Hakai 1–2; Sakaria 1–4; 7–14

Sa tele mea taua e fai e toe fausia ai Ierusalema. Ae ina ua mavae le tusa ma le 15 tausaga talu ona toe foi atu tagata Isaraelu, sa le fiafia ai le Alii ona sa le’i tuua le faamuamua maualuga i le fausiaina o le malumalu (tagai i le Hakai 1:2–5; tagai foi i le Esera 4:24). A o e faitauina le Hakai 1; 2:1–9, mafaufau i fesili faapenei:

• O a taunuuga na feagai ma tagata Isaraelu ona latou te lei faamae’aina le malumalu?

• O a faamanuiaga na folafola mai e le Alii ia i latou pe afai latou te faamae’aina le fauina o Lona maota?

• O le a le savali a le Alii ia te oe i le Hakai 1:5–7? E mafai faapefea ona e faaogatasia mea e te faamuamua ma mea a le Alii? O anafea na faamanuiaina ai oe mo le faamuamuaina o le Atua i lou olaga?

Sa feagai le uluai Au Paia o Aso e Gata Ai ma se tulaga faapena i tagata Isaraelu i aso o Hakai (tagai i le Mataupu Faavae ma Feagaiga 95). O le a se mea ua e aoaoina mai nei faataitaiga e lua e uiga i lagona o le Alii e uiga i malumalu?

Tagai foi i le Dale G. Renlund, “O Iesu Keriso O Le Oa,” Liahona, Nov. 2023, 96–99; Terence M. Vinson, “O Soo Moni o le Faaola,” Liahona, Nov. 2019, 9–11; “Ou Te Fia Vaai i le Malumalu,” Tusipese a Tamaiti, nu. 99; “Provo City Center Temple Completed” (vitio), ChurchofJesusChrist.org.

7:17

I lou manatu, o le a le taua o le i ai o le “E Paia ia Ieova” o loo vaneina i mea faitino o aso uma e pei o mea o loo ta’ua i le Sakaria 14:20? (tagai foi i le Esoto 28:36–38). O le a le taua o le vaneina i luga o malumalu i aso nei? O le a le uiga o lenei fuaitau ia te oe? E mafai faapefea ona avea le paia ma se vaega o lou olaga i aso taitasi? Mafaufau loloto i fesili nei a o e faitauina valaaulia a le Alii i Lona nuu ina ia paia atili i le Sakaria 1:1–6; 3:1–7; 7:8–10; 8:16–17.

E mafai foi ona e faitauina le Sakaria 2:10–11; 8:1–8; 14:9–11, 20–21 e iloa ai le mea o le a i ai le olaga i se aso i le lumanai pe a tatou mau faatasi uma ma le Alii i se tulaga o le paia. O le a se mea ua faagaeetia ai oe e uiga i le faaaliga vaaia a Sakaria i le lumanai o Ierusalema? O le a le mea ua e maua ii lea o le a e manao e vaaia i lou lotoifale? E faapefea ona e saunia ina ia e ola i tulaga ua faamatalaina e Sakaria?

O nai nisi tusitusiga a Sakaria sa faasino atu uma i le auaunaga faalelalolagi a Iesu Keriso faapea foi ma Lona Afio Mai Faalua. O loo i lalo nisi o valoaga a Sakaria, faatasi ai ma mau e faatatau i lo latou faataunuuina. A o e suesueina nei fuaitau, fesili ifo ia te oe lava, “O le a le mea o aoao mai e lenei fuaiupu e uiga i le Faaola?

• Sakaria 9:9–11 (tagai i le Mataio 21:1–11; 1 Peteru 3:18–19)

• Sakaria 11:12–13 (tagai Mataio 26:14–16; 27:1–7)

• Sakaria 12:10 (tagai Ioane 19:37; Faaaliga 1:7)

• Sakaria 13:6–7; 14:1–9 (tagai Mataio 26:31; Mataupu Faavae ma Feagaiga 45:47–53)

E te manatu e faape’i le i ai faatasi ma tagata o loo faafeiloaia Iesu i Ierusalema e pei ona faamatalaina i le Sakaria 9:9–11? E mafai faapefea ona e faafeiloaia o Ia i lou olaga, o ou aiga, ma lou nuu?

Tagai foi i le Taiala i Tusitusiga Paia, “Mesia,” Potutusi o le Talalelei; “The Lord’s Triumphal Entry into Jerusalem” (vitio), Potutusi o le Talalelei; Ronald A. Rasband, “Osana i le Atua Silisili Ese,” Liahona, Me 2023, 108–12.

1:9

• A o outou faitauina faatasi ma lau fanau ia vaega o le Hakai 1:2–5 , fesoasoani ia i latou ia iloa pe aisea na le fiafia ai le Alii i tagata. Fai i lau fanau e piki se fuaitau mai le fuaiupu 6 ma tusi se ata e uiga i ai. E mafai ona latou faaali atu i le tasi ma le isi ma mate mai po o le a le fuaitau e faatusa i ai ata taitasi. Pe a tatou faaaluina le taimi i mea e ese mai mea e finagalo i ai le Alii, e faapefea ona pei lena mea o le aai ae le maoona? E mafai ona outou talanoa i le tasi ma le isi e uiga i le auala e mafai ona outou faaavanoaina ai se taimi mo mea e taua i le Alii.

• E mafai foi ona e faitau atua le fuaiupu 8 i lau fanau, ma valaaulia i latou e faafoliga e “o ae i le mauga,” “aumaia laau,” ma “fau le fale [o le Alii].” E mafai e lau fanau ona fai se lisi o mea e latou te faia i se aso masani, e aofia ai mea na talosaga mai ai le Alii ia i latou ia faia. Fai atu i lau fanau e “mafaufau i [o latou] ala” e ala i le li’oina o mea e ono fetalai ai le Alii o mea e sili ona taua ia latou lisi.

• I se faaaliga vaaia, na vaai ai Sakaria i se faitaulaga sili o lē na ofu i ni “ofu eleelea” (Sakaria 3:3). Sa tuuina atu e se agelu ia te ia ni ofu mamā. E mafai ona e fesoasoani i lau fanau ia iloa upumoni taua e ala i le faitau faatasi o le Sakaria 3:1–7 ma talanoa e uiga i mea e ono faatusa i ai lavalava palapala ma lavalava mamā. E faapefea ona tatou mamā mai a tatou agasala, e tusa lava pe ua tatou papatiso? E faapefea ona fesoasoani a tatou feagaiga o le papatisoga ia i tatou ina ia “savali i ala a le Alii”?

• E mafai ona outou vaai ma lau fanau i se ata o se papatisoga, e pei o lea o loo i le auivi lenei. Aisea tatou te ofu paepae ai i o tatou papatisoga? E mafai foi ona e usuina se pese e uiga i le papatisoga, e pei o le “Pe A Ou Papatiso” (Tusipese a Tamaiti, 53); o le a le mea o aoao mai e le pese e uiga i le mafuaaga e finagalo ai le Alii ia tatou papatiso?

• Atonu e fia vaai faalemafaufau lau fanau i le mea na tupu na valoia i le Sakaria 9:9, ina ua afio mai Iesu i Ierusalema i le vaiaso mulimuli o Lona soifuaga faaletino. Ina ia fesoasoani i lenei mea, faaali atu ia i latou se ata o le mea na tupu, e pei o lea o loo i le auivi lenei. E mafai foi ona e faasoa atu ia i latou “Ua Alu le Faaola i Ierusalema” (i le O Tala o le Feagaiga Fou, 110–12). E mafai e lau fanau ona faasino atu i tagata o loo i ata o “ matua fiafia.” O ai le Tupu i le Sakaria 9:9? Aisea tatou te faafetai ai mo Ia?

  

  1:35

• Mafaufau e fesoasoani i lau fanau e faatusatusa valoaga mai ia Sakaria ma fuaiupu o le Feagaiga Fou o loo faamatala ai lo latou faataunuuga. O nisi nei o faataitaiga: Sakaria 9:9 ma le Mataio 21:5–9; Sakaria 9:11 ma le 1 Peteru 3:18–19; Sakaria 11:12 ma le Mataio 26:14–16; Sakaria 13:7 ma le Mataio 26:31. O a mea ua tatou aoao ai e uiga i le Faaola mai nei fuaiupu?