హగ్గయి 1–2; జెకర్యా 1–4; 7–14

యెరూషలేమును తిరిగి కట్టడానికి చేయవలసిన అనేక ముఖ్యమైన విషయాలున్నాయి. కానీ సుమారుగా ఇశ్రాయేలీయులు తిరిగి వచ్చిన 15 సంవత్సరాల తరువాత, దేవాలయ పునర్నిర్మాణానికి ఎక్కువ ప్రాధాన్యత ఇవ్వబడలేదని ప్రభువుకు కోపం వచ్చింది (హగ్గయి 1:2–5; ఎజ్రా 4:24 కూడా చూడండి). మీరు హగ్గయి 1; 2:1–9ను చదివినప్పుడు, ఈ విధమైన ప్రశ్నలను పరిగణించండి:

• వారు దేవాలయమును పూర్తి చేయలేదు కనుక ఇశ్రాయేలీయులు ఎదుర్కొన్న పర్యవసానములేవి?

• వారు ఆయన మందిర నిర్మాణమును పూర్తి చేసిన యెడల ప్రభువు వాగ్దానమిచ్చిన దీవెనలేవి?

• హగ్గయి 1:5–7 లో మీ కొరకు ప్రభువు సందేశమేమిటి? మీరు మీ ప్రాధాన్యతలను ప్రభువు వాటితో ఎలా సర్దుబాటు చేయవచ్చు? మీ జీవితంలో దేవునికి మొదటి స్థానం ఇచ్చినందుకు మీరు ఎప్పుడు ఆశీర్వదించబడ్డారు?

హగ్గయి కాలంలోని ఇశ్రాయేలీయుల మాదిరిగానే ప్రారంభ కడవరి-దిన పరిశుద్ధులు‌ కూడా అదే విధమైన పరిస్థితిని ఎదుర్కొన్నారు (సిద్ధాంతము మరియు నిబంధనలు 95 చూడండి). దేవాలయాల పట్ల ప్రభువు యొక్క భావాల గురించి ఈ రెండు ఉదాహరణల నుండి మీరు ఏమి నేర్చుకుంటారు?

డేల్ జి. రెన్‌లండ్, “యేసు క్రీస్తు మనకెంతో విలువైనవారు,” లియహోనా, నవ. 2023, 96–99; టెర్రెన్స్ ఎమ్.విన్సన్, “రక్షకుని యొక్క నిజమైన శిష్యులు,” లియహోనా, నవ. 2019, 9–11 కూడా చూడండి.ChurchofJesusChrist.org

7:17

మీ అభిప్రాయం ప్రకారం, జెకర్యా 14:20లో పేర్కొన్నట్లుగా రోజువారీ వస్తువులపై “యెహోవాకు ప్రతిష్ఠితము” అని చెక్కడం యొక్క విలువ ఏమిటి? (నిర్గమకాండము 28:36–38 కూడా చూడండి). ఈ రోజు దేవాలయాలపై దానిని చెక్కడం యొక్క విలువ ఏమిటి? ఈ వాక్యభాగము మీకు ఏ అర్థాన్ని కలిగియున్నది? మీ దైనందిన జీవితంలో పరిశుద్ధతను మీరెలా భాగంగా చేసుకోగలరు? జెకర్యా 1:1–6; 3:1–7; 7:8–10; 8:16–17లో మరింత పరిశుద్ధంగా ఉండమని ప్రభువు తన జనులకు ఇచ్చిన ఆహ్వానాలను మీరు చదివేటప్పుడు ఈ ప్రశ్నలను ధ్యానించండి.

పరిశుద్ధమైన స్థితిలో ప్రభువుతో మనమందరం జీవించినప్పుడు భవిష్యత్తు దినములో జీవితం ఎలా ఉంటుందో తెలుసుకోవడానికి మీరు జెకర్యా 2:10–11; 8:1–8; 14:9–11, 20–21 కూడా చదవవచ్చు. యెరూషలేము యొక్క భవిష్యత్తు గురించి జెకర్యా దర్శనములో మిమ్మల్ని ఆకట్టుకొనేదేమిటి? మీ సమాజములో మీరు చూడాలనుకొనేలా అక్కడ మీరు ఏమి కనుగొంటారు? జెకర్యా వివరించిన పరిస్థితుల్లో జీవించడానికి మీరు ఎలా సిద్ధపడగలరు?

జెకర్యా రచనలలో అనేకము యేసు క్రీస్తు యొక్క భూలోక పరిచర్యను మరియు చివరకు ఆయన రెండవ రాకడను కూడా సూచిస్తాయి. క్రింద జెకర్యా యొక్క కొన్ని ప్రవచనాలు, వాటి నెరవేర్పు గురించిన లేఖనాలతో సహా ఉన్నాయి. మీరు ఈ గద్యభాగాలను చదువుతున్నప్పుడు, “రక్షకుని గురించి ఇది నాకు ఏమి బోధిస్తుంది?” అని మిమ్మల్ని మీరు ప్రశ్నించుకోండి.

• జెకర్యా 9:9–11 (మత్తయి 21:1–11; 1పేతురు 3:18–19 చూడండి)

• జెకర్యా 11:12–13 (మత్తయి 26:14–16; 27:1–7 చూడండి)

• జెకర్యా 12:10 (యోహాను 19:37; ప్రకటన 1:7 చూడండి)

• జెకర్యా 13:6–7; 14:1–9 (మత్తయి 26:31; సిద్ధాంతము మరియు నిబంధనలు 45:47–53 చూడండి)

జెకర్యా 9:9–11లో వివరించిన విధంగా యెరూషలేములోకి యేసును స్వాగతించే జనుల మధ్య ఉండడం ఎలా ఉండియుండవచ్చని మీరు అనుకుంటున్నారు? మీరు ఆయనను మీ జీవితంలోకి, మీ ఇళ్లలోకి మరియు మీ సమాజములోకి ఎలా స్వాగతించగలరు?

రోనాల్డ్ ఎ. రాస్బాండ్, “అత్యున్నతుడైన దేవుని నామము ధన్యమగును గాక,” లియహోనా, మే 2023, 108–12 కూడా చూడండి.

1:22

• మీరు మీ పిల్లలతో హగ్గయి 1:2–5లోని భాగాలను చదివేటప్పుడు, ప్రభువు జనుల పట్ల ఎందుకు సంతోషించలేదో తెలుసుకోవడానికి వారికి సహాయపడండి. బహుశా మీ పిల్లలు 6వ వచనము నుండి ఒక వాక్యభాగాన్ని ఎంచుకొని దాని చిత్రాన్ని గీయవచ్చు. వారు దానిని ఒకరికొకరు చూపించవచ్చు మరియు ప్రతీ చిత్రము ఏ వాక్యభాగాన్ని సూచిస్తుందో ఊహించవచ్చు. ప్రభువు కోరుకునే దానికి బదులు ఇతర విషయాలపై మనం సమయాన్ని వెచ్చించినప్పుడు, అది తినినప్పటికీ నింపబడనట్లుగా ఎలా ఉంటుంది? ప్రభువుకు ప్రాముఖ్యమైన విషయాల కోసం మీరు ఎలా సమయాన్ని వెచ్చించవచ్చో మీరు ఒకరితో ఒకరు మాట్లాడుకోవచ్చు.

• మీరు మీ పిల్లలకు 8వ వచనమును కూడా చదివి, “పర్వతములెక్కి,” “మ్రాను తీసికొని వచ్చి,” “[ప్రభువు] మందిరమును కట్టించునట్లు” నటించమని వారిని ఆహ్వానించవచ్చు. మీ పిల్లలు ప్రభువు వారిని చేయమని కోరిన వాటితో సహా, మామూలుగా ఒక రోజులో చేసే పనుల జాబితాను తయారు చేయవచ్చు. వారి జాబితాలో అత్యంత ప్రాముఖ్యమైన విషయాలుగా ప్రభువు చెప్పే వాటి చూట్టూ సున్నా చుట్టడం ద్వారా “[వారి] ప్రవర్తనను గూర్చి ఆలోచించుకొనమని” మీ పిల్లలను అడగండి.

• ఒక దర్శనంలో, జెకర్యా “మలిన వస్త్రములు ధరించి” ఉన్న ఒక ప్రధాన యాజకుడిని చూశాడు (జెకర్యా 3:3). ఒక దేవదూత అతనికి శుభ్రమైన దుస్తులు ఇచ్చాడు. జెకర్యా 3:1–7ని కలిసి చదవడం ద్వారా మరియు మురికి దుస్తులు మరియు శుభ్రమైన దుస్తులు దేనిని సూచిస్తాయో మాట్లాడడం ద్వారా ముఖ్యమైన సత్యాలను కనుగొనడంలో మీరు మీ పిల్లలకు సహాయం చేయవచ్చు. మనం బాప్తిస్మం తీసుకున్న తర్వాత కూడా మన పాపాల నుండి ఎలా శుద్ధులం అవుతాము? మన బాప్తిస్మపు నిబంధన “[ప్రభువు] మార్గాలలో నడవడానికి” మనకు ఎలా సహాయం చేస్తుంది?

• ఈ నమూనాలో ఉన్నటువంటి బాప్తిస్మపు చిత్రాన్ని మీరు మరియు మీ పిల్లలు చూడవచ్చు. మన బాప్తిస్మపు సమయంలో మనం తెల్లని దుస్తులు ఎందుకు ధరిస్తాము?

• జెకర్యా 9:9లో, యేసు తన మర్త్య జీవితంలోని చివరి వారంలో యెరూషలేములోకి వచ్చినప్పుడు ముందుగా చెప్పబడిన సంఘటనను మీ పిల్లలు ఊహించవచ్చు. దీనికి సహాయం చేయడానికి, ఈ నమూనా‌లో ఉన్నట్లుగా సంఘటన యొక్క చిత్రాన్ని వారికి చూపించండి. మీ పిల్లలు “చాలా సంతోషిస్తున్న” చిత్రాలలోని వ్యక్తులను సూచించవచ్చు. జెకర్యా 9:9లో రాజు ఎవరు? ఆయన పట్ల మనం ఎందుకు కృతజ్ఞులం?

  

  1:35

• జెకర్యా నుండి వచ్చిన ప్రవచనాలను వాటి నెరవేర్పును వివరించే క్రొత్త నిబంధన వచనాలతో పోల్చడానికి మీ పిల్లలకు సహాయం చేయడం గురించి ఆలోచించండి. ఇక్కడ కొన్ని ఉదాహరణలున్నాయి: జెకర్యా 9:9 మరియు మత్తయి 21:5–9; జెకర్యా 9:11 మరియు 1 పేతురు 3:18–19; జెకర్యా 11:12 మరియు మత్తయి 26:14–16; జెకర్యా 13:7 మరియు మత్తయి 26:31. ఈ వచనాల నుండి రక్షకుని గురించి మనమేమి నేర్చుకుంటాము?