« 11. Feiā ’Āpī Tamāhine », Buka arata’i rahi : Tāvini i roto i te ’Ēkālesia a Iesu Mesia i te Feiā Mo’a i te mau Mahana Hope’a nei (2020).
« 11. Feiā ’Āpī Tamāhine », Buka arata’i rahi.
11.
Feiā ’Āpī Tamāhine
11.1
Te fā ’e te fa’anahonahora’a
E tauturu te ’āvirira’a Feiā ’Āpī Tamāhine i te mau tamari’i a te Atua ’ia fa’aineine nō te ho’i i mua i tōna ’aro. ’A rohi ai rātou nō te ha’apa’o i tā rātou mau fafaura’a e te Atua, e ha’anahia te feiā ’āpī tamāhine « i te parautia ’e te mana o te Atua ma te hanahana rahi » (1 Nephi 14:14).
11.1.1
Fā
E tauturu te ’āvirira’a Feiā ’Āpī Tamāhine i te feiā ’āpī tamāhine ’ia rave ’e ia ha’apa’o i te mau fafaura’a mo’a ’e ’ia fa’ahōhonu i tō rātou fa’afāriura’a ia Iesu Mesia ’e tāna ’evanelia.
Te fā a te hō’ē piha feiā ’āpī tamāhine o te tauturura’a ïa i te feiā ’āpī tamāhine ’ia ’ohipa ’āmui nō te rave-fa’aoti-ra’a i te ’ohipa nō te fa’aorara’a ’e te fa’ateiteira’a. I roto i tā rātou piha tamāhine, e tāvini te feiā ’āpī tamāhine ia vetahi ’ē, e rave fa’aoti i te mau hōpoi’a o te fafaura’a, e patu i te tāhō’ēra’a, ’e e ha’api’i mai ’e e ora i te ha’api’ira’a tumu.
11.1.2
Te parau tai’o a te Feiā ’Āpī Tamāhine
E nehenehe te parau tai’o a te feiā ’āpī tamāhine e tauturu i te feiā ’āpī tamāhine tāta’itahi ’ia hāro’aro’a i tōna ti’ara’a hanahana ’e ’ia fa’afāriuhia ’ia Iesu Mesia. E tai’o te feiā ’āpī tamāhine ’e tō rātou feiā fa’atere i te parau tai’o i te ’ōmuara’a o te mau purera’a i te sābati ’e i te tahi atu mau putuputura’a Feiā ’Āpī Tamāhine. Teie te parau tai’o :
« E tamāhine herehia vau e nā Metua i te ra’i ra, mā te nātura hanahana ’e te hope’a mure ’ore.
« ’Ei pipi nā Iesu Mesia, tē tūtava nei au ’ia riro mai iāna ra te huru. Tē ’imi nei au ’e tē rave nei au mai te au i te heheura’a e tae mai iā’u nei ’e tē aupuru nei au ia vetahi ’ē i tōna i’oa mo’a.
« E ti’a atu vau ’ei ’ite nō te Atua i te mau taime ato’a ’e i roto i te mau mea ato’a ’e i te mau vāhi ato’a.
« ’A tūtava ai au ’ia noa’a te fa’ateiteira’a, e poihere au i te hōro’a nō te tātarahapa, ’e e ’imi au i te ha’amaita’i iā’u i te mahana tāta’itahi. Ma te fa’aro’o, e ha’apūai au i tō’u ’utuāfare ’e i tō’u mau fēti’i, e rave au i te mau fafaura’a mo’a ’e e ha’apa’o vau i te reira, ’e e fāri’i au i te mau ’ōro’a ’e te mau ha’amaita’ira’a o te hiero mo’a ».
11.1.3
Piha tamāhine
E riro te feiā ’āpī tamāhine ’ei melo nō te hō’ē piha Feiā ’Āpī Tamāhine, ma te ha’amata i te ’āva’e Tēnuare o te matahiti e ti’ahia ai tō rātou matahiti i te 12.
E fa’anahohia te mau piha Feiā ’Āpī Tamāhine ’ei pupu matahiti. Hō’ē pupu matahiti, ’o te feiā ’āpī tamāhine pā’āto’a ïa o te ti’ahia hō’ē ā matahiti i roto i te hō’ē matahiti tārena. E nehenehe e ’āmui i roto i te hō’ē piha tamāhine hau atu i te hō’ē pupu matahiti. E nu’u te feiā ’āpī tamāhine i roto i te hō’ē piha tamāhine ’āpī i te ’āva’e Tēnuare o te matahiti e ti’ahia tō rātou matahiti i te fāito matahiti o taua piha tamāhine ra.
Nā roto i te pure, e fa’aoti te mau ’episekōpora’a ’e te feiā fa’atere ta’ata pa’ari o te feiā ’āpī tamāhine e nāhea ’ia fa’anahonaho i te piha tamāhine ’ia au i te fāito matahiti. E feruri rātou i te mau rāve’a fa’aterera’a nō te feiā ’āpī tamāhine. Ta’a ’ē noa atu te rahi o te piha tamāhine, e mā’itihia hō’ē peresideni nō te piha tāta’itahi, ’e mai te mea e nehenehe, hō’ē ’aore rā, e piti tauturu, ’e hō’ē pāpa’i parau. I roto i te mau ’āmuira’a ’ua nava’i te feiā ’āpī tamāhine, ’ia fa’anahohia te mau piha tamāhine huru rahi, ’ia ti’a i te mau peresidenira’a ’ia tāvini i rotopū i te mau melo o te piha tamāhine.
E parauhia te mau piha i te hō’ē noa i’oa, ’oia ho’i « Te Feiā ’Āpī Tamāhine ». Mai te mea ’ua hau atu i te hō’ē piha tamāhine i roto i te hō’ē pāroita, e fa’a’ohipahia te mau pupu matahiti nō te fa’ata’a i te mau piha tamāhine.
11.2
Te ’āmuira’a i roto i te ’ohipa nō te fa’aorara’a ’e te fa’ateiteira’a
Tē ani mai nei te Atua i te mau ta’ata ato’a ’ia haere mai i te Mesia ’e ’ia tauturu i roto i tāna ’ohipa nā roto i :
-
Te orara’a i te ’evanelia a Iesu Mesia.
-
Te ha’apa’ora’a i te feiā tei hina’aro i te tauturu.
-
Te anira’a i te mau ta’ata ato’a ’ia fāri’i i te ’evanelia.
-
Te tāhō’ēra’a i te mau ’utuāfare nō te tau a muri atu.
E paraparau ’āmui te mau peresidenira’a piha tamāhine, pāturuhia e te feiā fa’atere ta’ata pa’ari, nō ni’a i te huru nō te rave-fa’aoti-ra’a i teie ’ohipa. Nō te ha’amāramaramara’a hau, nō ni’a i te ’ohipa nō te fa’aorara’a ’e te fa’ateiteira’a, ’a tuatāpapa i te pene 1.
11,2.1
Te orara’a i te ’evanelia a Iesu Mesia
11.2.1.1
Te mau ’ohipa a te mau metua ’e te feiā fa’atere
E hōpoi’a nā te mau metua ’ia ha’api’i i tā rātou mau tamari’i i te ’evanelia ’e ’ia tauturu ia rātou ’ia ora i te reira (hi’o Te Ha’api’ira’a Tumu ’e te mau Fafaura’a 68:25–28). E pāturu te ’episekōpora’a, te feiā fa’atere nō te feiā ’āpī tamāhine, ’e te mau peresidenira’a piha tamāhine, i te mau metua i roto i teie hōpoi’a mai teie i muri nei :
-
E fa’aitoito i te ’āparaura’a i rotopū i te feiā ’āpī tamāhine ’e tō rātou ’utuāfare.
-
E ha’apāpū ē, tē pāturu nei ’e tē ha’amaita’i nei te mau ’ātivite a te feiā ’āpī i te mau ’utuāfare.
-
E tauturu i te mau metua ’ia fa’aineine i tā rātou mau tamāhine nō te ’ōro’a hiero, nō te tāvinira’a misiōnare rave tāmau (mai te mea e hina’aro te feiā ’āpī tamāhine), te fa’aipoipora’a hiero, ’e te ti’ara’a metua vahine.
E ara ato’a te feiā fa’atere i ni’a i te feiā ’āpī ’aita te ’utuāfare e pāturu ia rātou nō te ora i te ’evanelia.
E tūtava te mau metua ’e te feiā fa’atere ’ia riro rātou ’ei mau hi’ora’a maita’i nō te feiā ’āpī. E fa’aa’o rātou i te feiā ’āpī i roto i tā rātou mau tauto’ora’a ’ia riro hau atu mai ia Iesu Mesia te huru. E nehenehe te fa’anahora’a a te mau tamari’i ’e a te feiā ’āpī e tauturu i roto i teie mau tauto’ora’a (hi’o ChildrenandYouth.ChurchofJesusChrist.org).
11.2.1.2
Te ha’api’ira’a mai i te ’evanelia
E fa’aitoito te feiā fa’atere ’e te mau peresidenira’a piha tamāhine i te feiā ’āpī tamāhine ’e tō rātou mau ’utuāfare ’ia ha’api’i mai i te ’evanelia i te fare. E tuatāpapa te feiā fa’atere i te ’evanelia ’e e fa’a’ite atu i te feiā ’āpī tamāhine i te mau mea tā rātou i ha’api’i mai. E ani rātou i te mau melo o te piha tamāhine ’ia fa’a’ite mai i te ’ekālesia i te mau mea tā rātou i ha’api’i mai i te fare.
E putuputu te mau piha feiā ’āpī tamāhine i te sābati nō te ha’apūai i te fa’aro’o, nō te patu i te hō’ēra’a, nō te ha’apūai i te mau ’utuāfare ’e i te mau fare, ’e nō te rave i te mau fa’anahora’a nō te rave fa’aoti i te ’ohipa o te fa’aorara’a ’e te fa’ateiteira’a. Nā te mau peresidenira’a piha tamāhine, pāturuhia e te feiā fa’atere ta’ata pa’ari, e fa’anaho i te mau putuputura’a o te sābati.
E fa’atupuhia te mau rurura’a piha tamāhine i te piti ’e te maha o te sābati o te ’āva’e. E 50 minuti te maoro. Nā te hō’ē melo nō te peresidenira’a piha tamāhine e arata’i. E arata’i ’oia i te piha tamāhine i te tai’ora’a i te parau tai’o ’e i te ’āparau-’āmui-ra’a nō ni’a i te mau fa’auera’a ’ohipa ’e te tahi atu mau mea.
I muri iho, nā te hō’ē melo o te piha tamāhine ’aore rā, te hō’ē fa’atere ta’ata pa’ari e arata’i i te ha’api’ira’a ’evanelia. E paraparau te mau peresidenira’a piha tamāhine ’e te feiā fa’atere ta’ata pa’ari nō te fa’aoti e nā vai e ha’api’i. E ’itehia te mau arata’ira’a o te putuputura’a i roto i te Mai, pe’e mai—nō te mau pupu Autahu’ara’a a Aarona ’e te mau piha Feiā ’Āpī Tamāhine (hi’o ComeFollowMe.ChurchofJesusChrist.org).
Mai te mea i roto i te hō’ē pāroita, ’ua hau atu i te hō’ē piha feiā ’āpī tamāhine, e fa’ata’a ’ē rātou i te putuputura’a. Terā rā, e nehenehe rātou e putuputu ’āmui, mai te mea tē vai ra te hō’ē hina’aro ta’a ’ē. E nehenehe te feiā ’āpī tamāhine ’e te feiā ’āpī tamāroa e ’āmui i te tahi taime nō te hō’ē ha’api’ira’a i te sābati, mai tei fa’aauhia e te ’episekōpora’a ’e te peresidenira’a Feiā ’Āpī Tamāhine.
E fa’aitoitohia te feiā ’āpī tamāhine ’ia haere i te ha’api’ira’a séminaire (hi’o 15.1).
11.2.1.3
Te tāvinira’a ’e te mau ’ātivite
Nā te mau peresidenira’a piha tamāhine, ma te pāturuhia e te feiā fa’atere ta’ata pa’ari, e fa’anaho i te tāvinira’a ’e te mau ’ātivite. E ti’a i te reira ’ia tauturu i te rave-fa’aoti-ra’a i te ’ohipa o te fa’aorara’a ’e te fa’ateiteira’a. E ti’a i te tāvinira’a ’e te mau ’ātivite ’ia patu i te mau ’itera’a pāpū, ’ia ha’apūai i te mau ’utuāfare, ’ia fa’atupu i te hō’ēra’a o te piha tamāhine, ’e ’ia hōro’a i te mau rāve’a nō te ha’amaita’i ia vetahi ’ē. ’Ia rave-fa’atano-hia te reira i roto e maha tuha’a nō te tupura’a o te ta’ata iho : te pae vārua, te pae tōtiare, te pae tino, ’e te pae ferurira’a.
E ravehia te rahira’a o te mau ’ātivite a te feiā ’āpī i te mau taime ta’a ’ē atu i te sābati ’aore rā, i te mau pō monirē. E fa’atupuhia te reira hō’ē taime i te hepetoma. I roto i te tahi mau fenua, nō te ātea, nō te pārurura’a, ’aore rā, nō te tahi atu mau tumu, ’aita te mau ’ātivite e fa’atupuhia. I roto i te reira mau fenua, e nehenehe e fa’aiti ri’i mai te fa’atupura’a i te reira mau ’ātivite, ’ia fa’atupuhia rā hō’ē a’e i te ’āva’e hō’ē.
E nehenehe e fa’anaho i te mau ’ātivite i ni’a i te Hi’ora’a nō te fa’anahora’a i te ’ohipa tāvinira’a ’e te ’ātivite, e vai ra i ni’a i te ChurchofJesusChrist.org.
Tē vai ra te tahi tāvinira’a ’e te tahi mau ’ātivite e ’āmui te feiā ’āpī tamāroa ’e te feiā ’āpī tamāhine, nō te feiā ’āpī pa’ari ana’e rā.
E nehenehe te feiā ’āpī e fāna’o i te autahira’a i roto i te mau pupu rarahi a’e. E nehenehe te feiā ’āpī i roto e piti pāroita ’aore rā hau atu, e putuputu ’āmui i te tahi taime nō te tāvinira’a ’e te mau ’ātivite. E nehenehe te mau titi ’aore rā, te mau mata’eina’a e fa’anaho i te tahi taime i te tāvinira’a ’e te mau ’ātivite nā te feiā ’āpī.
E tauturu te feiā fa’atere ta’ata pa’ari ’ia hi’o ē, e mea ataata ’ore te mau ’ātivite (hi’o safety.ChurchofJesusChrist.org ; hi’o ato’a 20.7 i roto i teie buka arata’i). E tītauhia ’ia tae mai e piti a’e ti’a fa’atere ta’ata pa’ari i roto i te mau ’ātivite ato’a (hi’o 11.6.1).
Nō te mau ha’amāramaramara’a hau atu, hi’o YoungWomen.ChurchofJesusChrist.org. Hi’o ato’a JustServe.org i te vāhi e roa’a te reira. E hōro’a mai teie mau rāve’a tauturu i te mau mana’o nō te tāvinira’a ’e te ’ātivite.
Te mau ’ātivite tāmatahiti. Ta’a ’ē atu te mau ’ātivite tāmau a te feiā ’āpī, e nehenehe ato’a te feiā ’āpī tamāhine e ’āmui atu i roto i teie i muri nei, i te matahiti tāta’itahi :
-
Hō’ē putuputura’a piri atu i te ’ōmuara’a o te matahiti, nā te feiā ’āpī ’e tō rātou mau metua. E nehenehe te reira e fa’atupu-fa’ata’a-’ē-hia nō te feiā ’āpī tamāroa ’e te feiā ’āpī tamāhine, ’aore rā e fa’atupu-’āmui-hia. E nehenehe ato’a te reira e fa’atupuhia nā te pāroita ’aore rā, nā te titi. E arata’ihia ’e e fa’anahohia te reira nā te mau rima tauturu o te ’episekōpo i roto i te pupu o te mau tahu’a ’e te peresidenira’a o te piha feiā ’āpī tamāhine pa’ari a’e. E nehenehe te feiā ’āpī tamāhine e ti’ahia te matahiti i te 12 i roto i terā iho matahiti, e fāri’i i tā rātou mau pihi tā’amura’a, i roto i teie putuputura’a (hi’o 11.6.3). Nō te tahi atu mau ha’amāramaramara’a, hi’o ChildrenandYouth.ChurchofJesusChrist.org.
-
Hō’ē pūhapara’a nā te feiā ’āpī tamāhine (hi’o Young Women Camp Guide (Te arata’i pūhapara’a nā te feiā ’āpī tamahine)). E nehenehe te feiā ’āpī tamāhine e ’āmui atu i roto i te tahi atu mau pūhapara’a, te mau tupura’a ’ohipa, ’e te mau ’ātivite i te roara’a o te matahiti, mai te mea tē vai ra.
-
E ’āmuira’a feiā ’āpī pāroita ’aore rā titi, ’aore rā e ’āmuira’a Nō te pūai o te feiā ’āpī (JSF). Nō te mau ha’amāramaramara’a nō ni’a i te mau ’āmuira’a JSF, hi’o FSY.ChurchofJesusChrist.org. Nō te mau ha’amāramaramara’a nō ni’a i te mau pi’ira’a ’e te mau hōpoi’a a te JSF, nō te pāroita ’e nō te titi, hi’o FSYLeader.ChurchofJesusChrist.org (nō te Fenua Marite ’e Tanata) ’aore rā FSY Planning Guide (Arata’i nō te fa’anahora’a i te JSF) (nō te tahi atu mau fenua).
-
Hō’ē a’e ’ātivite nō te tūra’i i te parau nō te mau ture i roto i te Nō te pūai o te feiā ’āpī. E nehenehe te feiā ’āpī tamāroa ’e te feiā ’āpī tamāhine e ’āmui atu i roto i teie tupura’a ’ohipa. E nehenehe ato’a e ani i te mau metua.
Te mau tītaura’a o te matahiti. Ma te parau fa’ati’a a tō rātou mau metua, e nehenehe te feiā ’āpī tamāhine e haere i te pūhapara’a pō a te feiā ’āpī tamāhine e ha’amata i te ’āva’e Tēnuare o te matahiti e ti’ahia ai tō rātou matahiti i te 12. E nehenehe rātou e haere i te mau orira’a, te mau ’āmuira’a feiā ’āpī, ’e te mau ’āmuira’a JSF e ha’amata i te ’āva’e Tēnuare o te matahiti e ti’ahia ai tō rātou matahiti i te 14. Terā rā, ’ia ti’ahia tō rātou e 16 a’e matahiti hou te arapaera’a (hi’o Nō te Pūai o te Feiā ’Āpī [2011], 4).
’Aufaura’a i te mau ’ātivite. Nā te tāpura faufa’a a te pāroita e ’aufau i te mau ’ātivite, tae noa atu i te mau tauiha’a. ’Eiaha te mau rāterera’a ’e te mau ha’amāu’ara’a ’ia rahi roa.
Fa’anahora’a ta’a ’ē, mai te mea ’aita e rava’i te tāpura faufa’a a te pāroita nō te ’aufau i te mau ’ātivite e rave rahi mahana, mai te mau pūhapara’a, e nehenehe te feiā fa’atere e ani i te feiā e ’āmui atu i te reira ’ātivite ’ia ’aufau i tā rātou tuha’a. Terā rā, ’eiaha te hō’ē tamāhine ’ia ’ōpanihia ’ia haere mai te mea ’aita tāna e nehenehe e ’aufau. Mai te mea e hina’aro-noa-hia ā te tahi atu moni, e nehenehe te ’episekōpo e fa’ati’a ’ia ravehia te hō’ē ’ātivite ’imira’a moni i te matahiti hō’ē (hi’o 20.6.5).
E ha’apāpū te ’episekōpora’a ē, ’ua nava’i ’e ’ua tuea maita’i te tāpura faufa’a ’e te mau ’ātivite nā te feiā ’āpī tamāroa ’e nā te feiā ’āpī tamāhine. ’Ua fa’ata’ahia te tāpura faufa’a nō te feiā ’āpī tamāhine mai te au i te rahira’a o te feiā ’āpī tamāhine i roto i te pāroita. ’Ua fa’ata’ahia te tāpura faufa’a nō te mau pupu Autahu’ara’a a Aarona mai te au i te rahira’a o te feiā ’āpī tamāroa i roto i te pāroita.
Hi’o FSY.ChurchofJesusChrist.org nō te mau ha’amāramaramara’a nō ni’a i te ’aufaura’a i te mau ’āmuira’a JSF.
11.2.1.4
Te fa’ahotura’a iāna iho
I roto i tā rātou mau tauto’ora’a ’ia riro hau atu mai te Fa’aora te huru, e anihia i te feiā ’āpī ’ia ha’amau i te mau ’ōpuara’a nō te tupu i te rahi i te pae vārua, te pae tōtiare, te pae tino ’e te pae ferurira’a (hi’o Luka 2:52). E ’imi te feiā ’āpī i te fa’aurura’a nō te ’ite, e aha te ti’a ia rātou ’ia ha’amaita’i atu. Nā roto i te tauturu a te mau metua, e rave rātou i te mau fa’anahora’a, e ha’a i ni’a i tā rātou mau fa’anahora’a, ’e e feruri i ni’a i te mau mea tā rātou i ha’api’i mai. E hōro’a ato’a te feiā fa’atere i te pāturura’a e hina’arohia. Terā rā, ’eiaha rātou e tāpa’o i te mau ’ōpuara’a a te feiā ’āpī tamāhine ’aore rā, i tō rātou haerera’a i mua. E nehenehe te mau metua ’e te feiā fa’atere e hōro’a i te mana’o nō ni’a i te mau ’ōpuara’a, e vaiiho rā rātou i te feiā ’āpī ’ia ’imi i tā rātou iho fa’aurura’a nō ni’a i te mau ’ōpuara’a e rave.
E fa’aitoitohia te feiā ’āpī ’ia fa’aoti e piti a’e ’ōpuara’a i roto i nā tuha’a tāta’itahi e maha i te matahiti tāta’itahi. E nehenehe rātou e fa’a’ohipa i te Fa’ahotura’a i te ta’ata iho : Buka arata’i nā te feiā ’āpī ’aore rā, te fa’aaura’a rorouira Ora i te ’evanelia, nō te ha’amau ’e nō te tāpa’opa’o i te mau fā.
Nō te tahi atu mau ha’amāramaramara’a, hi’o ChildrenandYouth.ChurchofJesusChrist.org.
11.2.2
Te ha’apa’ora’a i te feiā tei hina’aro i te tauturu
E ti’a i te feiā ’āpī tamāhine ’ia fāri’i tāmau i te mau rāve’a nō te tāvini ia vetahi ’ē i roto ’e i pīha’i iho i tō rātou ’utuāfare, i roto i te mau ’ātivite a te feiā ’āpī, ’e nā roto ia rātou iho. Tē vai ra te mau mana’o nō te tāvinira’a i ni’a i te ChildrenandYouth.ChurchofJesusChrist.org I te vāhi tē vai ra, e hōro’a mai te JustServe.org i te mau rāve’a ’ohipa tāvinira’a i rotopū i te huira’atira.
11.2.2.1
Aupururaʼa
Te aupurura’a ’o te ha’apa’ora’a ïa ia vetahi ’ē mai tā te Fa’aora e nā reira. E nehenehe te feiā ’āpī tamāhine e fāri’i i te fa’auera’a nō te aupuru ma te ha’amata i te ’āva’e Tēnuare o te matahiti e ti’ahia ai tō rātou matahiti i te 14. Nō te tahi atu mau ha’amāramaramara’a, hi’o pene 21.
11.2.3
Te anira’a i te mau ta’ata ato’a ’ia fāri’i i te ’evanelia
E ani te feiā ’āpī tamāhine i te mau ta’ata ato’a ’ia fāri’i i te ’evanelia ’a ti’a ai rātou « ’ei ’ite o te Atua i te mau mahana ato’a, ’e i te mau mea ato’a, ’e i roto i te mau vāhi ato’a » (Mosia 18:9). ’Ua tāpurahia i raro nei te tahi mau rāve’a nō te rave i te reira :
-
Fa’a’ite i te hō’ē hi’ora’a maita’i ’ei mau pipi nā Iesu Mesia.
-
Fa’a’ite i tō rātou ’itera’a pāpū i te mau hoa ’e i te mau melo o te ’utuāfare.
-
E aupuru i te mau melo paruparu o tā rātou piha tamāhine.
-
E ani i te mau hoa ’ia haere mai i te purera’a ’aore rā, i te mau ’ātivite a te feiā ’āpī.
-
Ani i te mau hoa ’ia ’āmui mai i roto i te fa’anahora’a a te mau tamari’i ’e a te feiā ’āpī. E ha’a te feiā fa’atere piri roa i te mau metua o teie mau feiā ’āpī nō te tauturu ia rātou ’ia hāro’aro’a i te fa’anahora’a ’e ’ia fa’ata’a nāhea rātou ’e tā rātou mau tamari’i ’ia ’āmui mai i roto.
-
Ani i te mau hoa ’ia ha’api’ihia e te mau misiōnare.
E nehenehe te mau metua ’e te feiā fa’atere e tauturu i te feiā ’āpī tamāhine ’ia fa’aineine ia rātou nō te fa’a’ite i te ’evanelia i te roara’a o tō rātou orara’a. ’Ua tāpurahia i raro nei te tahi mau rāve’a nō te rave i te reira :
-
E fa’aitoito i te feiā ’āpī tamāhine ’ia noa’a tō rātou iho ’itera’a pāpū nō ni’a i te fa’anahora’a nō te ’oa’oa a te Metua i te ao ra, te tāra’ehara o Iesu Mesia, ’e te fa’aho’i-fa’ahou-ra’a-hia mai tāna ’evanelia.
-
E hōro’a i te mau rāve’a nō te tāvini i roto i te ’Ēkālesia.
-
E hōro’a i te mau rāve’a nō te ha’api’i i te ’evanelia i roto i te mau putuputura’a a te piha tamāhine ’e i roto i te tahi mau fa’anahora’a.
Mai te mea e hina’aro te feiā ’āpī tamāhine e tāvini i te hō’ē misiōni rave tāmau, e tauturu te mau metua ’e te feiā fa’atere ia rātou ’ia fa’aineine. ’Oia ato’a, e ha’api’i ia rātou nō ni’a i te mau ha’amaita’ira’a ’e te mau tītaura’a o te ’ohipa misiōnare rave tāmau.
’Ei tuha’a nō teie fa’aineinera’a, e nehenehe te ’episekōpora’a ’aore rā, te peresidenira’a titi e fa’anaho i te hō’ē ha’api’ira’a fa’aineinera’a misiōnare. Te mau rāve’a tumu nō teie ha’api’ira’a ’o te mau pāpa’ira’a mo’a ïa, te Missionary Standards for Disciples of Jesus Christ (Te mau ture misiōnare nō te mau pipi a Iesu Mesia), ’e te ’Ia Poro Haere i tā’u nei ’Evanelia. E’ita teie ha’api’ira’a e fa’aterehia i te mau putuputura’a mātarohia i te sābati.
E hōro’a te Missionary.ChurchofJesusChrist.org i te tahi atu mau rāve’a ’o tē nehenehe e tauturu i te feiā ’āpī tamāhine e hina’aro e fa’aineine nō te tāvini i te hō’ē misiōni. Hi’o te mau pene 23 ’e te 24 nō te mau ha’amāramaramara’a hau atu.
11.2.4
Te tāhō’ēra’a i te mau ’utuāfare nō te tau a muri atu
E nehenehe te feiā ’āpī tamāhine e tauturu ’ia hō’ē te mau ’utuāfare nō te tau a muri atu nā roto i te mau rāve’a e rave rahi. ’Ua tāpurahia i raro nei te tahi o te reira mau rāve’a :
-
Fa’atura i tō rātou mau metua ’e e fa’a’ite i te hō’ē hi’ora’a nō te hō’ē orara’a mai tō te Mesia i roto i tō rātou fare.
-
Fa’aineine ’ia fāri’i i tō rātou iho ’utuāfare mure ’ore.
-
Vai ti’a mā nō te hō’ē parau fa’ati’a nō te hiero.
-
Fa’aineine nō te fāri’i i te mau ’ōro’a nō te hiero, tae noa atu i te fa’aipoipora’a mure ’ore.
-
Ha’api’i mai i te parau nō ni’a i tō rātou mau ’utuāfare fēti’i ’e te mau tupuna (hi’o Tō’u ’utuāfare : Te mau ’ā’amu e tāhō’ē ia tātou).
-
’Imi i te mau tupuna tei tītauhia te mau ’ōro’a o te hiero (hi’o FamilySearch.org).
-
’Āmui pinepine i roto i te mau bāpetizora’a ’e te mau ha’amaura’a nō te feiā pohe, mai te mea e nehenehe.
-
Rave i te tānūmerara’a (hi’o FamilySearch.org/indexing).
-
E tāvini ’ei tauturu ’ohipa hiero ’e ’ā’amu ’utuāfare, ’ia pi’ihia e te ’episekōpora’a (hi’o 25.2.4).
11.3
Te fa’aterera’a i te Feiā ’Āpī Tamāhine o te pāroita
11,3.1
’Episekōpora’a
Te hōpoi’a mātāmua roa a te ’episekōpo o te ha’apa’ora’a ïa i te feiā ’āpī ’āpī tamāhine ’e te feiā ’āpī tamāroa i roto i tāna pāroita. E tāmau mai ’oia ’e tōna nā tauturu i tō rātou i’oa ’e e hāro’aro’a i tō rātou huru orara’a ’utuāfare. E fārerei rātou i te feiā ’āpī tamāhine tāta’itahi e piti a’e taime i te matahiti hō’ē (hi’o 31.3.1).
Tei te ’episekōpo te hōpoi’a nō te ’āvirira’a feiā ’āpī tamāhine o te pāroita. E putuputu tāmau ’oia ’e te peresideni feiā ’āpī tamāhine. E fa’a’ite atu ’oia i te mau ’ohipa nō ni’a i te Feiā ’Āpī Tamāhine i roto i te ’āpo’ora’a a te ’episekōpora’a.
E ’āmui tāmau atu te ’episekōpo ’e tōna nā tauturu i roto i te mau putuputura’a a te Feiā ’Āpī Tamāhine, te tāvinira’a ’e te mau ’ātivite. Mai te mea e rave rahi piha Feiā ’Āpī Tamāhine, e nehenehe te ’episekōpo e fa’ata’a iāna iho ’e tōna nā tauturu nō te ’ohipa i pīha’i iho i te mau piha ta’a ’ē maita’i.
11.3.2
Te peresidenira’a ta’ata pa’ari o te Feiā ’Āpī Tamāhine
E pi’i ’e e fa’ata’a te ’episekōpo i te hō’ē vahine ta’ata pa’ari nō te tāvini ’ei peresideni pāroita nō te Feiā ’Āpī Tamāhine. Mai te mea ’ua nava’i te rahi o te ’āmuira’a, e ani ’oia ’ia pi’ihia hō’ē ’aore rā, e piti vahine ta’ata pa’ari ’ei nā tauturu nōna (hi’o pene 30). E feruri te ’episekōpora’a i tāna anira’a ’e e fa’ahaere i te mau pi’ira’a.
I roto i te hō’ē ’āmuira’a na’ina’i, e nehenehe te peresideni Feiā ’Āpī Tamāhine ’o ’oia ana’e tei pi’ihia ’ei ti’a fa’atere ta’ata pa’ari i roto i te ’āvirira’a Feiā ’Āpī Tamāhine. I te reira taime, e ’ohipa ’oia ’e te mau metua nō te fa’anaho i te ha’api’ira’a ’e i te mau ’ātivite nō te Feiā ’Āpī Tamāhine. E ara ato’a ’oia ē, e tae mai e piti a’e ta’ata pa’ari ha’apa’o i roto i te mau putuputura’a ’e te mau ’ātivite ato’a. Mai te mea e nehenehe, e ti’a ’ia pi’ihia te mau tauturu ’e i te hō’ē pāpa’i parau.
I roto i te hō’ē ’āma’a na’ina’i roa e ’aita e peresideni nō te Feiā ’Āpī Tamāhine, e nehenehe te peresideni o te Sōtaiete Tauturu e fa’anaho i te ha’api’ira’a nō te feiā ’āpī tamāhine e tae atu i te taime e pi’ihia ai te hō’ē peresideni Feiā ’Āpī Tamāhine.
Teie te mau hōpoi’a a te peresideni o te Feiā ’Āpī Tamāhine : E tauturu tōna nā tauturu iāna.
-
E tāvini i roto i te ’āpo’ora’a pāroita. E tāvini ’oia (1) ’ei melo nō te ’āpo’ora’a pāroita ’o tē tauturu i te pāhonora’a i te mau hina’aro i roto i te pāroita ma te ’imira’a i te mau rāve’a, ’e (2) ’ei ti’a nō te Feiā ’Āpī Tamāhine (hi’o 29.2.5).
-
E tāvini ’oia ’ei melo nō te ’āpo’ora’a feiā ’āpī pāroita (hi’o 29.2.6).
-
E aupuru i te feiā ’āpī tamāhine tāta’itahi.
-
E hōro’a i te mau anira’a i te ’episekōpora’a nō te mau tuahine e tāvini i roto i te Feiā ’Āpī Tamāhine.
-
E ha’api’i i te tahi atu feiā fa’atere Feiā ’Āpī Tamāhine ’e te mau peresidenira’a piha tamāhine i tā rātou mau hōpoi’a.
-
E paraparau ’e te feiā ’āpī tamāhine nō ni’a i te mau fifi ’aita e tītauhia te ’episekōpo ’aore rā, e ’ere i te hāmani-’ino-ra’a (hi’o 32.3, 31.3.1, ’e 38.6.2).
-
E arata’i i te mau peresidenira’a piha tamāhine i roto i tā rātou mau hōpoi’a fa’aterera’a. Nā te hō’ē melo ta’a ’ē nō te peresidenira’a Feiā ’Āpī Tamāhine e tauturu ’e e hi’opo’a i te piha tamāhine tāta’itahi.
-
E tauturu i te feiā ’āpī tamāhine ’o tē tāvini ’ei hoa nō te mau tuahine ta’ata pa’ari i roto i te aupurura’a (hi’o 21.2.2).
-
E fa’atupu tāmau i te mau putuputura’a a te peresidenira’a Feiā ’āpī Tamāhine ’e e fārerei i te ’episekōpo.
-
E hi’opo’a i te mau parau, te mau parau fa’a’ite, te tāpura faufa’a ’e te moni nō te ’āvirira’a Feiā ’Āpī Tamāhine.
11.3.3
Pāpa’i parau
Mai te mea e ’āmuira’a rahi, e hōro’a te peresideni Feiā ’Āpī Tamāhine i te ’episekōpo ra i te i’oa o te hō’ē tuahine ta’ata pa’ari nō te tāvini ’ei pāpa’i parau nō te feiā ’āpī tamāhine. Teie te mau hōpoi’a a te pāpa’i parau :
-
E tauturu i te peresidenira’a feiā ’āpī tamāhine ’ia fa’aineine i te tāpura ’ohipa nō te mau putuputura’a a te peresidenira’a. E ’āmui atu ’oia i roto i teie mau putuputura’a, e pāpa’i i te mau nota, ’e e hi’opo’a i te mau fa’auera’a ’ohipa.
-
E ha’api’i i te mau pāpa’i parau nō te piha tamāhine ’e e tauturu ia rātou ’ia tāpa’o i te rahira’a ta’ata e tae mai.
-
E tauturu i te peresidenira’a Feiā ’Āpī Tamāhine ’ia fa’aineine i te hō’ē tāpura faufa’a ’e e fa’ata’a mai i te mau ha’amāu’ara’a.
11.3.4
Te peresidenira’a piha tamāhine ’e te pāpa’i parau
11.3.4.1
Te pi’ira’a, te pāturura’a, ’e te fa’ata’ara’a
’Ei peresidenira’a tō te piha tamāhine tāta’itahi o te Feiā ’Āpī Tamāhine. E nehenehe te peresidenira’a o te Feiā ’Āpī Tamāhine e hōro’a i te i’oa o te feiā ’āpī tamāhine ’ia tāvini ’ei peresideni piha tamāhine. Nā roto i te pure e paraparau te mau melo o te ’episekōpora’a nō te fa’aoti ’o vai te pi’i.
E pi’i te hō’ē melo o te ’episekōpora’a i te hō’ē tamāhine nō te tāvini ’ei peresideni piha tamāhine. Mai te mea e nava’i te feiā ’āpī tamāhine nō te tāvini, e feruri ’oia nā roto i te pure i te mau melo o te piha tamāhine e tano e hōro’a i te i’oa ’ei tauturu ’e ’ei pāpa’i parau. E feruri te ’episekōpora’a i tāna anira’a ’e e fa’ahaere i te mau pi’ira’a.
Hou ’a ani ai i te hō’ē feiā ’āpī tamāhine ’ia tāvini i roto i te hō’ē o teie mau pi’ira’a, e ani te melo o te ’episekōpora’a i te parau fa’ati’a i te mau metua o te feiā ’āpī tamāhine.
I muri a’e i te hōro’ara’a i te reira mau pi’ira’a, e fa’a’ite atu te hō’ē melo o te ’episekōpora’a i te mau tamāhine ’āpī i mua i tā rātou piha tamāhine nō te pāturura’a. I muri iho, e fa’ata’a te ’episekōpo ’aore rā, te tauturu i fa’auehia, i te feiā ’āpī tamāhine.
E fa’a’ara te hō’ē melo o te ’episekōpora’a i teie mau pi’ira’a i roto i te purera’a ’ōro’a. ’Aita ’oia e ani i te pāturura’a.
I muri noa iho i te fa’ata’ara’ahia te mau peresidenira’a piha tamāhine, e ha’api’i te hō’ē melo nō te ’episekōpora’a ia rātou i tā rātou mau hōpoi’a. Hi’o « Aaronic Priesthood Quorum and Young Women Class Presidency Orientation (Te ha’api’ipi’ira’a a te peresidenira’a pupu Autahu’ara’a a Aarona ’e te piha Feiā ’Āpī Tamāhine) » i ni’a YoungWomen.ChurchofJesusChrist.org ; hi’o ato’a pene 4 o teie buka arata’i.
11.3.4.2
Mau hōpoi’a
E tāvini te mau peresideni piha tamāhine i roto i te ’āpo’ora’a feiā ’āpī o te pāroita (hi’o 11.3.4.4). Teie ato’a te mau hōpoi’a a te mau peresidenira’a piha tamāhine :
-
Arata’i i te mau tauto’ora’a a te piha tamāhine nō te ’āmui atu i roto i te ’ohipa nō te fa’aorara’a ’e te fa’ateiteira’a (hi’o pene 1).
-
Tītau ’ia ’ite ’e e tāvini i te feiā ’āpī tamāhine tāta’itahi, tae noa atu ia rātou ’o tē ’ore e tae mai nei i te mau putuputura’a piha tamāhine. ’Ia ’ite i tō rātou mau hina’aro ’e tō rātou huru orara’a.
-
’Āmui i roto i te mau tauto’ora’a pāroita nō te fa’a’ite i te ’evanelia ’e nō te ha’apūai i te mau melo ’āpī ’e tei ho’i fa’ahou mai. E haere te hō’ē melo nō te peresidenira’a o te piha feiā ’āpī tamāhine pa’ari a’e i roto i te mau rurura’a fa’aaura’a (hi’o 23.5.7).
-
’Āmui i roto i te mau tauto’ora’a nō te hiero ’e te ’ā’amu ’utuāfare a te pāroita. E haere te hō’ē melo nō te peresidenira’a o te piha feiā ’āpī tamāhine pa’ari a’e i roto i te mau rurura’a fa’aaura’a (hi’o 25.2.7).
-
Fa’anaho ’e arata’i i te mau rurura’a a te piha tamāhine i te sābati (hi’o 11.2.1.2).
-
E fa’anaho ’e e fa’aineine i te tāvinira’a ’e te mau ’ātivite a te piha tamāhine (hi’o 11.2.1.3).
-
E fa’atupu tāmau noa i te mau rurura’a peresidenira’a piha tamāhine (hi’o 11.3.4.3).
Mai te mea ’ua pi’ihia te mau pāpa’i parau nō te piha tamāhine, nā rātou e fa’aineine i te mau tāpura ’ohipa nō te mau rurura’a, e pāpa’ipa’i i te mau mea, ’e e tāpa’opa’o i te rahira’a ta’ata e tae mai.
E ha’api’i tāmau te mau melo o te peresidenira’a Feiā ’Āpī Tamāhine i te mau peresidenira’a piha tamāhine nō ni’a i tā rātou mau hōpoi’a (hi’o 11.3.2). E tauturu rahi atu te mau tauturu ha’amāramarama ’e te feiā ’aravihi nō te piha tamāhine (hi’o 11.3.5 ’e 11.3.6).
11.3.4.3
Putuputura’a a te peresidenira’a o te piha tamāhine
E putuputu tāmau te mau peresidenira’a piha Feiā ’Āpī Tamāhine. Nā te peresideni o te piha tamāhine e arata’i i teie mau rurura’a. E ’āmui ato’a mai te feiā fa’atere ta’ata pa’ari nō te Feiā ’Āpī Tamāhine tei fa’auehia e tauturu i te peresidenira’a piha tamāhine. I roto i teie mau rurura’a, e paraparau ’āmui te feiā fa’atere ’e e ’imi ho’i i te fa’aurura’a nō ni’a i te hina’aro o te Fatu nō tā rātou piha tamāhine. I roto i te tāpura ’ohipa, e nehenehe e ’āparau i te mau tumu parau i muri nei :
-
Te rave-fa’aoti-ra’a i te ’ohipa o te fa’aorara’a ’e te fa’ateiteira’a
-
Te tāvinira’a i te mau melo o te piha tamāhine, ma te ha’apa’o ta’a ’ē i te tauturura’a i te mau melo ’āpī ’e te torora’a i te rima i te mau melo paruparu
-
Te torora’a i te rima i te feiā nō te tahi atu mau ha’apa’ora’a fa’aro’o ’e mau ti’aturira’a.
-
Te fa’anahora’a i te mau putuputura’a a te piha tamāhine, te tāvinira’a, ’e te mau ’ātivite
-
Te ha’api’ira’a i te fa’aterera’a mai roto mai i te feiā fa’atere ta’ata pa’ari nō te Feiā ’Āpī Tamāhine ’aore rā, hō’ē melo nō te peresidenira’a o te piha tamāhine
Tē vai ra te Hōho’a nō te tāpura ’ohipa nō te putuputura’a a te peresidenira’a i ni’a ChurchofJesusChrist.org.
11.3.4.4
Te ’āpo’ora’a pāroita a te feiā ’āpī
Te fā o te ’āpo’ora’a pāroita a te feiā ’āpī, nō te tauturu ïa i te feiā ’āpī ’ia arata’i mai i te tahi atu mau ta’ata ia Iesu Mesia ra ’e ’ia rave i te ’ohipa nō te fa’aorara’a ’e te fa’ateiteira’a.
Nā te ’episekōpo e peresideni i te ’āpo’ora’a pāroita a te feiā ’āpī. Teie te mau melo o teie ’āpo’ora’a :
-
Te ’episekōpora’a.
-
Hō’ē o nā rima tauturu o te ’episekōpo i roto i te pupu tahu’a, te peresideni pupu ha’api’i, ’e te peresideni pupu diakono.
-
Te mau peresideni piha feiā ’āpī tamāhine (’aore rā, te peresidenira’a tā’āto’a o te piha ha’api’ira’a mai te mea ē, hō’ē ana’e piha feiā ’āpī tamāhine i roto i te pāroita).
-
Te peresideni nō te Feiā ’Āpī Tamāhine
E ’āparau te ’āpo’ora’a feiā ’āpī pāroita i te mau rāve’a nō te tauturu i te tahi atu mau ta’ata ’ia ha’apūai i te mau ’itera’a pāpū, ’ia fāri’i i te mau ’ōro’a fa’aorara’a, ’ia ha’apa’o i te mau fafaura’a, ’e ’ia riro ’ei mau pipi ha’apa’o nā Iesu Mesia (hi’o Moroni 6:4–5). E ’āparau ’āmui rātou nō ni’a i te mau hina’aro o te feiā ’āpī tamāhine ’e te feiā ’āpī tamāroa o te pāroita. E nehenehe rātou e paraparau i te mau ’ātivite nō te pāhono i teie mau hina’aro. Terā rā, e fa’anahohia te mau ’ātivite i roto i te mau rurura’a peresidenira’a pupu autahu’ara’a ’aore rā, piha tamāhine.
Hi’o 29.2.6 nō te tahi atu mau ha’amāramaramara’a nō ni’a i te ’āpo’ora’a feiā ’āpī pāroita.
11.3.5
Te mau tauturu ha’amāramarama
E nehenehe te Peresidenira’a o te Feiā ’Āpī Tamāhine e ani i te ’episekōpora’a ’ia pi’ihia te mau tauturu ha’amāramarama nō te Feiā ’Āpī Tamāhine. E ’ohipa te tauturu ha’amāramarama tāta’itahi i pīha’i iho i te hō’ē pupu matahiti ta’a maita’i o te feiā ’āpī tamāhine.
Teie te mau hōpoi’a a te mau tauturu ha’amāramarama :
-
E tauturu i te peresidenira’a Feiā ’Āpī Tamāhine i roto i rātou mau hōpoi’a.
-
E pāturu ’e e arata’i i te mau peresidenira’a piha tamāhine ’ia ha’api’i mai ’e ’ia fa’aineine i tā rātou mau hōpoi’a.
-
E ha’api’i i te mau ha’api’ira’a nō te sābati mai te mea e hina’arohia. E tauturu i te feiā ’āpī tamāhine tei anihia ’ia ha’api’i i te hō’ē ha’api’ira’a, ’ia fa’aineine maita’i ’e ’ia ha’api’i.
-
E haere i roto i te mau ’ātivite a te piha tamāhine.
-
E haere i te mau rurura’a peresidenira’a Feiā ’Āpī Tamāhine ’ia anihia mai.
’Ia tae mai e piti a’e vahine ta’ata pa’ari pāpū i roto i te putuputura’a ’e te ’ātivite a te piha tamāhine. Tītauhia i te mau tauturu ha’amāramarama ’ia rave i te ha’api’ipi’ira’a i ni’a ia ProtectingChildren.ChurchofJesusChrist.org (hi’o 11.6.1).
11.3.6
Te feiā ’aravihi
Mai te mea e hina’arohia, e nehenehe te peresidenira’a Feiā ’Āpī Tamāhine e ani i te ’episekōpora’a ’ia pi’i i te feiā ’aravihi nō te tauturu i te hō’ē ’ohipa ta’a ’ē, mai te pūhapara’a, te hō’ē ’āmuira’a feiā ’āpī ’aore rā te hō’ē tū’aro.
E tāvini te mau tahu’a ’ohipa ato’a i raro a’e i te fa’aterera’a a te peresidenira’a o te Feiā ’Āpī Tamāhine pāroita.
Tītauhia i te feiā ’aravihi ’ia rave i te ha’api’ipi’ira’a i ni’a ia ProtectingChildren.ChurchofJesusChrist.org (hi’o 11.6.1).
11.4
Tauturura’a i te feiā ’āpī tamāhine ’ia fa’aineine nō te haere atu i roto i te Sōtaiete Tauturu
E nehenehe te hō’ē feiā ’āpī tamāhine e haere atu i roto i te Sōtaiete Tauturu i te 18ra’a o tōna matahiti. I te 19ra’a o te matahiti, e ’āmui hope roa atu te tamāhine ’āpī tāta’itahi i roto i te Sōtaiete Tauturu. I roto i te tahi mau huru, e nehenehe te hō’ē feiā ’āpī tamāhine e haere i roto i te Sōtaiete Tauturu hou te 18ra’a o tōna matahiti. E paraparau te tamāhine ’āpī tāta’itahi i tōna nā metua ’e i te ’episekōpo nō te fa’aoti e aha te mea e tauturu maita’i a’e iāna ’ia ha’apūai noa i tōna fa’aro’o ia Iesu Mesia.
E ’ohipa ’āmui te mau metua ’e te feiā fa’atere o te feiā ’āpī tamāhine ’e te Sōtaiete Tauturu nō te tauturu i te feiā ’āpī tamāhine tāta’itahi ’ia manuia i te haerera’a i mua i roto i te Sōtaiete Tauturu. E hōro’a teie feiā fa’atere i te mau rāve’a tāmau nō te feiā ’āpī tamāhine ’e te mau tuahine nō te Sōtaiete Tauturu ’ia rave i te mau tū’atira’a ’e ’ia fa’ahotu i te mau auta’atira’a.
11.5
Te feiā fa’atere nō te Feiā ’Āpī Tamāhine o te titi
E pi’i te hō’ē melo o te peresidenira’a titi i te hō’ē vāhine ta’ata pa’ari nō te tāvini ’ei peresideni nō te Feiā ’Āpī Tamāhine o te titi. Mai te mea e titi rahi, e ani ’oia hō’ē ’aore rā, e piti vahine ta’ata pa’ari nō te tāvini ’ei tauturu, ’e hō’ē atu nō te tāvini ’ei pāpa’i parau. Nā te hō’ē melo o te peresidenira’a titi ’aore rā, hō’ē melo nō te ’āpo’ora’a teitei e pi’i ’e e fa’ata’a i teie mau vahine. Nō te mau ha’amāramaramara’a nō ni’a i te mau hōpoi’a a te peresidenira’a Feiā ’Āpī Tamāhine ’e te pāpa’i parau, hi’o 6.7.1 ’e 6.7.3.
’O te hō’ē tauturu i roto i te peresidenira’a titi e ha’apa’o i te ’āvirira’a Feiā ’Āpī Tamāhine i roto i te titi. Tei iāna ato’a te hōpoi’a nō te ’ohipa a te peresidenira’a Feiā ’Āpī Tamāhine o te titi. E ha’api’i ato’a ’oia i te mau ’episekōpo i tā rātou hōpoi’a nō te feiā ’āpī tamāhine.
E fa’aue te peresidenira’a titi i te hō’ē melo ’āpo’ora’a teitei ’ia ’ohipa i pīha’i iho i te peresidenira’a o te Feiā ’Āpī Tamāhine nō te titi (hi’o 6.5). E tāvini teie melo ’āpo’ora’a teitei ’e te peresidenira’a Feiā ’Āpī Tamāhine ’e te pāpa’i parau i roto i te tōmite fa’atere feiā ’āpī o te titi (hi’o 29.3.10).
11.6
Te mau arata’ira’a ’e te mau fa’aturera’a hau atu
11.6.1
Pārurura’a i te feiā ’āpī
’Ia ’ohipa ana’e te mau ta’ata pa’ari ’e te feiā ’āpī i roto i te mau fa’anahora’a a te ’Ēkālesia, e tītauhia e piti a’e ta’ata pa’ari ha’apa’o i reira. E tītauhia paha ’ia ’āmui te mau piha tamāhine nō te fa’atupu i te reira.
Tītauhia i te mau ta’ata pa’ari ato’a e ha’a ’e te feiā ’āpī, ’ia fāri’i hope roa i te ha’api’ipi’ira’a nō ni’a i te pārurura’a i te mau tamari’i ’e i te feiā ’āpī, i roto i te hō’ē ’āva’e o tō rātou pāturura’ahia (ProtectingChildren.ChurchofJesusChrist.org). E fāri’i fa’ahou rātou i te reira ha’api’ipi’ira’a i te mau toru matahiti ato’a i muri a’e.
Nō te mau ha’amāramaramara’a nō ni’a i te huru teie mau arata’ira’a e tano i ni’a i te mau hoa aupuru, hi’o 21.2.2.
11.6.2
Feiā ’āpī tamāhine huma
E ha’apa’o ta’a ’ē te mau peresidenira’a piha tamāhine i te feiā ’āpī tamāhine huma. Nō te mau ha’amāramaramara’a nō ni’a i te tauturura’a i teie feiā ’āpī tamāhine, hi’o disability.ChurchofJesusChrist.org.
11.6.3
Mau pihi nā te mau tamari’i ’e te feiā ’āpī
E fāri’i te feiā ’āpī tamāhine i te mau pihi ’ei tuha’a nō te fa’anahora’a a te mau tamari’i ’e te feiā ’āpī. E ti’a i te feiā ’āpī tamāhine tāta’itahi ’ia fāri’i i te hō’ē pihi tā’amura’a, mai roto mai i tōna peresidenira’a piha tamāhine, i te taime e riro ai ’oia ’ei melo nō te Feiā ’Āpī Tamāhine. E fāri’i ato’a ’oia i te hō’ē buka iti Fa’ahotura’a i te ta’ata iho : Buka arata’i nā te feiā ’āpī. E nehenehe e rave i te reira i te taime e fārerei ai te peresidenira’a piha tamāhine ’e te feiā fa’atere ta’ata pa’ari nō te feiā ’āpī tamāhine iāna nō te fāri’i iāna i roto i te Feiā ’Āpī Tamāhine. E nehenehe ato’a e rave i te reira i roto i te hō’ē putuputura’a matahiti nō te feiā ’āpī ’e tō rātou mau metua (hi’o 11.2.1.3).
I te ’āva’e Tēnuare nō te matahiti e ti’ahia ai te matahiti o te hō’ē tamāhine i te 18, e fāri’i ’oia i te tahi atu pihi tā’amura’a.
E roa’a i te feiā ’āpī tamāhine te hō’ē pihi manuiara’a nā roto i te tūtavara’a ’ia riro hau atu mai te Fa’aora te huru.
Nō te tahi atu mau ha’amāramaramara’a nō ni’a i te mau pihi, hi’o ChildrenandYouth.ChurchofJesusChrist.org.