“ວັນທີ 7–13 ເດືອນທັນວາ. ‘ສັກສິດແດ່ພຣະຜູ້ເປັນເຈົ້າ’: ຮັກກາຍ 1–2; ເຊກາຣີຢາ 1–4; 7–14,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 7–13 ເດືອນທັນວາ. ‘ສັກສິດແດ່ພຣະຜູ້ເປັນເຈົ້າ,’” ຈົ່ງຕາມເຮົາມາ: ພຣະຄຳພີເດີມ 2026

ພຣະວິຫານລາອີເອ ຮາວາຍ

ວັນທີ 7–13 ເດືອນທັນວາ: “ສັກສິດແດ່ພຣະຜູ້ເປັນເຈົ້າ”

ຮັກກາຍ 1–2; ເຊກາຣີຢາ 1–4; 7–14

ຫລັງຈາກຫລາຍທົດສະວັດຂອງການເປັນຊະເລີຍ, ຊາວອິດສະຣາເອນກຸ່ມໜຶ່ງ, ບາງທີລວມທັງສາດສະດາຮັກກາຍ ແລະ ສາດສະດາເຊກາຣີຢາ, ໄດ້ຖືກອະນຸຍາດໃຫ້ກັບໄປເມືອງເຢຣູຊາເລັມ. ບາງຄົນຢູ່ໃນກຸ່ມນີ້ຍັງຈື່ວ່າພຣະວິຫານເຄີຍເປັນຈັ່ງໃດ ກ່ອນມັນຖືກທຳລາຍ. ຕໍ່ຜູ້ທີ່ສົງໄສວ່າມັນຈະ “ສະຫງ່າງາມຄືພຣະວິຫານຄັ້ງທຳອິດ” ຂອງພຣະຜູ້ເປັນເຈົ້າຫລືບໍ່ (ຮັກກາຍ 2:3), ຮັກກາຍໄດ້ກ່າວພຣະຄຳຂອງພຣະຜູ້ເປັນເຈົ້າ ທີ່ໃຫ້ກຳລັງໃຈວ່າ: “ຢ່າສູ່ໃຫ້ຜູ້ໃດທໍ້ຖອຍໃຈ, ພຣະຜູ້ເປັນເຈົ້າໄດ້ກ່າວ, ແລະ ຈົ່ງເຮັດວຽກ: ເພາະເຮົາຈະຢູ່ກັບພວກເຈົ້າ, … ຢ່າສູ່ຢ້ານ.” “ມັນຈະສະຫງ່າງາມ, … ແລະ ເຮົາຈະໃຫ້ສະຖານທີ່ແຫ່ງນີ້ມີສັນຕິສຸກ” (ຮັກກາຍ 2:4–5, 7, 9).

ບໍ່ແມ່ນພຽງແຕ່ພຣະວິຫານສັກສິດເທົ່ານັ້ນທີ່ຕ້ອງໄດ້ສ້າງຂຶ້ນໃໝ່. ໃນຫລາຍວິທີທາງ, ຜູ້ຄົນຂອງພຣະເຈົ້າກໍຖືກທຳລາຍທາງວິນຍານຄືກັນ. ແລະ ການສ້າງຜູ້ຄົນໃຫ້ບໍລິສຸດຄືນໃໝ່ ຕ້ອງເຮັດຫລາຍກວ່າການຕັດກ້ອນຫີນ ແລະ ລຽນມັນໃສ່ກັນເພື່ອສ້າງບ້ານສັກສິດເທົ່ານັ້ນ. ມັນໝາຍເຖິງຄຳຈາລຶກ “ສັກສິດແດ່ພຣະຜູ້ເປັນເຈົ້າ” ບໍ່ແມ່ນມີພຽງແຕ່ຢູ່ເທິງຝາພຣະວິຫານ, ຫລື ແມ່ນແຕ່ຢູ່ເທິງ “ລະຄັງມ້າ” ແລະ “ໝໍ້ທຸກໜ່ວຍໃນເຢຣູຊາເລັມ” ເທົ່ານັ້ນ (ເຊກາຣີຢາ 14:20–21). ມັນຕ້ອງຖືກຈາລຶກໄວ້ໃນທຸກຫົວໃຈນຳອີກ.

ສຳລັບພາບລວມຂອງພຣະທຳຮັກກາຍ ແລະ ເຊກາຣີຢາ, ໃຫ້ເບິ່ງ “ຮັກກາຍ” ແລະ “ເຊກາຣີຢາ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຮັກກາຍ 1; 2:1–9

“ພິຈາລະນາທິດທາງຂອງທ່ານ.”

ມີຫລາຍສິ່ງທີ່ສຳຄັນທີ່ຈະເຮັດ ເພື່ອສ້າງສາເມືອງເຢຣູຊາເລັມຄືນໃໝ່. ແຕ່ຫລັງຈາກ 15 ປີ ນັບແຕ່ຊາວອິດສະຣາເອນໄດ້ກັບຄືນມາ, ພຣະຜູ້ເປັນເຈົ້າບໍ່ພໍພຣະໄທທີ່ເຫັນວ່າ ການສ້າງພຣະວິຫານບໍ່ມີຄວາມສຳຄັນອັນດັບສູງກວ່າ (ເບິ່ງ ຮັກກາຍ 1:2–5; ເບິ່ງ ເອຊະຣາ 4:24 ນຳອີກ). ຂະນະທີ່ທ່ານອ່ານ ຮັກກາຍ 1; 2:1–9, ໃຫ້ພິຈາລະນາຄຳຖາມດັ່ງເຊັ່ນ:

ຜົນສະທ້ອນຢ່າງໃດແດ່ທີ່ຊາວອິດສະຣາເອນປະເຊີນ ຍ້ອນວ່າພວກເຂົາບໍ່ໄດ້ສຳເລັດການສ້າງພຣະວິຫານ?
ພອນຢ່າງໃດແດ່ທີ່ພຣະຜູ້ເປັນເຈົ້າໄດ້ສັນຍາກັບພວກເຂົາ ຖ້າຫາກພວກເຂົາສຳເລັດການສ້າງບ້ານຂອງພຣະອົງ?
ຂ່າວສານຂອງພຣະຜູ້ເປັນເຈົ້າເຖິງທ່ານໃນ ຮັກກາຍ 1:5–7 ແມ່ນຫຍັງ? ທ່ານຈະສາມາດຈັດລຳດັບຄວາມສຳຄັນຂອງທ່ານໃຫ້ສອດຄ່ອງກັບຂອງພຣະຜູ້ເປັນເຈົ້າໄດ້ແນວໃດ? ທ່ານໄດ້ຮັບພອນເມື່ອໃດສຳລັບການໃຫ້ພຣະເຈົ້າເປັນອັນດັບແລກໃນຊີວິດຂອງທ່ານ?

ໄພ່ພົນຍຸກສຸດທ້າຍສະໄໝເລີ່ມຕົ້ນໄດ້ປະເຊີນກັບສະຖານະການທີ່ຄ້າຍຄືກັນກັບຊາວອິດສະຣາເອນໃນສະໄໝຂອງຮັກກາຍໄດ້ປະເຊີນ (ເບິ່ງ ຄຳສອນ ແລະ ພັນທະສັນຍາ 95). ທ່ານຮຽນຮູ້ຫຍັງແດ່ຈາກສອງຂໍ້ເຫລົ່ານີ້ກ່ຽວກັບຄວາມຮູ້ສຶກຂອງພຣະຜູ້ເປັນເຈົ້າກ່ຽວກັບພຣະວິຫານ?

ເບິ່ງ Dale G. Renlund, “Jesus Christ Is the Treasure,” Liahona, Nov. 2023, 96–99; Terence M. Vinson, “True Disciples of the Savior,” Liahona, Nov. 2019, 9–11; “We Love Thy House, O God,” Hymns, no. 247; “Provo City Center Temple Completed” (ວິດີໂອ), ChurchofJesusChrist.org ນຳອີກ.

ເຊກາຣີຢາ 1–3; 7–8; 14

ພຣະຜູ້ເປັນເຈົ້າສາມາດເຮັດໃຫ້ເຮົາບໍລິສຸດ.

ໃນຄວາມຄິດເຫັນຂອງທ່ານ, ການມີຄຳວ່າ “ສັກສິດແດ່ພຣະຜູ້ເປັນເຈົ້າ” ສະຫລັກຢູ່ເທິງສິ່ງຂອງໃນຊີວິດປະຈຳວັນ ທີ່ໄດ້ກ່າວເຖິງໃນ ເຊກາຣີຢາ 14:20 ມີຄຸນຄ່າຫຍັງແດ່? (ເບິ່ງ ອົບພະຍົບ 28:36–38 ນຳອີກ). ຄຳນີ້ທີ່ຖືກສະຫລັກໄວ້ທີ່ພຣະວິຫານໃນປະຈຸບັນມີຄຸນຄ່າຫຍັງແດ່? ວະລີນີ້ມີຄວາມໝາຍຕໍ່ທ່ານແນວໃດ? ທ່ານຈະສາມາດເຮັດໃຫ້ຄວາມບໍລິສຸດເປັນສ່ວນໜຶ່ງໃນຊີວິດປະຈຳວັນຂອງທ່ານໄດ້ແນວໃດ? ໃຫ້ໄຕ່ຕອງຄຳຖາມເຫລົ່ານີ້ ຂະນະທີ່ທ່ານອ່ານຄຳເຊື້ອເຊີນຂອງພຣະຜູ້ເປັນເຈົ້າຕໍ່ຜູ້ຄົນຂອງພຣະອົງ ເພື່ອໃຫ້ກາຍເປັນຄົນບໍລິສຸດຫລາຍຂຶ້ນ ຢູ່ໃນ ເຊກາຣີຢາ 1:1–6; 3:1–7; 7:8–10; 8:16–17.

ທ່ານກໍຍັງສາມາດອ່ານ ເຊກາຣີຢາ 2:10–11; 8:1–8; 14:9–11, 20–21 ນຳອີກ ເພື່ອຮຽນຮູ້ວ່າ ຊີວິດຈະເປັນແບບໃດໃນອະນາຄົດ ເມື່ອເຮົາທຸກຄົນອາໄສຢູ່ກັບພຣະຜູ້ເປັນເຈົ້າ ໃນສະພາບທີ່ບໍລິສຸດ. ແມ່ນຫຍັງທີ່ປະທັບໃຈທ່ານກ່ຽວກັບພາບນິມິດຂອງເຊກາຣີຢາເຖິງອະນາຄົດຂອງເມືອງເຢຣູຊາເລັມ? ທ່ານພົບເຫັນຫຍັງແດ່ທີ່ທ່ານຢາກເຫັນຢູ່ໃນຊຸມຊົນຂອງທ່ານ? ທ່ານຈະສາມາດກຽມຕົວເພື່ອທີ່ຈະໃຊ້ຊີວິດໃນສະພາບທີ່ເຊກາຣີຢາບັນຍາຍໄວ້ໄດ້ແນວໃດ?

ພຣະເຢຊູກຳລັງສະເດັດເຂົ້າເມືອງເຢຣູຊາເລັມເທິງຫລັງລໍ — “ຈົ່ງເບິ່ງດູວ່າກະສັດຂອງພວກເຈົ້າກຳລັງມາ: ເພິ່ນມາຢ່າງຜູ້ມີໄຊ ແລະ ຢ່າງຜູ້ຍຸດຕິທຳດ້ວຍ ແຕ່ພັດຖ່ອມຕົວລົງມານັ່ງທີ່ເທິງຫລັງລໍ” (ເຊກາຣີຢາ 9:9). Triumphal Entry [ການເດີນເຂົ້າເມືອງຢ່າງຜູ້ມີໄຊ], ໂດຍ ແຮຣີ ແອນເດີສັນ

ເຊກາຣີຢາ 9:9–11; 11:12–13; 12:10; 13:6–7; 14:1–9

ພຣະເຢຊູຄຣິດຄືພຣະເມຊີອາທີ່ສັນຍາໄວ້.

ການຂຽນຫລາຍຢ່າງຂອງເຊກາຣີຢາຊີ້ໄປຫາທັງການປະຕິບັດສາດສະໜາກິດຂອງພຣະເຢຊູຄຣິດ ແລະ ການສະເດັດມາຄັ້ງທີສອງຂອງພຣະອົງໃນທີ່ສຸດນຳອີກ. ຂ້າງລຸ່ມແມ່ນຄຳທຳນາຍບາງສ່ວນຂອງເຊກາຣີຢາ, ພ້ອມດ້ວຍຂໍ້ພຣະຄຳພີທີ່ໄດ້ເກີດເປັນຈິງ. ຂະນະທີ່ທ່ານສຶກສາຂໍ້ພຣະຄຳພີເຫລົ່ານີ້, ໃຫ້ຖາມຕົວເອງວ່າ: ສິ່ງນີ້ສິດສອນເຮົາຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ?

ເຊກາຣີຢາ 9:9–11 (ເບິ່ງ ມັດທາຍ 21:1–11; 1 ເປໂຕ 3:18–19)
ເຊກາຣີຢາ 11:12–13 (ເບິ່ງ ມັດທາຍ 26:14–16; 27:1–7)
ເຊກາຣີຢາ 12:10 (ເບິ່ງ ໂຢຮັນ 19:37; ພຣະນິມິດ 1:7)
ເຊກາຣີຢາ 13:6–7; 14:1–9 (ເບິ່ງ ມັດທາຍ 26:31; ຄຳສອນ ແລະ ພັນທະສັນຍາ 45:47–53)

ທ່ານຄິດວ່າມັນຈະເປັນແນວໃດຖ້າຫາກໄດ້ຢູ່ທ່າມກາງຜູ້ຄົນທີ່ຕ້ອນຮັບພຣະເຢຊູເຂົ້າສູ່ເມືອງເຢຣູຊາເລັມ ດັ່ງທີ່ບັນຍາຍໄວ້ໃນ ເຊກາຣີຢາ 9:9–11? ທ່ານຈະສາມາດຕ້ອນຮັບພຣະອົງເຂົ້າສູ່ຊີວິດຂອງທ່ານ, ບ້ານຂອງທ່ານ, ແລະ ຊຸມຊົນຂອງທ່ານໄດ້ແນວໃດ?

ເບິ່ງ ຄູ່ມືພຣະຄຳພີ, “ພຣະເມຊີອາ,” ຫ້ອງສະໝຸດພຣະກິດຕິຄຸນ; “The Lord’s Triumphal Entry into Jerusalem” (ວິດີໂອ), ຫ້ອງສະໝຸດພຣະກິດຕິຄຸນ; Ronald A. Rasband, “Hosanna to the Most High God,” Liahona, May 2023, 108–12 ນຳອີກ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຮັກກາຍ 1:2–8

“ພິຈາລະນາທິດທາງຂອງທ່ານ.”

ຂະນະທີ່ທ່ານອ່ານພາກສ່ວນຂອງ ຮັກກາຍ 1:2–5 ກັບລູກໆຂອງທ່ານ, ໃຫ້ຊ່ວຍພວກເຂົາຊອກຫາວ່າ ເປັນຫຍັງພຣະຜູ້ເປັນເຈົ້າຈຶ່ງບໍ່ພໍພຣະໄທກັບຜູ້ຄົນ. ບາງທີລູກໆຂອງທ່ານສາມາດເລືອກວະລີໃດໜຶ່ງຈາກ ຂໍ້ທີ 6 ແລະ ແຕ້ມຮູບກ່ຽວກັບມັນ. ພວກເຂົາສາມາດສະແດງໃຫ້ກັນແລະກັນເບິ່ງ ແລະ ເດົາວ່າແຕ່ລະຮູບເປັນຕົວແທນໃຫ້ຫຍັງ. ເມື່ອເຮົາໃຊ້ເວລາກັບສິ່ງທີ່ນອກເໜືອໄປຈາກສິ່ງທີ່ພຣະຜູ້ເປັນເຈົ້າຕ້ອງການ, ນັ້ນກໍເໝືອນກັບການກິນແຕ່ບໍ່ອີ່ມ ແມ່ນຫລືບໍ່? ພວກທ່ານອາດເວົ້າລົມກັນກ່ຽວກັບວ່າຈະຈັດເວລາໃຫ້ກັບສິ່ງທີ່ສຳຄັນຕໍ່ພຣະຜູ້ເປັນເຈົ້າໄດ້ແນວໃດ.
ທ່ານກໍສາມາດອ່ານ ຂໍ້ທີ 8 ໃຫ້ລູກໆຂອງທ່ານຟັງນຳອີກ ແລະ ເຊື້ອເຊີນພວກເຂົາໃຫ້ທຳທ່າ “ຂຶ້ນໄປເທິງພູ,” “ເອົາໄມ້ມາ,” ແລະ “ສ້າງບ້ານ [ຂອງພຣະຜູ້ເປັນເຈົ້າ].” ລູກໆຂອງທ່ານສາມາດຂຽນລາຍການກ່ຽວກັບສິ່ງທີ່ພວກເຂົາເຮັດໃນແຕ່ລະວັນ, ລວມທັງສິ່ງທີ່ພຣະຜູ້ເປັນເຈົ້າໄດ້ຂໍໃຫ້ພວກເຂົາເຮັດ. ຂໍໃຫ້ລູກໆຂອງທ່ານ “ພິຈາລະນາທິດທາງ [ຂອງພວກເຂົາ]” ໂດຍການຂີດອ້ອມສິ່ງທີ່ພຣະຜູ້ເປັນເຈົ້າອາດກ່າວວ່າເປັນສິ່ງສຳຄັນທີ່ສຸດ ຢູ່ໃນລາຍການຂອງພວກເຂົາ.

ການສິດສອນແບບໃຫ້ບ້ານເປັນສູນກາງ. ປະທານຣະໂຊ ເອັມ ແນວສັນ ໄດ້ສິດສອນວ່າ ບ້ານເຮືອນຄວນເປັນ “ສູນກາງການຮຽນຮູ້ພຣະກິດຕິຄຸນ” (“Becoming Exemplary Latter-day Saints,” Liahona, Nov. 2018, 113). ຂະນະທີ່ຄອບຄົວຂອງທ່ານສຶກສາຄຳແນະນຳຂອງຮັກກາຍໃຫ້ “ພິຈາລະນາທິດທາງຂອງທ່ານ,” ພວກທ່ານສາມາດເວົ້າລົມກ່ຽວກັບການໃຫ້ພຣະເຈົ້າເປັນອັນດັບແລກໃນຊີວິດຄອບຄົວຂອງພວກທ່ານ.

ເຊກາຣີຢາ 3:1–7

ການເຮັດ ແລະ ການຮັກສາພັນທະສັນຍາສາມາດຊ່ວຍໃຫ້ເຮົາເປັນເໝືອນພຣະບິດາເທິງສະຫວັນ ແລະ ພຣະເຢຊູຄຣິດຫລາຍຂຶ້ນ.

ໃນພາບນິມິດ, ເຊກາຣີຢາໄດ້ເຫັນມະຫາປະໂລຫິດຜູ້ໜຶ່ງທີ່ “ນຸ່ງເສື້ອຜ້າອັນເປິເປື້ອນ” (ເຊກາຣີຢາ 3:3). ທູດສະຫວັນໄດ້ມອບເສື້ອຜ້າທີ່ສະອາດໃຫ້ເພິ່ນ. ທ່ານສາມາດຊ່ວຍລູກໆຂອງທ່ານຄົ້ນພົບຄວາມຈິງທີ່ສຳຄັນ ໂດຍການອ່ານ ເຊກາຣີຢາ 3:1–7 ນຳກັນ ແລະ ເວົ້າລົມກ່ຽວກັບວ່າ ເສື້ອຜ້າອັນເປິເປື້ອນ ແລະ ເສື້ອຜ້າທີ່ສະອາດ ໝາຍເຖິງຫຍັງ. ເຮົາຈະສະອາດຈາກບາບຂອງເຮົາໄດ້ແນວໃດ, ແມ່ນແຕ່ຫລັງຈາກໄດ້ຮັບບັບຕິສະມາແລ້ວ? ພັນທະສັນຍາແຫ່ງການບັບຕິສະມາຂອງເຮົາຊ່ວຍໃຫ້ເຮົາ “ດຳເນີນຕາມທາງ [ຂອງພຣະຜູ້ເປັນເຈົ້າ]” ໄດ້ແນວໃດ?
ທ່ານ ແລະ ລູກໆຂອງທ່ານສາມາດເບິ່ງຮູບພາບບັບຕິສະມາ, ເຊັ່ນຮູບພາບໃນໂຄງຮ່າງນີ້. ເປັນຫຍັງເຮົາຈຶ່ງນຸ່ງຊຸດຂາວຕອນເຮົາຮັບບັບຕິສະມາ? ພວກທ່ານກໍສາມາດຮ້ອງເພງກ່ຽວກັບການບັບຕິສະມານຳອີກ, ເຊັ່ນ “When I Am Baptized” (Children’s Songbook, 103); ເພງນີ້ສິດສອນຫຍັງແດ່ກ່ຽວກັບວ່າ ເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ເຮົາຮັບບັບຕິສະມາ?

ພໍ່ກຳລັງໃຫ້ບັບຕິສະມາແກ່ລູກສາວຂອງລາວໃນແມ່ນ້ຳ

ເຊກາຣີຢາ 9:9–11; 11:12; 13:6–7

ພຣະເຢຊູຄຣິດຄືພຣະເມຊີອາທີ່ສັນຍາໄວ້.

ລູກໆຂອງທ່ານອາດຢາກຈິນຕະນາການເຖິງເຫດການທີ່ບອກລ່ວງໜ້າໃນ ເຊກາຣີຢາ 9:9, ກ່ຽວກັບຕອນທີ່ພຣະເຢຊູສະເດັດເຂົ້າສູ່ເມືອງເຢຣູຊາເລັມ ລະຫວ່າງອາທິດສຸດທ້າຍຂອງພຣະຊົນຊີບໃນຊ່ວງມະຕະຂອງພຣະອົງ. ເພື່ອຊ່ວຍໃນເລື່ອງນີ້, ໃຫ້ສະແດງຮູບພາບຂອງເຫດການນັ້ນໃຫ້ພວກເຂົາເບິ່ງ, ເຊັ່ນອັນທີ່ຢູ່ໃນໂຄງຮ່າງນີ້. ທ່ານກໍສາມາດເລົ່າເລື່ອງ “ພຣະຜູ້ຊ່ວຍໃຫ້ລອດໄປເມືອງເຢຣູຊາເລັມ” (ໃນ ເລື່ອງພຣະຄຳພີໃໝ່, 110–12) ໃຫ້ພວກເຂົາຟັງນຳອີກ. ລູກໆຂອງທ່ານສາມາດຊີ້ໃສ່ຜູ້ຄົນຢູ່ໃນຮູບພາບທີ່ “[ປິຕິຍິນດີຫລາຍ].” ແມ່ນໃຜຄືກະສັດໃນ ເຊກາຣີຢາ 9:9? ເປັນຫຍັງເຮົາຈຶ່ງຂອບພຣະໄທສຳລັບພຣະອົງ?

1:35
Chapter 44: The Savior Goes to Jerusalem
ໃຫ້ພິຈາລະນາທີ່ຈະຊ່ວຍລູກໆຂອງທ່ານປຽບທຽບຄຳທຳນາຍຈາກເຊກາຣີຢາໃສ່ກັບຂໍ້ພຣະຄຳພີໃນພຣະຄຳພີໃໝ່ ທີ່ບັນຍາຍເຖິງການເກີດເປັນຈິງຂອງຂໍ້ເຫລົ່ານັ້ນ. ຕໍ່ໄປນີ້ແມ່ນບາງຕົວຢ່າງ: ເຊກາຣີຢາ 9:9 ແລະ ມັດທາຍ 21:5–9; ເຊກາຣີຢາ 9:11 ແລະ 1 ເປໂຕ 3:18–19; ເຊກາຣີຢາ 11:12 ແລະ ມັດທາຍ 26:14–16; ເຊກາຣີຢາ 13:7 ແລະ ມັດທາຍ 26:31. ເຮົາຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດຈາກຂໍ້ເຫລົ່ານີ້?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ເຄື່ອງໝາຍຢູ່ເທິງພຣະວິຫານ ທີ່ອ່ານວ່າ “ສັກສິດແດ່ພຣະຜູ້ເປັນເຈົ້າ” ແລະ “ບ້ານຂອງພຣະຜູ້ເປັນເຈົ້າ” ໃນຫລາຍພາສາ — “ສັກສິດແດ່ພຣະຜູ້ເປັນເຈົ້າ” ປະກົດຢູ່ທີ່ພຣະວິຫານທຸກແຫ່ງ.

ໜ້າກິດຈະກຳປະຖົມໄວ: ພຣະເຢຊູຄຣິດສາມາດເຮັດໃຫ້ວິນຍານຂອງເຮົາສະອາດໄດ້ — “ສັກສິດແດ່ພຣະຜູ້ເປັນເຈົ້າ” ປະກົດຢູ່ທີ່ພຣະວິຫານທຸກແຫ່ງ.