“Jeptōm̧ba 20–26. Katak im Bujen Ko 106–108: ‘N̄an An Maron̄ in Kōpeļļo̧k Lan̄ ko,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Jeptōm̧ba 20–26. Katak im Bujen Ko 106–108,” Itok, Ļoor Eō—N̄an Kajjojo Armej im Baam̧le ko: 2021
Jeptōm̧ba 20–26
Katak im Bujen Ko 106–108
“N̄an An Maron̄ in Kōpeļļo̧k Lan̄ ko”
Elder Ulisses Soares ekar katakin, “Jej aikuj in pād ilo E, wujlepļo̧k ad make ilo jeje ko rekwojarjar, lem̧ōņōņō ilo er, ekkatak katak eo An, im mour ilo wāween eo Eaar mour ie” (“Ekōjkan Aō Maron̄ Meļeļe?” Ensign ak Liaona, Māe 2019, 7). Ilo ad wūjlepļo̧k ad make ilo Katak im Bujen Ko 106–8, je wāween ko kwomaron̄ kajjieon̄ n̄an mour kōn m̧ool ko kwoj loi.
Je En̄jake ko Rej Im̧we Eok
Ilo jinoin aō meļeļe, Katak im Bujen Ko 107 emaron̄ ilo kalimjōke emake wōt kōn laajrak in opiij ko an priesthood n̄an juon jekjek in tōl an Kabun̄ eo an Irooj. Ilo m̧ool, iien eo revelesōn in ekar publish, oran uwaan Kabun̄ in rekar kadede kōm̧m̧an eļapļo̧k jān jon̄an eo me ritōl ro rekar maron̄ kōm̧m̧ane. Kōn menin, kōlaajrake jerbal im eddo ko an Būreejtōnji eo Kein Kajuon, Doulul eo an Jon̄oulruo ro, Jiljilimjuonn̄oul, bisop ro, im doulul an būreejtōnji ro ekar lukkuun menin aikuji im ekar lukkuun jipan̄. Ak ekar lōn̄ļo̧k wōt kōn kōmeļeļe ko rekwojarjar ilo jekjōn 107 ijjeļo̧kin wāween wōt an kōlaajrake opiij eo an priesthood eo im doulul ko. En̄in Irooj ej katakin kōj kōn juon laajrak in priesthood etto me “kar dedeļo̧k ilo raan ko an Adam” (eoon 41). Unleplep eo an jān jinoin ekar baj n̄an kōm̧m̧an bwe en kūrm̧ool n̄an ajri ro nejin Anij—ekoba kwe—n̄an bōk maron̄ eo n̄an bōk kain̄i ko an gospel im lan̄lōn̄ kōn “aolep kōjeraam̧m̧an ko an jetōb ilo Kabun̄ in—n̄an an wōr ippān utiej in n̄an bōki mennin ittino ko an aelōn̄ in lan̄, [im] n̄an an wōr maron̄ in kōpeļļo̧k lan̄ ko n̄an er” (eoon ko 18–19).
Lale “Restoring the Ancient Order,” Revelations in Context, 208–12.
Ļōm̧ņak ko n̄an Ekkatak Jeje Ko Rekwojarjar Ippam̧ Make
Irooj ej katakin, kapilōk, im rie ro me E ej kūr er n̄an jerbal.
Ilo Katak im Bujen Ko 106 im 108, Irooj ekar kapilōk im kallim̧ur ruo membōr ro rekar kūr er n̄an jerbal ilo Kabun̄ in. Ta naan ko ilo revelesōn in me ej letok kapilōk im en̄jake ko kōn jerbal in jipan̄ eo am̧ make ilo aelōn̄ in kiin̄ eo an Anij? Er kein rej ruo iaer n̄an ļōmņak kaki:
-
Em̧ōj ke am̧ bōk “jouj im bab-laļ eo” kake e emaron̄ “jutak”? (Katak im Bujen Ko 106:8).
-
Ewi wāween am̧ “tiljekļo̧k jān kiiō m̧aanļo̧k ilo kōjparok kanejnej ko am,” ak Bujen Ko? (Katak im Bujen Ko 108:3).
Ta naan ko jet jān jekjōn 106 im 108 me eļap meļeļeier n̄an kwe?
Bar lale Russell M. Nelson, “Jerbal in Karejar kōn Kajoor im Maron̄ an Anij,” Ensign ak Liaona, May 2018, 68–75; “Warren Cowdery,” Revelations in Context, 219–23; “‘Wrought Upon’ to Seek a Revelation,” Revelations in Context, 224–28.
Irooj ej tōl kabun̄ eo An kōn mālim eo an priesthood.
Ilo am̧ ekkatak Jepļaatok eo an gospel, kwomaron̄ kile bwe Irooj ejeja an kōmeļeļeik likio in juon katak ilo juon revelesōn. Ijjelo̧kin , E ekar kwaļo̧k men ko “lain ioon lain” (Katak im Bujen Ko 98:12) n̄e wāween im jekjek ko remenin aikuj. Men̄e Irooj ekar letok m̧oktaļo̧k kōmeļeļe ko kōn priesthood m̧okta ilo 1829 (lale, n̄an waanjon̄ak, jekjōn 20 im 84), E ekar leļo̧k kōmeļeļe n̄an Armej ro Rekwojarjar ilo 1835 kōn opij ko an priesthood me remenin aikuj n̄an kōjeikiik im tōl eddōkļo̧k eo an rikaļoor ro An.
Ilo am̧ riit kōn opiij ko an priesthood, ļōmņak kōn wāween am̧ maron̄ rejtake ro me kwoj jerbal ippāer ilo kūr kein ilo am̧ “lōke, tōmak, im jar [ko]” (Katak im Bujen Ko 107:22).
-
Būreejtōnji eo Kein Kajuon im Būreejtōn eo an Kabun̄ in (eoon ko 9, 21–22, 65–66, 91–92)
-
Jon̄oulruo Rijilōk ro (eoon ko 23–24, 33–35, 38, 58)
-
Jiljilimjuonn̄oul ro (eoon ko 25–26, 34, 93–97)
-
Bisop ro (eoon ko 13–17, 68–76, 87–88)
Kain̄i ko an priesthood rej letok kōjeraam̧m̧an ko an mour in jetōb in kanniōk n̄an aolep ajri ro nejin Jemedwōj Ilan̄.
Elder Neil L. Andersen ekar katakin: “Priesthood eo ej kajoor im mālim eo an Anij kar letok n̄an lo̧mo̧o̧r im kōjeraam̧m̧an eo an aolep—em̧m̧aan, kōrā ro, im ajri ro. … N̄e jej erreo, kain̄i ko an priesthood ej kōkm̧anm̧anļo̧k mour ko ad ioon laļ in im kōpooj kōj n̄an kallim̧ur ko rekabwūlōn̄lōn̄ an laļ in me repād im̧aan” (“Kajoor ilo Priesthood eo,” Ensign ak Liaona, No̧b. 2013, 92). Ilo am̧ riiti Katak im Bujen Ko 107:1–20 (lale eļaptata eoon ko 18–20) im aolepān enaan eo an Elder Andersen, ļōmņak n̄an je im̧we ko kwoj en̄jaki kōn wāween an kajoor eo an Anij kōkm̧anm̧anļo̧k mour eo am̧ ioon laļ in im kōpooj eok n̄an mour indeeo. Ta eo kwoj kōm̧m̧ane n̄an bōk eļapļo̧k ilo likio in—im jipan̄ ro jet bōk—kōjeraam̧m̧an ko jet?
Bar lale Katak im Bujen Ko 84:19–27; Dallin H. Oaks, “The Keys and Authority of the Priesthood,” Ensign ak Liaona, Māe 2014, 49–52.
Priesthood eo ej kōjeraam̧m̧an baam̧le ko.
Adam ekar kōņaan bwe ineen ren jeraam̧m̧an jān priesthood eo. Ta kallim̧ur ko ekar bōki? (lale eoon ko 42, 55). Ilo am̧ riiti ta eo Adam ekar kōm̧m̧ane, ļōmņak kōn ikdeleel eo am̧ make n̄an baam̧le eo am̧ n̄an lan̄lōn̄ kōn kōjeram̧m̧an ko an priesthood eo. Ta eo kwoj im̧we kaki n̄an kōm̧m̧ani n̄an jipan̄ baam̧le eo am̧ bōk kōjeram̧m̧an ko?
Adam ej Kōjeraam̧m̧an ro Ineen, jān Clark Kelley Price
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 106:6.Ta eo baam̧le eo ad emaron̄ kōm̧m̧ane n̄an kōm̧m̧an bwe en wōr “lan̄lōn̄ ilo lan̄”?
-
katak im Bujen Ko 107:22.Ta eo jemaron̄ kōm̧m̧ane n̄an rejtake ritōl ro ad “jān … lōke, tōmak, im jar”?
-
Katak im Bujen Ko 107:27–31, 85.Pedped in katak ko me rej tōl ko̧o̧njeļ ko an Kabun̄ in emaron̄ bar jipan̄ kōj kapilōk doon āinwōt juon baam̧le. Ta pedped in katak ko ilo eoon kein me jemaron̄ kōjerbali ilo iien ko̧o̧njeļ ko an baam̧le ko ad? (Lale M. Russell Ballard, “Ko̧o̧njeļ ko an Baam̧le,” Ensign ak Liaona, Māe 2016, 63–65.)
-
Katak im Bujen Ko 107:99–100.Leļo̧k n̄an juon uwaan baam̧le eo kōmeļeļe ko em̧ōj jei kōn juon jerbal ilo m̧ōko, im kajjitōk bwe en kālet wāween an kōm̧m̧ane jerbal in: tiljek, ilo wāween an jowan, ak ilo an jab riiti kōmeļeļe eo. Kōtļo̧k bwe aolepān baam̧le eo en lale an kōm̧m̧ane jerbal eo im kajidede wāween ta eo uwaan baam̧le eo ekar kālete. Innem kōtļo̧k bwe ro uwaan baam̧le eo ren kajjojo kōm̧m̧ane. Etke Irooj ej aikuji kōj n̄an jim̧or ekkatak kōn eddo ko im kōm̧m̧ani kōn tiljek? (Lale Becky Craven, “Tiljek ņae Jatiljek,” Ensign ak Liaona, Māe 2019, 9–11.)
-
Katak im Bujen Ko 108:7.Elmen ad maron̄ kōkajoor doon ilo kōnono ko ad? ilo jar ko ad? ilo kōketak, ak kapilōk? ilo aolep kōm̧m̧an ko ad? Kwomaron̄ kālet juon iaan men kein n̄an jerbale āinwōt juon baam̧le.
N̄an ļōmņak ko reļļapļo̧k n̄an katakin ajri ro, lale laajrak eo an wiik in ilo Itok, Ļoor Eō—N̄an Būraimere.
Al eo kar elmakote: “We Listen to a Prophet’s Voice,” Hymns, no. 22.
Kōkōm̧anm̧anļo̧k Ekkatak Ippam̧ Make
Je Men ko Reim̧we. N̄e im̧we ko an jetōb ak en̄jake ko rej jiktok ippam̧, jeiki er. Ilo am̧ kōm̧m̧ane, kwoj kwaļo̧k n̄an Irooj bwe kwoj kaorōk tōļ eo An. (Lale Teaching in the Savior’s Way, 12, 30.)
Melkizedek ej Kōjeraam̧m̧an Ebream, jān Walter Rane