Ko e Hā ʻa e Ngaahi Lelei ʻo e Ako Lea Faka-Pilitāniá?

“Kapau ʻoku ʻikai te ke lea faka-Pilitānia, pea ta ʻoku totonu leva ke ke ako ia ʻi hoʻo hoko ko e faifekaú. Te ne tāpuekina koe lolotonga hoʻo ngāue fakafaifekaú pea ʻi hono kotoa ʻo hoʻo moʻuí” (Malanga ʻAki ʻEku Ongoongoleleí, 158). ʻE lava ke ʻoatu ʻe hono ako ʻo e lea faka-Pilitāniá ʻi hoʻo ngāue fakafaifekaú, kiate koe mo ho hoá ha ngaahi faingamālie ke fefakamālohiaʻaki mo fepoupouʻaki. “Tokoniʻi ho hoá ke ne aʻusia ha ola lelei mo maʻu ha loto-lahi ʻi he ako ʻo e lea fakafonua ho misioná pe ʻi he ako ʻo e lea faka-Pilitāniá. Toutou fakamālōʻiaʻi fakamātoato ho ngaahi hoá mo e kau faifekau kehé ʻi heʻenau fakalakalaká.” (Malanga ʻAki ʻEku Ongoongoleleí, 160). ʻI hoʻo foki ki ʻapí, te ke lava ʻo fakaʻaongaʻi hoʻo ngaahi taukei lea faka-Pilitāniá ke tokoniʻi e niʻihi kehé. “Hoko atu ʻi hono fakaʻaongaʻi ʻo e lea fakafonua ho misioná ʻi he hili hoʻo foki ki ʻapí. Kuo tāpuekina lahi koe ʻe he ʻEikí, pea mahalo pē te Ne toe fiemaʻu ke fakaʻaongaʻi hoʻo poto he lea fakafonua ko iá, ki ha ngaahi meʻa kehe ʻamui ange ʻi hoʻo moʻuí.” (Malanga ʻAki ʻEku Ongoongoleleí, 158).

Ko e kau faifekau taimi kakato kei talavou kotoa ʻoku ʻosi ʻenau ngāue fakafaifekaú (kau ai mo e kau faifekau tukuange teʻeki ʻosí mo e kau faifekau tokoní) ʻoku ʻosi tomuʻa fakangofua kinautolu ki he BYU–Pathway Worldwide pea maʻu ha totongi ako maʻamaʻa ange. Hili hono fakakakato ʻe he kau faifekaú e lēsoni fakaʻinitaneti EnglishConnect 3 pe maʻu ha maaka feʻunga ʻi he sivi lea faka-Pilitāniá, te nau lava ʻo hao mei he sivi lea faka-Pilitānia ke hū ki he BYU–Pathway Worldwide. Ko e BYU–Pathway ko ha polokalama ʻunivēsiti ia ʻokú ne ʻoatu ha ngaahi tohi fakamoʻoni ako mo ha mataʻitohi ʻi he ʻinitanetí.

ʻE lava ʻe he ako lea faka-Pilitāniá ʻo fakalahi hoʻo ngaahi faingamālie ki he ngāue maʻuʻanga moʻuí. ʻE lava ke maʻu e ngaahi faingamālié ni fakalotofonua pe ʻi he ʻinitanetí. ʻI he ngaahi fonua ko ia ʻoku ʻikai ko ʻenau lea fakafonuá ʻa e lea faka-Pilitāniá, ʻoku maʻu ʻe he niʻihi fakafoʻituitui ʻoku nau lea faka-Pilitāniá ha ngaahi fili kehekehe mo lahi ange ki he ngāue maʻuʻanga moʻuí pea lava ke nau maʻu ha vahe māʻolunga ange ʻaki ha peseti ʻe 30–50 mei he niʻihi fakafoʻituitui ʻoku ʻikai ke nau lea faka-Pilitāniá.

ʻAʻahi ki he missionary.englishconnect.org ke ako lahi ange mo maʻu ha ngaahi maʻuʻanga tokoni lahi ange.