Rut; 1 Samuel 1–3

• Jān ro uwaan kūaaj eo emaron̄ wōr an kajjojo armej en̄taan ko im rej oktak jān eo an Ruth im Hannah, remaron̄ ekkatak jān wāween kein kōrā retiljek rekar uwaak n̄an jako eo im metak bōro. N̄an jipan̄ er kōm̧m̧ane menin, komaron̄ kōjenolo̧k er n̄an kumi jiddik ko im karuwaineneik kajjojo iaan kumi ko n̄an riiti juon jebta jān Rut 1–4 ak 1 Samuel 1. Ioon boot eo, komaron̄ je kajjitōk ko āinwōt: Ta en̄taan ko Rut ak Hanna rekar jelm̧ai? Ekōjkan an kar kwaļo̧k aer lōke ilo Irooj ilo iien en̄taan ko aer? Kumi ko remaron̄ lali uwaak ko n̄an juōn ak elōn̄ļo̧k kajjitōk ko im kwaļo̧k ta eo raar loe. Ta eo jej ekkatak jān ļo̧o̧k kein kōn ewi wāween an Irooj jipan̄ kōj ilo iien ad en̄taan?

  

• Ejjab aolep ro rej jar kōn juōn ajri rej bōk juōn, im ejjab aolep ro emij ipper rej bar m̧are. Bōtaab en̄taan ko ad m̧ake, jekdoon ta rej, remaron̄ iien ko rem̧m̧an n̄an oktakļo̧k n̄an Rilo̧mo̧o̧r eo im kōkajoorļo̧k tōmak ko ad ilo E. Komaron̄ kajjitōk ippān ro uwaan kūlaaj eo n̄an riiti Rut 2:11–12 im 1 Samuel 1:9–11 im kōnono kōn ewi wāween an en̄taan ko an Rut im Hannah iooni jemjerā ko aer ippān Irooj. Ro uwaan kūlaaj eo remaron̄ kwaļo̧k wāween an tōmak ko aer kajoorļo̧k kōnke rekar oktakļo̧k n̄an Jisōs Kraist ilo iien en̄taan.

  N̄an jipan̄ kōnono in, komaron̄ karuwaineneik juon ak elōn̄ļo̧k ro uwaan kūlaaj eo bwe ren itok im pojak n̄an kwaļo̧k en̄jake ko aer jān juōn iaan ennaan kein an: Sister Reyna I. Aburto “Thru Cloud and Sunshine, Lord, Abide with Me!” (Liahona, Nob. 2019, 57–60); unin kōnono eo “The Joy of Overcoming through Christ” jān ennaan eo an Elder D. Todd Christofferson’ “The Joy of the Saints” (Liahona, Nob. 2019, 16–17); ak ennaan ko jān Būreejitōn Elaine S. Dalton “Kein Jipan̄ Ko Jet.” Kajjitōk ippān ro uwaan kūlaaj eo n̄an kwaļo̧k kōn ekōjkan an en̄taan ko ad maron̄ juōn iien em̧m̧an n̄an an kōļapļo̧k tōmak ilo Jisōs Kraist.

• Emaron̄ wōr jet ro ilo kūlaaj eo am̧ im rej, āinwōt Samuel, em̧ōj aer ron̄ ainikien Irooj ak rejjab kile kwe ej ainikien E. Komaron̄ karuwaineneik ro uwaan kūlaaj eo bwe ren etale 1 Samuel 3, pukot ta eo Samuel ekar kōm̧m̧ane im emaron̄ jipan̄ kōj ilo ad kajjieon̄ n̄an ron̄ im pokake ainikien Irooj. Komaron̄ bar kajjitōk ippān ruo uwaan kūlaaj eo n̄an bōktok iaio ko ikōtaan Samuel im Eli.

• Jet iien jej loe ad make ilo jōkjōk eo āinwōt Eli—ewōr ad iien em̧m̧an n̄an jipan̄ jet armej kile ainikien Irooj. Bōlen ro uwaan kūlaaj eo remaron̄ kwaļo̧k ewi wāween aer kar kōm̧m̧ane menin n̄an ro m̧ōttaer, ro uwaan baam̧le eo, im ro jet. Ta eo jeje ko rekwojarjar ak en̄jake ko em̧ōj ad kwaļo̧ki n̄an jipan̄ ro jet meļeļe ewi wāween an Irooj ennan ippād? (lale, n̄an waan jon̄ak, Katak im Bujen Ko 6:22–23; 8:2–3; 9:7–9).

Būreejtōn Elaine S. Dalton eaar katakin:

“Iaļ ko an mour in jet iien rej bōk kōj n̄an iaļ ko jekar jab kōtmeni. Ewōr ukoktak ko im ejerer ko ilo iiaļ eo kōjwōj ejjab maron̄ jeļā. Bōtaab kōn aolep ukoktak kein im jeer kein aolep iien ej wōr iien ko rem̧m̧an—iien ko rem̧m̧an n̄an ad kāālet uwaak ko im n̄an ta ej jenaaj kōm̧m̧ane. Men ko reppen ilo mour in remaron̄ iien ko rem̧m̧an n̄an jipan̄ kōj epaakeļo̧k Rilo̧mo̧o̧r eo im bwe en ļapļo̧k ad lōke E. Ilo m̧akūtkūt ko mour epaakeļo̧k E kajjojo raan, jej aikuj kaddōkļo̧k m̧wil ko an Kraist im men ko rem̧m̧an. …

“Āinwōt Rut im Hanna, kōjwōj aolep jenaaj en̄jake m̧ōjņo ko. Jemaron̄ jab aolep iien jeļā ta karōk eo an Irooj n̄an mour ko ad, bōtaan en̄in ej aō naan in kam̧ool ke jejjab make iaad. E ej pād ippād, im E ej kallim̧ur n̄an kōj, ‘Kwojjab maron̄ loe kōn mejān kanniōk ko mājemi, bwe ilo iien in, karōk eo an ami Anij kōn men ko renaaj itok ālkin, im m̧ōņōņō eo enaaj itok ālkin eļap en̄taan.’ [Katak im Bujen Ko 58:3]” (“Lessons from Ruth and Hannah,” Ensign, Epr. 2006, 35, 37).

Bar lale Jon 14:18; Alma 38:5.