Laajrak in Tōmak ko im Kean̄ ko Jān Kabun̄ 1 im 2

• En̄in ej wāween eo n̄an jipan̄ ro uwaan kūlaaj eo kwaļo̧k ta eo rekar loe eļaptata meļeļe in ilo Laajrak in Tōmak ko: Kwomaron̄ je nōm̧ba 1 n̄an 13 ioon boot eo im kajjitōk ippān ro uwaan kūlaaj eo n̄an je n̄an iturinļo̧k nōm̧ba eo juon men rekar ekkatak jān laajrak in tōmak ko rejetjet. Ta oktak eo m̧ool kein rej kōm̧m̧ane ilo kadkad eo ad ippān Jinedwōj im Jemādwōj Ilan̄ im Jisōs Kraist? Bōlen ro uwaan kūlaaj eo remaron̄ kwaļo̧k ekōjkan an Laajrak in Tōmak ko kar kōkōm̧anm̧anļo̧k ekkatak gospel eo aer ak kar jipan̄ er kwaļo̧k ippān ro jet.

• Etke wōnm̧aanļo̧k wōt in revelesōn eaorōk n̄an kōj? Kajjitōk ippān ro uwaan kūlaaj eo n̄an kwaļo̧k en̄jake ko aer kōn kajjitōk in. Ro uwaan kūlaaj eo remaron̄ barāinwōt ekōnono kōn ekōjkan an pedped in katak ko an wōnm̧aanļo̧k wōt in revelesōn iookļo̧k Kean̄ eo Jān Kabun̄ 1 im 2. (Laajrak in katak eo an wiik in ilo Itok, Ļoor Eō—N̄an Kajjojo Armej im Baam̧le ko ej kwaļo̧k kein jipan̄ ko rej iookļo̧k revelesōn kein). Ta eo jemaron̄ ekkatak jān Kean̄ eo Jān Kabun̄ 1 im 2 kōn jerbal eo an revelesōn ilo an tōl Kabun̄ in? (lale barāinwōt Laajrak in Tōmak ko 1:9 im ennaan eo jān Būreejtōn Gordon B. Hinckley ilo “Kein Jipaj ko Jet”). Ta waanjon̄ak ko jet kōn wōnm̧aanļo̧k wōt in revelesōn ro uwaan kūlaaj eo remaron̄ ļōmņak kake? Ekōjkan an revelesōn kein kareel mour ko ad im jipan̄ kōj kalōk aelōn̄ in kiin̄ eo an Jemādwōj Ilan̄?

• Ļōmņak in kajjitōk ippān ro uwaan kūlaaj eo n̄an etale Kean̄ eo Jān Kabun̄ 1 im 2 im n̄an kwaļo̧k juon men jān revelesōn ko me remaron̄ jipan̄ juon eo me ej ļon̄tak n̄an bōk juon oktak in kakien eo ekāāl, revelesōn, ak katak an Kabun̄ in. Ekōjkan an ro uwaan kūlaaj eo kar ekkatak n̄an lōke Anij n̄e rej lokjak kōn juon men ilo Kabun̄ in? Ekōjkan an kar ekkatak eo aer wiik in kōkajoorļo̧k tōmak eo aer bwe Jisōs ej tōl Kabun̄ in? Kōļmenļo̧kjeņ ko jān Būreejtōn Dieter F. Uchtdorf ilo “Kein Jipan̄ ko Jet” emaron̄ barāinwōt jipan̄.

  

Būreejtōn Gordon B. Hinckley ekar jerbal āinwōt juon uwaan Doulul eo an Jon̄oulruo Rijilōk ro ke revelesōn eo kar kōmeļeļeik ilo Kean̄ eo Jān Kabun̄ 2 kar bōke. Iiō ko tokālik ekar kōmeļeļeik en̄jake eo an:

“Ekar wōr juon mejatoto kwojarjar im ekwojarjar ilo ruum̧ eo. N̄an n̄a, kar en̄jake āinwōt juon iaļ ekar peļļo̧k ikōtaan tūroon in lan̄ im Rikanaan eo an Anij eo ej bukwelōlō im akweļap ekoba Em̧m̧aan ro jein im jatin. Jetōb eo an Anij ekar pād ijo. Im kōn kajoor eo an Jetōb Kwojarjar ekar itok n̄an rikanaan eo juon kam̧ool bwe men eo me kar jar kake ekar jim̧we, bwe iien eo ekar itok, im bwe kiiō kōjeraam̧m̧an ko relaudin̄din̄ an priesthood eo aikuj leļo̧k n̄an aolep em̧m̧aan ro rōrreo aolep jikin jekdo̧o̧n ta menmenbwij eo.

“Aolep em̧m̧aan ro ilo doulul eo, kōn kajoor eo an Jetōb Kwojarjar, raar jeļā ejja men eo wōt.

“Ekar juon iien eo elur im kanooj em̧m̧an. … Ejjeļo̧k jabdewōt ainikien jekar ron̄. Ak ainikien Jetōb eo ekar unoojdikdik tok n̄an kōļmenļo̧kjeņ ko am im lukkuun jetōb ko am” (“Priesthood Restoration,” Ensign, Okt. 1988, 70).

Būreejtōn Dieter F. Uchtdorf ekar ba menin n̄an ro me ewōr aer pere kōn bwebwenato eo an Kabun̄ in ak katak ko:

“Enaaj baj wōt wōr kajjitōk ko―ine in kappukot m̧ool ekkā an eddōkļo̧k im kajoorļo̧k im erom̧ juon wōjke in meļeļe. Ewōr jet membōr ro an Kabun̄ in me, ilo juon tōre ak jet iien, rejjan̄in kar kajjitōk kajjitōk ko rem̧ūlaļ im reppen. Juon iaan kōttōpar ko an Kabun̄ in ej n̄an naajdik ine in tōmak eo—aaet ilo jet iien bwidej eo eperpere im jab lukkuun jeļā kake. Tōmak ej n̄an kōjatdikdik kōn men ko jab loi ak rem̧ool.

“Kōn menin, ro jeiū im jatū jitōnbōro—ro m̧ōtta rejitōnbōro—jouj, m̧oktata pere pere ko ami m̧okta jān pere tōmak eo ami. Jej aikuj jab kōtļo̧k an pere likwōj kōj im dāpij kōj jān iakwe eo ekwojarjar, anemkwoj, im menin letok ko me rej itok kōn tōmak ilo Irooj Jisōs Kraist.” (“Itok, Kobatok Ippam̧,” Ensign ak Liaona, Nob. 2013, 23; bar lale Lawrence E. Corbridge, “Stand Forever” [Brigham Young University devotional, Jan. 22, 2019], speeches.byu.edu).