“Tijem̧ba 14–20. ‘Iar Yokwe Kom̧, Irooj ej Ba’: Malakai,” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)

“Tijem̧ba 14–20. ‘Iar Yokwe Kom̧, Irooj ej Ba,’” Itok, Ļoor Eō: Kallim̧ur M̧okta 2026

Tijem̧ba 14–20: “Iar Yokwe Kom̧, Irooj ej Ba”

Malakai

“Iar yokwe kom̧,” Irooj eaar ba n̄an armej ro kōn rikanaan Malakai. Ak Riisrael ro, ro rekar en̄taan ilo epepen ko reken̄tanaan im kam̧akoko, rekar kajjitōk, “Ekōjkan Am̧ yokwe kōm?” Malakai 1:2 Ālkin aolepen men ko rIIsrael ro raar jelm̧ae, remaron̄ kar ļōmnak ippāer eļan̄n̄e bwebwenato eo aer ej lukkuun kōn iakwe eo an Anij n̄an armej in bujen ro An. Ilo jet wāween, epidodo n̄an loe āinwōt juon bwebwenato in m̧ōjno im jum̧ae an armej. Bōtaab ilo aolep men, Anij eaar jab bōjrak in erļo̧ke iakwe eo An. Ke ļōmaro nejin Jekab rekar nana aer kōm̧m̧an n̄an ļaddik eo jatier Josep, Irooj ekar lo̧mo̧o̧ren wōt er jān n̄ūta (lale Jenesis 45:4–8). Ke Israel ekar ellotaan ilo āne jam̧den, Anij ekar najidik er kōn pilawā manna (lale Exodus 16:1–4). Jekdo̧o̧n n̄e Israel ekar oktakļo̧k n̄an anij ko jet, im rekar ejepelōklōk, Anij ekar kallim̧uri er eļan̄n̄e renaaj ukweļo̧k, Enaaj aiintok im lo̧mo̧o̧ren er “kōn tūriam̧o ko re ļap ” (lale Aiseia 54:7). Ilo m̧ool, Kallim̧ur M̧okta ej juon bwebwenato in kijenmej, im iakwe eo an Anij. Im bwebwenato in ej wōnm̧aanļo̧k wōt rainin. Jisōs Kraist, “Aļ in Wānōk,” āinwōt an Malakai ņae Etan, ekar itok kōn “kemour ilo pein” (Malakai 4:2). E ej kein kam̧ool eo em̧m̧an tata kōn iakwe eo an Anij n̄an riIsrael ro etto im n̄an kōj aolep.

N̄an meļeļe ko reļļapļo̧k kōn bok in Malakai, lale “Malakai” ilo Bible Dictionary.

Ļōmņak ko n̄an Ekkatak ilo M̧weeo im ilo Kabun̄ in

Malakai 1–4

“Kom̧win Ro̧o̧l n̄an Ippa, im Inaaj ro̧o̧l n̄an kom̧.”

Ilo raan ko an Malakai, RiIsrael ro rekar kalōk tampeļ eo kadede ilo Jerusalem, ak āinwōt juon armej rekar aikuj n̄an bar kalōk jem̧jerā eo aer ippān Irooj. Ilo am̧ ekkatak jān bok in Malakai, kappukot kajjitōk ko me Irooj ekar kajjitōkin RiIsrael ro ak rekar kajjitōk Ippān. Ļōmņak in kajjitōkin eok make kōn kajjitōk kein rej āinļo̧k wōt (jet waanjon̄ak ko ijin ilaļ me kar ļōmņak kaki) n̄an jipan̄ eok etale jem̧jerā eo am̧ ippān Irooj im n̄an epaakeļo̧k E.

Ewi wāween aō kar en̄jake iakwe eo an Irooj n̄an eō? (lale Malakai 1:2).
Mennin joortak ko aō n̄an Irooj rej ke lukkuun kautiej E? (lale Malakai 1:6–11).
Ilo wāween ta ko me ij aikuj n̄an “ro̧o̧l” n̄an Irooj? (lale Malakai 3:7).
Ij ke kwo̧o̧te Anij ilo jabdewōt wāween? (lale Malakai 3:8–11).
Ewi wāween an m̧wūlū ilo iien ko reppen kwaļo̧k en̄jake ko aō n̄an Irooj? (lale Malakai 3:13–15; bar lale 2:17).

Malakai 1:6–14

Irooj ej kajjitōk kōn “joortak erreo.”

Ilo am̧ riit kōn joortak ko kōmeļeļeik ilo Malakai 1, ta eo kwoj kile kōn kaarmejet ko būrij ro raar letok? Ta ko kein katok kein rekar elmakot kōn en̄jake ko an pris ro kōn Irooj? (lale Malakai 1:13). Ļōmņak in kōm̧m̧ane juon laarakj in joortak, mennin kaarmejet, me kwoj kōm̧m̧ane n̄an Irooj. N̄an kajjojo aitam ioon laajrak eo, rej maron̄ ekōnono kōn ta eo remaron̄ in kōm̧m̧ane juon jortak “kattoon” ak juon jortak “ erreo” (Malakai 1:7,11).

Malakai 3:8–12

Irooj ear kōpeļo̧k wūntō in lan̄ ilo aō kwaļo̧k aō tōmak ilo aō kōļļā juon m̧ōttan jon̄oul.

Ļōmņak ke juon m̧ōttam̧ eo ejkab jeļā ke kwoj kōļļā juon m̧ōttan jon̄oul. “Etke kwoj kōm̧m̧ane?” eo m̧ōttam̧ ej kajjitōk. Ļōmņak kōn men in ilo am̧ riiti Malakai 3:8–12. Ta eo kwoj loe me emaron̄ jipan̄ eok uwaake kajjitōk eo an eo m̧ōttam̧? Bar eo konaaj kar kōņaan bwe eo m̧ōttam̧ en meļeļe kōn juon m̧ōttan jon̄oul? N̄an jipan̄ ko reļļapļo̧k, komaron̄ etale enaan eo an Elder Neil L. Andersen “Kōpeļļo̧k Winto ko an Lan̄” (Liaona, Nob. 2023, 32–35), kappukot uwaak ko an kajjitōk kein:

Etke Irooj ekōņaan bwe jen kōļļā juon m̧ōttan jon̄oul?
Ta eo emaron̄ dāpij juon armej jān kōļļā juon m̧ōttan jon̄oul, im ekōjkan ad anjo̧ jān mennin kapan̄pan̄ kein?
Elmen an kōļļā juon m̧ōttan jon̄oul kōkajoor tōmak eo an ilo Jemedwōj Ilan̄ im Jisōs Kraist?

Komaron̄ bar kwaļo̧k n̄an eo m̧ōttam̧ wāween an Irooj kōjeraam̧m̧an eok n̄e kwoj kōļļā juon m̧ōttan jon̄oul. Komaron̄ lo ļōmņak kein ilo jekjōn eo taitōļ eo an ej “Lesson Number 1—Significant but Subtle Blessings” ilo enaan eo an Elder David A. Bednar’ “The Windows of Heaven” (Liahona, Nov. 2013, 17–18). Kain armej rōt eo jej erom̧ jen kōļļā juon m̧ōttan jon̄oul?

Ta meļeļein naan eo “kapeļļo̧k wūnto ko an lan̄” (eoon 10) ilo am̧ ļōmņak? Bōlen komaron̄ kalimjōk nabōjļo̧k juon wūntō im ļōmņak kōn unin wūntō ko. Etke “wūntō ko an lan̄” ej juon wāween n̄an kōmeļeļeik ekōjkan an Irooj kōjeraam̧m̧an kōj n̄e jej kōļļā juon m̧ōttan jon̄oul?

Jisōs ekar walokļo̧k n̄an Josep Smith ilo Kirtland Tampeļ. — Vision eo ilo Kirtland Tampeļ, jān Gary E. Smith

Malakai 4:5–6

“Inaaj jilkinwōj Ilaija, ri kanaan e.”

Ke Moronai ekar kouti Malakai 4:5–6 n̄an Josep Smith, ekar kōm̧m̧ane “kōn jidik oktak jān wāween eo kōnono jān e” ilo Baibōļ (lale Josep Smith—Bwebwenato 1:36–39). Ta eo oktak ko an Moronai rej kobaik waj n̄an meļeļe eo am̧ kōn kanaan in? Eļaptata, lin̄ūri kajjitōk kein:

Wōn “ro jim̧m̧am̧”? (lale Duteronomi 29:13). Ta kallim̧ur ko kar lelo̧k n̄an er (lale Ebream 2:9–11). Ewi wāween am̧ jipan̄ kakūrm̧ool kallim̧ur kein?
Iien ta ko raar jipan̄ eok ukōt būruōm̧ n̄an ro jibūm̧ im jim̧m̧aam̧? Etke elukkuun aorōk men in n̄an karōk eo an Jemedwōj Ilan̄?

N̄an ekkatak eļapļo̧k kōn Itok eo an Ilaija im elmen an kar kūrm̧ool kanaan in rainin, lale Katak im Bujen Ko 110:13–16 im D. Todd Christofferson, “Kajoor in Liap” (Liaona, Nob. 2023, 19–22). Etke kwoj kam̧m̧olool bwe Ilaijah ekar itok?

Bar lale Gerrit W. Gong, “Kōj Kajjojo Ewōr Juon Ad Bwebwenato,” Liaona, Māe 2022, 43–46; “Turn Your Hearts,” Hymns, no. 291; “The Sealing Power” (pijaan alooj), ChurchofJesusChrist.org.

N̄an eļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Malakai 1:2

Irooj ej iakwe eō.

Ewi wāween am̧ im ajri ro nejum̧ uwaake kajjitōk in epād ilo Malakai 1:2—“Ekōjkan An [Irooj] yokwe kōm?” Kwaļo̧k n̄an doon unin ami jeļā ke E ej iakwe kom̧. Bōlen ajri ro nejum̧ remaron̄ jin̄aik pija ko me rej kakeememej er kōn iakwe eo An.

Kobaik ajri ro ilo kōnono ko kōn gospel in. N̄e kwoj katakin ajri ro redikļok, komaron̄ aikuj ļōmņak kōn wāween ko rem̧m̧an me ej kobaik er ilo ekōnono ko an gospel in. N̄an waanjon̄ak, ajri ro remaron̄ pass e juon ball; n̄e rej jibwe ball eo, remaron̄ kwaļo̧k juon un rejeļā ke Jisōs ej iakwe er.

ro jinen im jemān im juon ļaddik rej erreilo̧k jān juon wūntō

Malakai 3:8–12

Irooj enaaj kōjeraam̧m̧an eō ilo aō kōļļā joun m̧ōttan jon̄oul.

Ewi wāween am̧ maron̄ jipan̄ ajri ro ekkatak kōn juon m̧ōttan jon̄oul? Komaron̄ kajjitōk bwe ren bwine jon̄oul men ko redik, āinwōt jāān ko ilo peij in m̧akutkut ko an wiik in. Innem remaron̄ kajepelļo̧k juon ian men ko jān men ko jet—en̄iin jon̄an eo jej leļo̧k n̄an Irooj āinwōt juon m̧ōttan jon̄oul eo ad. Ekkar n̄an Malakai 3:8–12, etke Irooj ekōņaan bwe jen kōļļā juon m̧ōttan jon̄oul? (bar lale “Rikanaan Malakai” ilo Bwebwenato ko jān Kallim̧ur M̧okta, 171–72; “First Things First!” [pijaan alooj], Gospel Library).

0:58
Malachi the Prophet

1:18
First Things First!
Ilo ami riiti Malachi 3:10 ippān doon, komaron̄ karuwanene ajri ro bwe ren jutak turin juon wūntō n̄e kwoj riiti naan eo “wūntō ko an lan̄.” Ak komaron̄ tein̄ aibōj n̄an juon kap m̧ae iien ebooļ lōn̄lōn̄ n̄an kōmeļeļeik naan eo “m̧ae iien enaaj ejjeļo̧k aikuj.” Jiron̄ ajri ro kōn kōjeraam̧m̧an ko Anij ear lewaj n̄an eok ilo am̧ kōļļā juon m̧ōttan jon̄oul. Ajri ro remaron̄ jin̄a pija ko rej jutak kōn kōjeraam̧m̧an kein im katotoiki ilo ak ioon juon wūntō ilo m̧weeo im̧ōm̧.

Malakai 4:5–6

Ilaijah ear itok im ukōt būruōd n̄an baam̧le ko ad.

Ilo Malakai 4:5–6, ajri ro remaron̄ pukot uwaak ko n̄an kajjitōk kein kōn kanaan eo an Malakai: Wōn eo Irooj ear kallim̧ur in jilkintok? N̄āāt eo E ar ba armej in enaaj itok? Ta eo Irooj ej ba ke armej in enaaj kōm̧m̧ane? Etke armej in enaaj aikuj in itok? Ia eo kanaan in ekar kūrm̧ool (lale Katak im Bujen Ko 110:13–16).
N̄an lale ekōjkan an kar kallim̧ur eo ilo Malakai 4:5 kūrm̧ool, komaron̄ bar etale “Joseph and Oliver Receive Priesthood Keys” in Bwebwenato ko ilo Katak im Bujen Ko, 26–30. Juon al āinwōt “The Hearts of the Children” (Children’s Songbook, 92) emaron̄ jipan̄ ajri ro ekkatak etke ekar aorōk bwe Ilaija en kar itok. Komaron̄ bar lale FamilySearch.org/discovery, FamilySearch Tree app, ak My Family booklet n̄an makutkut ko me remaron̄ jipan̄ kwe im ajri ro ukōt būruōmi n̄an ro jibūm̧i im jim̧aam̧i.

N̄an eļapļo̧k, lale ennaan eo an allōn̄ in ilo eo Jera māākjiin.

juon kōrā ej kōjopelpel juon an̄kijeep emouj — Mourning’s Hosanna, jān Rose Datoc Dall. Juon kōrā etan Mourning (Būrom̧ōj) ej jutak ilo laļ eo an jetōb, jepooļ kōn ro jibūn im jim̧aan etto. Ej m̧ōņōņō kōn aer bōk lo̧mo̧o̧r jān aer kōm̧akoko ilo jetōb.

peij in m̧akūtkūt eo an Būraimere: Irooj ej kōjeraam̧m̧an eō ilo aō kōļļā juon m̧ōttan jon̄oul — Mourning’s Hosanna, jān Rose Datoc Dall. Juon kōrā etan Mourning (Būrom̧ōj) ej jutak ilo laļ eo an jetōb, jepooļ kōn ro jibūn im jim̧aan etto. Ej m̧ōņōņō kōn aer bōk lo̧mo̧o̧r jān aer kōm̧akoko ilo jetōb.