క్రిస్మస్

యేసు క్రీస్తు లోకములోనికి తెచ్చే ఆనందము వలన క్రిస్మస్ ఆనందకరమైన సమయంగా పేరుపొందింది. రక్షకుడు జన్మించడానికి శతాబ్దాల ముందు, పాత నిబంధన ప్రవక్తలు కూడా రాబోయే మెస్సీయ గురించి మాట్లాడినప్పుడు ఆనందాన్ని అనుభవించారు. క్రింది గద్యభాగాలలో కొన్నింటిని చదవండి మరియు రక్షకుని నియమితకార్యము కొరకు ఎదురుచూసిన వారికి అవి ఎందుకు ప్రశస్థమైయుండవచ్చో ఆలోచించండి: కీర్తనలు 35:9; యెషయా 25:8–9; 44:21–24; 51:11; జెఫన్యా 3:14–20; మోషే 5:5–11. ఈ గద్యభాగాలు మీకు ఎందుకు ప్రశస్థమైనవి? ఆనందంగా ఉండడానికి ఈ లేఖనాలు ఏ కారణాలను సూచిస్తున్నాయి?

క్రిస్మస్‌కు సంబంధించిన ఆచారాలలో అనేకము క్రీస్తుపై మన ఆసక్తిని కేంద్రీకరించడానికి మనకు సహాయపడగల చిహ్నరూపకమైన అర్థాలను కలిగియుండగలవు. ఈ సంవత్సరం మీరు పాత నిబంధనను అధ్యయనం చేసినప్పుడు, రక్షకుని గూర్చి అనేక చిహ్నములను మీరు గమనించియుండవచ్చు. క్రింద కొన్ని జాబితా చేయబడ్డాయి. వీటిని అధ్యయనం చేసి, ఆయన గురించి అవి బోధించే దానిని వ్రాయడాన్ని పరిగణించండి.

• నక్షత్రము (సంఖ్యాకాండము 24:17; మత్తయి 2:2; ప్రకటన 22:16).

• గొఱ్ఱెలకాపరి (కీర్తనలు 23; లూకా 15:4–7; యోహాను 10:11).

• గొఱ్ఱెపిల్ల (ఆదికాండము 22:8; నిర్గమకాండము 12:5; 1 పేతురు 1:18–20).

• నీరు (నిర్గమకాండము 17:1–6; యిర్మీయా 2:13; యెహెజ్కేలు 47:1–12; యోహాను 4:7–14).

• బండ (1 సమూయేలు 2:2; 2 సమూయేలు 22:2–3; కీర్తనలు 118:22–23; యెషయా 28:16; ఎఫెసీయులకు 2:20).

• శాఖ (యెషయా 11:1–2; యిర్మీయా 23:5; 33:15).

• వెలుగు (కీర్తనలు 27:1; యెషయా 9:2; 60:19; మీకా 7:8; యోహాను 8:12).

యేసు క్రీస్తును గూర్చి సాక్ష్యమిచ్చేలా లేఖనాలలో మీరు కనుగొన్న ఇతర చిహ్నములు, గద్యభాగాలు మరియు వృత్తాంతములేవి?

2 నీఫై 11:4; మోషైయ 3:14–15; మోషే 6:63 కూడా చూడండి.

యేసు క్రీస్తు అనేక భిన్నమైన పేర్లు మరియు బిరుదులచేత సూచించబడ్డారు. క్రింది వచనాలలో బిరుదుల కొరకు చూడండి: కీర్తనలు 23:1; 83:18; యెషయా 7:14; 9:6; 12:2; 63:16; ఆమోసు 4:13; జెకర్యా 14:16; మోషే 7:53. మీరు ఆలోచించగల ఇతర పేర్లు ఏవి? క్రిస్మస్ కీర్తనలలో యేసు క్రీస్తును గూర్చి మీరు కనుగొన్న బిరుదులను జాబితా చేయడాన్ని కూడా మీరు ఆనందించవచ్చు. ప్రతీ బిరుదు ఆయన గురించి మీరు ఆలోచించే విధానమును ఎలా ప్రభావితం చేస్తుంది?

రాబోయే ఏడాది పొడవునా ఆయనను గుర్తుంచుకోవడంలో మీకు సహాయపడేలా రక్షకుని యొక్క ఒక బిరుదు లేదా పాత్రను ఎంచుకోవడం గురించి ఆలోచించండి.

క్వింటిన్ ఎల్. కుక్, “కష్ట కాలములలో వ్యక్తిగత శాంతి,” లియహోనా, నవ. 2021, 89–92 కూడా చూడండి.

• యేసు క్రీస్తు గురించి సంభాషణను ప్రారంభించడానికి ఉపయోగించగలిగేలా మీరు మరియు మీ పిల్లలు కొన్ని క్రిస్మస్ అలంకరణలను కలిగి ఉండవచ్చు. క్రిస్మస్ నక్షత్రం, దీపాలు లేదా బహుమతి మనకు రక్షకుడిని ఎలా గుర్తుచేస్తాయనే దాని గురించి మీరు మాట్లాడవచ్చు. అప్పుడు మీరు యేసు క్రీస్తుకు ప్రతీకగా ఉండే వాటి కోసం క్రింది లేఖనాలలో ఒకటి లేదా అంతకంటే ఎక్కువ వాటిని చూడవచ్చు: ఆదికాండము 22:8; సంఖ్యాకాండము 24:17; కీర్తనలు 23:1; 27:1. మీ పిల్లలు ప్రతీ వచనం చదువుతున్నప్పుడు దానికి సంబంధించిన చిత్రాన్ని లేదా అలంకరణను వారు పైకెత్తి పట్టుకోవచ్చు. యేసు ఎలా ఒక గొర్రెపిల్ల, నక్షత్రం, గొర్రెలకాపరి లేదా వెలుగులా ఉన్నారు?

• మీరు యెషయా 9:6ను చదివేటప్పుడు, మీ పిల్లలు ఈ నమూనా చివర ఉన్న చిత్రాన్ని కూడా చూడవచ్చు. “ఒక శిశువు పుట్టెను” అనే వాక్యభాగాన్ని విన్నప్పుడు శిశువైన యేసును సూచించమని మీ పిల్లలను అడగండి. పాత నిబంధనలోని ప్రవక్తలకు యేసు జన్మిస్తారని తెలుసని మీ సాక్ష్యాన్ని పంచుకోండి.

• మీరు వచ్చే ఏడాది కొత్త నిబంధనలో యేసు క్రీస్తు జీవితాన్ని అధ్యయనం చేయడానికి సిద్ధమవుతున్నప్పుడు, పాత నిబంధనలో ఈ సంవత్సరం ఆయన గురించి మీ పిల్లలు నేర్చుకున్న వాటిని వారితో సమీక్షించడాన్ని పరిగణించండి. మీరు నేర్చుకున్న వాటిని గుర్తుంచుకోవడంలో మీకు సహాయపడడానికి మీరు ఈ వనరులోని నమూనా‌లను మరియు ఏదైనా వ్యక్తిగత అధ్యయన గమనికలను సమీక్షించవచ్చు. పాత నిబంధన కథలు లేదా రండి, నన్ను అనుసరించండి లోని చిత్రాలను చూడడం వలన చిన్న పిల్లలు లబ్ధి పొందవచ్చు. ఏ ప్రవచనాలు లేదా కథలు మనకు ప్రత్యేకమైనవి? రక్షకుని గురించి మనము ఏమి నేర్చుకున్నాము?

• ఇశ్రాయేలీయుల కుటుంబాలు పస్కా మరియు ఇతర విందులు వంటి సంప్రదాయాలను కలిగియున్నాయి, అవి వారి హృదయాలను మరియు మనస్సులను ప్రభువు వైపుకు తిప్పడానికి ఉద్దేశించబడ్డాయి (నిర్గమకాండము 12 చూడండి). యేసు క్రీస్తుపై దృష్టి కేంద్రీకరించడానికి మీకు సహాయపడేలా క్రిస్మస్ సమయమందు మీరు, మీ పిల్లలు కలిగియున్న సంప్రదాయాలు ఏవి? మీ కుటుంబ చరిత్ర నుండి మీకు తెలిసిన సంప్రదాయాలు ఏవి? మీరు ప్రారంభించాలనుకున్న కొన్ని సంప్రదాయాలను మీ పిల్లలతో చర్చించడాన్ని మీరు పరిగణించవచ్చు. అవసరతలో ఉన్నవారికి సేవ చేయడం, మీరు రక్షకునికి “బహుమతి”గా అందించేదాన్ని ఎంచుకోవడం, ప్రథమ అధ్యక్షత్వము యొక్క క్రిస్మస్ భక్తి సమావేశమును మీతోపాటు చూడమని ఒక స్నేహితుడిని ఆహ్వానించడం (broadcasts.ChurchofJesusChrist.org), మీ స్వంత క్రిస్మస్ పాటను వ్రాయడం లేదా క్రీస్తు పుట్టుక యొక్క సందేశాన్ని పంచుకోవడానికి ఒక సృజనాత్మక విధానమును కనుగొనడం వంటివి కొన్ని ఉపాయాలు.

• క్రీస్తు జననం యొక్క గౌరవాన్ని మరియు ఆనందాన్ని అనుభవించడానికి మీరు మీ పిల్లలకు ఎలా సహాయపడగలరు? మీరు కలిసి మత్తయి 1:18–25; 2:1–12; లూకా 1:26–38; 2:1–20 చదవవచ్చు. ప్రతీ కుటుంబ సభ్యుడు లేఖన వృత్తాంతమును నుండి ఒక వ్యక్తిని ఎంపిక చేసుకొని, రక్షకుని గురించి ఆ వ్యక్తి ఎలా భావిస్తున్నాడో పంచుకోవచ్చు. అప్పుడు మీరు ఆయన గురించి మీ స్వంత భావాలను ఒకరితో ఒకరు పంచుకోవచ్చు.

  

  17:57

• బహుశా మీరు మరియు మీ పిల్లలు మీకు ఆనందాన్ని కలిగించేలా సంవత్సరాలుగా మీరు ఇచ్చిన లేదా అందుకున్న బహుమతుల గురించి మాట్లాడవచ్చు. అప్పుడు మీరు యెషయా 25:9ని కలిసి చదివి, పరలోక తండ్రి మనకు రక్షకుడిని పంపినందుకు మీరు ఎందుకు సంతోషిస్తున్నారనే దాని గురించి మాట్లాడవచ్చు. మన రక్షకునిగా యేసు క్రీస్తు పాత్రను బాగా అర్థం చేసుకోవడానికి మీ పిల్లలకు సహాయం చేయడానికి, యెషయా 25:8–9; 53:3–5; మరియు హోషేయ 13:14 చదవమని వారిని ఆహ్వానించండి. ప్రభువు మనల్ని ఎలా రక్షిస్తారనే దాని గురించి ఈ లేఖనాలు మనకు ఏమి బోధిస్తాయి?

• మీరు కలిసి క్రిస్మస్ పాటను కూడా పాడవచ్చు. పరలోక తండ్రి మరియు యేసు క్రీస్తు వారిని ప్రేమిస్తున్నారని తెలుసుకోవడంలో సహాయపడే వాక్యభాగాలను పాటలో కనుగొనడానికి మీ పిల్లలకు సహాయపడండి.