Sau, Mulimuli Mai ia te A’u
21–27 Tesema. “Sa Tatou Faatalitali ia te Ia, o le a Ia Faaolaina Foi i Tatou”: Kerisimasi

“21--27 Tesema. ‘Sa Tatou Faatalitali ia te Ia, o le a Ia Faaolaina Foi i Tatou’: Kerisimasi,” Sau, Mulimuli Mai ia te A’u—Mo le Agia ma le Ekalesia: Feagaiga Tuai 2026 (2026)

“21–27 Tesema. ‘Sa Tatou Faatalitali ia te Ia, o le a Ia Faaolaina Foi i Tatou,’” Sau, Mulimuli Mai ia te A’u: Sau, Mulimuli Mai ia te A’u: Feagaiga Tuai 2026

pepe o Iesu o loo moe

Auā Ua Fanau Mai Mo i Tatou le Tama, saunia e Simon Dewey

21–27 Tesema: “Sa Tatou Faatalitali ia te Ia, o le a Ia Faaolaina Foi i Tatou”

Kerisimasi

O le Feagaiga Tuai o loo tauave ai se agaga o le faamoemoe naunautai. I le itu lena, e tai pei teisi lava o le vaitau o le Kerisimasi. O le amata ai ia Atamu ma Eva, o peteriaka, perofeta, fatusolo, ma tagata o le Feagaiga Tuai sa tulimata’i atu i aso lelei, e faatumulia i le faamoemoe mo faafouga ma le laveaiga a le Mesia. Ma sa manaomia soo e Isaraelu lena faamoemoe—pe sa latou i ai i le faatagataotauaina i Aikupito po o Papelonia pe na taofiofi faatagataotauaina e a latou lava agasala po o le fouvale. Ae i na mea uma, sa faamanatu atu e perofeta ia i latou, o le a oo mai se Mesia, se tasi e Laveai, “e talai le saolotoga i le tafeaga” (Isaia 61:1).

O lena faamoemoe sa amata ona faataunuuina ina ua fanau mai Iesu Keriso i Peteleema. Na fanau mai le Laveai malosi o Isaraelu i se falepovi ma sa taoto i se faatanoa vao (tagai Luka 2:7). Ae sa le na’o se Laveai o Isaraelu anamua. Sa afio mai o Ia e laveai oe—e onosaia ou tiga, e tauave ou faanoanoaga, ma ia e manu’a mo au solitulafono, ina ia mafai ona faamaloloina oe i Ona faalavalava (tagai Isaia 53:4–5). O le mafuaaga lenei e faatumulia ai le Kerisimasi i naunautaiga fiafia e oo mai lava i aso nei. Ua silia ma le 2000 tausaga talu ai na afio mai ai le Mesia. Ma o loo faaauau ona oo mai o Ia i o tatou olaga i soo se taimi tatou te sailia ai o Ia.

aikona o suesuega

Manatu mo le Aoaoina i le Aiga ma i le Ekalesia

aikona o le seminare
Ou te olioli i lo’u Togiola.

O le Kerisimasi ua lauiloa o se vaitau olioli ona o le olioli lea na aumai e Iesu Keriso i le lalolagi. O seneturi ao le’i soifua mai le Faaola, sa lagona ai foi e perofeta o le Feagaiga Tuai le olioli a o latou saunoa i le afio mai o le Mesia. Faitau nisi o fuaitau nei, ma mafaufau e uiga i le pe aisea na taua ai ia i latou o e sa tulimatai atu i le misiona a le Faaola: Salamo 35:9; Isaia 25:8–9; 44:21–24; 51:11; Sefanaia 3:14–20; Mose 5:5–11. Aisea e taua ai nei fuaitau ia te oe? O a mafuaaga ua tuuina mai e nei fuaitau o mau ina ia olioli ai?

Tagai foi i le Dallin H. Oaks, “Tala Lelei o le Olioli Tele” (faigalotu o le Kerisimasi a le Au Peresitene Sili, 4 Tes., 2022), Potutusi o le Talalelei; “Le Lalolagi ia Fiafia,” Viiga. nu. 113.

o se fetu susulu i le lagi i le po

O faailoga e mafai ona fesoasoani ou te manatua ai Iesu Keriso.

O le tele o tu ma aga e o faatasi ma le Kerisimasi e mafai ona i ai uiga faafaailoga e faasino atu ai i tatou ia Keriso. A o e suesueina le Feagaiga Tuai i lenei tausaga, atonu na e maitauina ai le tele o faailoga e uiga i le Faaola. O loo lisi atu i lalo ni nai faailoga. Mafaufau e suesue i nei fuaitau ma tusifaamaumau mea ua latou aoaoina ai oe e uiga ia te Ia.

  • Fetu (Numera 24:17; Mataio 2:2; Faaaliga 22:16).

  • Leoleo Mamoe (Salamo 23; Luka 15:4–7; Ioane 10:11)

  • Tamai Mamoe (Kenese 22:8; Esoto 12:5; 1 Peteru 1:18–20).

  • Vai (Esoto 17:1–6; Ieremia 2:13; Esekielu 47:1–12; Ioane 4:7–14).

  • Papa (1 Samuelu 2:2; 2 Samuelu 22:2–3; Salamo 118:22–23; Isaia 28:16; Efeso 2:20).

  • Lala (Isaia 11:1–2; Ieremia 23:5; 33:15).

  • Malamalama (Salamo 27:1; Isaia 9:2; 60:19; Mika 7:8; Ioane 8:12).

O a isi faailoga, fuaitau, ma tala na e maua i tusitusiga paia o molimau mai ia Iesu Keriso?

Tagai foi i le 2 Nifae 11:4; Mosaea 3:14–15; Mose 6:63; “Ituaiga po o Faatusa o Keriso” ma le “Iesu Keriso,” e i ai uma i le Taiala i Tusitusiga Paia (Potutusi o le Talalelei).

“E igoa foi o Ia o le Silisili Ese.”

E tele suafa ma faalaniga eseese ua ta’ua ai Iesu Keriso. Vaavaai mo faalaniga i fuaiupu nei: Salamo 23:1; 83:18; Isaia 7:14; 9:6; 12:2; 63:16; Amosa 4:13; Sakaria 14:16; Mose 7:53. O a isi faalaniga e mafai ona e mafaufau i ai? Atonu foi e te fiafia e lisi faalaniga o Iesu Keriso e te maua i viiga o le Kerisimasi? E faapefea e faalaniga taitasi ona faatosina ai le ala e te mafaufau ai ia te Ia?

Mafaufau e filifili se faalaniga po o se matafaioi a le Faaola o le a fesoasoani ia te oe e manatua ai o Ia i le tausaga a sau.

Tagai foi i le Quentin L. Cook, “O Le Filemu o le Tagata Lava Ia i Taimi Faigata,” Liahona, Nov. 2021, 89–92; “Sa Pepese Mai Agelu,” Viiga, nu. 119.

Mo nisi manatu, tagai i le lomiga o lenei masina i mekasini o le Liahona ma le Mo Le Malosi o le Autalavou .

aikona o le vaega a tamaiti

Fautuaga mo le Aoaoina o Tamaiti

Ua aoaoina a’u e le Feagaiga Tuai e uiga ia Iesu.

  • Atonu e te maua ma lau fanau ni teuteuga o le Kerisimasi e mafai ona e faaaogaina e amata ai se talanoaga e uiga ia Iesu Keriso. Atonu e mafai ona e talanoa e uiga i le auala e faamanatu mai ai e se fetu Kerisimasi, moli, po o se meaalofa ia i tatou le Faaola. Ona mafai lea ona e vaavaai i se tasi pe sili atu o mau nei mo se mea lea e mafai ona faatusa ia Iesu Keriso: Kenese 22:8; Numera 24:17; Salamo 23:1; 27:1. Atonu e mafai e lau fanau ona u’u i luga se ata po o se teuteuga lea e o faatasi ma fuaiupu taitasi a o latou faitauina. E faapefea ona pei Iesu o se tamai mamoe, fetu, leoleo mamoe, po o se malamalama? Mafaufau e usu faatasi se pese Kerisimasi, e pei o le “O Fetu na Pupula” (Tusipese a Tamaiti, 24).

  • E mafai foi e lau fanau ona vaai i le ata i le faaiuga o lenei otootoga a o e faitauina atu ia i latou le Isaia 9:6 . Fai atu i lau fanau e faasino atu i le pepe o Iesu pe a latou faalogo i le fuaitau “ua fanau mai mo i tatou le tama.” Faasoa atu lau molimau faapea na silafia e perofeta o le Feagaiga Tuai o le a fanau mai Iesu.

  • Ao outou sauniuni e suesue le soifuaga o Iesu Keriso i le Feagaiga Fou i le tausaga a sau, mafaufau e toe iloilo faatasi ma lau fanau mea na latou aoaoina e uiga ia te Ia i lenei tausaga i le Feagaiga Tuai. Atonu tou te toe faamanatua ia otootooga o loo i lenei punaoa ma soo se faamatalaga o suesuega patino e fesoasoani tou te manatua ai mea na outou aoaoina. Atonu o le a aoga i tamaiti laiti le matamata i Tala o le Feagaiga Tuai po o ata o loo i le Sau, Mulimuli Mai ia te A’u. O a ni valoaga po o tala na tulagaese ia te outou? O le a se mea ua tatou aoaoina e uiga i le Faaola?

O tu ma agaifanua o le Kerisimasi e mafai ona faasino atu ia Iesu Keriso.

  • O aiga o tagata Isaraelu na i ai a latou tu ma agaifanu, e pei o le Paseka ma isi lava tausamaaga, sa faamoemoe e faasino atu ai o latou loto ma mafaufau i le Alii (tagai i le Esoto 12). O a ni au tu ma agaifanua ma lau fanau o loo i ai i le vaitau o le Kerisimasi lea e fesoasoani e te taulai atu ai ia Iesu Keriso? O a ni tu ma ni agaifanua ua e iloa mai le talafaasolopito o lou aiga? Atonu e te mafaufau e talanoa faatasi ma lau fanau ia nisi o tu ma agaifanua tou te mananao e amata. O nisi manatu e ono aofia ai le auauna atu i se tasi o manaomia le fesoasoani, filifili se mea o le a e ofoina atu o se ’meaalofa’ i le Faaola, valaaulia se uo e te lua matamata faatasi i le Faigalotu o le Kerisimasi a le Au Peresitene Sili (broadcasts.ChurchofJesusChrist.org), tusiaina o sa outou lava pese o le Kerisimasi, po o le sue o se auala fatufatuai e faasoa atu ai le savali o le soifua mai o Keriso.

I le aiga, o le aoaoina ma le ola ai e le tuueseeseina. “E fesootai vave lava le talalelei i totonu o le aiga. O iina o tagata o loo outou aoaoina le talalelei o tagata ia o le a outou ola faatasi —i aso uma. O le mea moni, o le tele o taimi, o le ola ai i le talalelei o le auala lea tatou te aoao ai le talalelei. O lea ao e aoaoina ma aoao atu le talalelei i le fale, vaavaai mo ni auala e fesootai ai mea o loo e aoaoina i mea o loo e faia. I lou aiga, ia avea le talalelei ma se mea e te taumafai e ola ai, ae le na o se mea e te talanoa ai” (Aoao Atu i le Ala a le Faaola, 31).

o se vaaiga o le Fanau Mai o Iesu

Ata o le Fanau Mai o Iesu, saunia e Ethan Brown

Na tuuina mai e le Tama Faalelagi ia te a’u le meaalofa o Lona Alo e avea ma o’u Faaola.

  • E mafai faapefea ona e fesoasoani i lau fanau ia lagona le migao ma le olioli i le soifua mai o Keriso? Atonu tou te matamata i le vitio “The Christ Child” (Potutusi o le Talalelei) pe faitau faatasi le Mataio 1:18–25; 2:1–12; Luka 1:26–38; 2:1–20. E mafai e tamaiti taitoatasi o le aiga ona filifili se tagata mai le vitio po o se tala i tusitusiga paia ma faasoa atu po o a lagona o lena tagata e uiga i le Faaola. Ona mafai lea ona tou faasoa atu i le tasi ma le isi o outou lava lagona e uiga ia te Ia.

    17:57

    The Christ Child

  • Atonu e mafai ona outou talanoa ma lau fanau e uiga i meaalofa na e tuuina atu pe mauaina i le aluga o tausaga lea na aumaia ai le olioli. Ona mafai lea ona outou faitau faatasi le Isaia 25:9 ma talanoa e uiga i le mafuaaga e te olioli ai ona sa auina mai e le Tama Faalelagi ia i tatou se Faaola. Ina ia fesoasoani i tamaiti ia sili atu ona malamalama i le matafaioi a Iesu Keriso o lo tatou Faaola, valaaulia i latou e faitau le Isaia 25:8–9; 53:3–5; ma le Hosea 13:14. O le a se mea o aoao mai e nei mau ia i tatou e uiga i le auala na faasaoina ai i tatou e le Alii?

  • E mafai foi ona outou usuina faatasi se pese Kerisimasi, e pei o le “I Se Fale o Manu” (Tusipese a Tamaiti, 42–43) po o le “Peteleema e, le Aai” (Viiga, nu. 122). Fesoasoani i lau fanau e sue fuaitau i le pese lea e fesoasoani ia i latou ia iloa ai e alofa le Tama Faalelagi ma Iesu Keriso ia i latou.

Mo nisi manatu, tagai i le lomiga o lenei masina o le mekasini o le Uo .
o se vaaiga o le Fanau Mai o Iesu

O Le Fanau Mai o Iesu, na saunia e N. C. Wyeth

Itulau o gaoioiga a le Peraimeri: Ua aoaoina a’u e le Feagaiga Tuai e uiga ia Iesu