මතෙව් 28; මාර්ක් 16; ලූක් 24; යොහාන් 20–21

මෙම ඡේදවල, මානව වර්ගයාගේ ඉතිහාසයේ වැදගත්ම සිදුවීමක් වන යේසුස් ක්‍රිස්තුස්වහන්සේගේ නැවත නැගිටීම ගැන ඔබ කියවනු ඇත. ඔබ කියවන විට, නැවත නැගිටීම අවට සිදුවීම් දුටු මිනිසුන් වෙනුවට ඔබව එතැන තබන්න. මෙම සාක්ෂිකරුවන්ට කෙසේ හැඟෙන්නට ඇත්ද? ඔබ ගැලවුම්කරුවාණන්ගේ නැවත නැගිටීම ගැන කියවන විට ඔබට හැඟෙන්නේ කෙසේද? එය ඔබට ජීවිතය පිළිබඳ ඔබේ දැක්මට, අන් අය සමග ඔබේ සබඳතා වලට, ක්‍රිස්තුස්වහන්සේ කෙරෙහි ඇති ඔබේ විශ්වාසයට සහ අනෙකුත් ශුභාරංචි සත්‍යයන් කෙරෙහි ඇති ඔබේ විශ්වාසයට—බලපා ඇති ආකාරය සලකා බලන්න.

තවත් බලන්න Bible Dictionary, “Resurrection”; “Resurrection,” Gospel Topics, topics.ChurchofJesusChrist.org.

නැවත නැගිටි ගැලවුම්කරුවාණන් මුණගැසුණු සංචාරක ගෝලයන් දෙදෙනාගේ අත්දැකීම් ඔබගේ අනුගාමික මාවතට සමාන්තර විය හැකිය. මෙම වාර්තාව සහ ක්‍රිස්තුස්වහන්සේගේ අනුගාමිකයෙකු ලෙස ඔබගේ අත්දැකීම් අතර ඔබ දකින සම්බන්ධතා මොනවාද? අද ඔබ උන්වහන්සේ සමග ගමන්කර තව ටික වේලාවක් “රැඳී සිටීමට” උන්වහන්සේට ආරාධනා කරන්නේ කෙසේද? (ලූක් 24:29). ඔබගේ ජීවිතයේ උන්වහන්සේගේ පැමිණීම ඔබ හඳුනාගන්නේ කෙසේද? ශුද්ධාත්මයාණන්වහන්සේ යේසුස් ක්‍රිස්තුස්වහන්සේගේ දේවත්වය පිළිබඳව ඔබට සාක්ෂි දී ඇත්තේ කිනම් ආකාර වලින්ද?

නැවත නැගිටි ස්වාමින්වහන්සේ මරියා මග්දලේනාට පෙනීසිටීම හා පසුව උන්වහන්සේගේ ගෝලයන් සමග කළ අන්තර්ක්‍රියා තුළින්, යේසුස්වහන්සේගේ නැවත නැගිටීම වචනානුසාරයෙන් හා භෞතිකව සිදුවූ බව අපට දැනගත හැකිය. උන්වහන්සේගේ නැවත නැගිටි, මහිමාන්විත ශරීරය සමග, උන්වහන්සේ තම අනුගාමිකයන් සමග ඇවිදිමින්, කථාකරමින්, අනුභව කළ සේක. යේසුස් ක්‍රිස්තුස්වහන්සේට මාංශ හා අස්ථි සහිත ශරීරයක් ඇති බව වෙනත් ශුද්ධලියවිලි වලද සාක්ෂි දරයි: පිලිප්පි 3:20–21; 3 නෙපි 11:13–15; දහම සහ ගිවිසුම 110:2–3; 130:1, 22.

භෞතික සාක්ෂි දැකීමෙන් තොරව යමක් සත්‍ය යැයි විශ්වාස කිරීම දුෂ්කර විය හැකිය. “බැලුවොත් මිස, නැත්නම් විශ්වාස නොකරමියි” (යොහාන් 20:25) පැවසූ තෝමස් මෙන් ඔබට සමහරවිට හැඟෙන්නට පුළුවන. ඊට ප්‍රතිචාර වශයෙන්, ගැළවුම්කරුවාණන් තෝමස්ට මෙසේ පැවසුවේය, “නුදුටු නුමුත් විශ්වාසකළාවූ අය ආශිර්වාදලද්දෝය” (යොහාන් 20:29). ඔබට නොපෙනෙන අධ්‍යාත්මික දේ විශ්වාස කිරීම නිසා ඔබ ආශිර්වාද ලබාඇත්තේ කෙසේද? ඔබට ගැලවුම්කරුවාණන්ව නොපෙනෙන විට පවා උන්වහන්සේ කෙරෙහි විශ්වාසයක් තබාගැනීමට උපකාරවත් වන්නේ මොනවාද? භෞතික සාක්ෂි නොමැතිව වුවද ඔබ විශ්වාස කරන වෙනත් සත්‍යයන් මොනවාද? ඔබ “නොපෙනෙන නමුත්, සත්‍යය වන දේ” කෙරෙහි ඔබේ ඇදහිල්ල තවදුරටත් ශක්තිමත් කරන්නේ කෙසේද?? (ඇල්මා 32:21; තවත් බලන්න ඊතර් 12:6). යේසුස් ක්‍රිස්තුස්වහන්සේව විශ්වාස කිරීමට ඔබට උපකාරවත් වූ අත්දැකීම් දිනපොතක පටිගත කිරීම සලකා බලන්න, නැතහොත් ඒවා ඔබ දන්නා කෙනෙකු සමග බෙදාගන්න.

ගැලවුම්කරුවාණන් යොහාන් 21 හි තම ප්‍රේරිතයන් සමග කළ අන්තර් ක්‍රියාකාරිත්වය, ලූක් 5:1–11 හි වාර්තා කර ඇති උන්වහන්සේ ඔවුන්ගේ දැල් දමන්නට පළමුව කළ ආඥාව හා සමග සන්සන්දනය කිරීම සිත්ගන්නාසුළු විය හැකිය. ඔබ සොයාගන්නා සමානකම් හා වෙනස්කම් මොනවාද? අනුගාමිකත්වය පිළිබඳව ඔබ සොයාගන්නා අවබෝධයන් මොනවාද?

ගැලවුම්කරුවාණන් යොහාන් 21:15–17 හි පේත්‍රැස්ට පැවසූ වචන ඔබට අදාළවන්නේ කෙසේදැයි සලකා බලන්න. ස්වාමින්වහන්සේගේ බැටළුවන්ට දේවසේවය කිරීමෙන් ඔබව වළක්වන කිසියම් යමක් තිබේද? “ඔබ මට ප්‍රේම කරන්නේද” කියා ස්වාමින්වහන්සේ ඔබෙන් ඇසුවොත් ඔබේ ප්‍රතිචාරය කුමක් වේද? ස්වාමින්වහන්සේ කෙරෙහි ඔබේ ප්‍රේමය පෙන්විය හැකි ආකාරය ගැන මෙනෙහි කරන්න.

තවත් බලන්න Jeffrey R. Holland, “The First Great Commandment,” Ensign or Liahona, Nov. 2012, 83–85.

“උන්වහන්සේ මෙහි නැත, උන්වහන්සේ මරණයෙන් නැවත නැගිට ඇත” යන වචන මෙතෙක් කථා කර ඇති වඩාත්ම බලාපොරොත්තු සහගත හා වැදගත් වචන සමහරක් වන්නේ ඇයි?

ඔබේ පවුලේ අය මෙම පරිච්ඡේද කියවන විට, සෑම කථාවකම යේසුස්වහන්සේ සමග කටයුතු කළ අය කෙරෙහි අවධානය යොමුකරන්න. උදාහරණයක් ලෙස, එක් අවස්ථාවකදී ඔබට ගැලවුම්කරුවාණන්ගේ සොහොන බැලීමට ගිය අය කෙරෙහි අවධානය යොමුකළ හැකිය. තවත් අවස්ථාවක, ඔබට එමාඕස් වෙත යන මාර්ගයේ ප්‍රේරිතවරුන්ගේ හෝ ගෝලයන්ගේ ක්‍රියා හොඳින් අධ්‍යයනය කළ හැකිය.

පවුලක් වශයෙන්, ක්‍රිස්තුස්වහන්සේ තම ප්‍රේරිතයන්ගෙන් ඉල්ලා සිටි කාර්යය ගැන සාකච්ඡා කරන්න. මෙම කාර්යය ඉටුකිරීමට අපට උදව් කළ හැක්කේ කෙසේද? උන්වහන්සේගේ අරමුණු ඉෂ්ට කිරීමට ඔබට උදව් වීමට “ස්වාමින්වහන්සේ [ඔබ සමග] වැඩ කරයි” කියා ඔබට හැඟුණු කාලයක් බෙදාගැනීමට ඔබට හැකිද? (මාර්ක් 16:20).

එකට ආහාර ගැනීමේදී මෙම පද කියවීම සලකා බලන්න. ගැලවුම්කරුවාණන්ගේ “මගේ බැටළුවන් පෝෂණය කරන්න” යන වචන වලට මෙය යම් අර්ථයක් එක් කළ හැකිය. අලුත් ගිවිසුමේ බැටළුවන් ගැන යේසුස්වහන්සේ ඉගැන්වූ දේ පදනම් කරගෙන (උදාහරණයක් ලෙස මතෙව් 9:35–36; 10:5–6; 25:31–46; ලූක් 15 4–7; යොහාන් 10:1–16 බලන්න), බැටළුවන් පෝෂණය කිරීම දෙවියන්වහන්සේගේ දරුවන් පෝෂණය කිරීම හා රැකබලාගැනීම සඳහා හොඳ රූපකයක් වන්නේ ඇයි? ස්වර්ගික පියාණන්වහන්සේට සහ යේසුස්වහන්සේට අප ගැන හැඟෙන ආකාරය ගැන මෙම රූපකය උගන්වන්නේ කුමක්ද?