Katak im Bujen Ko 106–108

• Āinwōt ro uwaan kūlaaj eo kar ekkatak Katak im Bujen Ko 106 im 108 wiik in, remaron̄ kar lo eoon ko me remaron̄ kar jipan̄ ro rej jerbal ilo kūr ko ilo Kabun̄ in (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko). Ļōmņak in leļo̧k n̄an ro uwaan kūlaaj eo iien n̄an je eoon ko raar loi ilo jekjōn kein ioon boot eo im kajjitōk ippāer n̄an kwaļo̧k meļeļe ko aer. Ta en̄jake ko ewōr ippāer me rej ekkeijelļo̧k ippān ak rej kwaļo̧k naan kein?

• Kwomaron̄ jino juon iien ekōnono kōn opiij ko an priesthood eo illo am̧ kajjtōk ippān kūlaaj eo n̄an kōm̧m̧ane juon laajrak in un ko Irooj ej leļo̧k n̄an rikanaan ro, rijilōk ro, im ritōl ro jet an Kabun̄ in. Bōlen ro uwaan kūlaaj eo emaron̄ kobaikļo̧k n̄an laajrak eo aer ālkin aer riiti Katak im Bujen Ko 107:18–20. Innām kwomaron̄ joļo̧k iien n̄an etale eddo ko Irooj ej leļo̧k n̄an ro rej kabwijer opiij kein: Būreejtōnji eo Kein Kajuon (eoon 9, 21–22, 65–66, 91–92), Jon̄oulruo Rijilōk ro (eoon 23–24, 33–35, 38, 58), Jiljilimjuonn̄oul eo (eoon 25–26, 34, 93–97), bisop ro (eoon 13–17, 68–76, 87–88). Ta eo jemaron̄ kōm̧m̧ane n̄an rejtake ritōl ro ad kōn “lōke, tōmak, im jar[ko] ad”? (eoon 22).

• Ekōjkan ad naaj kar uwaak eļan̄n̄e juon m̧ōttad me membōr in kabun̄ in ad ej kajjitōk ippād, “Ta in priesthood?” ak “Ta priesthood kii ko?” Ekōjkan an katak ko ilo “Kein Jipan̄ ko Jet” maron̄ jelōt uwaak ko ad? Bōlen ro uwaan kūlaaj eo remaron̄ barāinwōt lo meļeļe ko rejipan̄ ilo Katak im Bujen Ko 107:1–4, 18–20 (lale barāinwōt True to the Faith, 124–28). Ekōjkan an priesthood eo jipan̄ kōj bōk “ittino ko an aelōn̄ in lan̄” im “an wōr maron̄ in kōpeļļo̧k lan̄ ko n̄an [kōj]”? Ekōjan an jipan̄ kōj “ioon jemdoon eo im baaktok eo an Anij Jemān, im Jisōs”? (eoon 19).

• Būreejtōn M. Russell Ballard ekar ba, “ijeļā ko̧o̧njeļ ko rej wāween eo an Irooj im bwe Eaar kōm̧anm̧an aolep men ko ilo laļ in kōn juon ko̧o̧njeļ in lan̄” (“Ko̧o̧njeļ ko an Baam̧le,” Ensign ak Liaona, Māe 2016, 63). Ekōjkan am̧ maron̄ jipan̄ ro kwoj katakin meļeļe ekōjkan ad ko̧o̧njeļ ippān doon ilo m̧weo im ilo m̧ōn jar eo? Bōlen kwomaron̄ kajjitōk ippān jejjo membōr ro n̄an pojaktok n̄an kwaļo̧k en̄jake ko aer ilo m̧ōn jar eo ak ilo m̧weo ilo aer kar mour kake pedped in ko̧o̧njeļ ko ilo Katak im Bujen Ko 107:27–31, 85 (ak ilo ennaan in jipan̄ eo an Būreejtōn Ballard ilōn̄). Ļōmņak in kajjitōk ippān ro uwaan kūlaaj eo ilo wiik in n̄an pojaktok n̄an kūlaaj n̄an kwaļo̧k ļōmņak ko kōn ta eo ej kōm̧m̧an bwe juon ko̧o̧njeļ en wājepdik. Kōketak ro uwaan kūlaaj eo n̄an kappukot pedped in katak ko reka ekkatak jān iien ekōnono in me enaaj jipan̄ er ļapļo̧k an wājepdik ilo aer bōk ko̧naer ilo ko̧o̧njeļ ko ilju jekļan ilo m̧weo ak m̧ōn jar eo.

  

Būreejtōn Dallin H. Oaks ekar katakin:

“Jejjab iminene in kōnono kōn an kōrā ro wōr aer mālim in priesthood eo ippāer ilo kūr ko aer ilo Kabun̄ in, ak enej bar mālim ta? N̄e juon kōrā—dik ak rūtto—em̧ōj kōjeno̧lok n̄an kwaļo̧k gospel eo āinwōt juon mijenede ej jerbal aolep raan, leļo̧k n̄an liin mālim an priesthood eo n̄an kōm̧m̧ane jerbal eo an priesthood. Menin em̧ool n̄e juon kōrā em̧ōj kōjeno̧loke n̄an jerbal āinwōt juon ritōl ak rūkaki ilo juon doulul an Kabun̄ in ium̧win tōl eo an juon eo ej kabwijer kii ko an priesthood eo. Jekdo̧o̧n wōn eo ej jerbal ilo juon opiij ak kūr ekar bōk jān juon eo me ej kabwijer kii ko an priesthood eo ej kōjerbal mālim ilo kōm̧m̧ane jerbal in eddo ko an kar kappeiki” (“The Keys and Authority of the Priesthood,” Ensign ak Liaona, Māe 2014, 51).

Būreejtōn M. Russell Ballard ekar ba:

“Jemedwōj Ilan̄ ej jouj kōn kajoor in An. Aolep em̧m̧aan im kōrā ro ewōr aer maron̄ tōpar kajoor in n̄an jipan̄ ilo mour ko aer make. Aolep ro me rekar kōm̧m̧ani bujen ko rekwojarjar ippān Irooj im ro rej kautiej bujen ko rej karbōb n̄an bōk revelesōn ko an juon make, n̄an jeraam̧m̧an jān enjeļ ro rej karejar, n̄an kōnono ippān Anij, n̄an bōk tarlep in gospel eo, im, āliktata, n̄an erom̧ rijolet ippān Jisōs Kraist kōn aolep men ko ewōr ippān Jemen” (“Men and Women in the Work of the Lord,” New Era, Epr. 2014, 4–5).