1 Samuel 8–10; 13; 15–18

• Bwebwenato eo kōn an Anij kālet Saul im David kōn kanaan im revelesōn emaron̄ jipan̄ ro uwaan kūlaaj eo meļeļe elmen an armej ro kar kālet n̄an jerbal ilo Kabun̄ in rainin. Komaron̄ karuwaineneik ro uwaan kūlaaj eo n̄an riiti 1 Samuel 9:15–17; 10:1–12; im 16:1–13, lale eoon ko im remaron̄ jipan̄ er m̧eļeļe ta meļeļein n̄an “kūr an Anij” (Laajrak in Tōmak ko 1:5). Ta oktak eo ej kōm̧m̧ane, n̄an armej ro rej kūr im n̄an ro rej kāālet er, n̄an jeļā bwe Anij ej kāālet armej ro n̄an jerbal ilo Kabun̄ eo An?

  

• N̄an kōnono kōn etke ej aorōk n̄an pokake Irooj, komaron̄ karuwaineneik ro uwaak kūlaaj eo n̄an etale 1 Samuel 13:5–14 im lale m̧wil im m̧akūtkūt ko rej tōlļo̧k Saul bwe en wōtlo̧k. Ta eo jemaron̄ ekkatak jān bōd eo an Saul?

• Ilo ad aolep jab jeļā wūn eo kar kien Saul bwe en m̧an aolep armej in Amalekite ro im menin mour ko aer, ewōr men jemaron̄ ekkatak jāne ilo an uwaake kien in. N̄an jipan̄ ro uwaan kūlaaj eo kakūle ekkatak kein, komaron̄ jei ilo board eo N̄an bokake ej em̧m̧anļo̧k jān … im karuwaineneik ro uwaan kūlaaj eo n̄an ļōmņak kōn ennaan kein im etali ippān doon m̧akūtkūt kein jān 1 Samuel 15. Ta jet iaan men ko rem̧m̧an jej kōm̧m̧ani ilo mour ko ad im jet iien jet kāālet n̄an pokake Anij? Etke jej pokake Anij em̧m̧anļo̧k jān men ko jet rem̧m̧an?

• Ālkin riiti 1 Samuel 16:6–7, ro uwaan kūlaaj eo remaron̄ kwaļo̧k ļōmņak ko aer kōn ta meļeļein lale “ilo bōro” (eoon 7). Ewi wāween ad maron̄ ekkatak n̄an loe ilo jōkjōk eo Irooj ej loe? Ro uwaan kūlaaj eo remaron̄ kwaļo̧k en̄jake ko rekar ekkatak er kōn aorōkin lale ilo bōro eļapļo̧k jān tulik.

• Ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko, ro uwaan kūlaaj eo remaron̄ ļōmņak kōn naan kein kajjojo armej rej loi ilo 1 Samuel 17. Ļōmņak n̄an kajjitōk ippāer ro uwaan kūlaaj eo n̄an kwaļo̧k ta eo rekar ekkatak jān m̧akūtkūt in. Ilo jet wāween, ta eo rekar ekkatak jān David?

• Jet iaan ro ilo kūlaaj eo am rej jelm̧ae en̄taan ko im rej loi āinwōt an Golaiat kaam̧jak an kar kōm̧m̧ane n̄an Saul im ritariņae ro an. Ewi wāween am̧ maron̄ kōjerbal bwebwenato in an David im Golaiat n̄an jipan̄ ro uwaan kūlaaj eo jelm̧ae en̄taan ko aer kōn tōmak ilo Irooj? Bōlen komaron̄ likūt juon pija in David im Golaiat (āinwōt eo juōn ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko). Ro uwaan kūlaaj eo remaron̄ kōllaajrak e ilo ioon boot eo jet men ko remaron̄ āinwōt “Golaiat” ro ilo raan kein ad. Im remaron̄ loi eoon ko ilo 1 Samuel 17 im rej kwaļo̧k tōmak eo an David, eo ekōm̧m̧an bwe en maron̄ m̧an Golaiat (bar lale ennaan eo ilo “Kein Jipan̄ Ko Jet”). Bōlen ro uwaan kūlaaj remaron̄ kwaļo̧k en̄jake ko im rej ekkatak en̄jake an Irooj jipan̄ er ire ilo tarņae in.

Būreejtōn Gordon B. Hinckley ekar katakin:

“Elōn̄ Golaiat ko rej jepooļ eok, men eo aetok im eddo ej n̄an kōm̧m̧an men ko renana n̄an kakkure eok. Ejjeļo̧k em̧maan ratimjuōn-ne-aetokin, bōtaab rej armej im doulul ko im rej kōm̧akūt kadeel men ko renana im maron̄ im kōm̧ōjņo̧ im kakkure eok. …

“… Ak kwōj aikuj jab mijak eļan̄n̄e ewōr am̧ buwat in m̧ool ilo peim̧. … Ewōr ippām dōkā in erreo im kauteij im m̧ool n̄an kōjerbal in jum̧ae rikōjrat ro rej kōnaan anjo̧ ioom̧. Ejjab etto ilo am ekkōl, kwonaaj maron̄ kade er ‘ikōtaan mejaer,’ n̄an kōjerbale kōkaļļen en̄jake. Komaron̄ eļļā ioer jān kauweik eok make n̄an kattoļo̧k eok jān er. Komaron̄ ba n̄an elōn̄ iaer āinwōt an kar David ba n̄an Golaiat, ‘Kwoj Itok n̄an n̄a kōn juōn jāje, im kōn juōn m̧ade, im kōn kein kōjparok: bōtaab Inaaj iwōj n̄an kwe ilo etan Irooj eo ekajoor, im Anij an ritariņae ro an Israel, eo em̧ōj am̧ eļļo̧k jene’ [1 Samuel 17:45]” (“Overpowering the Goliaths in Our Lives,” Ensign, Māe 1983, 46, 51).