“ວັນທີ 21–27 ເດືອນທັນວາ. ‘ພວກຂ້ານ້ອຍໄດ້ລໍຖ້າພຣະອົງ, ແລະ ພຣະອົງຈະຊ່ວຍກູ້ເອົາພວກຂ້ານ້ອຍໄວ້’: ຄຣິດສະມາດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 21–27 ເດືອນທັນວາ. ‘ພວກຂ້ານ້ອຍໄດ້ລໍຖ້າພຣະອົງ, ແລະ ພຣະອົງຈະຊ່ວຍກູ້ເອົາພວກຂ້ານ້ອຍໄວ້,’” ຈົ່ງຕາມເຮົາມາ: ພຣະຄຳພີເດີມ 2026

For unto Us a Child Is Born [ມີເດັກນ້ອຍຜູ້ໜຶ່ງໄດ້ເກີດມາໃຫ້ພວກເຮົາ], ໂດຍ ຊາຍມັນ ດູວີ

ວັນທີ 21–27 ເດືອນທັນວາ: “ພວກຂ້ານ້ອຍໄດ້ລໍຖ້າພຣະອົງ, ແລະ ພຣະອົງຈະຊ່ວຍກູ້ເອົາພວກຂ້ານ້ອຍໄວ້”

ຄຣິດສະມາດ

ພຣະຄຳພີເດີມມີວິນຍານແຫ່ງຄວາມມຸ້ງຫວັງທີ່ກະຕືລືລົ້ນ. ໃນທາງນັ້ນ, ມັນກໍເປັນຄືກັນກັບເທດສະການຄຣິດສະມາດເລັກນ້ອຍ. ເລີ່ມຕົ້ນແຕ່ອາດາມ ແລະ ເອວາ, ປິຕຸ, ສາດສະດາ, ນັກກະວີ, ແລະ ຜູ້ຄົນໃນພຣະຄຳພີເດີມໄດ້ລໍຄອຍວັນທີ່ດີກວ່າເກົ່າ, ເຕັມໄປດ້ວຍຄວາມຫວັງສຳລັບການເລີ່ມຕົ້ນໃໝ່ ແລະ ການປົດປ່ອຍຂອງພຣະເມຊີອາ. ແລະ ຊາວອິດສະຣາເອນກໍຕ້ອງການຄວາມຫວັງນັ້ນເລື້ອຍໆ—ບໍ່ວ່າຈະເປັນຕອນທີ່ພວກເຂົາເປັນຊະເລີຍຢູ່ໃນເອຢິບ ຫລື ບາບີໂລນ ຫລື ຖືກຈ່ອງຈຳໂດຍບາບຂອງຕົນເອງ ຫລື ໂດຍການກະບົດ. ໂດຍທັງໝົດນີ້, ບັນດາສາດສະດາໄດ້ເຕືອນພວກເຂົາວ່າ ພຣະເມຊີອາ, ພຣະຜູ້ປົດປ່ອຍ, ຈະສະເດັດມາ “ເພື່ອປະກາດການປົດປ່ອຍແກ່ຊະເລີຍເສິກ” (ເອຊາຢາ 61:1).

ຄວາມຫວັງນັ້ນເລີ່ມເກີດເປັນຈິງເມື່ອພຣະເຢຊູຄຣິດໄດ້ມາກຳເນີດໃນເມືອງເບັດເລເຮັມ. ພຣະຜູ້ປົດປ່ອຍທີ່ຍິ່ງໃຫຍ່ຂອງອິດສະຣາເອນໄດ້ກຳເນີດຢູ່ໃນຄອກສັດ ແລະ ຖືກວາງໄວ້ໃນຮາງຫຍ້າ (ເບິ່ງ ລູກາ 2:7). ແຕ່ພຣະອົງບໍ່ພຽງເປັນຜູ້ປົດປ່ອຍຂອງຊາວອິດສະຣາເອນໃນສະໄໝບູຮານເທົ່ານັ້ນ. ພຣະອົງໄດ້ສະເດັດມາເພື່ອປົດປ່ອຍທ່ານ—ເພື່ອຮັບເອົາຄວາມໂສກເສົ້າຂອງທ່ານ, ເພື່ອແບກຫາບຄວາມເສຍໃຈຂອງທ່ານ, ຖືກຂ້ຽນຕີເພື່ອຄວາມຊົ່ວຮ້າຍຂອງທ່ານ, ເພື່ອວ່າດ້ວຍຮອຍໄມ້ແສ້ຂອງພຣະອົງ ທ່ານຈະໄດ້ຮັບການປິ່ນປົວ (ເບິ່ງ ເອຊາຢາ 53:4–5). ນີ້ຄືເຫດຜົນທີ່ບຸນຄຣິດສະມາດເຕັມໄປດ້ວຍຄວາມມຸ້ງຫວັງທີ່ມີຄວາມສຸກ ແມ່ນແຕ່ໃນທຸກວັນນີ້. ພຣະເມຊີອາໄດ້ສະເດັດມາຫລາຍກວ່າ 2,000 ປີຜ່ານມາແລ້ວ, ແລະ ພຣະອົງຍັງຄົງສືບຕໍ່ເຂົ້າມາໃນຊີວິດຂອງເຮົາ ເມື່ອໃດກໍຕາມທີ່ເຮົາສະແຫວງຫາພຣະອົງ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເຮົາປິຕິຍິນດີໃນພຣະຜູ້ໄຖ່ຂອງເຮົາ.

ຄຣິດສະມາດເປັນທີ່ຮູ້ຈັກກັນວ່າ ເທດສະການທີ່ມີຄວາມສຸກ ເພາະຄວາມສຸກທີ່ພຣະເຢຊູຄຣິດໄດ້ນຳມາສູ່ໂລກ. ຫລາຍສັດຕະວັດກ່ອນພຣະຜູ້ຊ່ວຍໃຫ້ລອດໄດ້ມາກຳເນີດ, ບັນດາສາດສະດາໃນພຣະຄຳພີເດີມກໍຮູ້ສຶກເຖິງຄວາມສຸກຄືກັນ ຂະນະທີ່ພວກເພິ່ນກ່າວເຖິງການສະເດັດມາຂອງພຣະເມຊີອາ. ໃຫ້ອ່ານພຣະຄຳພີບາງຂໍ້ດັ່ງຕໍ່ໄປນີ້, ແລະ ຄິດກ່ຽວກັບວ່າເປັນຫຍັງມັນຈຶ່ງມີຄ່າຕໍ່ຜູ້ທີ່ຄອຍຖ້າການປະຕິບັດພາລະກິດຂອງພຣະຜູ້ຊ່ວຍໃຫ້ລອດ: ເພງສັນລະເສີນ 35:9; ເອຊາຢາ 25:8–9; 44:21–24; 51:11; ເຊຟານີຢາ 3:14–20; ໂມເຊ 5:5–11. ເປັນຫຍັງຂໍ້ພຣະຄຳພີເຫລົ່ານີ້ຈຶ່ງມີຄ່າຕໍ່ທ່ານ? ຂໍ້ພຣະຄຳພີເຫລົ່ານີ້ໃຫ້ເຫດຜົນຫຍັງແດ່ ທີ່ເຮັດໃຫ້ເກີດຄວາມຊື່ນຊົມຍິນດີ?

ເບິ່ງ ດາລິນ ເອັຈ ໂອກສ໌, “ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່” (ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ປີ 2022, ວັນທີ 4 ເດືອນທັນວາ, 2022), ຫ້ອງສະໝຸດພຣະກິດຕິຄຸນ; “Joy to the World,” Hymns, no 201 ນຳອີກ.

ສັນຍາລັກສາມາດຊ່ວຍເຮົາໃຫ້ຈື່ຈຳພຣະເຢຊູຄຣິດ.

ປະເພນີຕ່າງໆທີ່ກ່ຽວຂ້ອງກັບບຸນຄຣິດສະມາດສາມາດມີຄວາມໝາຍທີ່ເປັນສັນຍາລັກ ຊີ້ບອກເຮົາໄປຫາພຣະຄຣິດໄດ້. ຂະນະທີ່ທ່ານສຶກສາພຣະຄຳພີເດີມໃນປີນີ້, ທ່ານອາດສັງເກດເຫັນສັນຍາລັກຫລາຍຢ່າງເຖິງພຣະຜູ້ຊ່ວຍໃຫ້ລອດ. ຈຳນວນໜ້ອຍໜຶ່ງໄດ້ຖືກລະບຸໄວ້ຢູ່ຂ້າງລຸ່ມ. ໃຫ້ຄິດທີ່ຈະສຶກສາຂໍ້ເຫລົ່ານີ້ ແລະ ບັນທຶກສິ່ງທີ່ມັນສິດສອນທ່ານກ່ຽວກັບພຣະອົງໄວ້.

ດວງດາວ (ຈົດບັນຊີ 24:17; ມັດທາຍ 2:2; ພຣະນິມິດ 22:16).
ຜູ້ລ້ຽງແກະ (ເພງສັນລະເສີນ 23; ລູກາ 15:4–7; ໂຢຮັນ 10:11)
ລູກແກະ (ປະຖົມມະການ 22:8; ອົບພະຍົບ 12:5; 1 ເປໂຕ 1:18–20).
ນ້ຳ (ອົບພະຍົບ 17:1–6; ເຢເຣມີຢາ 2:13; ເອເຊກຽນ 47:1–12; ໂຢຮັນ 4:7–14).
ຫີນ (1 ຊາມູເອນ 2:2; 2 ຊາມູເອນ 22:2–3; ເພງສັນລະເສີນ 118:22–23; ເອຊາຢາ 28:16; ເອເຟໂຊ 2:20).
ກິ່ງ (ເອຊາຢາ 11:1–2; ເຢເຣມີຢາ 23:5; 33:15).
ຄວາມສະຫວ່າງ (ເພງສັນລະເສີນ 27:1; ເອຊາຢາ 9:2; 60:19; ມີກາ 7:8; ໂຢຮັນ 8:12).

ສັນຍາລັກ, ຂໍ້ພຣະຄຳພີ, ແລະ ເລື່ອງລາວອື່ນອີກໃດແດ່ທີ່ທ່ານພົບເຫັນຢູ່ໃນພຣະຄຳພີ ທີ່ເປັນພະຍານເຖິງພຣະເຢຊູຄຣິດ?

ເບິ່ງ 2 ນີໄຟ 11:4; ໂມໄຊຢາ 3:14–15; ໂມເຊ 6:63; “ຮູບແບບ ຫລື ເຄື່ອງໝາຍເຖິງພຣະຄຣິດ” ແລະ “ພຣະເຢຊູຄຣິດ,” ທັງສອງຢູ່ໃນຄູ່ມືພຣະຄຳພີ (ຫ້ອງສະໝຸດພຣະກິດຕິຄຸນ).

“ພຣະອົງຈະຊົງນາມວ່າ ອັດສະຈັນ.”

ພຣະເຢຊູຄຣິດຖືກກ່າວເຖິງໃນຫລາຍພຣະນາມ ແລະ ຫລາຍຕຳແໜ່ງ. ໃຫ້ຊອກຫາຕຳແໜ່ງໃນຂໍ້ດັ່ງຕໍ່ໄປນີ້: ເພງສັນລະເສີນ 23:1; 83:18; ເອຊາຢາ 7:14; 9:6; 12:2; 63:16; ອາໂມດ 4:13; ເຊກາຣີຢາ 14:16; ໂມເຊ 7:53. ຕຳແໜ່ງອື່ນອີກໃດແດ່ທີ່ທ່ານຄິດອອກ? ທ່ານອາດມັກຂຽນຕຳແໜ່ງຂອງພຣະເຢຊູຄຣິດທີ່ທ່ານພົບເຫັນຢູ່ໃນເພງຄຣິດສະມາດລົງໄວ້. ແຕ່ລະຕຳແໜ່ງມີອິດທິພົນຕໍ່ວິທີທີ່ທ່ານຄິດກ່ຽວກັບພຣະອົງແນວໃດ?

ໃຫ້ພິຈາລະນາການເລືອກຕຳແໜ່ງ ຫລື ບົດບາດຂອງພຣະຜູ້ຊ່ວຍໃຫ້ລອດ ທີ່ຈະຊ່ວຍໃຫ້ທ່ານລະນຶກເຖິງພຣະອົງ ຕະຫລອດທັງປີທີ່ຈະມາເຖິງ.

ເບິ່ງ Quentin L. Cook, “Personal Peace in Challenging Times,” Liahona, Nov. 2021, 89–92; “Hark! The Herald Angels Sing,” Hymns, no. 209 ນຳອີກ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ພຣະຄຳພີເດີມສິດສອນເຮົາກ່ຽວກັບພຣະເຢຊູ.

ທ່ານ ແລະ ລູກໆຂອງທ່ານອາດມີເຄື່ອງຕົກແຕ່ງຄຣິດສະມາດ ທີ່ທ່ານສາມາດໃຊ້ເພື່ອເລີ່ມຕົ້ນການສົນທະນາກ່ຽວກັບພຣະເຢຊູຄຣິດ. ບາງທີທ່ານອາດເວົ້າກ່ຽວກັບວ່າ ດວງດາວ, ແສງສີ, ຫລື ຂອງຂວັນຄຣິດສະມາດເຕືອນໃຈເຮົາເຖິງພຣະຜູ້ຊ່ວຍໃຫ້ລອດແນວໃດ. ແລ້ວພວກທ່ານສາມາດຊອກຫາຂໍ້ພຣະຄຳພີຕໍ່ໄປນີ້ຂໍ້ໜຶ່ງ ຫລື ຫລາຍກວ່ານັ້ນ ທີ່ສາມາດເປັນສັນຍາລັກເຖິງພຣະເຢຊູຄຣິດ: ປະຖົມມະການ 22:8; ຈົດບັນຊີ 24:17; ເພງສັນລະເສີນ 23:1; 27:1. ບາງທີລູກໆຂອງທ່ານສາມາດຖືຮູບ ຫລື ເຄື່ອງຕົກແຕ່ງທີ່ເຂົ້າກັບແຕ່ລະຂໍ້ ຂະນະທີ່ພວກເຂົາອ່ານ. ພຣະເຢຊູເປັນເໝືອນລູກແກະ, ດວງດາວ, ຄົນລ້ຽງແກະ, ຫລື ແສງໄຟແນວໃດ? ໃຫ້ພິຈາລະນາທີ່ຈະຮ້ອງເພງຄຣິດສະມາດນຳກັນ, ເຊັ່ນ “ຄືນສະງັດ” (ເພງສວດ ແລະ ເພງຂອງເດັກນ້ອຍ, 57).
ລູກໆຂອງທ່ານກໍສາມາດເບິ່ງຮູບພາບທີ່ຢູ່ໃນທ້າຍຂອງໂຄງຮ່າງນີ້ນຳອີກ ຂະນະທີ່ທ່ານອ່ານ ເອຊາຢາ 9:6 ໃຫ້ພວກເຂົາຟັງ. ຂໍໃຫ້ລູກໆຂອງທ່ານຊີ້ໃສ່ກຸມມານນ້ອຍເຢຊູ ເມື່ອພວກເຂົາໄດ້ຍິນວະລີ “ມີເດັກນ້ອຍຜູ້ໜຶ່ງໄດ້ເກີດມາ.” ແບ່ງປັນປະຈັກພະຍານຂອງທ່ານວ່າ ສາດສະດາໃນພຣະຄຳພີເດີມຮູ້ວ່າພຣະເຢຊູຈະມາກຳເນີດ.
ຂະນະທີ່ທ່ານກະກຽມທີ່ຈະສຶກສາພຣະຊົນຊີບຂອງພຣະເຢຊູຄຣິດຢູ່ໃນພຣະຄຳພີໃໝ່ໃນປີໜ້າ, ໃຫ້ຄິດທີ່ຈະທົບທວນກັບລູກໆຂອງທ່ານ ເຖິງສິ່ງທີ່ພວກເຂົາໄດ້ຮຽນຮູ້ກ່ຽວກັບພຣະອົງໃນປີນີ້ ຢູ່ໃນພຣະຄຳພີເດີມ. ທ່ານສາມາດທົບທວນໂຄງຮ່າງຢູ່ໃນແຫລ່ງນີ້ ແລະ ຂໍ້ໝາຍເຫດຈາກການສຶກສາເປັນສ່ວນຕົວໃດໆ ເພື່ອຊ່ວຍທ່ານຈື່ຈຳສິ່ງທີ່ທ່ານໄດ້ຮຽນຮູ້. ລູກຜູ້ນ້ອຍອາດໄດ້ຮັບຜົນປະໂຫຍດຈາກການເບິ່ງປຶ້ມ ເລື່ອງພຣະຄຳພີເດີມ ຫລື ຮູບພາບຢູ່ໃນປຶ້ມ ຈົ່ງຕາມເຮົາມາ. ຄຳທຳນາຍ ຫລື ເລື່ອງລາວໃດແດ່ທີ່ເດັ່ນ? ເຮົາໄດ້ຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ?

ປະເພນີສະຫລອງບຸນຄຣິດສະມາດຊີ້ບອກເຮົາໄປຫາພຣະເຢຊູຄຣິດ.

ຄອບຄົວຊາວອິດສະຣາເອນມີປະເພນີ, ດັ່ງເຊັ່ນງານປັດສະຄາ ແລະ ງານລ້ຽງອື່ນໆ, ທີ່ມີເຈດຕະນານຳພາໃຈ ແລະ ຈິດໃຈຂອງພວກເຂົາໄປຫາພຣະຜູ້ເປັນເຈົ້າ (ເບິ່ງ ອົບພະຍົບ 12). ທ່ານ ແລະ ລູກໆຂອງທ່ານມີປະເພນີແນວໃດແດ່ ໃນຊ່ວງບຸນຄຣິດສະມາດ ເພື່ອຊ່ວຍພວກທ່ານໃຫ້ສຸມໃຈໃສ່ພຣະເຢຊູຄຣິດ? ພວກທ່ານຮູ້ຈັກປະເພນີໃດແດ່ຈາກປະຫວັດຄອບຄົວຂອງພວກທ່ານ? ທ່ານອາດພິຈາລະນາທີ່ຈະເວົ້າລົມກັບລູກໆຂອງທ່ານກ່ຽວກັບປະເພນີບາງຢ່າງທີ່ພວກທ່ານຢາກເລີ່ມຕົ້ນເຮັດ. ແນວຄິດບາງຢ່າງອາດລວມທັງການຮັບໃຊ້ຄົນໃດຄົນໜຶ່ງທີ່ຂັດສົນ, ການເລືອກບາງສິ່ງທີ່ພວກທ່ານຈະມອບໃຫ້ເປັນ “ຂອງຂວັນ” ແດ່ພຣະຜູ້ຊ່ວຍໃຫ້ລອດ, ການເຊື້ອເຊີນໝູ່ຄົນໜຶ່ງໃຫ້ເບິ່ງລາຍການໃຫ້ຄຳດົນໃຈຂອງຝ່າຍປະທານສູງສຸດເນື່ອງໃນໂອກາດເທດສະການຄຣິດສະມາດກັບພວກທ່ານ (broadcasts.ChurchofJesusChrist.org), ການແຕ່ງເພງຄຣິດສະມາດເອງ, ຫລື ການຊອກຫາວິທີພິເສດເພື່ອແບ່ງປັນຂ່າວສານເຖິງການກຳເນີດຂອງພຣະຄຣິດ.

ຢູ່ໃນບ້ານ, ການຮຽນຮູ້ ແລະ ການດຳລົງຊີວິດແມ່ນແຍກອອກຈາກກັນບໍ່ໄດ້. “ພຣະກິດຕິຄຸນມີຄວາມກ່ຽວຂ້ອງໂດຍກົງໃນບ້ານ. ຄົນໃນບ້ານນັ້ນທີ່ທ່ານກຳລັງຮຽນຮູ້ພຣະກິດຕິຄຸນນຳ ຄືຄົນທີ່ທ່ານຈະໃຊ້ຊີວິດຢູ່ນຳກັນ—ທຸກມື້. ຕາມຈິງແລ້ວ, ສ່ວນຫລາຍ, ການດຳລົງຊີວິດຕາມພຣະກິດຕິຄຸນຄື ວິທີ ທີ່ເຮົາຮຽນຮູ້ພຣະກິດຕິຄຸນ. ສະນັ້ນຂະນະທີ່ທ່ານຮຽນຮູ້ ແລະ ສິດສອນພຣະກິດຕິຄຸນຢູ່ທີ່ບ້ານ, ໃຫ້ຊອກຫາວິທີທີ່ຈະເຊື່ອມຕໍ່ສິ່ງທີ່ທ່ານຮຽນຮູ້ໃສ່ກັບສິ່ງທີ່ກຳລັງເຮັດຢູ່. ຢູ່ໃນບ້ານຂອງທ່ານ, ຈົ່ງໃຫ້ພຣະກິດຕິຄຸນເປັນບາງສິ່ງທີ່ທ່ານພະຍາຍາມດຳລົງຊີວິດຕາມ, ບໍ່ແມ່ນພຽງແຕ່ເປັນບາງສິ່ງທີ່ທ່ານເວົ້າກ່ຽວກັບເທົ່ານັ້ນ” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 31).

ຮູບພາບສາກເລື່ອງລາວການກຳເນີດ, ໂດຍ ອີຕັນ ບຣາວ

ພຣະບິດາເທິງສະຫວັນໄດ້ປະທານຂອງປະທານໃຫ້ເຮົາ ຄືພຣະບຸດຂອງພຣະອົງ ເພື່ອໃຫ້ເປັນພຣະຜູ້ຊ່ວຍໃຫ້ລອດຂອງເຮົາ.

ທ່ານຈະສາມາດຊ່ວຍລູກໆຂອງທ່ານໃຫ້ຮູ້ສຶກມີຄວາມຄາລະວະ ແລະ ມີຄວາມສຸກກັບການກຳເນີດຂອງພຣະຄຣິດໄດ້ແນວໃດ? ພວກທ່ານອາດເບິ່ງວິດີໂອ “The Christ Child: A Nativity Story” (ຫ້ອງສະໝຸດພຣະກິດຕິຄຸນ) ຫລື ອ່ານ ມັດທາຍ 1:18–25; 2:1–12; ລູກາ 1:26–38; 2:1–20 ນຳກັນ. ລູກແຕ່ລະຄົນສາມາດເລືອກເອົາຄົນໜຶ່ງຈາກວິດີໂອ ຫລື ຈາກເລື່ອງລາວໃນພຣະຄຳພີ ແລະ ແບ່ງປັນວິທີທີ່ບຸກຄົນນັ້ນຮູ້ສຶກກ່ຽວກັບພຣະຜູ້ຊ່ວຍໃຫ້ລອດແນວໃດ. ແລ້ວພວກທ່ານສາມາດແບ່ງປັນນຳກັນເຖິງຄວາມຮູ້ສຶກຂອງຕົນເອງກ່ຽວກັບພຣະອົງ.

17:57
The Christ Child
ບາງທີທ່ານ ແລະ ລູກໆຂອງທ່ານສາມາດເວົ້າລົມກ່ຽວກັບຂອງທີ່ພວກທ່ານໄດ້ມອບໃຫ້ ຫລື ໄດ້ຮັບໃນໄລຍະຫລາຍປີຜ່ານມາ ທີ່ນຳຄວາມຊື່ນຊົມມາໃຫ້. ແລ້ວພວກທ່ານສາມາດອ່ານ ເອຊາຢາ 25:9 ນຳກັນ ແລະ ເວົ້າລົມກ່ຽວກັບວ່າ ເປັນຫຍັງພວກທ່ານຈຶ່ງປິຕິຍິນດີທີ່ພຣະບິດາເທິງສະຫວັນໄດ້ສົ່ງພຣະຜູ້ຊ່ວຍໃຫ້ລອດມາໃຫ້ເຮົາ. ເພື່ອຊ່ວຍໃຫ້ລູກໆຂອງທ່ານເຂົ້າໃຈຫລາຍຂຶ້ນເຖິງບົດບາດຂອງພຣະເຢຊູຄຣິດໃນຖານະພຣະຜູ້ຊ່ວຍໃຫ້ລອດຂອງເຮົາ, ໃຫ້ເຊື້ອເຊີນພວກເຂົາໃຫ້ອ່ານ ເອຊາຢາ 25:8–9; 53:3–5; ແລະ ໂຮເຊອາ 13:14. ຂໍ້ພຣະຄຳພີເຫລົ່ານີ້ສິດສອນເຮົາຫຍັງແດ່ກ່ຽວກັບວິທີທີ່ພຣະຜູ້ເປັນເຈົ້າໄດ້ຊ່ວຍເຮົາໃຫ້ລອດ?
ພວກທ່ານກໍຍັງສາມາດຮ້ອງເພງຄຣິດສະມາດນຳກັນນຳອີກ, ເຊັ່ນ “ໄກແສນໄກຢູ່ທີ່ຮາບຢູດີອາ” (ເພງສວດ ແລະ ເພງຂອງເດັກນ້ອຍ, 56) ຫລື “ເຮົາຮູ້ພຣະຜູ້ໄຖ່ຊົງພຣະຊົນ” (ເພງສວດ ແລະ ເພງຂອງເດັກນ້ອຍ, 42). ຊ່ວຍໃຫ້ລູກໆຂອງທ່ານຊອກຫາວະລີໃນເພງທີ່ຊ່ວຍພວກເຂົາຮູ້ວ່າ ພຣະບິດາເທິງສະຫວັນ ແລະ ພຣະເຢຊູຄຣິດຮັກພວກເຂົາ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ໜ້າກິດຈະກຳປະຖົມໄວ: ພຣະຄຳພີເດີມສິດສອນເຮົາກ່ຽວກັບພຣະເຢຊູ — The Nativity [ສາກເລື່ອງລາວການກຳເນີດ], ໂດຍ ເອັນ ຊີ ໄວເອັດ