مُکاشفہ ۱–۱۱

مُکاشفہ کی کِتاب کو سمجھنا مشکل ہوسکتا ہے، لیکن حوصلہ شکن نہ ہوں۔ یُوحنّا کا وعدہ آپ کو کوشش جاری رکھنے کی ترغیب دے سکتا ہے: ”اِس نُبُوّت کی کِتاب کا پڑھنے والا، اور اُس کے سُننے اور سمجھنے والے اور جو کُچھ اِس میں لِکھا ہے اُس پر عمل کرنے والے مُبارک ہیں، کِیُونکہ خُداوند کے آنے کا وقت نزدِیک ہے“ (ترجمہ برائے جوزف سمتھ، مُکاشفہ ۱: ۳ [بائبل مُقدّس کے ضمیمہ میں]، تاکید شامل کی گئی ہے)۔

مُکاشفہ کا مُطالعہ کرتے ہوئے درج ذیل سوالات اور وسائل بصیرت فراہم کرسکتے ہیں۔

• یُوحنّا کون تھا؟ (دیکھیں ۱ نیفی ۱۴: ۱۸–۲۷)

• کِتاب کس طرح ترتیب دی گئی ہے، اور ہمیں کن موضوعات کو تلاش کرنے کی ضرورت ہے؟

• مُکاشفہ میں درج علامتیں کن چِیزوں کی نمائندگی کرتی ہیں؟ (دیکھیں عقائد اور عہود ۷۷؛ نئے عہد نامہ کی تدریسی کتاب برائے طالب علم [کتابچہ برائے کلیسیائی تعلیمی نظام، ۲۰۱۴]، ۵۲۵–۶۸۔)

جب آپ مُکاشفہ کی کتاب کا مُطالعہ شروع کرتے ہیں، تو سوچیں کہ آپ جو چِیزیں پڑھتے ہیں وہ کیسے آسمانی باپ کے اپنے بچّوں کی نِجات اور اُن کی سرفرازی کے منصوبے سے متعلق آپ کے علم سے ہم آہنگ ہوتی ہیں۔ آپ میری اِنجیل کا پرچار کرو (صفحات ۴۷–۵۹) میں نِجات کے منصوبے کا جائزہ لینے سے شروع کرسکتے ہیں۔ پھر، جب آپ یُوحنّا کی رویا کے بارے میں پڑھتے ہیں، تو اپنے آپ سے یہ سوالات پوچھیں: میں مُکاشفہ سے اُس کے پاس واپس لوٹنے میں میری مدد کرنے کے لیے آسمانی باپ کے کاموں کے بارے کون سی سَچّائیاں سیکھتا ہوں؟ یہ کِتاب میرے لیے خُدا کے منصوبے کو سمجھنے میں میری کِس طرح مدد کرسکتی ہے؟

اِس سے آپ کو یہ جاننے میں مدد مل سکتی ہے کہ عام طور پر:

• باب ۱۲ کا بیشتر حصّہ قبل از فانی زِندگی کے واقعات سے متعلق ہے۔

• ابواب ۶–۱۱، ۱۳–۱۴، ۱۶–۱۹ میں فانی زِندگی اور زمِین کی تاریخ کے واقعات کو بیان کیا گیا ہے۔

• ابواب ۲–۳، ۱۵، ۲۰–۲۲ حتمی عدالت اور دینداروں کی منتظر ابدی بادشاہت کی وضاحت کرتے ہیں۔

مُکاشفہ ۲–۳ میں نِجات دہندہ کے اِلفاظ منکشف کرتے ہیں کہ وہ یُوحنّا کے ایّام میں کلیسیا کی ہر شاخ کی انفرادی کامیابیوں اور جدوجہد کو سمجھتا تھا۔ اُس نے متعدد اجتماعوں میں مُقدّسین کو یقین دلایا کہ وہ دُوسری چِیزوں کے علاوہ، اُن کے ”کاموں،“ ”مُصِیبتوں،“ ”غرِیبی،“ اور ”محبّت“ سے بھی واقف تھا (مکاشفہ ۲:۲، ۹، ۱۹)—بمع بہتری کے کچھ طریقوں کے۔

یہ ابواب آپ کو یاد دلاتے ہیں کہ نِجات دہندہ آپ کی طاقتوں اور کمزوریوں کو سمجھتا ہے اور اپنی زمِینی چنوتیوں پر غالب آنے میں آپ کی مدد کرنا چاہتا ہے۔ یِسُوع مسِیح نے غالب آنے والوں سے کیا وعدہ کِیا ہے؟ آپ اپنی چنوتیوں پر غالب آنے کے لیے کون سی تبدیلیوں کا اِلہام پاتے ہیں؟

اگرچہ آپ کو یہ یاد نہیں ہے، آپ اُن واقعات کا حصّہ تھے جن کا بیان مُکاشفہ ۵ میں کیا گیا ہے۔ جب آپ اِن واقعات کے بارے میں پڑھتے ہیں، تو اِس بات پر غور کریں کہ کیسا محسوس ہوا ہوگا کہ یِسُوع مسِیح (”برّہ“) آسمانی باپ کے منصوبے کو ممکن بنائے گا (جو اِس کِتاب کو کھولنے اور اُس کی مُہریں توڑنے کے لائِق ہے)۔ صرف یِسُوع مسِیح ہی اَیسا کیوں کرسکتا تھا؟ آپ اپنے نِجات دہندہ کے طور پر اُس پر اپنے اعتماد کو کیسے ظاہر کرسکتے ہیں؟

مزید دیکھیں ایّوب ۳۸: ۴–۷۔

مُکاشفہ ۶–۱۱ میں ایسے واقعات بیان کیے گئے ہیں جو زمِین کے مادّی وجود کے دوران پیش آئیں گے (دیکھیں عقائد اور عہود ۷۷: ۶)، بشمول آخری ایّام میں بحالی کے (دیکھیں مُکاشفہ ۷)۔ جب آپ یُوحنّا کی جانب سے پیشتر سے بیان کردہ واقعات کے بارے میں پڑھتے ہیں اور اُن کو رفتہ رفتہ ظاہر ہوتا ہوا دیکھتے ہیں تو، اپنے آپ کو اور اپنے خاندان کو آمدِ ثانی کے لیے بہتر طور پر تیار کرنے کے لیے آپ کیا اِلہام پاتے ہیں؟

فرض کریں کہ یُوحنّا کو آپ کے گھر والوں کو بھی ایک پیغام دینے کا کہا گیا ہے جیسا کہ اُس نے اپنے دور میں کلیسیاؤں کو دیا تھا۔ وہ کِس چِیز کی تعریف کرے گا؟ آپ کی اصلاح کیسے ہوسکتی ہے؟

نِجات دہندہ کی تصویر دیکھائیں جس میں وہ دروازے پر کھڑا ہُؤا کھٹکھٹاتا ہے (اِس خاکہ کے ساتھ منسلک تصویر دیکھیں)۔ اپنے خاندان کو مُکاشفہ ۳: ۲۰ پڑھنے اور درج ذیل سوالات پر تبادلہ خیال کرنے کی دعوت دیں: یِسُوع اندر آنے کی بجائے صرف دروازے پر کھڑا کیوں کھٹکھٹاتا ہے؟ ہم اپنے گھر میں اُس کے اچھّے اثر کو کیسے دعوت دے سکتے ہیں؟

یہ آیات ہمیں اِس بارے میں کیا تعلیم دے سکتی ہیں کہ ہم ہَیکل کی رسوم کے لیے کیوں سفید لباس پہنتے ہیں؟