Ren Kinter—Ourour fan iten Fansoun Kon me an ekkewe Semirit Mwichen Afanafanen Sakrament

Ren ewe emwen me ren ewe pisop, an semirit we afanafanen mwichen sakrament a kan soun fis non ekkewe unungat maram nesoponon ewe ier. Usun ewe presetensin Kinter me souemwenin kon, angang ren ewe chon aninis non ewe pisoprik ewe a kan wisen tumunu Kinter an epwe ota ewe mwich.

Ewe mwich epwe mut ngeni ekkewe semirit repwe atoura met ir me ar famini ra fen kaeo seni ewe Testamen Noom non Imw me non Kinter, mi pachenong konun Kinter ra fen konu non ewe ier. Nupwen ka ota ewe mwich, ekieki usun ekkoch anen om kopwe tongeni anisi ewe mwicheichen fan ar repwe anonga ar ekiek won ewe Chon Amanau me An kewe afanafan.

Ekkewe fan mi kukkun chochon semirit non ir mi tongeni ekieki ekkoch aan non minne ekkewe chochon famini ra tongeni fiti ne aninis ren nour kewe semirit. Emon chon ewe pisoprik mi tongeni osopwano ewe mwich ren ekkoch mwochomwochen kapas.

Nupwen ka amonnata ewe mwich, chechemeni ekkei emwen mi tettenitiw:

• Mwonneta ne kaeo esap angeiano ewe fansoun seni klasin Kinter ika famini.

• Pisekin katon, ufouf, me pekin appio rese fich ngeni mwichen sakrament.

Nengnei Pukenapen Emwen: Angang non Ewe Mwichefenin Jises Kraist ren Aramas mi Pin non Fansoun Soponon, 12.2.1.2, Gospel Library.

5 minich (Presetensin Kinter): Iotekin nepoputan, pukefel ika nongonongn achifoua, me eu afanafan

20 minich (souemwenin kon): Fansoun kon

Ewe presetensin Kinter me souemwenin kon ra finata ekkewe konun eu me eu maram ar repwe apochokuna ekkewe nongonong ekkewe semirit ra kaeo non ar kewe klas me non imw. Eu tettenin kon mi apochokuna ekkei nongonong mi pachenong non ei puken emwen.

Nupwen ka aiti ekkewe semirit ekkewe kon, tingorer repwe aporousa met ra fen kaeo usun ekkewe porous me nongonongen annuk minne ekkewe kon ra afanafana. Tingorei ekkewe semirit repwe aporousa ar ekiek me memmef usun ekkewe ennet mi pwa non ekkewe kon.

Ewe Noun Semirit Puken Kon ina ewe nongonongen popun kon non Kinter. Kon mi fel seni ewe puken kon mi fel me ekkoch kon seni ewe Friend ir mi pwan fich ngeni, Ka pwan tongen nounou ekkoch kon seni Kon mi fen—Ren Imw mki Mwichefen. Ewe nounoun och pwan kon non Kinter epwe mumuta me ren ewe pisoprik (nengeni Pukenapen Emwen, 12.3.4).

Fansoun kon a fis an epwe anisi ekkewe semirit repwe kaeo ekkewe ennetin ewe kapas allim. Ekkewe kokkot mwirin ra tongeni peseok nupwen ka ota ekkoch anen om kopwe osukuna ekkewe nongonongen kapas allim mi pwa non kon mi fen me non konun Kinter.

Anea ekkewe uwokisin pukefel mi wewe ngeni. Ren chommong me nein ekkewe kon non Noun Semirit Puken Kon me ewe puken kon mi fel, awewr ngeni uwokisin pukefel mi wewengenir ir mi tettenitiw. Anisi ekkewe semirit repwe anneani ekkoch ekkei uwokisin, me kapas ren ifa usun ekkewe uwokisin ra wewe ngeni ewe kon. Ka pwan tongeni etettenatiw ekkoch uwokisin won ewe pap me tingorei ekkewe semirit ar repwe apponuwa fengeni ekkewe awewen ngeni eu kon ika uwokisin kon.

Amwosowa non ewe mi pon. Makkei eu uwokisin ewe kon won ewe pap fiti fitefou foun mak rese nom. Iwe mwirin eisini ekkewe semirit repwe konu ewe kon, ausening ngeni ekkewe kapas mi amwosowa non ekkewe mi pon. Nupwen ra amwosa non eu me eu mi pon, aporous fengen usun met nongonongen kapas allim ka kaeo seni ekkewe foun kapas rese nom.

Pwarata. Apasata mwochomwochen kapasen pwarata ngeni ekkewe semirit usun ennetien kapas allim mi pwa non ewe konun Kinter. Anisi ekkewe semirit repwe weweiti pwe kon ina eu anenn ar repwe tongeni apasa ar kapasen pwarata me mefi ewe Ngun.

Uta usun emon chon pwarata. Etiwa ekkewe semirit ar repwe ekkesiwin ne uta me aporousa met ra fen kaeo seni ewe kon ra konu ika ifa usun ra mefi ekkewe ennet ewe kon mi aiti kich. Eisinir ifa usun ra mefi nupwen ra konu ewe kon, me anisir repwe esinna amemefin ewe Ngun mi Fel.

Nounou sasing. Eisini ekkewe semirit repwe anisuk ne kutta ika forata ekkoch sasing repwe nonno ngeni foun kapas mi auchea ika ekkoch kapas non ewe kon. Tingorer repwe aporousa ifa usun ekkewe sasing ra wewe ngeni ewe kon me met ewe kon a aitir. Ren awewe, ka ka aitir usun ewe kon “When He Comes Again” (Noun Semirit Puken Kon, 82–83), ka tongeni onnomu fetanei ekkoch sasing non ewe rum kewe ir mi esisinata auchean kapas seni ewe kon (usun ren chon nang, snow, me fu). Eisini ekkewe semirit ar repwe ionfengeni ekkewe sasing me amochureta non tettenir nupwen oua konu fengeni ewe kon.

Aea pisekin osukun. Ka tongeni aea och mettoch ne pesei ewe aporous usun eu kon. Ren awewe, nupwen oua konu ewe kon “My Heavenly Father Loves Me” (Noun Semirit Puken Kon, 228–29), ka tongeni pwar ngeni ekkewe semirit echo sasingin mettoch usun emon machang, pungun ran, ika ponira. Ei a tongeni efisata eu aporous fengen ren ifa usun sia tongeni kuna esisinen an Samach won Nang tong unukuch.

Etiwa ar repwe aporous usun met mi fis ngenir. Anisi ekkewe semirit repwe anono fengeni ekkewe nongonong ir mi kaeo me non ewe kon ngeni met mi fis ngenir ren ekkei nongonong. Ren awewe, me mwen ami konu “I Love to See the Temple” (Noun Semirit Puken Kon, 95), ka tongeni eisini ekkewe semirit repwe eitieta pour ika ra fen kukuna eu tempel. Tingorer, nupwen ka kon, ar repwe ekieki ifa usun ra mefi nupwen ra kuna eu tempel.

Eis Kapaseis\ Mi chommong kapaseis ka tongeni eis nupwen ka kon. Ren awewe, ka tongeni eisini ekkewe semirit met ra kaeo seni eu me eu uwokisin non ewe kon. Ka pwan tongeni eisinir repwe ekieki usun ekkoch kapaseis minne ewe kon mi ponuweni. Ei mi tongeni efisata eu aporous fengen usun ekkewe ennet kich mi kaeo me non ewe kon.

Aea mecheresin mwokutukutun pau. Etiwa ekkewe semirit ar repwe ekieki usun ekkoch mecheresin mwokutukutun pau ne anisir repwe chechemeni ekkewe kapas me porousen eu kon. Ren awewe, nupwen ka konu “Search, Ponder, and Pray” (Noun Semirit Puken Kon, 109), ka tongeni tingorei ekkewe semirit ara repwe itini meser nupwen ra konu usun ekkewe pukefel, iti mokurer nupwen ra konu usun ekipwichi, me numifengeni pour nupwen ra konu usun iotek.