ඇල්මා 13–16

දෙවියන්වහන්සේගේ මිදීමේ සැලැස්ම ගැන ඇල්මා 12 හි, ඇල්මා ඉගැන්වූ බව ඔබට මතක ඇති (ඇල්මා 12: 24–27 බලන්න). 13 වන පරිච්ඡේදයේ, “මේ දේවල් ජනයාට ඉගැන්වීමට” දෙවියන්වහන්සේ විසින් නියම කරන ලද පූජකයන් ගැන ඔහු කතා කළේය (ඇල්මා 13:1). ඇල්මාගේ වචන පූජකත්වය පිළිබඳ බොහෝ ප්‍රබල සත්‍යයන් හෙළිකරයි. සමහරවිට ඔබට ඇල්මා 13:1–9 හි එක් පදයකට අවම වශයෙන් එක් සත්‍යයක්වත් හඳුනාගැනීමට උත්සාහ කළ හැකිය. ඔබට ආරම්භ කිරීම සඳහා අදහස් කිහිපයක් මෙන්න:

1 වන පදය.පූජකත්වය “[දෙවියන්වහන්සේගේ] පුත්‍රයාණන්ගේ නියෝගය” ලෙසද හැඳින්වේ (දහම සහ ගිවිසුම 107:1-4 බලන්න).

2 වන පදය.මිදීම සඳහා තම පුත්‍රයාණන් දෙස බැලීමට මිනිසුන්ට උපකාර කිරීමට දෙවියන්වහන්සේ පූජකයන්ව පත්කරයි.

3 වන පදය.පූජකත්වය දරන්නන් ඔවුන්ගේ වගකීම් සඳහා “ලෝකයේ අත්තිවාරමේ සිට” සූදානම් විය.

ඔබ සොයාගත් වෙනත් දේ මොනවාද? මෙම සත්‍යයන් ගැන මෙනෙහි කරන විට පූජකත්වය ගැන ඔබට හැඟෙන්නේ කෙසේද? මිදීම සඳහා ක්‍රිස්තුස්වහන්සේ දෙස බැලීමට පූජකත්ව වත්පිළිවෙත් ඔබට උපකාර කර ඇත්තේ කෙසේද?

අම්මොනිහාහි බොහෝ දෙනෙක් නෙහෝර්ගේ අනුගාමිකයන් වීම සිත්ගන්නා කරුණකි (ඇල්මා 14:18; 15:15 බලන්න). නෙහෝර්ගේ ආකාරයේ පූජකවරු (ඇල්මා 1:3–6 බලන්න) ඇල්මා විස්තර කළ “දෙවියන්වහන්සේගේ පුත්‍රයාණන්ගේ ආකාරයට” (දහම සහ ගිවිසුම 107:3) වෙන්කළ පූජකයන්ට වඩා වෙනස් වූයේ කෙසේද? (ඇල්මා 13:1–19 බලන්න).

තවත් බලන්න ඩාලේ ජී. රෙන්ලන්ඩ්, “පූජකත්වය සහ ගැලවුම්කරුවාණන්ගේ වන්දිගෙවීමේ බලය,” එන්සයින් හෝ ලියහෝනා, නොවැ. 2017, 64-67.

ඇල්මා 13:3 හි ඇල්මාගේ ඉගැන්වීම් විශේෂයෙන් සඳහන් කරන්නේ පූජකත්වය දරන්නන්ටය. කෙසේවෙතත්, ඔහු ඉගැන්වූ මූලධර්මය—පුද්ගලයන්ට පැවරුම් ලැබී ඒවා “ලෝකයේ අත්තිවාරමේ සිට” ඉටුකිරීමට සූදානම් වීම—අප සැමට අදාළ වේ. සභාපති ස්පෙන්සර් ඩබ්. කිම්බල් මෙසේ පැවසීය. “අප මෙහි පැමිණීමට පෙර ලෝකයේ විශ්වාසවන්ත කාන්තාවන්ට යම් යම් පැවරුම් ලබාදී ඇති අතර විශ්වාසවන්ත පිරිමින්ට ඇතැම් පූජකත්ව කාර්යයන් සඳහා කලින්ම නියම කර තිබුණි. අපට දැන් තොරතුරු මතක නැති අතර, මෙය අප වරක් එකඟ වූ දෙයෙහි මහිමාන්විත යථාර්ථය වෙනස් නොකරයි. ” (Teachings of Presidents of the Church: Spencer W. Kimball [2006], 215–16; තවත් බලන්න දහම සහ ගිවිසුම 138:55–56).

ඔවුන්ගේ විශ්වාසයන් නිසා දුක්විඳ මියගිය ධර්මිෂ්ට මිනිසුන් ගැන ඇල්මා 14 හි සඳහන් වේ. ධර්මිෂ්ටව ජීවත්වීමට උත්සාහ කරන මිනිසුන්ට බොහෝ භයානක දේ සිදුවන්නේ මන්දැයි, අනෙකුත් බොහෝදෙනා මෙන්, ඔබත් සිතනවා විය හැකිය. ඇල්මා 14 හි මෙම අසීරු ප්‍රශ්නයට සියලු පිළිතුරු ඔබ සොයානොගනු ඇත, නමුත් ඇල්මා සහ අමුලෙක් ඔවුන් මුහුණ දුන් තත්වයන්ට ප්‍රතිචාර දැක්වූ ආකාරයෙන් බොහෝ දේ ඉගෙනගත හැකිය. ස්වාමින්වහන්සේ සමහරවිට ධර්මිෂ්ට මිනිසුන්ට දුක්විඳීමට ඉඩදෙන්නේ මන්ද යන්න පිළිබඳව ඔවුන්ගේ වචන හා ක්‍රියාවන් ඔබට උගන්වන්නේ කුමක්ද? හිංසා පීඩා වලට මුහුණදීම ගැන ඔබ ඔවුන්ගෙන් ඉගෙනගන්නේ කුමක්ද?

තවත් බලන්න මතෙව් 5:43–44; මාර්ක් 14:55–65; රෝම 8:35–39; 1 පේත්‍රැස් 4:12–14; දහම සහ ගිවිසුම 122:5–9.

සුභාරංචිය වැළඳගැනීම සඳහා අමුලෙක් අතහැරදැමූ දේවල් ලැයිස්තුවක් සෑදීම සිත්ගන්නා සුළු විය හැකිය (ඇල්මා 10:4–5; 15:16 බලන්න) සහ ඔහු ලබාගත් දේ ඇති ලැයිස්තුවක් සමග එය සංසන්දනය කරන්න (ඇල්මා 15:18; 16:13–15; 34:8 බලන්න). වඩාත් විශ්වාසවන්ත අනුගාමිකයෙකු වීමට ඔබ කැපකිරීමට කැමති කුමක්ද?

ඇල්මා 13 හි “විශ්‍රාමය” යන වචනය දිස්වන සෑම අවස්ථාවකම සටහන් කිරීමෙන් ඔබේ පවුලට ප්‍රයෝජන ගත හැකිය. එය සමග දිස්වන වෙනත් වචන සහ අදහස් මොනවාද? “ස්වාමින්ගේ විශ්‍රාමය” යන්නෙන් අදහස් කරන්නේ කුමක්ද යන්න තේරුම්ගැනීමට මෙය අපට උපකාර කරන්නේ කෙසේද? ශාරීරික විවේකයට වඩා එය වෙනස් වන්නේ කෙසේද?

මෙම පද වලින් උගන්වන දේ ඔබේ පවුලේ අයට දෘශ්‍යමාන කිරීමට උපකාර කිරීම සඳහා, සමහරවිට ඔබට සුදු ඇඳුම් වැනි යමක් එකට සේදිය හැකිය. අපිරිසිදු වූ විට අපට හැඟෙන්නේ කෙසේද? අප නැවත පිරිසිඳු වූ විට අපට හැඟෙන්නේ කෙසේද? ගැලවුම්කරුවාණන්ගේ වන්දිගෙවීම තුළින් අප පව් කොට පසුතැවිලි වී පවිත්‍ර වන විට අපට දැනෙන හැඟීම් වලට මෙම හැඟීම් සමාන වන්නේ කෙසේද?

අප වැරදි කළත්, අපව ශක්තිමත් කිරීමට සහ සුවකිරීමට ස්වාමින්වහන්සේට ඇති බලය ගැන සීස්රොම්ගේ අත්දැකීම් වලින් අප ඉගෙනගන්නේ කුමක්ද? උන්වහන්සේගේ ශක්තිය හා සුවය ලැබීමේදී පූජකත්වයට කළ හැකි කාර්යභාරය කුමක්ද?

මෙම පද කියවීමෙන් පසු, ඔබට ඇල්මා 9:4 කියවිය හැකිය. අනාගතවක්තෘවරයාගේ වචන ගැන සෝරාම්ට හැඟුණු ආකාරය අම්මොනිහාහි ජනයාට හැඟුණු ආකාරය හා සැසඳීමෙන් අප ඉගෙනගන්නේ කුමක්ද? අපගේ ජීවමාන අනාගතවක්තෘවරයාගේ වචන වලට විශ්වාසවන්තව සිටීමට අප කරන්නේ මොනවාද?