Katak im Bujen Ko 85–87

• Ilo Katak im Bujen Ko 85:6, rikanaan Josep Smith ekar kōjerbal kajin eo ej tipdiki aolep meļeļe n̄an ba kōn wāween an Jetōb kar kōnono n̄an e. Ta eo jej ekkatak kōn Jetōb Kwojarjar jān kōmeļeļe eo an alikkar? Komaron̄ kajjitōk ippān ro uwaan kūlaaj eo n̄an ļōmņak kōn iien ko me Jetōb ekar kōnono n̄an er—ewi wāween aer kōmeļeļeik en̄jake ko aer? Remaron̄ lo kōmeļeļe ko jet ilo eoon ko āinwōt: Luk 24:32; Mosaia 5:2; Alma 32:28; Hilamōn 5:30; Katak im Bujen Ko 6:22–23; 11:12–13.

• Komaron̄ ke ļōmņak kōn juon katak ak juon kōmeļeļe me emaron̄ kōmeļeļeik unoojdikdik eo edik im emera an Jetōb? Bōlen komaron̄ kajjino jet iaan al ko remera im rekwojarjar ilo an ro uwaan kūlaaj eo jino deļo̧n̄e ruum eo. Ro uwaan kūlaaj eo remaron̄ kōnono kōn wāween an al eo kōm̧m̧an bwe ren en̄jake im ewi jon̄an an pen n̄an ron̄jake al eo eļan̄n̄e elōn̄ ainikein ko rekauwaron̄ron̄. Menin emaron̄ tōl n̄an juon kōmeļeļe eo kōn menin kapokpok ko ilo mour ko aer me rej dāpij kōj jān ad ron̄jake ainikien eo edik im emera. Ro uwaan kūlaaj eo remaron̄ kwaļo̧k ta eo rej kōm̧m̧ane n̄an kōļapļo̧k en̄jake ko aer kōn Jetōb—jet kapilōk maron̄ loi ilo “Kein Jipan̄ Ko Jet.”

• M̧akūtkūt eo tok juon emaron̄ jipan̄ ro uwaan kūlaaj eo meļeļe kōn kōkaļļein bārābōļ eo kōn ine em̧m̧an im tāō ko: Komaron̄ je kōkaļle in naan ko jān bārābōļ eo (āinwōt “rikalbwin ine eo,” “tāō ko rej bauti im m̧anļo̧k wiit ko,” “juļ eo ej jebar,” im “ainitok eo an wiit ko” [eoon 2–4, 7]) im ukook ko rekkar (āinwōt “Rijilōk ro,” “Bun̄ jān Tōmak,” “Jepļaaktok eo,” im “jerbal in mijinede”) ilo juon m̧ōttan pepa ejeņoļo̧k im likūt ioon bo̧o̧t eo. Innem ro uwaan kūlaaj eo remaron̄ jerbal ippān doon n̄an kōmmāājāji kōkaļļe ko kōn meļeļeier, ilo aer ekkatak jān Katak im Bujen Ko 86:1–7 (remaron̄ bar riiti Matu 13:37–43). Etke eaorōk bwe Irooj en kwaļo̧k revelesōn in “n̄an ro rikarjera”? (eoon 1). Ta ennaan ko me jej loi me rej iookļo̧k jerbal ko ad n̄an Irooj? (bar lale eoon 11).

• N̄an jipan̄ ro uwaan kūlaaj eo meļeļe aikuj eo n̄an “jutak … ilo jikin rekwōjarjar,’ komaron̄ jino ilo am̧ kajjitōk ippāer n̄an kōllaajraki jet iaan apan̄ ko jej jelm̧aeiki ilo raan ko āliktata. Remaron̄ lo jet waanjon̄ak ko ilo Katak im Bujen Ko 87:2, 6. Innem komaron̄ kōmeļeļeik wāween an kūr eo an Irooj ilo eoon 8 maron̄ jipan̄ kōn apan̄ kein. Kajjitōk āinwōt kein remaron̄ jipan̄:

  Ta eo eaorōk kōn naan in “jutak” ilo eoon in?

  Ta eo ej kōm̧m̧an bwe juon jikin en ekwojarjar?

  Ta eo emaron̄ kam̧akūt juon armej jān juon jikin ekwojarjar?

  Ewi wāween ad maron̄ lukkuun lale bwe jen jab em̧akūt?

• Bōlen ro uwaan kūlaaj eo remaron̄ kōņaan kwaļo̧k n̄an doon waanjon̄ak ko jet kōn “jikin ko rekwojarjar” im ta eo ej kōm̧m̧an bwe en ekwojarjar (komaron̄ kōmeļeļeik bwe juon jikin ekwojarjar emaron̄ ļapļo̧k jān juon jikin jej pād ie). Pija in alooj eo “Standing in Holy Places” (ChurchofJesusChrist.org) emaron̄ letok kakkobaba in aitia ko jet. Ilo aer kwaļo̧k, rōjan̄ er n̄an kōnono etke jikin kein rekwojarjar ippāer. Ewi wāween an jikin kein rekwojarjar jipan̄ kōj lo aenōm̧m̧an ilubwiljin kauwōtata ko an raan kein āliktata?

Sister Vicki F. Matsumori, juon kar rikakpilōklōk m̧okta ilo Būreejtōnji eo Eutiej an Būraimere ro, ekar leļo̧k kapilōk in: “Kōnke Jetōb ekkā kōmeļeļeiki āinwōt juon ainikien edik im emera, eaorōk n̄an barāinwōt kōjeņo̧ļo̧k juon iien eo elūr ilo mour ko ad. Irooj ekar kapilōk kōj n̄an ‘pād wōt, im jeļā bwe N̄a Naij Anij’ [Sam Ko 46:10]. Eļan̄n̄e jej kōm̧m̧an juon iien emera im elūr kajjojo raan n̄e ejjab ekutkut ad alooj tv, kamputōr, ikkure ko ilo pija in alooj, ak devices ko an juon make, jej kōtļo̧k bwe ainikien eo edik im emera en wōr an iien n̄an bōktok revelesōn ko ad make im n̄an unoojdikdik kōn tōl ko rem̧m̧an, kam̧ool, im kaenōm̧m̧an n̄an kōj (“Helping Others Recognize the Whisperings of the Spirit,” Ensign ak Liahona, Nov. 2009, 11).