Nuh sin Ninac Pahpah—Ahkolah Tuhlihk Nuhtum an nuhke Lusen Moul Lalos ke Inkacnek in Wuhlweacng luhn God

Nephi el luti lah “muhtuhnpot kuht enenuh in ilyak kac” inkacnek in wuhlweacgn “pa auliyak ac pacptaislac ke kof” (2 Nephi 31:17). Oaru lom in kahsruh tuhlihk an in ahkolah nuhke pacptais ac ahkkweyeyucklac kuh in sang nuh selos in tu kuh ke inkacnek in wuhlweacng lalos. Orekma oaru inge muhtwacwacack ke lutiyacn luhlahlfongi ke Jisus Kraist ac auliyak. Eltahl oacyacpac sang weacng luti ke kuht ahksasucye wuhlweacng ke pacptais lasr ke kuht eis ke kuhfa luhn Leum ke kais sie wik.

Pa inge kuhtuh ma kuh in kahsrwekom: 2 Nephi 31; special issue of the Friend magazine ke pacptais; Topics and Questions, “Baptism,” Gospel Library.

• Pacl nuhkwewa kom puhlakihn ma se ma ahkfokokoye luhlahlfongi lom ke Pahpah Inkuhsrao ac Jisus Kraist, fahk nuh sin tuhlihk nuhtum an. Kahsrwelos in kahlwem kac lah luhlahlfongi pa sie ma kuh in kapwack fokokoi ac fokokoi ke lusen moul nohfohn. Meac kuhtuh ma tuhlihk nuhtum an kuh in oruh in ahkfokokoye luhlahlfongi lalos ke Kraist met liki elos pacptaislac?

• Ke tuhlihk nuhtum an orwaclah sulaclah tahfonglac, engan in sramsram ke mwe sang luhn auliyak. Ac ke kom orwaclah sie sulaclah koluk, sruhmuhn ke engan se ma tuhkuh ke kom auliyak ke ma koluk lom ke kais sie lwen. Fahkwack lah ke srihpen Jisus Kraist el kweok ac misac ke ma koluk lasr, kuht kuh in auliyak ke kais sie lwen, eis nuhnak muhnahs, ac eis kuh in eklac. Ke tuhlihk nuhtum an suk ke nuhnak muhnahs lom, nuhnak muhnahs nuh selos ke engan.

• Sruhmuhn nuh sin tuhlihk nuhtum an ke pacptais. Sang petsac elos in liye ac sruhmuhn ke ma sikyak nuh sum met. Sruhmuhn ke puhla lom, lah liyacacng wuhlweacng lom ke pacptais kahsrwe kom fuhkah in etuh Jisus Kraist yohk liki met ah, ac wuhlweacng lom tiac tui in ahkinsewowoye kom fuhkah. Kwacfe tuhlihk an in kihsensiyuhk.

• Ke pacl oasr pacptais se ke sucu lom kuh ke alu an, us tuhlihk nuhtum an in liye. Tuhkweni sramsramkihn lah meac kom ac tuhlihk nuhtum an liye ac puhla. Fin ac kuh, sramsram nuh sin sie mwet ma pacptaislac tari ac siyuhk kihsensiyuhk inge: “Fuhkah ne kom in orwaclah sulaclah se inge? Kom ahkolah fuhkah?”

• Pacl nuhkwewa kom akihlen tuhlihk nuhtum an el oruh sie ma el olwelah in oruh, kaksakuhnuhlos ke insiom kwewa. Fahk lah liyacacng olwelah uh kahsrwe kuht in ahkolah in liyacacng wuhlweacng muhtahl kuht orwaclah nuh sin God ke kuht ac pacptaislac uh. Meac kuht olwelah nuh sin God ke kuht pacptaislac uh? Meac El olwelah nuh sesr? (Liye Mosiah 18:8–10, 13.)

• Sruhmuhn lah ahkkweyeyucklac ac ekihn sie mempuhr ke Alu luhn Jisus Kraist luhn Mwet Luhlahlfongi Ke Lwen-sahflah ahkinsewowoye kom fuhkah. In mwe srihkasrak, kom tuhkuh fototoyang nuh sin Pahpah Inkuhsrao ac Jisus Kraist fuhkah ke kom kuhlwacnsuhpuh mwet sahyac ac ke mwet sahyac kuhlwacnsuhpwe kom uh? Kahsruh tuhlihk nuhtum an in nuhnkuh ke kuhtuh inkacnek in kuhlwacnsap ac ahkfokokoye mwet sahyac ekihn mempucr ke Alu uh. Oacyacpac kahsrwelos in puhla ac akihlen engan se ma tuhkuh ke elos ac kuhlwacnsap uh.

• Ke kom ac tuhlihk an tuhkweni puhlakihn sie ma muhtahl (oacna ke alu ac, ke riti ma suhmuhslah, kuh ke kuhlwacnsuhpuh sie mwet), fahk nuh selos ke puhla lom ke nguhn kuh ma kom puhlakihn. Ngihsrwe tuhlihk nuhtum an in sruhmuhn ke puhla lalos. Suhmuhslah ke kain in inkacnek ma Nguhn el kuh in sramsram nuh sin mwet, wi pac inkacnek El sramsram nuh sum sifacna. Kahsruh tuhlihk nuhtum an in akihlen ac akacrsuhi ke pacl elos puhla mokleyuck luhn Nguhn Muhtahl.

• Tuhkweni liye kuhtuh petsac ke Gospel Library collection titled “Hear Him!” Tuhkweni sramsramkihn kain in inkacnek ma mwet kuhlwacnsap luhn Leum lohng Puhsrwacl. Fahk nuh sin tuhlihk nuhtum an in sruhlwaclah sie petsac kuh orwaclah sie petsac in ahkkahlwemye lah elos lohng fuhkah puhsrwen Mwet Lahngo.

• Oruh kuhfa luhn Leum in sie ma muhtahl ac ma sikyak engan se in sucu lom an. Akacsruhi nuh sin tuhlihk nuhtum an lah kom nuhnkuh ke Jisus Kraist fuhkah ke pacl in kuhfa luhn Leum. Kahsruh tuhlihk nuhtum in oraclah plwacn in ahkkahlwemye lah kuhfa luhn Leum muhtahl selos. In mwe srihkasrak, porongo kahs ke pruhe ke kuhfa luhn Leum kuh in ahkacsmakihnye kuht ke wuhlweacng lasr ke kuht pacptaislac.

• Puhkantwen puk ke Kawuck mackuhsin ma nein artikuhl, sramsram, ac ma in orek in kahsruh tuhlihk an in ahkolah nuhke pacptais ac ahkkweyeyucklac. Sang tuhlihk an in sulaclah kuhtuh in wi kom riti. (Liye pac the collection “Preparing for Baptism” in the children’s section of the Gospel Library.)

Pristut pa kuh ac wal luhn God suc El orekmakihn in ahkinsewowoye tuhlihk Nahtuhl. Pristut luhn God oasr fin facluh misenge ke Alu luhn Jisus Kraist luhn Mwet Luhlahlfongi ke Lwen Sahflah. “Mempucr nuhkwewa suc liyacacng wuhlweacng lalos—muhtwacn, mukul, ac tuhlihk—elos ahkinsewowoyeyuck ke kuh luhn pristut luhn God lun lohm selos in ahkfokokoyaclos sifacna ac sucu lalos” (General Handbook: Serving in The Church of Jesus Christ of Latter-day Saints, 3.6, Gospel Library). Kuh se inge ac kahsruh mempucr in oruh orekma in molwelah luhn God ac moul ma pahtpaht ke moul lalos sifacna ac sucu lalos (liye General Handbook, 2.2).

Ke mukul ac muhtwacn uh kuhlwacnsap ke kunohkohn ke Alu uh, elos oruh ke wal luhn pristut, ye kolyuck luhn elos suc sruok ki luhn pristut. Tulihk nuhkwewa nuhtin Pahpah Inkuhsrao—tuhlihk mukul ac tuhlihk muhtwacn Nahtuhl—fah ahkinsewowoyeyuck ke elos kahlwemwack ke pristut Lal.

Kuht eis akwuck muhtahl ke wal luhn pristut. “Mukul ke Alu uh ma suwohs elos eis wal luhn pristut ke fihliyac fin paho nuhke ohfohs luhn pristut” (General Handbook, 3.4). Elos suc sruok ohfohs luhn pristut kuh in kolyuck sin sie suc sruok ki luhn pristut in oruh akwuck luhn pristut.

In lotwelah yohk ke pristut, liye Russell M. Nelson, “Spiritual Treasures,” Liahona, Nov. 2019, 76–79; Russell M. Nelson, “The Price of Priesthood Power,” Liahona, May 2016, 66–69; “Priesthood Principles,” chapter 3 in General Handbook.

• Oruh akwuck luhn pristut in ma kwacna sikyak se ke moul luhn sucu lom an. Kahsruh tuhlihk nuhtum an in ahkolah nuhke kuhfa luhn Leum ke kais sie wik. Ahkkweye tuhlihk nuhtum an in suk ke mwe insewowo luhn pristut ke elos mas kuh enenuh ahkkweyeyuck kuh kolyuck. Oruh in ma kom pahlah kac se in akihlen inkacnek Leum el ahkinsewowoye sucu lom ke kuh Lal.

• Ke kom tuhkweni riti ma suhmuhslah uh, suk ke pacl wowo in sramsramkihn lah God El ahkinsewowoye mwet uh ke kuh Lal fuhkah. Sruhmuhn ke ma kom puhlakihn sifacna ke God el ahkinsewowoye kom ke pristut Lal. In mwe srihkasrak nuhke mwe insewowo kuht eis sin God ke pristut, liye General Handbook, 3.2, 3.5.

• Luti tuhlihk nuhtum an lah tukun pacptais, elos kuh in eis kuh luhn God ke elos liyacacng wuhlweacng lalos ke elos pacptaislac ah. Tuhkweni riti mwe fahkwack lal President Russell M. Nelson “Spiritual Treasures” (Liahona, Nov. 2019, 76–79). Sruhmuhn nuh sin tuhlihk nuhtum an lah akwuck luhn pristut use fuhkah kuh luhn God nuhke moul lom an. Nuhke kuhtuh inkacnek ma kuht insewowo ke kuh luhn God, liye General Handbook, 3.5.

• Sramsramkihn kihsensiyuhk soko “Meac mwet kuhlwacnsap se luhn Leum el oacna?” Tuhkweni riti Doctrine and Covenants 121:36–42, ac suk ke kuhtuh top nuhkac. Pacl nuhkwewa kom akihlen tuhlihk nuhtum an (kuh siena mwet sahyac) el orekmakihn ip yohk kuh ohiyac wowo ke fuhs inge, fahk nuh selos in etuh.

• Ke kom kuh tuhlihk nuhtum an orekmakihn ki in ikacslah sruhnguhl kuh ahkoswack soko stosah, eis sie pacl an in kapsruh ki ingacn nuhke ki ma mwet kol ke pristut uh sruok. (Nuhke kalmeacn ki luhn pristut, liye General Handbook, 3.4.1). Meac ki luhn pristut “ikacslah” kuh “ahkosack” nuh sesr? Liye pac Gary E. Stevenson, “Where Are the Keys and Authority of the Priesthood?,” Liahona, May 2016, 29–32; “Where Are the Keys?” (video), Gospel Library.

  

  2:51

Tempuhl uh ipin plwacn luhn Pahpah Inkuhsrao nuh sin tuhlihk Nahtuhl. Ke lohm sin Leum, kuht orwaclah wuhlweacng muhtahl sin Pahpah Inkuhsrao ke kuht wi oruh akwuck muhtahl, suc ma inge kwewa kol nuh sin Jisus Kraist. Pahpah Inkuhsrao el use inkacnek nuh sin tuhlihk Nahtuhl nuhkwewa in oraclah wuhlweacng ac wi oruh akwuck muhtahl, wi pac mwet ma tiac eis ke ma inge ke moul se inge. Ke muhtwacwacackiyacn yac se ma tuhlihk nuhtum an eklac yac 12 lac uh, elos sun matwac fal in pacptais ac ahkkweyeyucklac lun tempuhl luhn mwet mahtuh lalos ma misac (liye pac 1 Corinthians 15:29).

• Som nuhke lohm sin Leum in fusus ke pacl kom kuh an. Sruhmuhn nuh sin tuhlihk nuhtum an lah efuh kom fahsri tempuhl ac tempuhl kahsrwe kom fuhkah in puhla fototo nuh sin Pahpah Inkuhsrao ac Jisus Kraist.

• Tuhkweni sifilpac liye ac sramsramkihn kihsensiyuck nuhke pwepuh in lwelah nuh tempuhl. Kom kuh in sokwack kihsensiyuhk inge ke pages 36–37 ke Nuhke Kuh luhn Mwet Fuhsr: Sie Mwe Kol nuhke Sulaclah Wo. Sruhmuhn nuh sin tuhlihk nuhtum an lah meac sikyak ke sirape nuhke pwepuh in lwelah nuh tempuhl. Sruhmuhn lah efuh yohk srihpac sum in oasr pwepuh in lwelah nuh tempuhl lom.

• Tuhkweni riti Malachi 4:6. Sruhmuhn lah insiom forlah fuhkah nuh sin mwet mahtuh lowos ma misac tari. Lotwelah ke mwet mahtuh lom ke kom oruh tahk sucu lom ke FamilySearch.org. Suk mwet mahtuh lom ma enenuh in pacptaislac ac ahkkweyeyucklac. Mwet kahsruh ke tempuhl ac family history kuh in kahsrwe kom.

• Tuhkweni liye kuhtuh mwe kahsruh ke collection se inge “Temple” in the children’s section of the Gospel Library. (Liye pac “Preparing Your Child for Temple Baptisms and Confirmations” ke ChurchofJesusChrist.org.)

Mwe insewowo luhn patriarch kuh in sie mwe kolyuck, ahkkweye, ac mokleyuck. Oasr kac mwe kahsruh nuh sesr sifacna sinl Pahpah Inkuhsrao me ac kahsrwe kuht in kahlwem kac lah suc kuht uh ac meac srihpac lasr fin facluh. Kahsruh tuhlihk nuhtum an in eis mwe insewowo luhn patriarch ke kom lotwelos ke yohk srihpaciyac ac muhtahliyacn mwe insewowo luhn patriarch.

In lotwelah pac kuhtuh kac, liye Topics and Questions, “Patriarchal Blessings,” Gospel Library.

• Sruhmuhn nuh sin tuhlihk nuhtum an puhla lom ke kom eis mwe insewowo luhn patriarch. Kom kuh in sruhmuhn ke ma kom oruh in ahkolah in eis mwe insewowo luhn patriarch, ac kahsrwe kom fuhkah in fototoyang nuh sin God, ac El tahfwelah fuhkah in kol kom ke mwe insewowo se inge. Kom kuh pac in fahk nuh sin tuhlihk nuhtum an in sramsram nuh sin sucu sahyac lowos ma eis tari mwe insewowo luhn patriarch.

• Tuhkweni riti mwe fahkwack lal Elder Randall K. Bennett “Your Patriarchal Blessing—Inspired Direction from Heavenly Father” ac mwe fahkwack Elder Kazuhiko Yamashita “When to Receive Your Patriarchal Blessing” (Liahona, Mei 2023, 42–43, 88–90). Akacsruhi nuh sin sie sin sie lah meac kom lotwelah ke mwe fahkwack inge lah efuh Pahpah Inkuhsrao el kena kuht in eis mwe insewowo luhn patriarch. In lotwelah ke ma enenuh in orek in eis ke mwe insewowo luhn patriarch, liye General Handbook, 18.17.

• Fin oasr mwet mahtuh lom eis tari mwe insewowo luhn patriarch, ac wo in riti kuhtuh nuh sin tuhlihk nuhtum an. In ngihsrwe ke mwe insewowo luhn mwet mahtuh lom ma misac tari, som nuhke ChurchofJesusChrist.org, tanyac Tools an luhng ke lacyot an, ac sulaclah Mwe Insewowo luhn Patriarch.

• Tukun tuhlihk nuhtum an eis mwe insewowo luhn patriarch lalos, suli oacna sie sucu ma oasr ke pacl sacn in suhmuhslah ke puhla lalos ac sruhmuhn nuh sin tuhlihk nuhtum an.

God el kena use mwe sang muhtahl, kuh ahkinsewowoye, tuhlihk Nahtuhl nuhkwewa ke “kuh tuhkuh luhng me” (Doctrine and Covenants 95:8). Kuht som nuhke tempuhl in eis mwe sang muhtahl lasr ke pacl se fanna, tuhsruhk wuhlweacng kuht orwaclah yurin God ac kuh luhn nguhn El use nuh sesr oacna ke sie ip ke mwe sang muhtahl kuh in ahkinsewowoye kuht ke lwen nuhkwewa in moul lasr.

• Sruhpuhsrwack sie petsac ke tempuhl ah lun lohm sum an. Sruhmuhn nuh sin tuhlihk nuhtum an ke puhla lom ke kom oasr lun lohm sin Leum. Sruhmuhn in fusus ke luhngse lom nuh sin Leum ac lohm Sel ac ke wuhlweacng kom orwaclah we. Suk ke pacl wo lom in som nuhke tempuhl wi tuhlihk nuhtum an in oruh pacptais ac ahkkweyeyucklac lnuh sin mwet mahtuh somlah lalos.

• Tuhkweni liye temples.ChurchofJesusChrist.org . Riti ke ma inge “About the Temple Endowment” ac “Prepare for the House of the Lord.” Lwelah tuhlihk nuhtum an in siyuhk kuhtwena kihsensiyuhk ma oasr selos ke tempuhl uh. Nuhke mwe kahsruh ke ma kom kuh sruhmuhn ke kom oasr lihkihn tempuhl, liye mwe fahkwack lal Elder David A. Bednar “Prepared to Obtain Every Needful Thing” (Liahona, Mei 2019, 101–4; liye pac “Home-Centered and Church-Supported Learning and Temple Preparation”).

• Ke kom ac tuhlihk nuhtum an wi oruh akwuck muhtahl sahyac (kain se ke kuhfa luhn Leum kuh mwe insewowo ke onwelah), eis pacl lom in sramsramkihn akucl ke akwuck inge. Meac akucl inge luhmweyuck nuhkac? Akucl inge fahkwack fuhkah kacl Jisus Kraist? Ma se inge kuh in kahsruh tuhlihk nuhtum an in motko kalmen akucl ke akwuck luhn tempuhl, ma oacyacpac fahkwack ke Jisus Kraist.

• Kahsruh tuhlihk nuhtum an in akihlen lah elos liyacacng fuhkah wuhlweacng ke pacptais lalos ke Mosiah 18:10, 13 (liye pac fuhs 8–9, ma ahkuhtweyac ke fukun wuhlweacng sacn). Oacyacpac kahsruh tuhlihk nuhtum an in akihlen lah Leum el ahkinsewowoyaclos fuhkah. Muhsaheack luhlahlfongi luhn tuhlihk nuhtum an ke kuhiyaclos in liyacacng wuhlweacng lalos.

• Sramsram lwemtuhlwacack ac fusus lah wuhlweacng lom lun temmpuhl kol kom ke sulaclah lom ac kahsrwe kom fuhkah in fototoyang nuh sin Jisus Kraist. Kom kuh in orekmakihn General Handbook, 27.2, in sifilpac liye wuhlweacng kuht orwaclah lun tempuhl. Kom fin eis tari mwe sang muhtahl lom, sruhmuhn nuh sin tuhlihk nuhtum an lah karmacn kahsrwekom fuhkah in esam wuhlweacng lom nuh sin Jisus Kraist (liye “Sacred Temple Clothing” [video], Gospel Library; Anette J. Dennis, “Put Ye On the Lord Jesus Christ,” Liahona, Mei 2024, 10–13).

  

  4:12

Elder David A. Bednar el luti: “Ma se ma yohk srihpac emet kom kuh in oruh in ahkolah nuhke pahng lom nuhke misin pa in ekihn sie misineri met liki na kom som nuhke misin lom. … Elyah an pa in tiac som nuhke sie misin; tuhsruhk, elyah an pa in ekihn sie misineri ac kuhlwacnsap ke lusen moul lom ke insiom, kuh lom, nuhnak lom, ac kuhiyom kwewa. Kom ahkoo nuhke kuhlwacnsap ke misin ke lusen moul lom” (“Becoming a Missionary,” Liahona, Nov. 2005, 45–46). Ma tuhlihk nuhtum puhlakihn ke el ekihn sie misineri fah ahkinsewowoyaclos ne tok, ac tiac ke puhluhn pacl se na ma elos kuhlwacnsap ke misin lalos.

In lotwelah kuhtuh pac, liye Russell M. Nelson, “Preaching the Gospel of Peace,” Liahona, May 2022, 6–7; Gary E. Stevenson, “Love, Share, Invite,” Liahona, May 2022, 84–87; “Adjusting to Missionary Life,” Gospel Library.

• Ahkkahlwemye lah elos ac akacsruhi fuhkah ke wosasuc. Acsmak pacl nuhkwewa nuhke pacl wowo in akacsruhi nuh sin mwet sahyac ke puhla lom kacl Pahpah Inkuhsrao ac Mwet Lahngo ac ke mwe insewowo kom eis liki wosasuc ma sifilpac fohlohkyak ac ke kom ekihn sie mempucr ke Alu Lal. Suli mwet sahyac in wi sucu lom an nuhke Alu- ac toeni luhn sucu.

• Suk pacl wowo luhn sucu lom an in wi misineri an. Suli misineri in luti kawuck lom, kuh lwelah nuh selos in luti mwet in lohm sum an. Siyuhk sin misineri an ke ma elos puhlakihn ac kuhlwwacnsap lalos ke misin lalos kahsrwelos fuhkah in fototoyang nuh sin Jisus Kraist. Oacyacpac siyuhk lah meac elos oruh (kuh kena tuh elos in orwaclah) in ahkolah in ekihn misineri.

• Fin kom kuhlwacnsap ke misin, sruhmuhn ke puhla lom kac. Kuh suli kawuck kuh sucu lom ma kuhlwacnsap ke misin in sruhmuhn. Kom kuh pac in sramsramkihn inkacnek kom orekmakihn in akacsruhi ke wosasuc nuh sin mwet sahyac in moul lom. Kahsruh tuhlihk nuhtum an in nuhnkuh ke kuhtuh ohiyac ma eltahl kuh in oruh in akacsruhi ke wosasuc uh.

• Sang nuh sin tuhlihk nuhtum an pacl wo in luti sucu lom an ke ip yohk ke wosasuc. Tuhlihk nuhtum an kuh pac in practis in akacsruhi ke luhlahlfongi lalos sin mwet sahyac. Kom kuh in sramsramkihn kihsensiyuhk inge “Kuht ac tuhkahkuhnlah fuhkah Puk luhn Mormon nuh sin sie mwet ma sonna lohng kac?” kuh “Kuht ac ahkuhtweyac fuhkah enenuh luhn Mwet Lahngo nuh sin sie suc tiac sie mwet Christian?” (Liye Ahmad S. Corbitt, “Do You Know Why I as a Christian Believe in Jesus Christ?,” Liahona, Mei 2023, 119–21.)

• Kahsruh tuhlihk nuhtum an in puhla wo ke sramsram nuh sin mwet uh. Meac kuhtuh inkacnek wowo in sang sramtweack sie sramsram? Ahkkweye tuhlihk nuhtum an in lotwelah lah elos ac lohng fuhkah ke ma mwet sahyac fahk, kahlwem ke ma oan insiaclos, ac akacsruhi ke ma pwacye ke wosasuc ma kuh in ahkinsewowoye moul lalos.

• Suk pacl wowo luhn tuhlihk nuhtum an in lotwelah ke facsin ac luhlahlfongi sahyac. Kahsrwelos in akihlen ac ahkfuhlwactye woiyac ac mwe luti pwacye ke luhlahlfongi sahyac.

Lun tempuhl ah, mukul tuhmac ac muhtwacn kiac kuh in macruhtlac nuh tok ma pahtpaht. Ma se inge sikyak ke akwuck se pahngpahng “sil lun tempuhl.” Finne akwuck se inge kuh in yac puhs fah mukul kuh muhtwacn nuhtum eis, ma srihsrihk ma kom tuhkweni oruh ke lusen yac ingacn kuh in kahsrwelos in ahkolah nuhke mwe insewowo wolacna se inge.

• Tuhkweni riti “Suc: Sie Mwe Fahkwack nuh fin Facluh” (Gospel Library). Meac mwe fahkwack se inge luti ke engan ke moul luhn sucu ac ke pahyuck wowo? Yurin tuhlihk an, sulaclah sie sin ip yohk ma sihmlac ke mwe fahkwack se inge in lutlutkihn. Kom kuh in liye ma suhmuhnslah ma kuhpahsr nuhke ip yohk sacn ke Guide to the Scriptures. Kom kuh pac in orwaclah finsrak lom in orekmakihn ip yohk sacn ke sucu lom an. Ke kom orekma nuhke finsrak lom an, tuhkweni sramsramkihn lah meac wo sikyak ke moul luhn sucu lom ke kowos moulkihn ip yohk se inge.

• Riti nuh sin tuhlihk nuhtum an mwe fahkwack lal Dieter F. Uchtdorf “In Praise of Those Who Save” (Liahona, Mei 2016, 77–80). Ke kom som nuhke “A Society of Disposables,” kom kuh in suk ke ma lun lohm sum ma kuh in sisilac ac ma sahyac ma tiac. Sramsramkihn lah kom karihngihn ma uh fuhkah ke kom luhngse eltahl in oan paht uh. Meac ma se inge fahkwack ke ohiyac fuhkah kuht enenuh in oruh in karihngihn pahyuhk lasr ac inmahsrlon sucu uh? Meac pac kuht lotwelah ke mwe fahkwack lal Prestuhn Uchtdorf ke Mwet Lahngo el kahsrwe kuht in muhsahelah pahyuhk fokoko ac sucu fokoko?

• Sramsramkihn nuh sin tuhlihk nuhtum an ke ma kom ac muhtwacn kuh mukul tomom an lotwelah in fihlyac pahyuhk lowos ke inkacnek luhn Kraist ac inkacnek kom srihke in ahkwoyelah. Fin kom ac muhtacn kiom kuh mukul tomom sil lun tempuhl tari, ahkkahlwemye nuh sin tuhlihk nuhtum an in mwe srihkasrak lah kom srihke fuhkah in liyacacng wuhlweacng lom yurin Leum. Sruhmuhn nuh sin tuhlihk nuhtum an lah kom srihke in oruh tuh Pahpah Inkuhsrao ac Jisus Kraist in an infulwen inmahsrlomtacl ac Eltahl kahsrwe kom fuhkah (liye pac Ulisses Soares, “In Partnership with the Lord,” Liahona, Nov. 2022, 42–45).

• Ke sulaclah luhn sucu enenuh in oreklac, suli mwet in sucu in toeni ac sramsram. Oruh nuhnak luhn mwet nuhkwewa in sucu an in yohk srihpac ac lohnyuck sin mwet nuhkwewa. Orekmakihn sramsram inge oacna pacl wowo se in ahkkahlwemye sramsram wowo ac kuhlwacng inmahsrlon sucu, finne nohfohn tiac nuhnak se fanna. (Liye M. Russell Ballard, “Family Councils,” Liahona, May 2016, 63–65.)

• Ke pacl tiac insese ac fuhs sikyak in sucu an, ahkkahlwemye muhtweng ac luhngse. Kahsruh tuhlihk nuhtum an in liye lah ahkwoyelah fuhs ke ohiyac luhn Kraist kuh in kahsrwelos fuhkah nuhke sie pahyuck engan. Tuhkweni riti Doctrine and Covenants 121:41–42, ac sramsramkihn lah ip yohk ke fuhs inge kuh in orekmakihnyuckyuck nuhke pahyuck uh fuhkah.