Katak im Bujen Ko 89–92

• Elōn̄ armej remaron̄ watōk Naan in Mālōtlōt āinwōt juon laajrak in “kōm̧m̧ani” im “jab kōm̧m̧ani” N̄an jipan̄ ro uwaan kūlaaj eo kejo̧kļo̧kjeņ kōn pedped in katak ko n̄an kōmeļeļe in, kajjitōk ippāer n̄an kappukot Katak im Bujen Ko 89 ippān kajjitōk ko me rej ellaajrak āinwōt in ilo kōļmenļo̧kjeņ: Etke Irooj ekar letok n̄an kōj Naan in Mālōtlōt? Ta eo revelesōn in ekar katakin kōj kōn Jemedwōj Ilan̄ im karōk eo An n̄an kōj? Naan eo ilo “Kein Jipan̄ ko Jet” emaron̄ lukkuun ļap an jipan̄. Eļan̄n̄e kwoj en̄jake ke enaaj kōjeraam̧m̧an ro uwaan kūlaaj eo, komaron̄ kajjitōk ippāer n̄an kōllaajrak ilo bo̧o̧t eo kōm̧m̧an ko rekkāājmourur im rekōjorrāān me Irooj ekar kalikkari ilo Katak im Bujen Ko 89:5–17. Innem remaron̄ etale “Ājmour ilo Ānbwin im Kōļmenļo̧kjeņ” ilo N̄an Kōkajoorļo̧k Jodikdik Ro (25–27) im kobaikļo̧k n̄an laajrak ko aer men ko jet rej loi. Ewi wāween an kallim̧ur ko ilo eoon ko 18–21 kar kūrm̧ool ilo mour ko ad?

• En̄in ej bar juon wāween n̄an jipan̄ ro uwaan kūlaaj ro kōmeļeļeik pedped in katak ko ilo Naan in Mālōtlōt. Komaron̄ kōjepel kūlaaj eo n̄an jilu kurup im kajjitōk ippān kajjojo kurup n̄an riiti jekjen 89, kappukot uwaak ko n̄an juon iaan kajjitōk ko: Ta pedped in katak ko me remaron̄ letok rōjan̄ n̄an juon eo me ej apan̄ n̄an pokake Naan in Mālōtlōt? Ta pedped in katak ko me remaron̄ jipan̄ kōj bwe jen jab ekajet ro me rej apan̄ n̄an pokake? Ta pedped in katak ko me remaron̄ kaenōm̧m̧an kōj n̄e ewōr ad nan̄inmej in ānbwin jekdoon n̄e jej kōjparok Naan in Mālōtlōt? Āinwōt m̧ōttanļo̧k m̧akūtkūt in, komaron̄ kwaļo̧k en̄jake eo an Būreejtōn Dieter F. Uchtdorf ilo an kar kaminene n̄an erom̧ juon baiļōt in ritariņae (lale “Continue in Patience,” Ensign ak Liahona, May 2010, 58). Rōjan̄ ro uwaan kūlaaj eo n̄an ļōmņak kōn juon men rekar en̄jake im̧we n̄an kōm̧m̧ane ilo iien kōmeļeļe eo, im leļo̧k n̄an er iien n̄an je en̄jake ko rej en̄jaki.

  

• Laajrak eo an wiik in ilo Itok, Ļoor Eō—N̄an Kajjojo im Baam̧le Ko ļōmņak bwe membōr ro ren lale Katak im Bujen Ko 90:1–17 n̄an ekkatak kōn Būreejtōnji eo Kein Kajuon. Komaron̄ kajjitōk ippān ro uwaan kūlaaj eo n̄an kwaļo̧k ta eo rekar ekkatak ilo m̧weo jān m̧akūtkūt in, ak komaron̄ lale eoon kein āinwōt juon kūlaaj. Ro uwaan kūlaaj eo remaron̄ barāinwōt kappukot naan ko ilo “Come, Listen to a Prophet’s Voice” (Al ko, numba. 21) ak al ko jet kōn rikanaan me rej iookļo̧k katak ko ilo eoon kein. Ewi wāween an jerbal in jipan̄ ko an Būreejtōnji eo Kein Kajuon kar jipan̄ eok jeļā Jemedwōj Ilan̄ im Jisōs Kraist?

• Ilo laļ in rainin, jejeļā kōn enaan ko me repād ie “ewōr men ko rellōn̄ … rem̧ool” im “ewōr men ko rellōn̄ … rej jab m̧ool” (eoon ko 1–2). Kajjitōk ippān ro uwaan kūlaaj eo n̄an kappukot ilo jekjen 91 kapilōk eo kōn Apocrypha me emaron̄ jipan̄ er jeļā m̧ool ilo ennaan ko rej jelm̧aeiki. Ta waanjon̄ak ko remaron̄ kwaļo̧ki kōn wāween an Jetōb kar jipan̄ er jeļā m̧ool?

Būreejtōn Boyd K. Packer ekar katakin:

“Naan in Mālōtlōt kar ‘leļo̧k n̄an juon pedped ippān kallim̧ur’ [Katak im Bujen Ko 89:3]. Naan in pedped ilo revelesōn in ej juon men elukkuun aorōk. Juon pedped in katak ej juon m̧ool ejjeļo̧k jem̧ļo̧kin, juon kakien, juon ruuļ komaron̄ mour ekkar n̄an e n̄an tōl eok ilo am̧ kōm̧m̧ane jokālet ko. Ilo m̧ool pedped ko rejjab lukkun kōmeļeļeļ ilo dipdikin. Me ekōm̧m̧an bwe en kanem̧kwoj eok n̄an kappukot wāween eo am̧ kōn juon eo enaaj niknik ilo m̧ool, juon pedped, āinwōt juon am̧ an̄kō.

Membōr ro rej je ilo kajjitōk eļan̄n̄e men in ak men kein rej jum̧ae Naan in Mālōtlōt. Rej ņae etaer tii, ko̧pe, dān in kadōk, im jikka ko rej jum̧aeiki. Ekar jab lukkun kōmeļeļe ilo lukkuun dipdikin. Ijjeļo̧kin, jej katakin pedped eo ippān kōjeraam̧m̧an ko kar kallim̧ur kaki. Elōn̄ iminene ko kar ejaak, men ko jej an̄ūri me juon emaron̄ idaak ak memeiki ak emenonoiki ak wā eo ej kejorrāān jim̧ōr ilo ānbwin im jetōbme rejjab kwaļo̧k ilo revelesōn. …

“Kautiej pedped in Naan in Mālōtlōt im konaaj bōk kōjeraam̧m̧an” (“The Word of Wisdom: The Principle and the Promises,” Ensign, May 1996, 17–18).