Katak im Bujen Ko 98–101

• En̄taan eo ak jum̧ae eo jej jelm̧ae rainin emaron̄ in oktak jān ta eo Armej ro Rekwojarjar rekar jelm̧ae ilo Missouri ilo 1833 eo, bōtaab kapilōk eo an Irooj ilo Katak im Bujen Ko 98 ej wōnm̧aanļo̧k wōt n̄an raan kein. N̄an jipan̄ ro uwaan kūlaaj eo ekkatak jān kapilōk in, ļōmņak in je kajjitōk ko āinwōt in ioon boot eo: Ilo wāween ta Irooj ej kōņaan bwe Armej ro Rekwojarjar An ren meļeļe kōn menin jum̧ae? Ekōjkan an Irooj kōņaan bwe jen ņa mejļan en̄taan? Ro uwaan kūlaaj eo remaron̄ jerbal ilo kurup ko reddik n̄an pukot uwaak ko ilo Katak im Bujen Ko 98:1–3, 11–16, 23–30 innām ekōnono kōn ta eo rej ekkatak. Ta m̧ool ko jej loi me remaron̄ jipan̄ kōj erom̧ rikaļoor ro rem̧m̧anļo̧k an Jisōs Kraist? Ennaan ko ilo “Kein Jipan̄ ko jet” remaron̄ kōkobabatok n̄an ekōnono in.

• Ilo iien en̄taan ko ak mālijjon̄ ko, ennaan in jān jekjōn 98 im 101 remaron̄ jipan̄: Iroon enaaj jipan̄ kōj eļan̄n̄e jej m̧ōņōņō in lōke E. N̄an jipan̄ ro uwaan kūlaaj eo lo ennaan in, kwomaron̄ je laajrak in eoon kein ioon boot eo im kajjitōk ippān ro uwaan kūlaaj eo n̄an kāālet jejjo n̄an riiti: Katak im Bujen Ko 98:1–3, 11–12, 37; 101:2–5, 9–16. Kajjitōk ippāer n̄an kwaļo̧k ta eo rej loe me ej kōketak er n̄an lōke ilo Irooj. Ekōjkan an eoon kein katakin kōn wāween n̄an likūt ad lōke ilo Irooj? (Lale barāinwōt Linda S. Reeves, “Bōk Kōjeram̧m̧an ko an Bujen ko Am̧,” Ensign ak Liaona Nob. 2013, 118–20.)

• Ekōjkan am̧ maron̄ jipan̄ ro uwaan kūlaaj eo kile kōjparok eo me ej itok ilo ad “eo̧ron̄ ainikien Irooj”? (eoon 7). Bōlen kwomaron̄ kajjitōk ippān jejjo ro uwaan kūlaaj eo n̄an kōm̧m̧an arin būrabōļ eo ilo Katak im Bujen Ko 101:43–62 ilo an ro jet uwaan kūlaaj eo kōļap ainikien aer riiti. Innām kwomaron̄ ekōnono kōn kajjitōk ko āinwōt kein: Ta m̧ōttan ko reokotaktak ilo būrabōļ eo rej jutak kaki? Ta eo ekar kōm̧m̧an bwe rijerbal ro ren jerwane jikin kallib eo? Ta katak ko jej ekkatak jān m̧akūtkūt ko an rijerbal ro? Ta eo jej ekkatak kōn Irooj jān m̧akūtkūt ko an juon em̧m̧aan ekanooj em̧m̧an? Emaron̄ barāinwōt jipan̄ n̄an keidi eoon 1–8 ippān eoon 47–51 im ekōnono kōn ekōjkan ad maron̄ “tiljek im mālōtlōt” ilo kijejeto ko ad n̄an kalōk Zaion ilo mour ko ad kajjojo, ilo m̧ōko im̧ōd, im āinwōt juon Kabun̄.

  

Elder Robert D. Hales ekar katakin:

“Jet armej ebōd aer ļōmņak uwaak ko āinwōt ikōn̄, ettā, jeorļo̧k bōd, im kwaļo̧k naan in kam̧ool ko rettā rebuwal im rem̧ōjņo̧. Bōtaab n̄an ‘iakwe rikōjdāt ro [ad], kōjeraam̧m̧an ro rej kaliaik [kōj], kōm̧m̧an em̧m̧an n̄an ro me rej dike [kōj], im jar kōn ro me rej kōjerbal [kōj], im kaen̄taan [kōj]’ (Matu 5:44) ebōk tōmak, kajoor, im, eo eļap tata iaer, peran an Rikūrijtin. …

“N̄e jejjab idenwoņe—n̄e jej ukotļo̧k jepād im anjo̧ jān en̄jake in illu—jej barāinwōt jutak ippān Rilo̧mo̧o̧r. Jej kwaļo̧k iakwe eo An, eo ej kajoor eo wōt me emaron̄ anjo̧ ioon rikapo eo im uwaake ro rej kinaakļo̧k kōj ilo ejjeļo̧k ņotaik er ilo kōro̧o̧l nana. Men jab in ejjab juon m̧ōnjo̧. Ej peran an Rikūrijtin” (“Christian Courage: The Price of Discipleship,” Ensign ak Liahona, Nov. 2008, 72).

Elder Kevin R. Duncan ekar ba: “Ro jeiū im jatū, jouj en jab bōd ami meļeļe. N̄an jeorļo̧k bōd ejjab n̄an errā. Jejjab nōbar m̧wiļ nana ak kōtļo̧k bwe juon en nana an kōm̧m̧an n̄an kōj kōnke kōn apan̄ ko, metak ko ak m̧ōjņo̧ ko aer. Bōtaab je maron̄ bōk eļapļo̧k meļeļe im aenōm̧m̧an n̄e jej kalimjōk kōn eļapļo̧k kōļm̧ānļo̧kjeņ. … Jeorļo̧k bōd ej juon pedped in kemour eaiboojoj. Jejjab aikuj erom̧ juon eo nana n̄an e ruo alen. Jemaron̄ jeorļo̧k bōd” (“Unokan Kōmour Jeorļo̧k Bōd,” Ensign ak Liaona, Māe 2016, 35).