Ren Sam me In—Amwonata Noumi Semirit ngeni eu Unusen Manau won An Kot Anen Pwon mi pin

Nifai a aiti kich pwe “ewe asamen ewe tit minne [sipwe] tonong non iei aier me papatais ren konik” (2 Nifai 31:17). Om achocho ne anisi noum kewe semirit ne monneta ngeni papatais me kapunguno a tongeni apochokureno won ewe aan. Ekkei achocho a poputa ren osukun usun nuku non Jises Kraist me aier. Ra pwan pachenong osukun ren ifa usun sia asofosefani ach pwonen papatais ren ach angei ewe sakrament iteiten ran.

Ikkei ekkoch aninis ra tongeni anisuk: 2 Nifai 31; auchean tappin ewe Friend magazine usun papatais; Topics and Questions, “Baptism,” Gospel Library.

• Inet chok mi wor mettoch a fis ewe a apochokuna om nuku non Samach won Nang me Jises Kraist, aporousa ngeni noum we semirit. Anisir repwe weweiti pwe nuku och mettoch mi tongeni marita ne pochokununo me pochokununo non unusen manau. Met ekkoch mettoch noum we semirit a tongeni fori ne apochokunano nuku non Kraist me mwen repwe papatais?

• Nupwen noum we semirit a finata och mettoch mi muan, kapas pwapwa usun ewe niffangen aier. Me nupwen ka finata och mettoch mi muan, aporousa ewe pwapwa minne a fis nupwen ka aier seni om kewe tipis iteiten ran. Pwarata pwe pokiten Jises Kraist a riaffou me mano fan iten ach tipis, sia tongeni aier iteiten ran, musono, me angei ewe manaman ne siwin. Nupwen noum we semirit a kutta om omusomus, fangafangoch me non pwapwa.

• Ureni noum we semirit usun papatais. Pwari ekkoch sasing me aporousa met om chechemeni. Kapas ren ifa usun en mi mefi, ifa usun om apwonueta om pwonen papatais a anisuk om kopwe sineochu Jises Kraist, me ifa usun om pwon mi pin a soposopono ne efeiochu manauom. Pesei noum we semirit ne eis kapaseis.

• Nupwen mi wor eu papatais non om famini ika non om we wart, uwei noum we semirit epwe katon. Kapas fengen usun met en me noum we semirit oua kuna me mefi. Ika mi tufich, kapas ngeni ewe aramas a papatais me eis kapaseis usun ekkei: “Ifa usun ka fori ei pungun finata? Ifa usun ka amonneta?”

• Inet chok ka apareni noum we semirit a fori och mettoch ra pwonei repwe fori, awora ennetin om mwar. Affata pwe ach apwonueta pwon a anisi kich ne mwonneta ne apwonueta pwon mi pin sia fori nupwen sia papatais. Met sia pwonei ngeni Kot nupwen sia papatais? Met I a pwonei ngeni kich? (Nengeni Mosaia 18:8–10, 13.)

• Kapas ren ifa usun om kapunguno me winiti emon chon Ewe Mwichefenin Jises Kraist ren Aramas mi Pin non Fansoun Soponon a fen efeiochuk. Ren awewe, ifa usun ka fen arap ngeni Samach won Nang me Jises Kraist nupwen ka angang ngeni ekkoch me nupwen ekkoch ra angang ngonuk? Anisi noum we semirit epwe ekieki usun ekkoch anen an epwe angang me apochokuna ekkoch usun emon chon ewe Mwichefen. Pwan anisir repwe mefi me esinna ewe pwapwa a feito seni ach angang ngeni ekkoch.

• Nupwen en me noum we semirit a fis ngeni kemi och mettoch mi pin (usun me non fan, nupwen oua anneani ekkewe pukefel, ika nupwen oua angang ngeni ekkoch), urenir usun ewe memmefin ngun ika ourour oua mefi. Etiwa noum we semirit epwe aporousa ifa usun met ka mefi. Esinna ekkewe sokopaten anen ewe Nun a kapas ngeni aramas, mi pachenong anen An kapas ngonuk won winikapom. Anisi noum we semirit epwe eisnna me aporousa ngonuk ekkoch fansoun nupwen repwe fen mefi ewe amemefin ewe Ngun mi Fel.

• Katon fengen ekkoch me nein ekkewe fitio non ewe kinikin Nenien puken Kapas Allim itenapan “Rongorong I!” Kapas fengen usun ekkewe sokofesenin anen noun ewe Samon chon angang ra rong Mongungun. Etiwa noum we semirit epwe chungani echo sasing ika fori echo fitio usun ar rong mongungun ewe Chon Amanau.

• Fori ewe sakrament epwe och mettoch mi pin me apwapwa non om famini. Aporousa ngeni noum we semirit ifa usun anonga om ekiek won Jises Kraist fansoun sakrament. Anisi noum we semirit epwe fori eu kokkot ne pwarano pwe ewe sakrament mi pin ngenir. Ren awewe, ausening ngeni ekkewe kapasen ekkewe iotekin sakrament a tongeni achema kich usun ach pwonen papatais.

• Chommong tettenin ewe Friend magazine mi pachenong ekkoch toropwe, tutunap, me urumot an epwe anisi semirit repwe monneta ngeni papatais me kapunguno. Mut ngeni noum we semirit epwe fini ekkoch an epwe annea me pwapwaiti reom. (Nengeni pwan ewe kinikin “Monneta ngeni Papatais” non ewe kinikin an semirit non ewe Nenien puken Kapas Allim.)

Ewe pristut ina ewe mumutan me manamanen Kot minne I a efeiochu Noun semirit ren. An Kot pristut mi nom won ewe fonufan ikenai non Ewe Mwichefenin Jises Kraist ren Aramas mi Pin non Fansoun Soponon. “Meinisin chon Mwichefen kewe ir mi apwonueta ar kewe pwon mi pin—fefin, mwan, me semirit—ra feioch ren an Kot manamanen pristut non imwer ne apochokuner pwisin me ar famini” (Pukenapen Emwen: Angang non Ewe Mwichefenin Jises Kraist ren Aramas mi Pin Non Fansoun Soponon, 3.6, Gospel Library). Ei manaman epwe anisi memper ne fori an Kot angangen amanau me manau tekia non pwisin manauer me ar famini (nengeni Pukenapen Emwen, 2.2).

Nupwen mwan me fefin ra angang non wisen Mwichefen, ra fori fiti ewe mumutan pristut, fan emwenien ekkewe mi omochu kiien pristut. Meinisin noun Samach won Nang semirit—Noun at me Noun nengin—repwe feioch nupwen ra weweochuti An pristut.

Sia angei angangepin seni ewe mumutan ewe pristut. “Ekkewe mwan chon ei Mwichefen mi nimenimoch ra angei mumutan ewe pristut ren ar ra ewis ngenir wiser me seikita ngeni kewe wis non ewe pristut” (Pukenapen Emwen, 3.4). Ekkewe ir mi omochu wisen pristut ra tongeni mumuta me ren emon mi omochu kiien pristut ne fori angangepinen pristut.

Om kopwe kaeo pwan ekkoch usun pristut, nengeni Russell M. Nelson, “Ekkewe Feiochun Ngun,” Liahona, Nov. 2019, 76–79; Russell M. Nelson, “The Price of Priesthood Power,” Liahona, May 2016, 66–69; “Priesthood Principles,” sopwun 3 in Pukenapen Emwen.

• Fori angangepinen pristut epwe och mettoch mi chok fifis non manauen om famini. Ren awewe, anisi noum we semirit epwe monneta non pekin ngun ngeni ewe sakrament iteiten wik. Pesei noum we semirit epwe kutta feiochun pristut nupwen ra semwen ika a namot ngenir ourur me emwen. Fori epwe eu oreni ne affatau ekkewe anen an ewe Samon efeiochu om famini seni An manaman.

• Nupwen oua annea fengen, katon ekkoch tufich ne aporousa ifa usun Kot a efeiochu aramas seni An manaman. Aporousa pwisin met mi fis ngonuk nupwen Kot a efeiochuk seni ren An manaman. Ren awewen ekkoch feioch sia angei seni Kot me ren ewe pristut, nengeni Pukenapen Emwen, 3.2, 3.5.

• Ureni noum we semirit pwe mwirin papatais, ra tongeni angei an Kot manaman ren ar apwonueta ewe pwonen papatais. Atona sefan fengen an Preseten Russell M. Nelson we porous “Ekkewe Feiochun Ngun” (Liahona, Nov. 2019, 76–79). Ureni noum we semirit ifa usun angangepinen pristut a fen wato an Kot manaman non manauom. Ren eu tettenin ekkoch ekkewe aan sia feioch me ren an Kot manaman, nengeni Pukenapen Emwen, 3.5.

• Aporous won ewe kapaseis “Met usun nikinikin emon chon angangen ewe Samon?” Anneani fengen Doctrine and Covenants 121:36–42, me kutta ponuwan kewe. Inet chok ka esinna noum we semirit (ika pwan emon) a aea eu me nein ekkewe nongonong ika nikinik non ekkei uwokisin, itinieu.

• Nupwen en me noum we semirit oua aea kii ne suki eu asam ika amanaua efoh taraku, awora och fansoun ne anonno fengeni ekkena kii ngeni ekkewe kii minne souemwenin pristut ra amochu. (Ren eu awewen kiien pristut, nengeni Pukenapen Emwen, 3.4.1). Met kiien pristut ra “suki” ika “poputani” ngeni kich? Nengeni pwan Gary E. Stevenson, “Ikefan ekkewe Kii me Mumutan ewe Pristut?,” Liahona, May 2016, 29–32; “Where Are the Keys?” (video), Gospel Library.

  

  2:51

Tempel ir eu kinikinin an Samach won Nang kokkot fan iten Noun semirit. Non imwen ewe Samon, sia fori pwon mi pin ren Samach won Nang nupwen sia fiti angangepin, meinisin ra iti ngeni Jises Kraist. Samach won Nang a fen awora eu aan ngeni meinisin Noun semirit ar repwe fori pwon mi pin me fiti angangepin, mi pachenong aramas kewe rese angeir me non ei manau. Nepoputan ewe ier noum we semirit a tori 12 ier, ra watte ar repwe papatais me kapunguno non ewe tempel fan iten neuo mi mano (nengeni pwan 1 Corinthian 15:29).

• Feino ngeni ewe imwen ewe Samon non chommong fansoun nonnomum mi mutatat. Kapas ngeni noum we semirit usun pwata ka feino me ifa usun ewe tempel a anisuk om kopwe mefi arap ngeni Samach won Nang me Jises Kraist.

• Atona sefani me aporous fengen usun ekkewe kapaseisen toropwen mumuta ne tonong non tempel. Ka tongeni kuner won peich 36– 36 ren Ren ewe Pochokunen Sarafo: Ew Emwen ren Omw Kopwe Finata Mettoch. Kapas ngeni noum we semirit usun met a fis non eu interfiun taropwen mumuta ne tonong non tempel. Aporousa pwata an wor eu toropwen mumuta ne tonong non tempel a auchea ngonuk.

• Annea fengeni Malachi 4:6. Kapas ren ifa usun netipom a tongeni kun ngeni om kewe neuo. Kaeo pwan ekkoch usun om kewe neuo ren om nenengeni om we uruon famini fengen won FamilySearch.org. Kutta om neuo ekkewe mi namot repwe papatais me kapunguno. Emon chon ourouren tempel non wart me uruon famini a tongeni anisuk.

• Atona sefani fengen ekkoch me nein ekkewe pekin aninis non ewe kinikin itenapan “Tempel” non ewe kinikin an semirit non ewe Nenien puken Kapas Allim. (Nengeni pwan “Preparing Your Child for Temple Baptisms and Confirmations” won ChurchofJesusChrist.org.)

Eu efeiochun petriark a tongeni epwe eu pekin emwen, ourur, me ourour. Mi masoweni ourour ngeni kich pwisin seni Samach won Nang me anisi kich ne weweiti pwisin nonnomuch me ach popun. Anisi noum we semirit ne monneta an epwe angei eu efeiochun petriark ren om aitir ewe auchean me pinin wesewesen efeiochun petriark.

Om kopwe kaeo pwan ekkoch, nengeni Topics and Questions, “Patriarchal Blessings,” Gospel Library.

• Aporousa ngeni noum semirit met mi fis ngonuk om we angei eu efeiochun petriark. Ka tongeni aporousa mettoch ren ifa usun ka monneta ne angei, ifa usun an anisuk kopwe arap ngeni Kot, me ifa usun I a sopweno ne emwenuk me non ei efeioch. Ka pwan tongeni tingorei noum we semirit ne kapas ngeni ekkoch chochon famini kewe ra fen angei ar efeiochun petriark.

• Atona sefani an Elter Randall K. Bennett porous “Your Patriarchal Blessing—Inspired Direction from Heavenly Father” me an Elter Kazuhiko Yamashita porous “When to Receive Your Patriarchal Blessing” (Liahona, May 2023, 42–43, 88–90). Aporousa fengeni met oua kaeo seni ekkei porous usun pwata Samach won Nang a mochen kich sipwe angei eu efeiochun petriark. Om kopwe kaeo ewe angangen om kopwe angei eu efeiochun petriark nengeni Pukenapen Emwen, 18.17.

• Ika mi wor om neuo kewe ra angei ar efeiochun petriark, menin epwe murino ne anneani ekkoch me neir ngeni noum we semirit. Om kopwe tingor ekkewe efeiochun om kewe neuo ra fen mano, saininong non ChurchofJesusChrist.org, tiki Tools asachikin peniemwanin ewe minen katon, me fini Patriarchal Blessing.

• Mwirin noum we semirit a angei eu efeiochun petriark, etiwa ekkoch chon ewe famini ekkewe ir mi nom ar repwe rekotuni ar memmef me aporouser ngeni noum we semirit.

Kot a mochen endow, ika efeiochu, meinisin Noun semirit ren “manaman seni won tekia (Doctrine and Covenants 95:8). Sia no ngeni ewe tempel ach sipwe angei ach pwisin endowment fan eu chok, nge ekkewe pwon mi pin sia fori ren Kot me ewe manaman ngun I a ngeni kich pwe pekin ewe endowment a tongeni efeiochu kich iteiten ran non manauach.

• Pwari echo sasingin ewe tempel non imwom. Ureni noum semirit usun ekkewe memmef ka mefi me non imwen ewe Samon. Kopwe kakapas usun om tong fan iten ewe Samon me Imwan we me ekkewe pwon mi pin ka fen fori ikewe. Kutta tufichinin om kopwe no ngeni ewe tempel fiti noum we semirit ne fori papatais me kapunguno fan iten ar kewe neuo.

• Nenengeni temples.ChurchofJesusChrist.org fengen. Anneani ekkewe toropwe usun “Usun ewe Tempel Endowment” me “Monneta ngeni ewe Imwen ewe Samon.” Mut ngeni noum we semirit epwe kapas eis an kewe kapaseis usun ewe tempel. Ren emwen usun met ka tongeni kapas usun me nukun ewe tempel, nengeni an Elter David A. Bednar porous “Prepared to Obtain Every Needful Thing” (Liahona, May 2019, 101–4; nengeni akkaewin ewe kinikin itenapan “Home-Centered and Church-Supported Learning and Temple Preparation”).

• Nupwen en me noum we semirit oua fiti ika kuna ekkoch pwan angangepin (usun ren ewe sakrament ika eu efeiochun echikar), awora och fansoun ne porous usun ewe esisin mi pachenong non ewe angangepin. Met ekkei esisin ra tupuni? Ifa usun ra pwarata usun Jises Kraist? Ei a tongeni anisi noum we semirit epwe monneta ne ekipwichi ewe esisinen wewen angangepinen tempel, minne ra pwan pwarata usun Jises Kraist.

• Anisi noum we semirit epwe esinna ifa usun ra apwonueta ewe pwonen papatais mi awewetiw non Mosaia 18:10, 13 (nengeni pwan uwokisin 8–9, minne mi awewetiw ekkewe uwan ena pwon mi pin. Pwan anisi noum semirit epwe esinna ifa usun ewe Samon mi efeiochur. Amari an noum semirit epinukunuk non ar tufich ne apwonueta pwon mi pin.

• Kapas wenechar nge fan chommong ren ifa usun om pwonen tempel a emweni om kewe pekin finata me anisuk ne arap ngeni Jises Kraist. Ka tongeni aea Pukenapen Emwen, 27.2, ne atona sefani ekkewe pwon mi pin sia fori me non ewe tempel. Ika ka fen angei ewe endowment, ureni noum kewe semirit ifa usun ewe ufoufen tempel mi pin a anisuk ne chechemeni om kewe pwon mi pin ren Jises Kraist (nengeni “Sacred Temple Clothing” [fitio], Gospel Library; Anette J. Dennis, “Put Ye On the Lord Jesus Christ,” Liahona, May 2024, 10–13).

  

  4:12

Elter David A. Bednar a aiti kich: “Ewe akkauchean mettoch en mi tongeni fori om kopwe amonneta ngeni eu kokko ngeni angangen misin ina om kopwe winiti emon misineri me mwen kopwe non won eu misin. … Ewe auchean osukosuk pwe esap ach no won eu misin; nge fen, ach sipwe winiti misinieri me angang non unusen manauach ren unusen netipach, ach tufich, ekiek, me pochokun. … Ka amonneta ngeni eu nakatamen manauen angangen misineri” (“Becoming a Missionary,” Liahona, Nov. 2005, 45–46). Ekkewe mettoch a fis ngeni noum we semirit an winiti emon misineri epwe efeiochur feinfeino, esap chok ren ewe fansoun ra anganga eu misin.

Om kopwe kaeo pwan ekkoch, nengeni Russell M. Nelson “Afanafana ewe Kapas Allimen Kinamwe,” Liahona, May 2022, 6–7; Gary E. Stevenson, “Love, Share, Invite,” Liahona, May 2022, 84–87; “Adjusting to Missionary Life,” Gospel Library.

• Anapanapa ifa usun kopwe aporousa ewe kapas allim non chok pukutan wesewesen mwokutukut. Kopwe chok mwitir ne apareni tufich om kopwe aporousa ngeni ekkoch om memmef usun Samach won Nang me ewe Chon Amanau me ekkewe feioch ka angei seni an ewe Chon Amanau kapas allim mi niwinsefan me usun emon chon An Mwichefen. Etiwa ekkoch repwe fiti om famini non urumotun Mwichefen me famini.

• Kutta ekkewe tufich fan iten om famini ne akosos ngeni misineri. Etiwer repwe aiti chienom kewe, ika mut ngenir repwe aiti aramas non imwom we. Eisini ekkewe misineri usun ekkewe mettoch a fis ngenir me ifa usun angangen misineri a anisir ar repwe arap ngeni Jises Kraist. Pwan eis met ra fori (ika aneanei pwe ra fen fori) ne monneta ar repwe misineri.

• Ika ka fen angangen misin, kapas wenechar me fan chommong usun met mi fis ngonuk. Ika etiwa chienom ika chon om famini kewe ra angangen misin repwe kapas usun ar misin. Ka pwan tongeni kapas usun ekkoch anen om aporousa ewe kapas allim ngeni ekkoch non unusen manauom. Anisi noum we semirit epwe ekieki ekkoch anen ar repwe tongeni aporousa ewe kapas allim.

• Ngeni noum we semirit ekkoch tufich ne aiti om famini ekkewe nongonongen ewe kapas allim. Noum we semirit a pwan tongeni sossot ne aporousa ar nuku ngeni ekkoch. Ren awewe, ka tongeni aporous won kapaseis usun “Ifa usun sipwe esinei ewe Puken Mormon ngeni emon esamo rongorong usun?” ika “Ifa usun sipwe awewei ewe namoten ewe Chon Amanau ngeni emon ese nuku non Kraist?” (Nengeni Ahmad S. Corbitt, “Do You Know Why I as a Christian Believe in Jesus Christ?,” Liahona, May 2023, 119–21.)

• Anisi noum we semirit epwe mefi kinamwe an epwe porous ngeni aramas. Met ekkoch aan mi murino ach sipwe poputani eu aporous? Pesei noum we semirit an epwe kaeo ifa usun an epwe ausening ngein met ekkoch ra apasa, weweiti met mi nom non netiper, me aporousa ennetin ewe kapas allim minne mi tongeni efeiochu manauer.

• Kutta ekkewe tufich fan iten noum we semirit an epwe kaeo usun ekkoch oreni me nuku. Anisir repwe esinna me sufonuti ekkewe nongonong mi och me ennet non an ekkoch nuku.

Non ewe tempel, emon mwan me emon fefin ra tongeni pupunu ren fansoun esemuch. Ei a fis non eu angangepin itan “ewe riri fengen non tempel.” Inamo ika ei angangepin epwe fis non ekkan ier mi towaweno fan iten noum we nengin ika at, ewe kukkunun, mecheresin, mettoch ami mi chok foffori fengen fansoun ekkena ier ra tongeni anisir repwe monneta ngeni ei amwararen feioch.

• Annea fengeni “Ewe Famini: Eu Esinesin ngeni ewe Fonufan” (Gospel Library). Met ei esinesin a aiti ngeni kich usun pwapwa non manauen famini me usun murinon apupunu? Fiti noum we semirit, fini eu me nein ekkewe nongonong mi etettenitiw non ewe esinesin ami oupwe kaeo usun. Ka tongeni kutta ekkoch uwokisin mi wewengeni ena nongonong non ewe Emwen ngeni ekkewe Pukefel. Ka pwan tongeni forata ekkoch kokkot om kopwe aeaochu ena nongonong non om famini. Nupwen ka angang won om kana kokkot, aporous fengen usun ekkewe mwirimwirin om manaueni ena nongonong a fis non manauen om famini.

• Fiti noum we semirit, anneani an President Dieter F. Uchtdorf’ we porous “In Praise of Those Who Save” (Liahona, May 2016, 77–80). Inet ka tori ewe kinikin itenapan “A Society of Disposables,” ka tongeni kutta mettoch non imwom we ekkewe ir mi tongeni koturuno me mettoch rese tongeni. Kopwe porous ren ifa usun ka asokano om mwokutukut won mettoch nupwen ka mochen repwe nom non fansoun nakatam. Met ei a pwar ngeni kich ren ifa usun sipwe tumunuochu nefinen pupunu me famini? Pwan met sia kaeo seni an Preseten Uchtdorf ei porous ren ifa usun ewe Chon Amanau a tongeni anisi kich ne amari pochokunen pupunu me famini?

• Kopwe wenechar ngeni noum we semirit usun ekkewe mettoch en me punuwom we oua kaeo usun ami awora eu apupunu esemuch mi anongonong won Kraist me ekkewe anen ami achocho ne amurunonoi. Ika en me punuwom we oua fen riri fengen non ewe tempel, pwar ngeni noum we semirit ren om nenien appiru ifa usun ka achocho ne apwonueta om kewe pwon mi pin ren ewe Samon. Ureni noum ewe semirit ifa usun ka achocho ne fori pwe Samach won Nang me ewe Chon Amanau repwe nom nukanapen nefinom me ifa usun Ir ra anisuk (nengeni pwan Ulisses Soares, “Non Angangfengen fiti ewe Samon,” Liahona, Nov. 2022, 42–45).

• Nupwen pekin finata an famini a nomot epwe fis, awora an famini mwichen apungupung mi aporous. Tumunochu pwe oupwe rongorong me aucheani meinisin an chon ewe famini ekiek. Aea ekkei aporous pwe eu tufichin om kopwe anapanapa murinon aporus fengen me kirekiroch non nefinen famini, pwan mwo nupwen meinisin ra weweiti mettoch non ewe chok napanap. (Nengeni M. Russell Ballard, “Family Councils,” Liahona, May 2016, 63–65.)

• Nupwen a wor tipengaw ika osukosuk non ewe famini, pwomweni tipepos me urmoumoch. Anisi noum we semirit epwe kuna ifa usun atawei osukosuk non napanapen Kraist a tongeni anisir repwe monneta ngeni eu pwapwan pupunu. Annean fengeni Doctrine and Covenants 121: 41– 42, me kapas ren ifa usun ekkewe nongonong non ekkei uwokisin ra tongeni wewe ngeni ewe apupunu.