Kūrijm̧ōj

Kūrijm̧ōj ej bar meļeļein juon jijen ekam̧ōņōņō kōn lan̄lōn̄ eo Jisōs Kraist ej bōktok n̄an laļ in. Bukwi iiō ko m̧okta jān an kar Rilo̧mo̧o̧r ļotak, rikanaan ro an Kallim̧ur M̧okta rekar bar en̄jake lan̄lōn̄ ilo aer kar kōnono kōn itok eo an Messaia. Riiti jet iaan eoon kein rej elaajrak, im ļōmņak kōn etke ren kar lukkuun aorōk n̄an ro me rej mijeļo̧k wōt mijen eo an Rilo̧mo̧o̧r: Sam Ko 35:9; Aiseia 25:8–9; 44:21–24; 51:11; Zepanaia 3:14–20; Moses 5:5–11. Etke eoon kein raorōk n̄an eok? Ta un ko eoon kein rej letok bwe jen lan̄lōn̄?

Bar lale Dallin H. Oaks, “Good Tidings of Great Joy” (First Presidency Christmas devotional, Dec. 4, 2022), Gospel Library; “Joy to the World,” Hymns, no 201.

Elōn̄ iaan iminene ak manit ko me rej iookļo̧k Kūrijm̧ōj me emaron̄ letok kōkaļļe ko eļap meļeļeir me ej bokļok kōj n̄an Kraist. Ilo am̧ ekkatak Kallim̧ur M̧okta ilo iiō in, bolen kwomaron̄ kile jet kōkaļļe ko an Rilo̧mo̧o̧r. Jejjo iaer rej elaajrak ijin ilaļ. Ļōmņak in ekkatak men kein im rekoote ta eo kwoj katakin kōn E.

• Iju (Bōnbōn 24:17; Matu 2:2; Revelesōn 22:16).

• Seperd (Sam Ko 23; Luk 15:4–7; Jon 10:11)

• Lamb (Jenesis 22:8; Exodus 12:5; 1 Piter 1:18–20).

• Dān (Exodus 17:1–6; Jeremaia 2:13; Ezekiel 47:1–12; Jon 4:7–14).

• Dekā (1 Samuel 2:2; 2 Samuel 22:2–3; Sam Ko 118:22–23; Aiseia 28:16; Epesōs 2:20).

• Ra (Aiseia 11:1–2; Jeremaia 23:5; 33:15).

• Meram (Sam Ko 27:1; Aiseia 9:2; 60:19; Maika 7:8; Jon 8:12).

Ta kōkaļļe ko jet, eoon ko, im bwebwenato ko me kwoj loi ilo jeje ko rekwojarjar me rej kam̧ool kōn Jisōs Kraist?

Bar lale 2 Nipai 11:4; Mosaia 3:14–15; Moses 6:63; “Types or Symbols of Christ” im “Jisōs Kraist,” ilo Unin Tōl eo n̄an Jeje ko rekwojarjar

Etan Jisōs Kraist ej itok kōn elōn̄ et ko rokkotaktak im taitōļ ko. Kappukot taitōļ ko ilo eoon kein: Sam Ko 23:1; 83:18; Aiseia 7:14; 9:6; 12:2; 63:16; Amos 4:13; Zekaraia 14:16; Moses 7:53. Ta taitōļ ko jet me kwomaron̄ bar ļōmņak kaki? Kwomaron̄ bar m̧ōņōņō in kōlaajrake taitōļ ko an Jisōs Kraist me kwoj loe ilo al in jar ko an Kūrijm̧ōj. Ewi wāween an kajjojo taitōļ jelet wāween eo kwoj ļōmņak kake E?

Ļōmņak in kāālet juon taitōļ ak eddo an Rilo̧mo̧o̧r me enaaj jipan̄ eok keememej E aolepen iiō eo ej pedo tok.

Bar lale Quentin L. Cook, “Aenōm̧m̧an eo an Juon Make ilo Iien ko Reppen,” Liaona, Nob. 2021, 89–92; “Hark! The Herald Angels Sing,” Hymns, no. 209.

• Emaron̄ wōr jet am̧ im ajri ro nejum̧ kein kainōknōk in Kūrijm̧ōj kom̧ maron̄ kōjerbali n̄an ijjino juon ekōnono kōn Jisōs Kraist. Bōlen kom̧ maron̄ kōnono kōn ewi wāween an iju in Kūrijm̧ōj, ļait ko, ak juon mennin letok kakeememej kōj kōn Rilo̧mo̧o̧r. Innem komaron̄ lale juon ak elōn̄ļo̧k in eoon kein laajraki n̄an juon men me emaron̄ jutak kōn Jisōs Kraist: Jenesis 22:8; Bōnbōn 24:17; Sam Ko 23:1; 27:1. Bōlen kwe im ajri ro nejum̧ remaron̄ jibwe juon pija ak kainōknōk me ej ekkeijel ippān eoon eo ilo aer riiti. Elmen an Jisōs Kraist āinwōt juon ļaam̧, iju, ak ļait? Ļōmņak in al juon al in Kūrijm̧ōj ippān doon, āinwōt “Stars Were Gleaming” (Children’s Songbook, 37).

• Kwe im ajri ro remaron̄ bar lale juon pija ilo jem̧ļo̧kin unin tōl in ilo am̧ riiti Aiseia 9:6 n̄an er. Kajjitōk ippān ajri ro n̄an jitōn̄ nin̄nin̄ Jisōs n̄e rej ron̄ naan eo “juon ajri eļotak.” Kwaļo̧k naan in kam̧ool eo am̧ kōn rikanaan ro ilo Kallim̧ur M̧okta me rekar jeļā bwe Jisōs enaaj ļotak.

• Ilo am̧ kōppopo n̄an ekkatak mour eo an Jisōs Kraist ilo Kallim̧ur M̧okta iiō in tok, ļōmņak in etale ippān baam̧le ta eo rekar ekkatak kōn E ilo iiō in ilo Kallim̧ur M̧okta. Kwomaron̄ etali ko em̧ōj kōlaajraki ilo bok in im jabdewōt note ko jān am̧ make ekkatak n̄an jipan̄ eok keemmej ta eo kwar ekkatak kake. Ajri ro reddik remaron̄ eddōkļo̧k jān aer lale Bwebwenato ko jān Kallim̧ur M̧okta ak pija eo ilo Itok, Ļoor Eō. Ta kanaan ko ak bwebwenato ko rejenolo̧k? Ta eo jekar ekkatak kōn Rilo̧mo̧o̧r?

• Baam̧le ko an RiIsrael ro ekar wōr aer iminene ak manit, āinwōt Kwojkwoj in Kijone im bar kwojkwoj ak Kōjota ko jet, me rekar kajet buruōer im aer ļōmņak n̄an Irooj (lale Exodus12). Ta iminene ak manit eo me baam̧le eo am̧ ewōr ippāer ilo iien Kūrijm̧ōj me enaaj jipan̄ eok mije wōt Jisōs Kraist? Ta iminene ak manit ko kwoj aikuj jeļā kake jān menmenbwij eo am̧? Kwomaron̄ ļōmņak n̄an kōmeļeļe āinwōt juon baam̧le kōn jet iminene ak manit kwokōņaan jino kōm̧m̧ane. Jet ļōmņak ko remaron̄ kobaik jipan̄ juon armej kōn aikuj ko an ej karuwaineneik juon m̧ōttan n̄an alooje Nokon in Kūrijm̧ōj eo an Būreejtōnji eo Kein Kajuon ippam̧ (broadcasts.ChurchofJesusChrist.org), ej juon am̧ make al in Kūrijm̧ōj, ak kappukot wāween eo emejādik n̄an kwaļo̧k ennaan eo kōn ļotak eo an Kraist.

• Ewi wāween am̧ jipan̄ ajri ro en̄jake kautiej im lan̄lōn̄ kōn ļotak eo an Kraist? Kwomaron̄ alooje pija eo “The Christ Child” (Gospel Library) ak riit ippān doon Matu 1:18–25; 2:1–12; Luk 1:26–38; 2:1–20. Kajjojo ajri remaron̄ kālet juon armej jān pija in alooj ak bwebwenato ko ilo bok ko rekwojarjar im kwaļo̧k wāween an armej eo kar en̄jake kōn Rilo̧mo̧o̧r. Innem komaron̄ kwaļo̧k n̄an doon en̄jake ko ami kōn E.

  

  17:57

• Bōlen kwe im ajri ro maron̄ kōnono kōn mennin letok ko kar lewaj n̄an kom iiō ko m̧aantak me rekar boktok n̄an kom̧ lan̄lōn̄. Innem kom̧ maron̄ riit Aiseia 25:9 ippān doon im kōnono kōn etke kwoj lan̄lōn̄ bwe Jemedwōj Ilan̄ ear jilkintok juon Rilo̧mo̧o̧r n̄an kōj. N̄an jipan̄ ajri ro meļeļeļo̧k eddo eo an Jisōs Kraist āinwōt eo ad Rilo̧mo̧o̧r, karuwanene er n̄an riiti Aiseia 25:8–9; 53:3–5; im Hoseia 13:14. Ta eo jeje kein rekwojarjar rej katakin kōj kōn elmen an Irooj lo̧mo̧o̧ren kōj?

• Kom̧ maron̄ bar al juon al in Kūrijm̧ōj ippān doon, āinwōt “Away in a Manger” (Children’s Songbook, 42–43) ak “O Little Town of Bethlehem” (Hymns, no. 208). Jipan̄ ajri ro nejum̧ kappukot naan ko ilo al eo me ej jipan̄ er jeļā ke Jemedwōj Ilan̄ im Jisōs Kraist rej iakwe er.