Katak im Bujen Ko 93

• Ilo aer kar katak jān Katak im Bujen ko 93, ro uwaan kūlaaj eo remaron̄ kar lo elōn̄ m̧ool ko kōn Jemād Ilan̄ im Jisōs Kraist. Kajjitōk ippān ro uwaan kūlaaj eo n̄an kwaļo̧k ta eo raar loe. Kwomaron̄ barāinwōt ajije kūlaaj eo n̄an kurup ko im leļo̧k n̄an kajjojo kurup jet eoon ko n̄an katak kaki ippān doon. Innām kajjojo kurup remaron̄ kwaļo̧k n̄an kūlaaj eo ta eo rekar ekkatak kake kōn “ekōjkan kabun̄-jar, im … ta [jej] kabun̄-jar n̄an e” (eoon 19).

• Katak im Bujen Ko 93 epād ie elōn̄ m̧ool ko kōn paotok indeeo eo ad im kōjatdikdik eo āinwōt ajri ro nejin Anij. Jet ro uwaan kūlaaj eo remaron̄ kar loi m̧ool kein ilo aer kar katak jān jekjōn 93 ilo m̧weo (lale laajrak in katak eo an wiik in ilo Itok, Ļoor Eō—N̄an Kajjojo Armej im Baam̧le ko). Ro me rekar riit remaron̄ kwaļo̧k ta eo rekar loe, im kwomaron̄ bar kappukot m̧ool ko jet āinwōt juon kūlaaj. Ekōjkan an m̧ool kein maron̄ jelōt wāween ad kōm̧m̧an n̄an armej ro ipeļāakid—ak kōj make?

• En̄in ej bar juon wāween n̄an ekkatak kōn paotok eo ad indeeo im kōjatdikdik eo: ro uwaan kūlaaj eo remaron̄ riit ippān doon eoon 24 im je jilu taitōļ ko Āinwōt kōj kiiō, im Āinwōt kar kōj, im Āinwōt naaj kōj. Innām kwomaron̄ ajije kūlaaj eo n̄an jilu kurup ko im kajjitōk ippān kajjojo kurup n̄an etale Katak im Bujen Ko 93:6–39, kappukot m̧ool ko kōn kadkadid indeeo kōn kiiō, m̧oktaļo̧k, im ilju im jekļaj. Kajjojo kurup remaron̄ je ium̧win taitōļ ko ta eo raar loe. Ekōjkan an m̧ool kein im̧we er kōn jokālet ko jej kōm̧m̧ani?

• Kakien eo n̄an “ko̧koņe m̧weo im̧ōm make” (eoon 43) ejjab kōn kakoņ kōbat ko im kūļo̧jet ko bōtaab kōn katakin—im ekkatak—“meram im m̧ool” (eoon 42). Bōlen ro uwaan kūlaaj eo remaron̄ kwaļo̧k ekōjkan aer kajjieon̄ ļoor kapilōk in. Ta jet apan̄ ko rej jelm̧ae? Ta m̧ool ko ak pedped in katak ko ilo Katak im Bujen ko 93 remaron̄ jipan̄?

• Ejja m̧ōttan wōt ekōnono eo ami kōn eoon kein, ro uwaan kūlaaj eo remaron̄ riiti m̧ōttan ko an ennaan eo an Būreejtōn Henry B. Eyring “M̧weo Ijo Jetōb eo an Irooj ej Jokwe ie” (Ensign ak Liaona, Māe 2019, 22–25) im kwaļo̧k jabdewōt kōļmenļo̧kjeņ ko me rej iookļo̧k m̧ool ko ilo Katak im Bujen Ko 93:40–50. (Lale barāinwōt ennaan eo ilo “Kein Jipan̄ ko Jet.”)

Elder David A. Bednar ekar katakin:

“Ilo opiij eo aō ewōr juon pija jin̄n̄a in juon m̧eļaaj in wiit. Pija in ej juon kōro̧ro in annan̄ in bōran būraaj uno—annan̄ in juon bōran būraaj uno me emakeļo̧k ejjab eaibojooj im ainōknōk. Ilo m̧ool, eļan̄n̄e kwoj jutak epaakeļo̧k pija eo, men eo de eo kwoj loe juon dipio in ļain jiddik ko rejjab ekkeijel im ejjeļo̧k ļōmeer aer uno iaļo im gold im m̧ōņakņak. Mekarta, ilo am̧ jidik jidik kattoļo̧k eok jān pija eo, aolepān kajjojo annan̄ in bōran būraj ko rej koba ippān doon im kwaļo̧k juon meļaaj in juon meļan wiit eaibojooj. Elōn̄ kajjojo bōran būraj ko reaibojooj rej ippān doon n̄an ejaake juon pija eo emejādik im aiboojoj.

“Kajjojo jar an baam̧le, kajjojo iien an baam̧le ekkatak jeje ko rekwojarjar, im kajjojo nokon in jota an baam̧le ej juon bōran būraj ioon juon kappa ilo jetōb ko ad. Juon makūtkūt ej makeļo̧k ejjab kabwūlōn̄lōn̄ im ejjab kein ememļo̧kjeņ. Ak āinwōt ilo an iaļo im gold im m̧ōņakņak annan̄ in bōran būraaj uno ko koba ippān doon im kwaļo̧k juon tōprak, āindein an emakijkij ad kōm̧m̧ane men ko reddik me remaron̄ tōl ļo̧k n̄an tōprak ko raorōk an jetōb. ‘Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jerbarļo̧k men eo eļap’ (K&B 64:33). Jokkun wōt juon eo ej juon pedped in katak eo aorōk ilo ad likūt pedped eo an jerbal eo eļap ilo mour ko ad kajjojo im ilo an ļapļo̧k ad tiljek im bōk eddo ilo im̧ōko im̧ōd make” (“More Diligent and Concerned at Home,” Ensign ak Liahona, Nov. 2009, 19–20).