عیدِ ولادت المسِیح

اگرچہ آپ نے پہلے بھی کئی بار یِسُوع مسِیح کی ولادت کی کہانی پڑھی یا سُنی ہوگی، اِس دفعہ اِس خیال کو ذہن میں رکھیں کہ: ”کرسمس صرف اِس بات کا جشن نہیں ہے کہ یِسُوع دُنیا میں کیسے آیا تھا لیکن یہ جاننا بھی ضروری ہے کہ وہ کون ہے—ہمارا خُداوند اور مُنّجی، یِسُوع مسِیح—اور وہ کیوں آیا تھا“ (کریگ سی کرسچن سن، ”The Fulness of the Story of Christmas“ [صدارتِ اول کا کرسمس ڈیوشنل، دسمبر ۴، ۲۰۱۶]، broadcasts.ChurchofJesusChrist.org)۔

اپنی پیدائش سے قبل یِسُوع مسِیح کون تھا آپ اِس بارے کیا جانتے ہیں؟ (دیکھیں، مثال کے طور پر، یُوحنّا ۱۷: ۵؛ مضایاہ ۳: ۵؛ عقائد اور عہود ۷۶: ۱۳–۱۴، ۲۰–۲۴؛ موسیٰ ۴: ۲)۔ جب آپ اُس کی ولادت کے بارے میں پڑھتے ہیں تو اِس علم کا آپ کے احساسات پر کیا اثر پڑتا ہے؟

یِسُوع مسِیح زمِین پر کیوں آیا تھا آپ اِس بارے کیا جانتے ہیں؟ (دیکھیں، مثال کے طور پر، لُوقا ۴: ۱۶–۲۱؛ یُوحنّا ۳: ۱۶–۱۷؛ ۳ نیفی ۲۷: ۱۳–۱۶؛ عقائد اور عہود ۲۰:۲۰–۲۸)۔ یہ علم نِجات دہندہ کے بارے میں آپ کے احساسات کو کیسے متاثر کرتا ہے؟ یہ آپ کے زِندگی گزارنے کے طریقے کو کیسے متاثر کرتا ہے؟

مزید دیکھیں ۲ کُرنتھِیوں ۸: ۹؛ عِبرانیوں ۲: ۷–۱۸؛ ۱ نیفی ۱۱: ۱۳–۳۳؛ ایلما ۷: ۱۰–۱۳؛ ”The Nativity“ (ویڈیو، ChurchofJesusChrist.org)۔

اگرچہ مسِیح کی ولادت کی کہانی مُعجِزانہ واقعات سے گھِری ہوئی تھی،باوجود اِس کے اگر وہ عظیم کام نہ کرتا جو بعد میں اُس نے اپنی زِندگی میں سر انجام دیا تو اُس کی پیدائش بھی عام ہی تصّور کی جاتی۔ جیسا کہ صدر گورڈن بی ہنکلی نے بیان کیا ”گتسِمنی اور کلوری، اور قِیامت پر فتح کی حقیقت مخلصی دینے والے مسِیح کے برعکس، بیت لحم کا بچّہ یِسُوع دُوسرے عام بچّوں کی مانند ہی ہوتا“ (”The Wondrous and True Story of Christmas،“ انزائن، دسمبر ۲۰۰۰، ۵)۔

نئے عہد نامے میں نِجات دہندہ کے الہٰی مشن اور دُوسروں کے ساتھ اُس کی قوی محبّت کا ثبوت مِلتا ہے۔ آپ کے ذہن میں کون سے حوالہ جات یا کہانیاں آتی ہیں؟ آپ شاید اِس وسیلہ یا اپنے مُطالعاتی روزنامچے پر نظر ڈال سکتے ہیں اور اپنے درج کردہ تاثرات کا جائزہ لے سکتے ہیں۔ آپ ۱ کُرنتھِیوں ۱۵: ۲۱–۲۶؛ کُلسّیوں ۱: ۱۲–۲۲؛ ۱ پطرس ۲: ۲۱–۲۵ بھی پڑھ سکتے ہیں اور غور کریں کہ کِس طرح نِجات دہندہ اور اُس کے کام نے آپ کی زِندگی کو برکت بخشی ہے۔ آپ اپنی زِندگی میں کیا تبدیل کرنے کی حوصلہ افزائی محسوس کرتے ہیں؟ آپ نِجات دہندہ کی طاقت کِس طرح حاصل کریں گے؟

آپ اپنے گھر والوں کے ساتھ یِسُوع مسِیح کی ولادت کا جشن کیسے منا سکتے ہیں؟ یہاں چند ایک تجاویز پیش کی گئی ہیں، یا آپ خود سے سوچ سکتے ہیں:

• مسِیح کی ولادت کی کہانی کے کچھ حصّے ایک ساتھ پڑھیں یا اُن کی کردار نگاری کریں۔

• صدارتِ اوّل کا کرسمس ڈیوشنل دیکھیں (broadcasts.ChurchofJesusChrist.org)۔

• اکٹھے کرسمس کے گیت گائیں، یا پڑوسیوں یا دوستوں کا انتخاب کرکے اُن سے ملنے جائیں اور اُن کے لیے گیت گائیں (دیکھیں گیت، نمبر. ۲۰۱–۱۴)۔

• خدمت کا کام سرانجام دیں۔

• خاندانی اَرکان سے کہیں کہ وہ مسِیح کی ولادت کی کہانی میں سے تفصیلات کو کھوجیں جن کی بدولت اُنھیں اَیسی آرائشی یا سجاوٹی چِیزیں بنانے کے لیے تجاویز ملیں جو اُن کو یِسُوع مسِیح کی یاد دِلا سکتی ہیں۔

ہم یِسُوع مسِیح کی پیدائش کے لیے کیوں شُکر گُزار ہیں؟ اُس نے ہمیں کون سی نَعمتیں بخشی ہیں؟ ہم اپنے تشکر کا اِظہار کِس طرح سے کر سکتے ہیں؟

اگر آپ کرسمس کے موقع پر نِجات دہندہ پر توجہ مرکوز کرنے میں اپنے خاندان کی مدد کرنا چاہتے ہیں تو، شاید آپ اکٹھے کچھ پڑھنے اور مُطالعہ کرنے میں وقت صرف کرسکتے ہیں ”زِندہ مسِیح :رَسُولوں کی گواہی“ (انزائن یا لیحونا، مئی ۲۰۱۷، سرورق کے اندر)۔ شاید آپ ”زِندہ مسِیح“ کی عبارتوں کو زبانی یاد کرسکتے ہیں یا نئے عہد نامے میں نِجات دہندہ کی زِندگی کی تفصیل میں سے ایسے بیانات تلاش کریں جو اِس تحریر کی تائید کرتے ہیں۔ آپ خاندان کے ہر فرد کو یِسُوع مسِیح کی اپنی گواہی لِکھنے کی بھی دعوت دے سکتے ہیں اور تحریک پانے پر اِن کو خاندان کے سامنے پڑھ سکتے ہیں۔