Katak im Bujen Ko 137–138

• Elōn̄ wōt iaad rejeļā kajjien armej ro me ekar jab wōr aer iien n̄an bōk gospel eo ilo mour in—ekoba ro me raar ajri wōt im mej. Kajjitōk ippān ro uwaan kūlaaj eo n̄an kwaļo̧k juon m̧ool rej loe ilo jekjōn 137 me ejipan̄ er meļeļe karōk eo an Anij n̄an rein kajjojo. Ta m̧ool ko jej loi ilo Katak im Bujen Ko 138:32–37 me kobaiktok n̄an meļeļe eo ad kōn karōk eo an Anij? Ro uwaan kūlaaj eo remaron̄ kwaļo̧k ekōjkan an m̧ool kein kōm̧m̧an bwe ren en̄jake kōn Jemedwōj Ilan̄, karōk in lo̧mo̧o̧r eo An, im Pinmuur eo an Jisōs Kraist. Ennaan eo ilo “Bar jet Kein Jipan̄ ko” maron̄ in jipan̄ iien ekōnono eo ami.

• En̄jake eo Joseph F. Smith ekar kōmeļeļeik ilo Katak im Bujen Ko 138:1–11, 25–30 ejipan̄ kōj meļeļe ekōjkan ad maron̄ kōpooj kōj make n̄an bōk revelesōn. Bōlen ro uwaan kūlaaj eo remaron̄ jerbal ippān doon n̄an kwaļo̧k ta eo rej ekkatak kōn revelesōn jān eoon kein. Kwomaron̄ kajjitōk ippān ro uwaan kūlaaj eo n̄an kwaļo̧k ekōjkan an riit im kejo̧kļo̧kjeņ kōn jeje ko rekwojarjar kar kōpooj er n̄an bōk revelesōn (lale barāinwōt Josep Smith—Bwebwenato 1:11–12).

• Ennaan eo an Būreejtōn M. Russell Ballard “Visōn eo kōn Lo̧mo̧o̧r eo an ro Remej” (Ensign ak Liaona, Nob. 2018, 71–74) ej kōmeļeļeik kōn “mour eo an Josep F. Smith kōn an kar kōpopo n̄an bōk revelesōn in ekabwilōn̄lōn̄ [Katak im Bujen Ko 138].” Eļan̄n̄e ro uwaan kūlaaj eo am̧ kar riiti ennaan eo an Būreejtōn Ballard wiik in, kōketak er n̄an kwaļo̧k juon men me ekar im̧we er. Ak kom̧ maron̄ riiti jidikin ennaan eo āinwōt juon kūlaaj. Ta eo ej im̧we kōj kōn mour eo an Būreejtōn Smith im paotok eo an? Ta eo jemaron̄ ekkatak jān waanjon̄ak eo an?

  

• N̄an jipan̄ ro uwaan kūlaaj eo lo m̧ool ko ilo Katak im Bujen Ko 138:12–60, kwomaron̄ leļo̧k n̄an er jet kajjitōk ko kōn laļ eo an jetōb me elōn̄ uwaak ko ilo eoon kein. N̄an waanjon̄ak: Ta eo Rilo̧mo̧o̧r eo ekar kōm̧m̧ane ke Ekar pād ilo laļ eņ an jetōb? Wōn ro ribōkto-bōktak ennaan an Irooj, im ta ennaan eo aer? Ro uwaan kūlaaj eo remaron̄ kāālet juon ak ruo iaan kajjitōk kein im jerbal ilo kurup ko reddik n̄an kappukot uwaak ko. Innām remaron̄ kwaļo̧k n̄an doon m̧ool ko raar loi. Ta oktak eo m̧ool kein rej kōm̧m̧ane n̄an mour ko ad?

• Ta eo jenaaj kar ba n̄an juon eo me ej kajjitōk, “Ta eo ej waļo̧k n̄e jej mej?” Ta eo jenaaj kar kwaļo̧k jān Katak im Bujen Ko 138:12–60 me emaron̄ in jipan̄ uwaake kajjitōk in? (lale barāinwōt Alma 40:11–15).

Būreejtōn Henry B. Eyring ekar katakin:

“Jet wōt iaan ajri ro nejin Anij rej bōk ilo mour in juon jeļāļo̧kjeņ eo ealikkar kōn karōk eo an Anij, ippān tok kain̄i ko an priesthood im bujen ko me rej kōm̧m̧an bwe kajoor in pinmuur eo an Rilo̧mo̧o̧r ren jerbal ilo mour ko ad. …

“Jet remaron̄ likūt menin ekalijōkļo̧k. Remaron̄ likūt āinwōt juon kam̧ool ke ejjeļo̧k karōk, ejjeļo̧k men jej aikuj kōm̧m̧ane n̄an bōk lo̧mo̧o̧r—en̄jake bwe Anij eo em̧m̧an im eļap an iakwe eban kar ejaake karōk eo me epojak n̄an jet wōt iaan ajri ro Nejin. Ro jet remaron̄ bōk ļōmņak in ke Anij ekar baj kālet wōt m̧okta wōn ro Nejin enaaj kar lo̧mo̧o̧ren er im leļo̧k n̄an er gospel eo, ak ro jet me rejjan̄in ron̄ kōn gospel eo ej kōnke kar jab ‘kālet’ er.

“Ak kwe im n̄a jejeļā, kōn m̧ool ko em̧ōj kōjepļaaki tok jān Rikanaan Josep Smith, bwe karōk eo an Anij eļap an em̧m̧an im etūriamo̧ jān jon̄an en jej ļōmņake. Jemedwōj Ilan̄ ej ikdeleel n̄an kobaik im kōjeraam̧m̧an aolepān baam̧le eo An. Ilo An jeļā bwe ejjab aolepāer renaaj kar kāālet n̄an koba, karōk eo An ej leļo̧k n̄an kajjojo ajri ro Nejin iien eo em̧m̧an n̄an errā ak makoko kōn kūr eo An” (“Kakobaik Baam̧le eo an Anij,” Ensign ak Liaona, Māe 2017, 20–21).