ឆ្នាំ​ចាស់ ដូច​ដែល​បង្ហាញ​នៅក្នុង​តារាង​ខាងក្រោម​នេះ ៖

ជាទូទៅ​កុមារ​ឡើងពី​ថ្នាក់​អង្គការ​បឋមសិក្សា​ទៅ​ថ្នាក់​យុវនារី ឬ​កូរ៉ុម​ឌីកុន​នៅក្នុង​ខែ​មករា​នៃ​ឆ្នាំ​ដែល​ពួកគេ​ចូល​ដល់​អាយុ ១២ ឆ្នាំ ។ ពួកគេ​អាច​ទទួល វិញ្ញាបនបត្រ​នៃ​ការរីកចម្រើន ។ វិញ្ញាបនបត្រ​ទាំងនេះ​អាច​បង្កើត​បាន​នៅក្នុង​ធនធាន​សម្រាប់​ថ្នាក់ដឹកនាំ និង​ស្មៀន ។

ក្នុង​កាលៈទេសៈ​ខ្លះ កុមារ​ដែល​មាន​អាយុ ១១ ឆ្នាំ ប្រហែល​ជា​មិនទាន់​ត្រៀមខ្លួន​រួចរាល់​ដើម្បីចេញ​ពី​អង្គការ​បឋមសិក្សា​នោះទេ ។ ប៊ីស្សព ឪពុកម្តាយ និង​កុមារ​ប្រឹក្សា​ជាមួយគ្នា​អំពី​ពេលវេលា​ត្រឹមត្រូវ ។

កុមារ​អាច​មិន​ទាន់​បានបញ្ចប់​អង្គការ​បឋម​សិក្សា​ពីមុន​ខែ​មករា​នៃឆ្នាំ​ដែល​ពួកគេ​ចូល​ដល់​អាយុ ១២ ឆ្នាំ​នៅឡើយ ។ ហើយ​យុវជន​ក៏​មិនអាច​តែងតាំង​ជា​ឌីកុន​ពីមុន​ពេល​នោះដែរ ។

ពេលវេលា​ចម្រៀង​ជួយកុមារ​ឲ្យ​ទទួល​អារម្មណ៍​នូវ​សេចក្ដី​ស្រឡាញ់​របស់​ព្រះវរបិតាសួគ៌ ហើយ​រៀន​អំពី​ផែនការ​នៃ​សុភមង្គល​របស់ទ្រង់ ។ នៅពេល​កុមារ​ច្រៀង​អំពី​គោលការណ៍​នៃ​ដំណឹងល្អ នោះ​ព្រះវិញ្ញាណ​បរិសុទ្ធ​ថ្លែង​ទីបន្ទាល់​ពី​សេចក្ដី​ពិតពេញ​លេញ​នៃ​គោលការណ៍​ទាំងនោះ ។ ទំនុក​ច្រៀង និង​តន្ត្រី​នឹង​ដក់​ជាប់​ក្នុង​គំនិត និង​ដួង​ចិត្ត​របស់​កុមារ​ពេញ​មួយ​ជីវិត​របស់​ពួកគេ ។

ម៉ោង​ច្រៀង​ចម្រៀង​គឺ​ខុសពី​ម៉ោង​ថ្នាក់រៀន​ផ្សេងទៀត ។ អំឡុង​ម៉ោង​ច្រៀង​ចម្រៀង កុមារបាន​រៀននៅពេល​ពួកគេ​ចូលរួម​ច្រៀង​យ៉ាង​សកម្ម ។ អ្នកដឹកនាំ​ភ្លេង​ថ្នាក់​អង្គការ​បឋមសិក្សា​បង្រៀន​គោលការណ៍​នៃ​ដំណឹងល្អ ប៉ុន្ដែ​ពួកគាត់​បង្រៀន​តាមរយៈ​តន្ដ្រី​ជា​ចម្បង ។

គណៈប្រធាន​អង្គការ​បឋម​សិក្សា និង​អ្នកដឹកនាំ​តន្ត្រី​ជ្រើសរើស​ចម្រៀង​សម្រាប់​ខែ​នីមួយៗ ដើម្បី​ពង្រឹង​គោលការណ៍​ដំណឹងល្អ​ដែល​កុមារ​កំពុង​រៀន​នៅក្នុង​ថ្នាក់ និង​នៅ​ឯ​គេហដ្ឋាន​របស់​ពួកគេ ។ ចម្រៀង​ទាំងឡាយ​ដែល​ពង្រឹង​ដល់​គោលការណ៍​ទាំងនេះ ក៏មាន​នៅក្នុង ចូរ​មកតាម​ខ្ញុំ ផង​ដែរ ។

សម្រាប់​ព័ត៌មាន​បន្ថែម សូមមើល « សេចក្តី​ណែនាំ​សម្រាប់​ម៉ោង​ច្រៀង​ចម្រៀង និង​បទបង្ហាញ​របស់​កុមារ​នៅក្នុង​ការប្រជុំ​សាក្រាម៉ង់នៅក្នុង​សៀវភៅ ចូរ​មក​តាម​ខ្ញុំ ។ សូម​មើល​ផង​ដែរ ១២.១.៦ និង ១២.៣.៤ នៅ​ក្នុង​ក្បួនខ្នាត​នេះ ។

បទបង្ហាញ​របស់​កុមារ​នៅក្នុង​ការប្រជុំ​សាក្រាម៉ង់​ប្រចាំឆ្នាំ ធ្វើឡើង​នៅ​អំឡុង​ពីរបីខែ​មុនដំណាច់​ឆ្នាំ ។ កុមារ​ធ្វើបទ​បង្ហាញ​ពីអ្វី​ដែល​ពួកគេ​បានរៀន​នៅឯ​ផ្ទះ និង​នៅឯ​ព្រះវិហារ​នៅអំឡុង​ឆ្នាំ​នេះ ។ ពួកគេ​ជួយ​ឲ្យ​អង្គ​ប្រជុំ​ផ្តោតយកចិត្ត​ទុកដាក់​លើ​ព្រះវរបិតាសួគ៌ ព្រះអង្គ​សង្រ្គោះ និង​ការបង្រៀន​របស់​ពួកទ្រង់ ។

គណៈប្រធាន​អង្គការ​បឋមសិក្សា និង​អ្នកដឹកនាំ​តន្រ្តី​ដាក់​ផែនការ​ពី​បទបង្ហាញ​នេះ​ប្រកប​ដោយ​ការអធិស្ឋាន ។ គណៈប៊ីស្សព​ផ្តល់ឲ្យ​នូវ​ការណែនាំ ។ កុមារ​អាច​ច្រៀងចម្រៀង ឡើងនិយាយ និង​ចែកចាយ​ដំណើររឿង បទគម្ពីរ ឬ​ថ្លែងទីបន្ទាល់ ។

បទបង្ហាញ​អាច​យកពេល​ទាំងអស់ ឬ​ផ្នែកខ្លះ​នៃ​ម៉ោង​ប្រជុំ បន្ទាប់ពី​សាក្រាម៉ង់ ។ អង្គភាព​ដែល​មាន​កុមារ​តិច​អាច​អញ្ជើញ​សមាជិក​គ្រួសារ​របស់​កុមារ​ឲ្យ​ចូលរួម ។

ដោយសារតែ​ភាពពិសិដ្ឋ​នៃ​ការប្រជុំ​សាក្រាម៉ង់ នោះ​ការធ្វើបទ​បង្ហាញ​មិន​គួរ​បញ្ចូល​នូវ​ជំនួយ​ចក្ខុ សម្លៀកបំពាក់​បែប​ប្រពៃណី ឬ​បទបង្ហាញ​ប្រព័ន្ធ​ផ្សព្វផ្សាយ​ឡើយ ។

សម្រាប់​ព័ត៌មាន​បន្ថែម សូមមើល « សេចក្តី​ណែនាំ​សម្រាប់​ម៉ោង​ច្រៀង​ចម្រៀង និង​បទបង្ហាញ​របស់​កុមារ​នៅក្នុង​ការប្រជុំ​សាក្រាម៉ង់នៅក្នុង​សៀវភៅ ចូរ​មក​តាម​ខ្ញុំ ។

ឪពុក​ម្តាយ​ទទួល​ខុសត្រូវ​ជា​ចម្បង​ក្នុង​ការបង្រៀន​ដល់​កូនៗ​របស់​ពួកគាត់​អំពី​ព្រះវិហារ​បរិសុទ្ធ និង​បព្វជិតភាព ។ ដើម្បី​គាំទ្រ​ដល់ពួកគាត់ គណៈប្រធាន​អង្គការ​បឋមសិក្សា​ដាក់​ផែនការ​ធ្វើ​ការប្រជុំ​រៀបចំខ្លួន​សម្រាប់​បព្វជិតភាព និង​ព្រះវិហារ​បរិសុទ្ធ​ជា​រៀងរាល់​ឆ្នាំ ។ គណៈប៊ីស្សព​ផ្តល់ឲ្យ​នូវ​ការណែនាំ ។ ការប្រជុំ​នេះគឺ​សម្រាប់​កុមារ​នៅក្នុង​ថ្នាក់ ក្លាហាន ១០ ។ ឪពុកម្តាយ​ត្រូវ​បាន​អញ្ជើញ​ឲ្យ​ចូលរួម ។ ការប្រជុំនេះ​មាន​គោលបំណង​ដូចខាងក្រោម ៖

• ជួយ​កុមារ​ឲ្យយល់​ពី​គោលបំណង ការ​ទទួល​ខុសត្រូវ និង​ពរជ័យ​នៃ​បព្វជិតភាព ។

• ជួយ​កុមារ​ឲ្យ​ចូលរួម​នៅក្នុង​កិច្ចការ​ព្រះវិហារ​បរិសុទ្ធ និង​ពង្សប្រវត្តិ ហើយ​រៀបចំខ្លួន​ដើម្បី​ធ្វើ និង​រក្សា​សេចក្តី​សញ្ញាដ៏​ពិសិដ្ឋ ។

• ជួយ​កុមារា​ឲ្យ​រៀបចំខ្លួន​ដើម្បី​ទទួល​បព្វជិតភាព​អើរ៉ុន ។

• ជួយ​កុមារ​ឲ្យ​រៀបចំ​ខ្លួន​ទទួល​ប័ណ្ណ​ចូល​ព្រះវិហារ​បរិសុទ្ធ ។

ការប្រជុំនេះ​អាច​ធ្វើឡើង​នៅអំឡុង​ថ្នាក់​អង្គការ​បឋមសិក្សា​នៅថ្ងៃ​អាទិត្យ នៅពេល​ផ្សេងទៀត​នៅ​ថ្ងៃអាទិត្យ ឬ​នៅពេល​ខុសគ្នា​ណាមួយ ។ សមាជិក​មួយ​រូប​នៃ​គណៈ​ប៊ីស្សព​ដឹកនាំ​កម្មវិធី ។ យ៉ាងហោចណាស់ មាន​សមាជិក​មួយរូប​នៃ​គណៈប្រធាន​អង្គការ​បឋមសិក្សា​ចូលរួម ។

ប្រសិនបើ​អង្គភាព​មួយ​ដែល​មាន​កុមារតិច នោះ​ការប្រជុំ​អាច​ធ្វើឡើង​ក្រោម​ការដឹកនាំ​ពី​គណៈប្រធាន​ស្តេក ។ វួដ​ខ្លះ ឬ​វួដ​ទាំងអស់​នៅក្នុងស្តេក​ជួបជុំ​ជាមួយគ្នា ។

សម្រាប់​ព័ត៌មាន​បន្ថែម សូមមើល Temple and Priesthood Preparation នៅលើ​គេហទំព័រ ChurchofJesusChrist.org ។

កុមារ​គួរ​មាន​ឱកាស​ដើម្បី​បម្រើ​មនុស្សដទៃ​នៅក្នុង និង​ជាមួយ​ក្រុមគ្រួសារ​របស់​ពួកគេ​ជាប្រចាំ និង​អំឡុង​ពេល​ធ្វើ​សកម្មភាព​ក្នុង​អង្គការ​បឋមសិក្សា ។ គំនិត​សម្រាប់​ធ្វើការបម្រើ​អាចរកបាន​នៅលើ ChildrenandYouth.ChurchofJesusChrist.org ។ នៅកន្លែង​ណា​ដែល​មាន នៅលើគេហទំព័រ JustServe.org ផ្ដល់​ជា​ឱកាស​បម្រើ​នៅក្នុង​សហគមន៍ ។

កុមារ​អាច​អញ្ជើញ​មនុស្ស​ទាំងអស់​ឲ្យ​ទទួលយក​ដំណឹងល្អ​តាមរបៀប​ជាច្រើន ។ វិធីមួយ​ចំនួន​ទាំងនេះ​គឺត្រូវបាន​រៀបរាប់​ដូចខាងក្រោម ៖

• ធ្វើ​ជា​គំរូ​ល្អ​ក្នុងនាម​ជា​សិស្ស​នៃ​ព្រះ​យេស៊ូវ​គ្រីស្ទ ។

• ចែកចាយ​ទីបន្ទាល់​របស់​ពួកគេ​ជាមួយ​មិត្តភក្តិ និង​សមាជិក​គ្រួសារ ។

• ផ្តល់ការងារ​បម្រើ​ទៅ​កាន់​សមាជិក​ក្នុងថ្នាក់​ដែល​មិន​សូវ​សកម្ម ។

• អញ្ជើញ​មិត្តភក្តិ​ឲ្យ​មក​ព្រះវិហារ ចូលរួម​សកម្មភាព​នានា ឬ​ពិធីបុណ្យ​ជ្រមុជ​ទឹក ឬ​ទទួល​ការបង្រៀន​ពី​ពួក​អ្នកផ្សព្វផ្សាយ​សាសនា ។

• អញ្ជើញ​មិត្តភក្តិ​ឲ្យ​ចូលរួម​នៅក្នុង​កម្មវិធី​កុមារ និង​យុវវ័យ ។ ថ្នាក់ដឹកនាំ​ធ្វើការ​យ៉ាងជិតស្និទ្ធ​ជាមួយ​ឪពុកម្តាយ​របស់កុមារ​ទាំងនេះ ដើម្បី​ជួយ​ពួកគេ​ឲ្យយល់​ពី​កម្មវិធី​នេះ និង​កំណត់​ថាតើ​ពួកគាត់ និងកូនៗ​របស់​ពួកគាត់​ចង់ចូល​រួមយ៉ាង​ដូចម្តេច ។

• សូម​អញ្ជើញ​មិត្តភក្តិ និង​សមាជិក​គ្រួសារ​ឲ្យចូលរួម​នៅក្នុង​បទបង្ហាញ​របស់​កុមារ​នៅក្នុង​ការប្រជុំ​សាក្រាម៉ង់​ប្រចាំ​ឆ្នាំ ។

កុមារ​អាច​ជួយ​ក្រុមគ្រួសារ​ឲ្យ​មាន​សាមគ្គីភាព​សម្រាប់​ភាពអស់កល្ប​តាម​របៀប​ជាច្រើន ។ វិធីមួយ​ចំនួន​ទាំងនេះ​គឺត្រូវបាន​រៀបរាប់​ដូចខាងក្រោម ៖

• គោរព​ឪពុក​ម្តាយ​របស់​ពួកគេ និង​ធ្វើ​ជា​គំរូ​នៃ​ការរស់នៅ​ដូចជា​ព្រះគ្រីស្ទ​នៅក្នុង​ផ្ទះរបស់​ពួកគេ ។

• រៀបចំ​ខ្លួន​ដើម្បី​មាន​គ្រួសារ​ដ៏​អស់កល្ប​ជានិច្ច​របស់​ពួកគេ​ផ្ទាល់ ។

• ព្យាយាម​មាន​ភាពស័ក្តិសម​ដើម្បី​ទទួល​ប័ណ្ណ​ចូល​ព្រះវិហារ​បរិសុទ្ធ នៅពេល​ដល់​អាយុ​ត្រឹមត្រូវ ។

• សូម​រៀបចំ​ធ្វើ និង​រក្សាសេចក្ដី​សញ្ញា ហើយ​ទទួល​ពិធីបរិសុទ្ធ​ក្នុង​ព្រះវិហារ​បរិសុទ្ធ រួមទាំង​អាពាហ៍ពិពាហ៍​ដ៏​អស់កល្ប​ជានិច្ច ។

• រៀន​អំពី​សាច់ញាតិ​ជិត​ឆ្ងាយ និង​បុព្វការីជន​របស់ពួកគេ ( សូមមើល My Family: Stories That Bring Us Together ) ។

• ស្វែងរក​បុព្វការីជន​ដែល​ត្រូវការ​ពិធីបរិសុទ្ធ​នៅ​ព្រះវិហារ​បរិសុទ្ធ ( សូមមើល​គេហទំព័រ FamilySearch.org ) ។

• រៀបចំខ្លួន​ដើម្បី​ទទួល​ពិធី​បុណ្យ​ជ្រមុជទឹក និង​ពិធីបញ្ជាក់​សម្រាប់​មរណជន ។

• ចូលរួម​ធ្វើ​លិបិក្រម​ជាមួយ​សមាជិក​គ្រួសារ ( សូមមើល​គេហទំព័រ FamilySearch.org/indexing ) ។

ការទទួលខុសត្រូវ​ដ៏សំខាន់​បំផុត​របស់​ប៊ីស្សព​គឺ ត្រូវ​មើលថែ ជំនាន់​ដែល​កំពុង​ពេញវ័យ នៅក្នុង​វួដ​របស់​គាត់ ។ ប៊ីស្សព ឬ​ទីប្រឹក្សា​ដែល​បាន​ចាត់តាំង​ម្នាក់​ជួប​ជាប្រចាំ​ជាមួយ​ប្រធាន​អង្គការ​បឋម​សិក្សា ។

ប៊ីស្សព និង​ទីប្រឹក្សា​របស់​ពួកគាត់​ឆ្លើយតប​ភ្លាមៗ​នឹង​អនុសាសន៍​ពី​គណៈប្រធាន​អង្គការ​បឋមសិក្សា ចំពោះ​អស់​អ្នក​ដែល​ត្រូវបាន​ហៅ​ឲ្យបម្រើ​នៅក្នុង​អង្គការ​បឋមសិក្សា ។ គណៈប៊ីស្សព​ធ្វើការ​ជាមួយ​គណៈប្រធាន​ដើម្បី​រក្សា​ការបន្ត​មានគ្រូ និង​អ្នកដឹកនាំ​តន្រ្តី ។ បើ​អាចធ្វើបាន សមាជិក​ដែល​បម្រើ​នៅក្នុង​ការហៅបម្រើ​ទាំងនេះ​គួរតែ​បម្រើ​ឲ្យ​បានយូរ​ល្មម ដើម្បី​បង្កើត​ទំនាក់ទំនង​ពេញ​ដោយ​ក្តីស្រឡាញ់ និង​ទំនុកចិត្ត​ជាមួយ​កុមារ ។ ទំនាក់ទំនង​បែបនោះ​ជួយ​បីបាច់​ទីបន្ទាល់​នៅក្នុង​ដួងចិត្ត​របស់​កុមារ ។

ប៊ីស្សព និង​ទីប្រឹក្សា​របស់គាត់​ចូលរួម​ក្នុង​អង្គការ​បឋមសិក្សា​ជាប្រចាំ ។ ពួកគាត់​ក៏រៀន​ស្គាល់​ឈ្មោះ និង​រៀន​យល់​ពី​កាលៈទេសៈ​នៅ​ផ្ទះ​របស់​កុមារ​ម្នាក់ៗ​នៅក្នុង​វួដ​ផងដែរ ។

ប៊ីស្សព​ហៅ ហើយ​ញែក​ចេញ​ស្ត្រី​មជ្ឈិម​វ័យ​ម្នាក់​ឲ្យ​បម្រើ​ជា​ប្រធាន​អង្គការ​បឋម​សិក្សា​ក្នុង​វួដ ។ ប្រសិន​បើ​អង្គភាព​នោះ​ធំ​ល្មម​គ្រប់​គ្រាន់ ប្រធាន​ក្រុម​យុវនារី​នោះ​ផ្ដល់​អនុសាសន៍​ឲ្យ​ហៅ​ស្ត្រី​មជ្ឈិមវ័យ​​ម្នាក់ ឬ​ពីរ​នាក់​មក​ធ្វើ​ជា​ទីប្រឹក្សា​របស់​គាត់ ( សូមមើល ជំពូក​ទី ៣០ ) ។ គណៈប៊ីស្សព​ពិចារណា​ពី​ការ​ផ្ដល់​អនុសាសន៍​របស់​គាត់ ហើយ​ធ្វើ​ការ​ហៅ​នោះ ។

គណៈ​ប្រធាន​អង្គការ​បឋម​សិក្សា​ទទួល​ការណែនាំ និង​ការគាំទ្រ​ជា​បន្ត​បន្ទាប់​មកពី​គណៈប្រធាន​អង្គការ​បឋម​សិក្សា​ស្តេក ។

នៅក្នុង​អង្គភាព​តូច​មួយ ប្រធាន​អង្គការ​បឋម​សិក្សា​ប្រហែល​ជាអ្នក​ដឹកនាំ​តែម្នាក់​គត់​ដែល​បាន​ហៅ​នៅក្នុង​អង្គការ​បឋម​សិក្សា ។ នៅក្នុង​ករណី​នេះ គាត់​ធ្វើការ​ជាមួយ​នឹង​ឪពុកម្ដាយ​ដើម្បី​រៀបចំ​មេរៀន ម៉ោង​ច្រៀង​ចម្រៀង និង​សកម្មភាព​នានា ។ គាត់​ក៏​ត្រូវ​ធ្វើ​ឲ្យ​ប្រាកដ​ថា យ៉ាងហោច​ណាស់​មជ្ឈិមវ័យ​ពីរនាក់​ដែល​មាន​ការទទួល​ខុសត្រូវ មាន​វត្តមាន​នៅក្នុង​ការប្រជុំ និង​សកម្មភាព​ថ្នាក់​ទាំងអស់ ។ ប្រសិនបើ​អង្គភាព​នោះ​ធំ​ល្មម​គ្រប់គ្រាន់ នោះ​អាច​មាន​ការហៅ​បន្ថែម​ទៀត​តាម​លំដាប់​លំដោយ​នេះ ៖ ទីប្រឹក្សា អ្នកដឹកនាំ​ភ្លេង គ្រូបង្រៀន និង​ថ្នាក់ដឹកនាំ​ថ្នាក់​ទារកដ្ឋាន លេខា និង​ថ្នាក់ដឹកនាំ​សកម្មភាព ។

ប្រសិន​បើ​សាខា​មួយ​គ្មាន​ប្រធាន​អង្គការ​បឋម​សិក្សា នោះ​ប្រធាន​សមាគម​សង្គ្រោះ​អាច​ជួយ​ឪពុកម្ដាយ​ឲ្យ​រៀបចំ​ការ​បង្រៀន​ដល់​កុមារ រហូត​ដល់​ប្រធាន​អង្គការ​បឋម​សិក្សា​ម្នាក់​ត្រូវ​បាន​ហៅ ។

គណៈប្រធាន​អង្គការ​បឋម​សិក្សា​ជួយ​ឪពុក​ម្ដាយ​ឲ្យ​រៀបចំ​កុមារ​ដើម្បី​ចាប់ផ្ដើម​ដើរ និង​រីកចម្រើន​នៅលើ​ផ្លូវ​នៃ​សេចក្ដីសញ្ញា ។ នេះ​គឺជា​ការទទួល​ខុសត្រូវ​ដ៏សំខាន់​បំផុត​មួយ​របស់​ពួកគាត់ ។

ដើម្បី​សម្រេច​ការណ៍​នេះ​បាន ប្រធាន​អង្គការ​បឋម​សិក្សា​អាច​ចាត់​សមាជិក​ម្នាក់​ក្នុង​គណៈប្រធាន​របស់​ខ្លួន ឲ្យ​ជួយ​ឪពុក​ម្ដាយ​ដើម្បី​រៀបចំ​កូនៗ​របស់​ពួកគាត់​ឲ្យ​ទទួល​ពិធី​បុណ្យ​ជ្រមុជ​ទឹក និង​ពិធី​បញ្ជាក់ ។ ប្រធាន​អង្គការ​បឋម​សិក្សា​អាច​ចាត់​សមាជិក​ម្នាក់ទៀត​ក្នុង​គណៈប្រធាន​របស់​ខ្លួន ឲ្យ​ជួយ​ឪពុក​ម្ដាយ​ដើម្បី​រៀបចំ​កូនៗ​របស់​ពួកគាត់​ទៅ​ព្រះវិហារ​បរិសុទ្ធ និង​ទទួល​បព្វជិតភាព ។

សមាជិក​នៃ​គណៈប្រធាន​ទាំងនេះ​ជម្រាប​ដល់​ឪពុក​ម្ដាយ​អំពី​ធនធាន​នានា​នៅក្នុង​បណ្ណាល័យ​ដំណឹងល្អ ដែល​អាច​ជួយ​ពួកគាត់​បាន ។ សូមមើល​ឧទាហរណ៍ « ការរៀបចំ​កូនៗ​របស់​បងប្អូន​ឲ្យ​នៅលើ​ផ្លូវ​នៃ​សេចក្ដីសញ្ញា​របស់​ព្រះ​ពេញ​មួយ​ជីវិត » នៅក្នុង​សៀវភៅ ចូលមកតាមខ្ញុំ ។ សមាជិក​ក្នុង​គណៈប្រធាន​អាច​ធ្វើការ​ជាមួយ​នឹង​បងប្អូន​ប្រុស​ស្រី​ដែល​ផ្ដល់​ការងារ​បម្រើ គ្រូបង្រៀន និង​សមាជិក​ដទៃ​ទៀត​ដើម្បី​គាំទ្រ​ដល់​ឪពុក​ម្ដាយ​បាន ។

ប្រធាន​អង្គការ​បឋម​សិក្សា​មាន​ការទទួល​ខុសត្រូវ​បន្ថែម​ទៀត​ដូច​ខាងក្រោម​នេះ ។ ទីប្រឹក្សា​របស់​គាត់​ជួយ​ដល់​គាត់ ។

• បម្រើ​នៅក្នុង​ក្រុមប្រឹក្សា​វួដ ។ គាត់​បម្រើ​ជា ( ១ ) សមាជិក​មួយរូប​នៃ​ក្រុមប្រឹក្សា​វួដ​ដែល​ជួយ​បំពេញ​តាម​សេចក្ដី​ត្រូវការ​នៅក្នុង​វួដ ហើយ​ស្វែងរក​ដំណោះស្រាយ​នានា និង ( ២ ) ជា​អ្នកតំណាង​ឲ្យ​អង្គការ​បឋម​សិក្សា ។ គាត់​ជួយ​ក្រុមប្រឹក្សា​វួដ​ឲ្យ​ស្គាល់​ឈ្មោះ និង​ស្ថានភាព​នៅក្នុង​គ្រួសារ​របស់​កុមារ​ម្នាក់ៗ ដើម្បី​ជួយ​ជំរុញ​ដល់​ការផ្ដល់​ការងារ​បម្រើ​ដល់​កុមារ និង​ក្រុមគ្រួសារ​ទាំងឡាយ ។ សូមមើល ២៩.២.៥ ។

• ធ្វើ​ការ​ប្រជុំ​គណៈប្រធាន​អង្គការ​បឋម​សិក្សា​ជា​ទៀង​ទាត់ ហើយ​ជួប​នឹង​ប៊ីស្សព ឬ​ទីប្រឹក្សា​ដែល​បាន​ចាត់តាំង​របស់​គាត់ ។

• ដាក់​ស្នើ​អនុសាសន៍​ទៅកាន់​គណៈ​ប៊ីស្សព​ឲ្យ​ហៅ​បុរស និង​ស្ត្រី​មជ្ឈិម​វ័យ​មក​បម្រើ​នៅ​ក្នុង​អង្គការ​បឋម​សិក្សា ។

• ជួយ​ក្រុមប្រឹក្សា​វួដ​ឲ្យ​ស្គាល់​កុមារ ដែល​នឹង​គ្រប់​អាយុ​ដើម្បី​ទទួល​បុណ្យ​ជ្រមុជ​ទឹក​នៅ​ឆ្នាំ​ក្រោយ ( សូមមើល ១៨.៧.១.១ ) ។

• ជួយ​ដាក់​ផែនការ​ធ្វើ​កម្មវិធី​បុណ្យ​ជ្រមុជ​ទឹក​សម្រាប់​កុមារ​ដែល​មាន​កំណត់ត្រា នៅពេល​មាន​ការស្នើសុំ​ឲ្យ​ធ្វើ​ដូច្នោះ ( សូមមើល ១៨.៧.២ ) ។

• ដាក់​ផែនការ ហើយ​ដឹកនាំ​ការ​បើក​កម្មវិធី​ប្រជុំ​អង្គការ​បឋម​សិក្សា​នៅ​ថ្ងៃ​អាទិត្យ ។

• ធ្វើ​ការ​ងារ​បម្រើ​ដល់​កុមារ គ្រូបង្រៀន និង​ថ្នាក់​ដឹកនាំ​ម្នាក់ៗ​ក្នុង​អង្គការ​បឋម​សិក្សា ។

• បង្រៀន​ថ្នាក់​ដឹកនាំ និង​គ្រូបង្រៀន​ក្នុង​អង្គការ​បឋម​សិក្សា​ពី​ការ​ទទួល​ខុស​ត្រូវ​របស់​ពួកគេ ហើយ​គាំទ្រ​ពួកគេ​នៅ​ក្នុង​ការ​ទទួល​ខុស​ត្រូវ​ទាំង​នោះ ដោយ​ណែនាំ​ពួកគេ​ពី​ការ​ហៅ​របស់​ពួកគេ ( សូមមើល ការបង្រៀន​តាម​របៀប​របស់​ព្រះអង្គ​សង្គ្រោះ [ ឆ្នាំ​២០១៦ ] ទំព័រ ៣៨ ) ។

• ជួយ​ថ្នាក់ដឹកនាំ និង​គ្រូបង្រៀន​ក្នុង​អង្គការ​បឋម​សិក្សា​អំឡុង​ម៉ោង​រៀន ម៉ោង​ច្រៀង​ចម្រៀង និង​ម៉ោង​ប្ដូរ​ថ្នាក់ ។

• ចូល​រួម​ថ្នាក់​អង្គការ​បឋម​សិក្សា ហើយ​រៀបចំ​គ្រូបង្រៀន​ឲ្យ​ចូល​រួម​ការ​ប្រជុំ​ក្រុម​ប្រឹក្សា​គ្រូបង្រៀន ។

• ជួយ​ណែនាំ​កម្មវិធី​កុមារ និង​យុវវ័យ​ដល់​កុមារ​ដែល​ឈាន​ចូល​អាយុ ៨​ឆ្នាំ និង​ដល់​ឪពុក​ម្ដាយ​របស់​ពួកគេ ។ ការណ៍​នេះ​អាច​កើត​ឡើង​នៅ​ក្នុង​គេហដ្ឋាន​របស់​ពួកគេ ឬ​ក្នុង​ថ្នាក់​អង្គការ​បឋម​សិក្សា​របស់​ពួកគេ ( សូមមើល​ ១២.៥.៧ ) ។

• មើលការ​ខុស​ត្រូវ​លើ​កំណត់ត្រា របាយការណ៍ ថវិកា និង​ហិរញ្ញវត្ថុ​នៃ​អង្គការ​បឋម​សិក្សា ។

ប្រសិន​បើ​អង្គភាព​ធំ​ល្មម​គ្រាប់​គ្រាន់ នោះ​ប្រធាន​អង្គការ​បឋម​សិក្សា​ផ្ដល់​អនុសាសន៍​ឲ្យ​គណៈប៊ីស្សព​ហៅ​ស្ត្រី​មជ្ឈិមវ័យ​ម្នាក់​មក​បម្រើ​ជា​លេខា ។ លេខាមាន​ការ​ទទួល​ខុស​ត្រូវ​ដូច​ខាង​ក្រោម ៖

• ជួយ​គណៈប្រធាន​អង្គការ​បឋម​សិក្សា​ឲ្យ​រៀបចំ​របៀបវារៈ​សម្រាប់​ការប្រជុំ​គណៈ​ប្រធាន ។ គាត់​ចូលរួម​ក្នុង​ការប្រជុំ​ទាំង​នេះ កត់ត្រា ហើយ​តាម​ដាន​លើ​កិច្ចការ​ទាំង​ឡាយ ។

• ធ្វើការ​យ៉ាង​ជិតស្និទ្ធ​ជាមួយ​នឹង​គ្រូបង្រៀន និង​ថ្នាក់​ដឹកនាំ​ដើម្បី​រក្សា​កំណត់ត្រា​វត្តមាន​ឲ្យ​បាន​ត្រឹមត្រូវ ។

• សូម​ធ្វើការ ជាមួយ​កូរ៉ុម​អែលឌើរ និង​លេខា​សមាគមសង្គ្រោះ​ដោយ​ប្រើប្រាស់ ធ.ថ.ស. ដើម្បីរក្សា​កំណត់ត្រា​វត្តមាន​របស់​មនុស្ស​ពេញវ័យ​ដែល​បម្រើ​នៅក្នុង​បឋមសិក្សា ។

• ធ្វើ​ឲ្យ​ប្រាកដ​ថា​គណៈប្រធាន​អង្គការ​បឋម​សិក្សា​ដឹង​ពី ៖

  • កុមារ​ថ្មី និង​កុមារ​មក​លេង ។

  • កុមារ​ចូល​ថ្នាក់​ទារកដ្ឋាន និង​កុមារ​ផ្លាស់​ពី​ថ្នាក់​ទារកដ្ឋាន​ទៅ​ថ្នាក់​សាន់ប៊ីម ។

  • កុមារ​ដែល​មាន​អាយុ​គ្រប់​គ្រាន់​សម្រាប់​ពិធី​បុណ្យ​ជ្រមុជទឹក ។

  • កុមារ​ដែល នឹង​ឈានដល់​វ័យ​ដែល​ចេញ​ពី​ថ្នាក់​អង្គការ​បឋម​សិក្សា ។

• ចាត់​កុមារ​ឲ្យ​ធ្វើ​ការ​អធិស្ឋាន ចែក​បទគម្ពីរ និង​ឡើង​និយាយ​អំឡុង​ការបើក​កម្មវិធី​ប្រជុំ​អង្គការ​បឋម​សិក្សា​នៅ​ថ្ងៃ​អាទិត្យ ( នៅក្រោម​ការដឹកនាំ​របស់​គណៈប្រធាន ) ។ គាត់​ក៏​ជូន​ដំណឹង​ដល់​ឪពុក​ម្ដាយ​ផង​ដែរ ។

• ជួយ​គណៈប្រធាន​អង្គការ​បឋម​សិក្សា​រៀបចំ​គម្រោង​ថវិកា មើលការ​ខុស​ត្រូវ​លើ​ការ​ចំណាយ ហើយ​តាម​ដាន​ឯកសារ​មេរៀន​សម្រាប់​កុមារ និង​យុវវ័យ ។

អ្នកដឹកនាំ​ភ្លេង និង​អ្នក​លេង​ព្យាណូ​បង្រៀន​កុមារ​អំពី​ដំណឹងល្អ​នៃ​ព្រះយេស៊ូវ​គ្រីស្ទ តាមរយៈ​តន្ត្រី​អំឡុង​ម៉ោង​ច្រៀង​ចម្រៀង ។ តន្ត្រី​ជួយ​ដល់​ការសិក្សា​ព្រះគម្ពីរ​ប្រចាំ​សប្តាហ៍​ដូច​ដែល​បាន​រៀបរាប់​នៅក្នុង ចូរ​មក​តាម​ខ្ញុំ ។ អ្នក​អាចប្រើប្រាស់​ធនធាន​ដូចខាងក្រោម​នេះ​បាន ៖

• សៀវភៅ​ចូរ​មក​តាម​ខ្ញុំ

• សេចក្តី​ណែនាំ​សម្រាប់​ម៉ោង​ច្រៀង​ចម្រៀង និង​បទបង្ហាញ​របស់​កុមារ​នៅក្នុងការប្រជុំ​សាក្រាម៉ង់

• សៀវភៅ​ចម្រៀង​កុមារ

• ទំនុកតម្កើង

• កម្រង​តន្រ្តី​កុមារ នៅលើ​គេហទំព័រ ChurchofJesusChrist.org

• « Primary Singing Time—Music Can Teach Doctrine » នៅលើ​គេហទំព័រ ( MediaLibrary.ChurchofJesusChrist.org )

គណៈប៊ីស្សព​ត្រូវតែ​អនុម័ត​លើ​ការប្រើប្រាស់​តន្រ្តី​ផ្សេងទៀត​នៅក្នុង​ថ្នាក់​អង្គការ​បឋម​សិក្សា ។

ប្រសិនបើ​គ្មាន​អ្នកលេង​ព្យាណូ ឬ​គ្មាន​ព្យាណូ​ទេ នោះ​ថ្នាក់ដឹកនាំ​អាច​ប្រើ​ការថត​សំឡេង​ទុក​ពី​ប្រភព​ដូច​ខាងក្រោម​នេះ​បាន ៖

• Sacred Music app

• កម្មវិធី​បណ្ណាល័យ​ដំណឹងល្អ

• Music.ChurchofJesusChrist.org

• ស៊ីឌី​នៅ​គេហទំព័រ store.ChurchofJesusChrist.org

កុមារ​ក៏អាច​ច្រៀង​ដោយគ្មាន​ភ្លេងអម​បាន​ដែរ ។

អ្នកដឹកនាំ​ភ្លេង​អាច​ជួយ​ផ្នែក​ភ្លេង​នៅក្នុង​ថ្នាក់ទារកដ្ឋាន​បាន នៅពេល​ដែល​មានការស្នើសុំ ។ អ្នក​អាច​ហៅ​អ្នក​ដឹកនាំភ្លេង​បន្ថែម​ម្នាក់​ទៀត​ឲ្យបម្រើ ប្រសិនបើ​ចាំបាច់ ។

អ្នកដឹកនាំ​ភ្លេង​ធ្វើការ​ជាមួយ​គណៈប្រធាន​អង្គការ​បឋមសិក្សា ដើម្បី​ជួយ​កុមារ​ឲ្យរៀបចំខ្លួន​សម្រាប់​ការធ្វើ​បទបង្ហាញ​របស់​កុមារ​នៅក្នុង​ការប្រជុំ​សាក្រាម៉ង់​ប្រចាំឆ្នាំ ( សូមមើល ១២.១.៦ ) ។

សូមមើល ម៉ោង​ច្រៀងចម្រៀង នៅលើ​គេហទំព័រ ChurchofJesusChrist.org ដើម្បី​ទទួលបាន​គំនិត និង​ធនធាន​បន្ថែម​ទៀត ។

វាគឺជា​អភ័យ​ឯកសិទ្ធិ​ដ៏ពិសិដ្ឋ​ដើម្បី​បង្រៀន​ដល់​កុមារ ។ ព្រះយេស៊ូវ​គ្រីស្ទ​បានបង្រៀន​ថា « មើល​ន៏ កូន​តូចៗ​របស់​អ្នក » ហើយ « ឲ្យ​ចំណី​ដល់​កូនចៀម​ខ្ញុំ​ស៊ីផង » ( នីហ្វៃទី​៣ ១៧:២៣; យ៉ូហាន ២១:១៥ ) ។ តាមរយៈ​ការធ្វើ​តាម​ការអញ្ជើញ​ទាំងនេះ នោះ​ថ្នាក់ដឹកនាំ​អង្គការ​បឋមសិក្សា​ស្រឡាញ់ និង​បង្រៀន​កុមារ​តាមរបៀប​របស់​ព្រះអង្គ​សង្រ្គោះ ។

គណៈប្រធាន​អង្គការបឋមសិក្សា​ផ្តល់​អនុសាសន៍​ឲ្យ​គណៈប៊ីស្សព​ហៅ​បុរស និង​ស្រ្តី​មក​បម្រើ​ជា​គ្រូបង្រៀន​ក្នុង​ថ្នាក់​អង្គការ​បឋមសិក្សា និង​ជាអ្នក​ដឹកនាំ​ថ្នាក់​ទារកដ្ឋាន ។ គណៈប៊ីស្សព​ពិចារណា​ពី​អនុសាសន៍​ទាំងនេះ ហើយ​ផ្តល់​ការហៅបម្រើ​នេះ ។ សមាជិក​ទាំងនេះ​ត្រូវបាន​ហៅឲ្យ​បង្រៀន និង​ផ្ដល់​ការងារ​បម្រើ​ដល់​ក្រុម​កុមារ​ដែល​មាន​អាយុ​ជាក់លាក់ ។

គ្រូបង្រៀន​បឋម​សិក្សា​បង្រៀន​មក​ពី​សៀវភៅ ចូរ​មក​តាម​ខ្ញុំ ( អាយុ ៣–១១ ឆ្នាំ ) ។ នៅ​ថ្ងៃអាទិត្យ​ទី​៥ ពួក​គេ​ត្រូវបាន​លើក​ទឹក​ចិត្ត​ឲ្យ បង្រៀន​មេរៀន​ចេញ​មកពី « ឧបសម្ព័ន្ធ ខ ៖ សម្រាប់​អង្គការ​បឋម​សិក្សា—ការរៀបចំ​កូនៗ​របស់​បងប្អូន​ឲ្យ​នៅលើ​ផ្លូវ​នៃ​សេចក្ដីសញ្ញា​របស់​ព្រះ​ពេញ​មួយ​ជីវិត » ។

ថ្នាក់​ដឹកនាំ​ថ្នាក់​ទារកដ្ឋាន​បង្រៀន ចេញ​មកពី​សៀវភៅ មើល​ន៏ កូន​តូចៗ​របស់​អ្នក​រាល់​គ្នា ។

គ្រូបង្រៀន និង​អ្នកដឹកនាំ​ថ្នាក់​ទារកដ្ឋាន​ធ្វើតាម​គោលការណ៍​នៅក្នុង ការបង្រៀន​តាម​របៀប​របស់​ព្រះអង្គ​សង្គ្រោះនិង ជំពូកទី ១៧ នៃ​ក្បួនខ្នាត​នេះ ។

នៅពេល​មជ្ឈិមវ័យ​បង្រៀន​កុមារ​នៅក្នុង​មជ្ឈដ្ឋាន​នៃ​សាសនាចក្រ យ៉ាង​ហោចណាស់​គួរមាន​មជ្ឈិមវ័យ​ពីររូប​ដែល​មាន​ការទទួលខុសត្រូវ មាន​វត្តមាន​នៅទីនោះ ។ មជ្ឈិមវ័យ​ពីរ​រូប​នោះ​អាចជា​បុរស​ទាំងពីរ​នាក់ ជា​ស្ត្រី​ទាំង​ពីរ​នាក់ ឬ​ស្វាមី​ភរិយា​មួយ​គូ​ដែល​បាន​រៀបការ​ហើយ​ក៏បាន ។ ប្រសិនបើ​ការណ៍​នេះ​មិនអាច​ធ្វើបានទេ នោះ​ថ្នាក់ដឹកនាំ​គួរតែ​បញ្ចូល​ថ្នាក់​ចូលគ្នា ។ ថ្នាក់ដឹកនាំ និង​គ្រូបង្រៀន​ត្រូវតែ​បញ្ចប់​វគ្គ​បណ្តុះបណ្តាល​នៅលើ​គេហទំព័រ ProtectingChildren.ChurchofJesusChrist.org ។ ( សូម​មើល ១២.៥.១ ) ។

យុវវ័យ​មិនគួរ​បង្រៀន​នៅក្នុង​ថ្នាក់​អង្គការ​បឋមសិក្សា​នោះទេ សូម្បីតែ​បង្រៀន​ជំនួស​ក្តី ។

គ្រូ​បង្រៀន​ថ្នាក់​អង្គការ​បឋម​សិក្សា និង​អ្នក​ដឹកនាំ​ថ្នាក់​ទារកដ្ឋាន​នៅ​ជា​មួយ​កុមារ ពេញ​ម៉ោង​ថ្នាក់​អង្គការ​បឋមសិក្សា ដោយ​រួម​ទាំង​ម៉ោង​ច្រៀងចម្រៀង និង​ការផ្លាស់ប្តូរ​ថ្នាក់​ផងដែរ ។ នៅអំឡុង​ម៉ោង​ច្រៀងចម្រៀង គ្រូបង្រៀន​ទាំងឡាយ​ចូលរួម​តាមថ្នាក់​របស់​ពួកគេ ។ គ្រូបង្រៀន​គួរតែ​នៅ​ជាមួយ​កុមារតូចៗ​បន្ទាប់​ពីអង្គការ​បឋម​សិក្សា រហូត​ដល់​សមាជិក​គ្រួសារ​មក​យក​កុមារ​ទៅ ។

គ្រូបង្រៀន និង​អ្នកដឹកនាំ​ថ្នាក់​ទារកដ្ឋាន​ចូលរួម​ការប្រជុំ​ក្រុម​ប្រឹក្សា​គ្រូបង្រៀន​ជា​រៀង​រាល់​ត្រីមាស ( សូមមើល ១៣.៤ ) ។

អ្នកដឹកនាំ​សកម្មភាព​ថ្នាក់ក្លាហាន​ផ្ដល់​ការងារ​បម្រើ​ដល់​កុមារ នៅពេល​ពួកគាត់​ដាក់​ផែនការ​បម្រើ និង​ធ្វើ​សកម្មភាព​នៅដើមឆ្នាំ​ខែ មករា ដែល​កុមារ​ឈាន​ដល់​អាយុ ៨ ឆ្នាំ ( សូមមើល ១២.២.១.៣ ) ។ ការបម្រើ និង​សកម្មភាព​នានា​ផ្តោតទៅ​លើ​កិច្ចការ​នៃ​សេចក្តីសង្រ្គោះ និង​ភាពតម្កើង​ឡើង​របស់​ព្រះ ។ សកម្មភាព​ទាំងនេះ​ផ្ដល់​ភាព​សប្បាយរីករាយ និង​ការចូលរួម​ចំណែក ។ វា​បង្កើត​ឲ្យ​មាន​ទីបន្ទាល់ ពង្រឹង​ក្រុមគ្រួសារ និង​ជំរុញ​ឲ្យ​មានការរីក​ចម្រើន​ផ្ទាល់ខ្លួន ។

អ្នកដឹកនាំ​សកម្មភាព​ថ្នាក់​ក្លាហាន​អាច​ជា​គ្រូបង្រៀន​អង្គការ​បឋម​សិក្សា​របស់​កុមារ ។ ពួកគេ​ក៏អាច​ជា​សមាជិកដទៃ​ទៀត ដែល​គណៈប្រធាន​អង្គការ​បឋមសិក្សា​ផ្តល់​អនុសាសន៍​ឲ្យ​គណៈប៊ីស្សព​ហៅបម្រើ​ផង​ដែរ ។ យ៉ាងហោចណាស់មានអ្នកដឹកនាំ​ពីរ​នាក់​ចូលរួម​ក្នុងសកម្មភាពនីមួយៗ ។ ថ្នាក់ដឹកនាំអាចជា​ស្ត្រី​ទាំង​ពីរ​នាក់ បុរស​ទាំងពីរ​នាក់ ឬ​ជា​ស្វាមី​ភរិយា​មួយ​គូ​ដែល​រៀបការ​ហើយ​ក៏បាន ។ ថ្នាក់​ដឹកនាំ​ត្រូវតែ​បញ្ចប់វគ្គ​បណ្តុះបណ្តាល​នៅលើ​គេហទំព័រ ProtectingChildren.ChurchofJesusChrist.org ។ ( សូម​មើល ១២.៥.១ ) ។

នៅពេល​មជ្ឈិមវ័យ​ប្រាស្រ័យ​ទាក់ទង​ជាមួយ​កុមារ​នៅក្នុង​បរិវេណ​របស់​សាសនាចក្រ យ៉ាង​ហោច​ណាស់​គួរ​មាន​មជ្ឈិមវ័យ​ពីរ​រូប​ដែល​មាន​ការទទួល​ខុសត្រូវ មាន​វត្តមាន​នៅទីនោះ ។ វាអាច​ចាំបាច់​ដើម្បី​បញ្ចូ​លថ្នាក់រៀន​ចូលគ្នា​ដើម្បី​ឲ្យ​ការងារ​នេះ​អាច​ធ្វើ​ទៅ​បាន ។

មជ្ឈិមវ័យ​ទាំងអស់​ដែល​ធ្វើការ​ជាមួយ​កុមារ​ត្រូវតែ​បញ្ចប់​វគ្គ​បណ្តុះបណ្តាល​ស្ដីពី​ការការពារ​កុមារ និង​យុវវ័យ​អំឡុង​ពេល​មួយ​ខែ ក្រោយពី​ទទួល​បាន​ការគាំទ្រ ( នៅលើ​គេហទំព័រ ProtectingChildren.ChurchofJesusChrist.org ) ។ បន្ទាប់ពី​នោះ ពួកគេ​ចូលរៀន​វគ្គ​បណ្តុះបណ្តាល​នោះ​ម្តងទៀត​ជារៀងរាល់​បីឆ្នាំ​ម្ដង ។

នៅពេល​កុមារ​មានជំងឺ​រ៉ាំរៃ ពិការភាព ឬ​មាន​តម្រូវការ​ពិសេស នោះ​ថ្នាក់​ដឹកនាំ​អង្គការ​បឋមសិក្សា​និយាយ​ជាមួយ​ឪពុក​ម្តាយ និង​គណៈប៊ីស្សព ។ ពួកគេ​ដាក់ផែនការ​ជាមួយ​គ្នា​ដើម្បី​គាំទ្រ​ដល់​ក្រុមគ្រួសារ និង​ជួយ​កុមារ​ឲ្យ​ចូលរួម​នៅក្នុង​អង្គការ​បឋមសិក្សា ។

ជាទូទៅ កុមារ​ដែល​មាន​ពិការភាព​ចូលរៀន​ថ្នាក់​អង្គការ​បឋមសិក្សា​តាម​ធម្មតា ។ បើ​ចាំបាច់ គ្រូបង្រៀន​បន្ថែម​ទៀត​អាច​ត្រូវបាន​ហៅ​ឲ្យ​ជួយ​បាន ។

កុមារ​ដែល​មាន​ពិការភាព ឬ​មាន​តម្រូវការ​ពិសេស​ផ្សេងទៀត ជា​ធម្មតា បញ្ចប់​ថ្នាក់​អង្គការ​បឋម​សិក្សា​នៅ​ដើម​ខែ​មករា​ក្នុង​ឆ្នាំ​ដែល​ពួកគេ​មាន​អាយុ ១២ ឆ្នាំ ។ កុមារ​មួយចំនួន​អាច​មិនទាន់​បញ្ចប់​តាម​កាលវិភាគ​របស់​អង្គការ​បឋមសិក្សា​ទេ ។ ប៊ីស្សព និង​ឪពុកម្តាយ​ធ្វើការ​រួមគ្នា​ដើម្បី​សម្រេច​ចិត្ត​ពីអ្វី​ដែល​ល្អបំផុត​សម្រាប់​កុមារ​ម្នាក់ៗ ។

សម្រាប់​ព័ត៌មាន​បន្ថែម សូមមើល​នៅលើ​គេហទំព័រ disabilities.ChurchofJesusChrist.org សូមមើល​ផងដែរ ៣៨.៨.២៧ នៅក្នុង​ក្បួនខ្នាត​នេះ ។

គណៈប៊ីស្សព និង​គណៈប្រធាន​អង្គការ​បឋម​សិក្សា​គួរចងចាំ​ពី​ឥទ្ធិពល​វិជ្ជមាន​នៃ​ការ​មាន​បុរស​ដែល​មានភាព​ស័ក្តិសម បម្រើ​នៅក្នុង​អង្គការ​បឋមសិក្សា ។ បុរស​អាច​បម្រើ​ជាគ្រូបង្រៀន អ្នកដឹកនាំ​ថ្នាក់​ទារកដ្ឋាន អ្នកដឹកនាំ​ភ្លេង និង​អ្នក​លេង​ព្យាណូ ព្រមទាំង​ជា​អ្នកដឹកនាំ​សកម្មភាព​ថ្នាក់​ក្លាហាន​បាន ។

ថ្នាក់ដឹកនាំ និង​គ្រូបង្រៀន​គួរតែ​លើកទឹកចិត្ត​ឪពុកម្តាយ​ឲ្យ​យកកូនៗ​របស់គាត់​ទៅ​បន្ទប់ទឹក ពីមុន​មកកាន់​អង្គការ​បឋមសិក្សា ។ នៅអំឡុង​អង្គការ​បឋមសិក្សា កុមារតូចៗ​ត្រូវតែ​យកទៅ​បន្ទប់ទឹក​ដោយ​ឪពុក ឬ​ម្តាយ ឬ​អាណាព្យាបាល​ស្របច្បាប់​ម្នាក់ ។ ថ្នាក់ដឹកនាំ និង​គ្រូបង្រៀន​មិនគួរ​យក​កុមារ​ទៅបន្ទប់ទឹក​នោះទេ ។

ថ្នាក់ដឹកនាំ និង​គ្រូបង្រៀន​គួរតែ​យកចិត្ត​ទុកដាក់ នៅពេល​សម្តែង​ពី​ព្រឹត្តិការណ៍​ពិសិដ្ឋ​នៅក្នុងអង្គការ​បឋមសិក្សា ។ ព្រះវរបិតាសួគ៌ និង​ព្រះវិញ្ញាណ​បរិសុទ្ធ​គឺមិន​ត្រូវ​យកមក​សម្តែង​នោះទេ ។ កុមារ​អាច​សម្តែង​តែ​ជា​ព្រះអង្គ​សង្រ្គោះ​ប៉ុណ្ណោះ​នៅក្នុង​ឈុតឆាក​ព្រះប្រសូតិកម្ម ។ សម្រាប់​គោលការណ៍​ណែនាំ​បន្ថែម សូមមើល ២០.៥.៦ ។

នៅពេល​កុមារ​ចាប់ផ្តើម​ថ្នាក់ ជ.ផ.ត. ៤ គណៈប្រធាន​អង្គការ​បឋមសិក្សា និង​គ្រូបង្រៀន​អង្គការ​បឋម​សិក្សា​របស់​ពួកគេ​រំឭក​ពួកគេ​ឲ្យ « ជ្រើសរើស​ត្រូវ » ។ ថ្នាក់​ដឹកនាំ​ទាំងនេះ​ក៏​ផ្តល់​ចិញ្ចៀន ជ.ផ.ត ពណ៌បៃតង​ទៅឲ្យ​កុមារ​ម្នាក់ៗ​ផងដែរ ។

នៅដើម​ឆ្នាំ​នីមួយៗ ប៊ីស្សព ទីប្រឹក្សា​ម្នាក់​របស់​គាត់ ឬ​សមាជិក​នៃ​គណៈប្រធាន​អង្គការ​បឋម​សិក្សា​អាច​ទៅលេង​ផ្ទះ ឬ​ចូល​ក្នុង​ថ្នាក់​អង្គការ​បឋម​សិក្សា​របស់​កុមារ​ម្នាក់ៗ​ដែល​ឈានចូល​ដល់​អាយុ ៨ ឆ្នាំ នៅ​ឆ្នាំ​នេះ ។ ពួកគាត់​អញ្ជើញ​កុមារ និង​ឪពុកម្តាយ​របស់​ពួកគេ​ឲ្យ​ចូលរួម​កម្មវិធី​កុមារ និង​យុវវ័យ ។ កុមារម្នាក់ៗ​ទទួល​បាន និមិត្តរូប​នៃ​ភាព​ជា​កម្មសិទ្ធិ និង​សៀវភៅ ការអភិវឌ្ឍ​ផ្ទាល់​ខ្លួន ៖ សៀវភៅ​ណែនាំ​កុមារ ។ ធនធាន​ទាំងនេះ​មាន​នៅលើ​គេហទំព័រ store.ChurchofJesusChrist.org ។

សម្រាប់​ព័ត៌មាន​បន្ថែម សូមមើល ChildrenandYouth.ChurchofJesusChrist.org ។