“ວັນທີ 14–20 ເດືອນທັນວາ ‘ພຣະຜູ້ເປັນເຈົ້າໄດ້ກ່າວວ່າ ເຮົາຮັກພວກເຈົ້າ’: ມາລາກີ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 14–20 ເດືອນທັນວາ ‘ພຣະຜູ້ເປັນເຈົ້າໄດ້ກ່າວວ່າ ເຮົາຮັກພວກເຈົ້າ,’” ຈົ່ງຕາມເຮົາມາ: ພຣະຄຳພີເດີມ 2026

ວັນທີ 14–20 ເດືອນທັນວາ: “ພຣະຜູ້ເປັນເຈົ້າໄດ້ກ່າວວ່າ ເຮົາຮັກພວກເຈົ້າ”

ມາລາກີ

“ເຮົາຮັກພວກເຈົ້າ,” ພຣະຜູ້ເປັນເຈົ້າໄດ້ບອກຜູ້ຄົນຂອງພຣະອົງຜ່ານທາງສາດສະດາມາລາກີ. ແຕ່ຊາວອິດສະຣາເອນ, ຜູ້ໄດ້ທົນກັບຄວາມທຸກຍາກລຳບາກ ແລະ ການເປັນຊະເລີຍເປັນເວລາຫລາຍລຸ້ນຄົນ, ໄດ້ຖາມວ່າ, “ພຣະອົງໄດ້ສະແດງຄວາມຮັກຂອງພຣະອົງຕໍ່ພວກຂ້ານ້ອຍຢ່າງໃດ?” (ມາລາກີ 1:2). ຫລັງຈາກທຸກສິ່ງທີ່ຊາວອິດສະຣາເອນໄດ້ປະເຊີນ, ພວກເຂົາອາດສົງໄສຖ້າຫາກວ່າປະຫວັດສາດຂອງພວກເຂົາເປັນເລື່ອງລາວເຖິງຄວາມຮັກຂອງພຣະເຈົ້າຕໍ່ຜູ້ຄົນແຫ່ງພັນທະສັນຍາຂອງພຣະອົງແທ້ໆຫລືບໍ່. ໃນບາງວິທີ, ມັນງ່າຍກວ່າທີ່ຈະເບິ່ງມັນວ່າເປັນເລື່ອງລາວຂອງຄວາມອ່ອນແອ ແລະ ການກະບົດຂອງມະນຸດ. ແຕ່ຜ່ານທຸກສິ່ງທັງໝົດນັ້ນ, ພຣະເຈົ້າກໍບໍ່ເຄີຍຢຸດເອື້ອມອອກມາດ້ວຍຄວາມຮັກ. ເມື່ອພວກລູກຊາຍຂອງຢາໂຄບໄດ້ປະພຶດບໍ່ດີຕໍ່ໂຢເຊັບ ນ້ອງຊາຍຂອງພວກເຂົາ, ພຣະຜູ້ເປັນເຈົ້າຍັງໂຜດຊີວິດຂອງພວກເຂົາຈາກຄວາມອຶດຢາກ (ເບິ່ງ ປະຖົມມະການ 45:4–8). ເມື່ອຊາວອິດສະຣາເອນເວົ້າຈົ່ມຢູ່ໃນຖິ່ນແຫ້ງແລ້ງກັນດານ, ພຣະອົງຍັງໄດ້ລ້ຽງດູພວກເຂົາດ້ວຍມານາ (ເບິ່ງ ອົບພະຍົບ 16:1–4). ແມ່ນແຕ່ເມື່ອຊາວອິດສະຣາເອນໄດ້ຫັນໄປຫາພະອື່ນ ແລະ ໄດ້ກະຈັດກະຈາຍໄປ, ພຣະເຈົ້າໄດ້ສັນຍາວ່າຖ້າຫາກພວກເຂົາກັບໃຈ, ພຣະອົງຈະເຕົ້າໂຮມ ແລະ ໄຖ່ພວກເຂົາ “ດ້ວຍຄວາມເມດຕາອັນຍິ່ງໃຫຍ່” (ເບິ່ງ ເອຊາຢາ 54:7). ແທ້ຈິງແລ້ວ, ພຣະຄຳພີເດີມເປັນເລື່ອງລາວເຖິງຄວາມອົດທົນ, ຄວາມຮັກທີ່ອົດກັ້ນຂອງພຣະເຈົ້າ. ແລະ ເລື່ອງນີ້ກໍສືບຕໍ່ໃນປະຈຸບັນ. ພຣະເຢຊູຄຣິດ, “ດວງຕາເວັນ [ແຫ່ງຄວາມຊອບທຳ],” ດັ່ງທີ່ມາລາກີໄດ້ເອີ້ນ, ໄດ້ສະເດັດມາ “ນຳເອົາການປິ່ນປົວມາ” (ມາລາກີ 4:2). ພຣະອົງເປັນຫລັກຖານທີ່ຍິ່ງໃຫຍ່ທີ່ສຸດເຖິງຄວາມຮັກຂອງພຣະເຈົ້າຕໍ່ຊາວອິດສະຣາເອນໃນສະໄໝບູຮານ ແລະ ຕໍ່ເຮົາທຸກຄົນ.

ສຳລັບຂໍ້ມູນເພີ່ມເຕີມກ່ຽວກັບ ພຣະທຳມາລາກີ, ໃຫ້ເບິ່ງ “ມາລາກີ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ມາລາກີ 1–4

“ຈົ່ງກັບຄືນມາຫາເຮົາເຖີດ, ແລະ ເຮົາຈະກັບຄືນໄປຫາພວກເຈົ້າ.”

ໃນວັນເວລາຂອງມາລາກີ, ຊາວອິດສະຣາເອນໄດ້ສ້າງພຣະວິຫານໃນນະຄອນເຢຣູຊາເລັມຂຶ້ນໃໝ່ແລ້ວ, ແຕ່ສ່ວນຜູ້ຄົນ ພວກເຂົາຍັງຕ້ອງໄດ້ສ້າງຄວາມສຳພັນຂອງພວກເຂົາກັບພຣະຜູ້ເປັນເຈົ້າຄືນໃໝ່ຢູ່. ຂະນະທີ່ທ່ານສຶກສາມາລາກີ, ໃຫ້ຊອກຫາຄຳຖາມທີ່ພຣະຜູ້ເປັນເຈົ້າຖາມຊາວອິດສະຣາເອນ ຫລື ຄຳຖາມທີ່ພວກເຂົາໄດ້ຖາມພຣະອົງ. ໃຫ້ພິຈາລະນາທີ່ຈະຖາມຕົວເອງກັບຄຳຖາມທີ່ຄ້າຍຄືກັນນັ້ນ (ບາງຕົວຢ່າງມີລະບຸໄວ້ຢູ່ຂ້າງລຸ່ມ) ເພື່ອຊ່ວຍທ່ານປະເມີນຄວາມສຳພັນຂອງທ່ານກັບພຣະຜູ້ເປັນເຈົ້າ ແລະ ເຂົ້າໃກ້ຊິດພຣະອົງຫລາຍຂຶ້ນ.

ເຮົາຮູ້ສຶກແນວໃດເຖິງຄວາມຮັກຂອງພຣະຜູ້ເປັນເຈົ້າທີ່ມີຕໍ່ເຮົາ? (ເບິ່ງ ມາລາກີ 1:2).
ການຖວາຍຂອງເຮົາຕໍ່ພຣະຜູ້ເປັນເຈົ້າເປັນການໃຫ້ກຽດແກ່ພຣະອົງແທ້ໆບໍ? (ເບິ່ງ ມາລາກີ 1:6–11)
ໃນທາງໃດແດ່ທີ່ເຮົາຕ້ອງໄດ້ “ກັບຄືນ” ມາຫາພຣະຜູ້ເປັນເຈົ້າ? (ເບິ່ງ ມາລາກີ 3:7).
ເຮົາໄດ້ຂະໂມຍຈາກພຣະເຈົ້າໃນທາງໃດແດ່? (ເບິ່ງ ມາລາກີ 3:8–11).
ທັດສະນະຄະຕິຂອງເຮົາໃນຊ່ວງທີ່ເຮົາມີຄວາມຫຍຸ້ງຍາກສະທ້ອນເຖິງຄວາມຮູ້ສຶກຂອງເຮົາຕໍ່ພຣະຜູ້ເປັນເຈົ້າແນວໃດ? (ເບິ່ງ ມາລາກີ 3:13–15; ເບິ່ງ 2:17 ນຳອີກ).

ມາລາກີ 1:6–14

ພຣະຜູ້ເປັນເຈົ້າຂໍໃຫ້ “ຖວາຍເຄື່ອງບູຊາທີ່ເຮົາຍອມຮັບ.”

ຂະນະທີ່ທ່ານອ່ານກ່ຽວກັບການຖວາຍທີ່ບັນຍາຍໄວ້ໃນ ມາລາກີ 1, ທ່ານສັງເກດເຫັນຫຍັງແດ່ກ່ຽວກັບເຄື່ອງບູຊາທີ່ພວກປະໂລຫິດໄດ້ຖວາຍ? ເຄື່ອງບູຊາເຫລົ່ານີ້ແນະນຳຫຍັງແດ່ກ່ຽວກັບຄວາມຮູ້ສຶກຂອງພວກປະໂລຫິດຕໍ່ພຣະຜູ້ເປັນເຈົ້າ? (ເບິ່ງ ມາລາກີ 1:13). ໃຫ້ພິຈາລະນາເຮັດລາຍການຖວາຍ, ຫລື ເຄື່ອງບູຊາທີ່ທ່ານເຮັດເພື່ອພຣະຜູ້ເປັນເຈົ້າ. ສຳລັບທຸກອັນຢູ່ໃນລາຍການ, ໃຫ້ໄຕ່ຕອງວ່າແມ່ນຫຍັງທີ່ເປັນການຖວາຍທີ່ “ເປັນມົນທິນ” ຫລື ການຖວາຍທີ່ “ບໍລິສຸດ” (ມາລາກີ 1:7, 11).

ມາລາກີ 3:8–12

ພຣະຜູ້ເປັນເຈົ້າໄຂປະຕູສະຫວັນໃນຂະນະທີ່ເຮົາສະແດງສັດທາຂອງເຮົາ ໂດຍການຈ່າຍສ່ວນສິບ.

ລອງນຶກພາບວ່າທ່ານມີໝູ່ຄົນໜຶ່ງທີ່ຫາກໍຮູ້ວ່າທ່ານຈ່າຍສ່ວນສິບ. “ເປັນຫຍັງເຈົ້າຈຶ່ງເຮັດແນວນັ້ນ?” ໝູ່ຂອງທ່ານຖາມ. ໃຫ້ຄິດກ່ຽວກັບເລື່ອງນີ້ ຂະນະທີ່ທ່ານອ່ານ ມາລາກີ 3:8–12. ທ່ານພົບເຫັນຫຍັງຢູ່ໃນນັ້ນທີ່ສາມາດຊ່ວຍທ່ານຕອບຄຳຖາມຂອງໝູ່ທ່ານ? ມີຫຍັງອີກທີ່ທ່ານຢາກໃຫ້ໝູ່ຂອງທ່ານເຂົ້າໃຈກ່ຽວກັບສ່ວນສິບ? ສຳລັບຄວາມຊ່ວຍເຫລືອເພີ່ມເຕີມ, ທ່ານສາມາດຄົ້ນຄວ້າຂ່າວສານຂອງແອວເດີ ນຽວ ແອວ ແອນເດີເຊັນ “Tithing: Opening the Windows of Heaven” (Liahona, Nov. 2023, 32–35), ເພື່ອຊອກຫາຄຳຕອບໃຫ້ກັບຄຳຖາມດັ່ງເຊັ່ນ:

ເປັນຫຍັງພຣະຜູ້ເປັນເຈົ້າຈຶ່ງຢາກໃຫ້ເຮົາຈ່າຍສ່ວນສິບ?
ແມ່ນຫຍັງທີ່ອາດກີດກັນບາງຄົນຈາກການຈ່າຍສ່ວນສິບ, ແລະ ເຮົາຈະເອົາຊະນະອຸປະສັກເຫລົ່ານີ້ໄດ້ແນວໃດ?
ການຈ່າຍສ່ວນສິບຊ່ວຍເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາ ໃນພຣະບິດາເທິງສະຫວັນ ແລະ ພຣະເຢຊູຄຣິດແນວໃດ?

ທ່ານກໍສາມາດແບ່ງປັນກັບໝູ່ຂອງທ່ານນຳອີກວ່າ ພຣະຜູ້ເປັນເຈົ້າໄດ້ອວຍພອນທ່ານແນວໃດເມື່ອທ່ານຈ່າຍສ່ວນສິບ. ທ່ານສາມາດຊອກຫາແນວຄິດຢູ່ໃນພາກທີ່ມີຫົວຂໍ້ວ່າ “Lesson Number 1—Significant but Subtle Blessings” ໃນຂ່າວສານຂອງແອວເດີ ເດວິດ ເອ ແບ໊ດນາ “The Windows of Heaven” (Liahona, Nov. 2013, 17–18). ເຮົາຈະກາຍເປັນຄົນແບບໃດຈາກການຈ່າຍສ່ວນສິບ?

ທ່ານຄິດວ່າວະລີ “ໄຂປະຕູສະຫວັນ” (ຂໍ້ທີ 10) ອາດໝາຍເຖິງຫຍັງ? ບາງທີທ່ານອາດຫລຽວອອກໄປນອກປ່ອງຢ້ຽມ ແລະ ຄິດກ່ຽວກັບຈຸດປະສົງຂອງປ່ອງຢ້ຽມ. ເປັນຫຍັງ “ປະຕູສະຫວັນ” ຈຶ່ງເປັນວິທີທີ່ດີໃນການອະທິບາຍວ່າ ພຣະຜູ້ເປັນເຈົ້າອວຍພອນເຮົາແນວໃດ ເມື່ອເຮົາຈ່າຍສ່ວນສິບ?

ພຣະເຢຊູກຳລັງປະກົດຕົວຕໍ່ໂຈເຊັບ ສະມິດ ໃນພຣະວິຫານເຄີດແລນ — Vision in the Kirtland Temple [ພາບນິມິດໃນພຣະວິຫານເຄີດແລນ], ໂດຍ ແກຣີ ສະມິດ

ມາລາກີ 4:5–6

“ເຮົາຈະໃຊ້ເອລີຢາ [ສາດສະດາ] ຂອງເຮົາມາ.”

ເມື່ອໂມໂຣໄນອ້າງເຖິງ ມາລາກີ 4:5–6 ກັບໂຈເຊັບ ສະມິດ, ເພິ່ນໄດ້ກ່າວ “ຜິດພ້ຽນໄປຈາກທີ່ມີ” ຢູ່ໃນພຣະຄຣິສຕະທຳຄຳພີຂອງພວກເຮົາໜ້ອຍໜຶ່ງ (ເບິ່ງ ໂຈເຊັບ ສະມິດ—ປະຫວັດ 1:36–39). ຖ້ອຍຄຳທີ່ແຕກຕ່າງຂອງໂມໂຣໄນໄດ້ຊ່ວຍໃຫ້ທ່ານເຂົ້າໃຈຫລາຍຂຶ້ນກ່ຽວກັບຄຳທຳນາຍຂໍ້ນີ້ແນວໃດ? ໂດຍສະເພາະຢ່າງຍິ່ງ, ໃຫ້ໄຕ່ຕອງຄຳຖາມດັ່ງເຊັ່ນ:

ໃຜຄື “ປູ່ຍ່າຕາຍາຍ”? (ເບິ່ງ ພຣະບັນຍັດສອງ 29:13). ຄຳສັນຍາໃດແດ່ທີ່ໄດ້ເຮັດໄວ້ກັບພວກເພິ່ນ? (ເບິ່ງ ອັບຣາຮາມ 2:9–11). ທ່ານຈະຊ່ວຍເຮັດໃຫ້ຄຳສັນຍາເຫລົ່ານີ້ເປັນຈິງໄດ້ແນວໃດ?
ປະສົບການໃດແດ່ທີ່ຊ່ວຍໃຫ້ທ່ານຫັນຫົວໃຈໄປຫາບັນພະບຸລຸດຂອງທ່ານ? ເປັນຫຍັງສິ່ງນັ້ນຈຶ່ງສຳຄັນຫລາຍຕໍ່ແຜນຂອງພຣະບິດາເທິງສະຫວັນ?

ເພື່ອຮຽນຮູ້ເພີ່ມເຕີມກ່ຽວກັບການມາຂອງເອລີຢາ ແລະ ການທຳນາຍນີ້ກຳລັງເກີດເປັນຈິງໃນປະຈຸບັນແນວໃດ, ໃຫ້ເບິ່ງ ຄຳສອນ ແລະ ພັນທະສັນຍາ 110:13–16 ແລະ D. Todd Christofferson, “The Sealing Power” (Liahona, Nov. 2023, 19–22). ເປັນຫຍັງທ່ານຈຶ່ງມີຄວາມກະຕັນຍູທີ່ເອລີຢາໄດ້ມາ?

ເບິ່ງ Gerrit W. Gong, “We Each Have a Story,” Liahona, May 2022, 43–46; “Turn Your Hearts,” Hymns, no. 291; “The Sealing Power” (ວິດີໂອ), ChurchofJesusChrist.org ນຳອີກ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ມາລາກີ 1:2

ພຣະຜູ້ເປັນເຈົ້າຮັກເຮົາ.

ທ່ານ ແລະ ລູກໆຂອງທ່ານຈະຕອບຄຳຖາມຢູ່ໃນ ມາລາກີ 1:2—ແນວໃດ ທີ່ວ່າ “[ພຣະຜູ້ເປັນເຈົ້າ] ໄດ້ສະແດງຄວາມຮັກຕໍ່ເຮົາຢ່າງໃດ?” ແບ່ງປັນນຳກັນແລະກັນເຖິງເຫດຜົນທີ່ພວກທ່ານຮູ້ວ່າພຣະອົງຮັກພວກທ່ານ. ບາງທີລູກໆຂອງທ່ານສາມາດແຕ້ມຮູບທີ່ເຕືອນໃຈພວກເຂົາເຖິງຄວາມຮັກຂອງພຣະອົງ.

ຊຸກຍູ້ລູກໆໃນການສົນທະນາພຣະກິດຕິຄຸນ. ຖ້າຫາກທ່ານກຳລັງສິດສອນລູກທີ່ຍັງນ້ອຍຢູ່, ທ່ານອາດຕ້ອງຄິດຫາວິທີສ້າງສັນ ເພື່ອໃຫ້ພວກເຂົາມີສ່ວນຮ່ວມໃນການສົນທະນາພຣະກິດຕິຄຸນ. ຍົກຕົວຢ່າງ, ລູກໆຂອງທ່ານສາມາດສົ່ງໝາກບານໃຫ້ກັນ; ເມື່ອຜູ້ໃດໄດ້ຖືໝາກບານ, ຜູ້ນັ້ນສາມາດແບ່ງປັນເຫດຜົນໜຶ່ງ ທີ່ເຂົາຮູ້ວ່າພຣະເຢຊູຮັກເຂົາ.

ພໍ່ແມ່ ແລະ ເດັກຊາຍກຳລັງຫລຽວອອກໄປທາງປ່ອງຢ້ຽມ

ມາລາກີ 3:8–12

ພຣະຜູ້ເປັນເຈົ້າຈະໃຫ້ພອນແກ່ເຮົາ ເມື່ອເຮົາຈ່າຍສ່ວນສິບ.

ທ່ານຈະຊ່ວຍລູກໆຂອງທ່ານໃຫ້ຮຽນຮູ້ກ່ຽວກັບສ່ວນສິບແນວໃດ? ທ່ານສາມາດຂໍໃຫ້ພວກເຂົານັບສິ່ງຂອງນ້ອຍໆ 10 ອັນ, ເຊັ່ນ ເງິນຫລຽນຢູ່ໃນໜ້າກິດຈະກຳຂອງອາທິດນີ້. ແລ້ວພວກເຂົາສາມາດແຍກອັນໜຶ່ງອອກຈາກກອງ—ນີ້ແມ່ນຈຳນວນທີ່ເຮົາມອບໃຫ້ແກ່ພຣະຜູ້ເປັນເຈົ້າເປັນສ່ວນສິບ. ອີງຕາມ ມາລາກີ 3:8–12, ເປັນຫຍັງພຣະຜູ້ເປັນເຈົ້າຈຶ່ງຢາກໃຫ້ເຮົາຈ່າຍສ່ວນສິບ? (ເບິ່ງ “ສາດສະດາມາລາກີ” ໃນ ເລື່ອງພຣະຄຳພີເດີມ, 171–72; “First Things First!” [ວິດີໂອ], ຫ້ອງສະໝຸດພຣະກິດຕິຄຸນ ນຳອີກ).

0:58
Malachi the Prophet

1:18
First Things First!
ຂະນະທີ່ພວກທ່ານອ່ານ ມາລາກີ 3:10 ນຳກັນ, ທ່ານສາມາດເຊື້ອເຊີນລູກໆຂອງທ່ານໃຫ້ຢືນຢູ່ໃກ້ປ່ອງຢ້ຽມ ເມື່ອທ່ານອ່ານຄຳວ່າ “ປະຕູສະຫວັນ.” ຫລື ທ່ານສາມາດເທນ້ຳໃສ່ຈອກ ຈົນກວ່າມັນຈະລົ້ນອອກ ເພື່ອສາທິດວະລີ “ຈົນບໍ່ມີຫ້ອງໃສ່ໄວ້ໃນເຮືອນ.” ບອກລູກໆກ່ຽວກັບພອນທີ່ພຣະເຈົ້າໄດ້ປະທານໃຫ້ທ່ານ ເມື່ອທ່ານຈ່າຍສ່ວນສິບ. ລູກໆຂອງທ່ານສາມາດແຕ້ມຮູບທີ່ເປັນຕົວແທນໃຫ້ກັບພອນເຫລົ່ານີ້ ແລະ ຕິດມັນໄວ້ທີ່ ຫລື ໃກ້ປ່ອງຢ້ຽມໃນເຮືອນຂອງທ່ານ.

ມາລາກີ 4:5–6

ເອລີຢາໄດ້ມາເພື່ອຫັນຫົວໃຈຂອງເຮົາໄປຫາຄອບຄົວຂອງເຮົາ.

ໃນ ມາລາກີ 4:5–6, ລູກໆຂອງທ່ານສາມາດຊອກຫາຄຳຕອບໃຫ້ກັບຄຳຖາມຕໍ່ໄປນີ້ ກ່ຽວກັບຄຳທຳນາຍຂອງມາລາກີ: ພຣະຜູ້ເປັນເຈົ້າສັນຍາວ່າຈະສົ່ງ ຜູ້ໃດ ມາ? ພຣະອົງໄດ້ກ່າວວ່າ ບຸກຄົນນີ້ຈະມາ ເມື່ອໃດ? ພຣະຜູ້ເປັນເຈົ້າໄດ້ກ່າວວ່າ ບຸກຄົນນີ້ຈະເຮັດ ສິ່ງໃດ? ເປັນຫຍັງ ບຸກຄົນນີ້ຈຶ່ງຈຳເປັນຕ້ອງມາ? ຄຳທຳນາຍໄດ້ເກີດເປັນຈິງຢູ່ ບ່ອນໃດ (ເບິ່ງ ຄຳສອນ ແລະ ພັນທະສັນຍາ 110:13–16).
ໃນການຊອກຫາວ່າ ຄຳສັນຍາຢູ່ໃນ ມາລາກີ 4:5 ໄດ້ເກີດເປັນຈິງ, ທ່ານສາມາດທົບທວນ “ໂຈເຊັບ ແລະ ອໍລີເວີໄດ້ຮັບຂໍກະແຈຂອງຖານະປະໂລຫິດ” ໃນ ເລື່ອງຄຳສອນ ແລະ ພັນທະສັນຍາ, 26–30 ນຳອີກ. ເພງເຊັ່ນ “The Hearts of the Children” (Children’s Songbook, 92) ສາມາດຊ່ວຍລູກໆຂອງທ່ານຮຽນຮູ້ວ່າເປັນຫຍັງມັນຈຶ່ງສຳຄັນຫລາຍທີ່ເອລີຢາໄດ້ມາ. ທ່ານກໍສາມາດເຂົ້າໄປທີ່ FamilySearch.org/discovery, FamilySearch Tree app, ຫລື ຄອບຄົວຂອງຂ້ອຍ ປຶ້ມນ້ອຍ ສຳລັບກິດຈະກຳທີ່ສາມາດຊ່ວຍທ່ານ ແລະ ລູກໆຂອງທ່ານຫັນຫົວໃຈຂອງພວກທ່ານມາຫາບັນພະບຸລຸດຂອງພວກທ່ານ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຜູ້ຍິງກຳລັງແກວ່ງຜ້າແພມົນສີຂາວ — Mourning’s Hosanna [ໂຮຊັນນາຂອງນາງໂມນນິງ], ໂດຍ ໂຣດສ໌ ເດທ໊ອກ ດອລ໌. ຜູ້ຍິງຊື່ໂມນນິງຢືນຢູ່ໃນໂລກວິນຍານ, ຫຸ້ມລ້ອມໄປດ້ວຍບັນພະບຸລຸດຂອງນາງ. ນາງສະເຫລີມສະຫລອງການປົດປ່ອຍຂອງເຂົາເຈົ້າຈາກການຈ່ອງຈຳທາງວິນຍານ.

ໜ້າກິດຈະກຳປະຖົມໄວ: ພຣະຜູ້ເປັນເຈົ້າອວຍພອນເຮົາ ເມື່ອເຮົາຈ່າຍສ່ວນສິບ — Mourning’s Hosanna [ໂຮຊັນນາຂອງນາງໂມນນິງ], ໂດຍ ໂຣດສ໌ ເດທ໊ອກ ດອລ໌. ຜູ້ຍິງຊື່ໂມນນິງຢືນຢູ່ໃນໂລກວິນຍານ, ຫຸ້ມລ້ອມໄປດ້ວຍບັນພະບຸລຸດຂອງນາງ. ນາງສະເຫລີມສະຫລອງການປົດປ່ອຍຂອງເຂົາເຈົ້າຈາກການຈ່ອງຈຳທາງວິນຍານ.