“ʻOku talitali lelei koe ki he EnglishConnect maʻá e Kau Faifekaú,” Tohi Fakahinohino Ako EnglishConnect maʻá e Kau Faifekaú
“ʻOku Talitali Lelei Koe,” Tohi Fakahinohino Ako ECM
Talitali Lelei koe ki he EnglishConnect maʻá e Kau Faifekaú
“Kapau ʻoku ʻikai te ke lea faka-Pilitānia, pea ta ʻoku totonu leva ke ke ako ia ʻi hoʻo hoko ko e faifekaú. Te ne tāpuekina koe lolotonga hoʻo ngāue fakafaifekaú pea ʻi hono kotoa ʻo hoʻo moʻuí. ʻE toe tāpuakiʻi foki ho fāmilí ʻe he ako ʻo e lea faka-Pilitāniá” (Malanga ʻAki ʻEku Ongoongoleleí, 158).
Taumuʻá
ʻOku ʻoatu ʻa e EnglishConnect maʻá e Kau Faifekaú ke tokoniʻi koe ke ke ako ʻa e lea faka-Pilitāniá “ʻi he ako pea ʻi he tui foki” (Tokāteline mo e Ngaahi Fuakava 88:118). ʻE lava ke tokoni atu ʻa e EnglishConnect ke ke:
-
Tupulaki ʻi hoʻo tui kia Sīsū Kalaisi mo ʻEne Fakaleleí.
-
Fakaʻaongaʻi ʻa e ngaahi tefitoʻi moʻoni ʻo e ako lea fakafonuá.
-
Fakalakalaka ʻi he ngaahi taukei lea Faka-Pilitāniá.
ʻE lava ke tāpuekina koe ko ha faifekau ʻi hono ako ʻo e lea faka-Pilitāniá pea fakalahi atu hoʻo ngaahi faingamālie hili ʻa e ngāue fakafaifekaú ki he ngāue tokoní, ngāue maʻuʻanga moʻuí, mo e akó—ʻo kau ai ʻa e BYU–Pathway Worldwide.
Vakai ki he “Ko e Hā ʻa e Ngaahi Lelei ʻo e Ako Lea Faka-Pilitāniá” ke ako lahi ange.
Ngaahi Tuʻunga ʻo e EnglishConnect
ʻOku lahi ha ngaahi tuʻunga kehekehe ʻo e EnglishConnect maʻá e Kau Faifekaú ke tokoniʻi koe ke ke fakalakalaka: EnglishConnect maʻá e Kau Toki Kamatá, EnglishConnect 1, EnglishConnect 2, mo e EnglishConnect 3. ʻOku maʻu ʻi he tuʻunga takitaha ha ngaahi maʻuʻanga tokoni ki he ako fakatāutahá mo e akoako fakaehoá. Kapau kuo teʻeki ai ke ke maʻu hoʻo naunaú, kātaki ʻo fetuʻutaki ki hoʻo taki fakamisioná.
Ako Fakaʻaho ʻo e Lea Fakafonuá
ʻOku ʻi ai ʻa e miniti ʻe 30–60 ʻa e kau faifekaú maʻá e ako lea fakafonuá ʻi heʻenau taimi-tēpilé (vakai, Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí, 2.4.2). ʻIkai ngata aí, te ke lava ʻo akoako hoʻo lea fakafonua ʻo e misioná mo e lea faka-Pilitāniá mo ho hoá ʻi he kotoa ʻo e ʻahó.
Te ke lava ʻo fakaʻaongaʻi ʻa e EnglishConnect maʻá e Kau Faifekaú lolotonga ʻa e taimi ako lea fakafonuá ke tāpuekina koe lolotonga hoʻo ngāue fakafaifekaú mo e kotoa ʻo hoʻo moʻuí.
Vakai, “Aʻusia ʻi he EnglishConnect maʻá e Kau Faifekaú.”
Fakaʻaongaʻi ʻa e ngaahi tefitoʻi moʻoni ʻi he Malanga ʻAki ʻEku Ongoongoleleí, vahe 7, ke akoako fakaʻaho mo fekumi ki he meʻafoaki ʻo e lea ʻi he ngaahi lea kehekehé.
“Faʻa kātaki ʻi hoʻo ako ʻi he faʻa lotu mo ako fakahoko ʻa e lea fakafonuá. Falala ʻe tokoniʻi koe ʻe he Laumālié ʻi hoʻo feinga faivelengá. Tui te ke lava ʻo maʻu ʻa e meʻafoaki ʻo e lea ʻi he ngaahi lea kehekehé” (Malanga ʻAki ʻEku Ongoongoleleí,162).