Kim, Taaqehin
21–27 diciembre. A’an a’in li xoo’oyb’enink wi’, ut a’an tooxkol: Li Ralankil

“21–27 diciembre. A’an a’in li xoo’oyb’enink wi’, ut a’an tooxkol: Li Ralankil,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)

“21–27 diciembre. A’an a’in li xoo’oyb’enink wi’, ut a’an tooxkol,” Kim, Taaqehin: Li Najter Chaq’rab’ 2026

li k’uula’al Jesus nawar

For unto Us a Child Is Born [Xb’aan naq yo’lajenaq choq’ qe jun li k’uula’al], xb’aan laj Simon Dewey

21–27 diciembre: A’an a’in li xoo’oyb’enink wi’, ut a’an tooxkol

Li Ralankil

Wan sa’ li Najter Chaq’rab’ jun musiq’ej re yo’onink. A’an chanchan li Ralankil. Chalen chaq laj Adan ut li xEva, eb’ li najter yuwa’b’ej, profeet, aj tz’iib’anel, ut komon sa’ li Najter Chaq’rab’ ke’ilok chi uub’ej chixyo’oninkileb’ li kutan q’axal chaab’ileb’, chi wankeb’ royb’enihom chirix lix kolb’aleb’ xb’aan li Mesias. Ut eb’ laj Israelita k’a’jo’ naq ke’raj ru li yo’onink a’an—naq ke’wan chi preexil aran Egipto ut Babilonia, malaj chi preexil xb’aan xmaakeb’ ut xpo’jikeb’ xch’ool. Ut sa’ chixjunil, eb’ li profeet ke’xjultika reheb’ naq li Mesias, jun aj Kolol reheb’, taachalq re “xpuktesinkil resil li kolb’a-ib’ reheb’ li wankeb’ sa’ tz’alam” (Isaias 61:1).

Kixtz’aqob’resi rib’ lix yo’onihomeb’ naq kiyo’la li Jesukristo sa’ Belen. Li nimla aj Kolol re Israel kiyo’la sa’ xna’ajeb’ li xul ut kiyokob’aak sa’ xwaleb’aal li xul (chi’ilmanq Lukas 2:7). A’ut, moko k’a’aj ta wi’ tixkoleb’ laj Israelita re najter kutan. Kichal chakolb’al—kiriiqani lix rahil aach’ool, kixk’am xrahil laa waam, kitene’ sa’ xkab’a’ laa maa’usilal, re naq rik’in li rapleek kixk’ul a’an, tatk’irtesiiq (chi’ilmanq Isaias 53:4–5). Xb’aan a’in naq nujenaq li Ralankil rik’in sahil yo’onink sa’ ajwi’ li kutan a’in. Li Mesias kichal numenaq 2000 chihab’ chaq, a’ut toj nachal sa’ li qayu’am naq naqasik’ ru.

reetalil li tzolok

Li na’leb’ re tzolok sa’ li ochoch ut sa’ li iglees

reetalil li seminario
Nasaho’ inch’ool chirix laj Tojol wix.

Li Ralankil a’an xq’ehil li sahil ch’oolejil b’antiox re li sahil ch’oolejil kixk’e li Jesukristo re li ruchich’och’. K’iila cient chihab’ ma nayo’la li Kolonel, eb’ li profeet sa’ li Najter Chaq’rab’ ke’saho’ ajwi’ xch’ool naq ke’aatinak chirix li Mesias li taachalq. Il junjunq reheb’ li raqal a’in, ut k’oxla k’a’ut naq aajel raj ruheb’ choq’ reheb’ li ke’yo’onin re lix k’anjel li Kolonel: Salmos 35:9; Isaias 25:8–9; 44:21–24; 51:11; Sofonias 3:14–20; Moises 5:5–11. K’a’ut naq ninqeb’ xwankil li raqal a’in choq’ aawe? K’a’ru naru nasaho’ wi’ qach’ool jo’ neke’xye li raqal a’in?

Chi’ilmanq ajwi’ Dallin H. Oaks, “Jun chaab’il esilal, ut a’an jun xnimal sahil ch’oolej” (Ch’utam re Ralankil re li Xb’eenil Awa’b’ejil, 4 diciembre, 2022), Biblioteca del Evangelio; “Sahaq eechʼool, li Qaawaʼ xchal,” Eb’ li B’ich, 123.

jun lemtz’il chahim chiru li choxa sa’ q’ojyin

Eb’ li eetalil nikine’xtenq’a chixk’oxlankil li Jesukristo.

Naab’al li nab’aanuman sa’ li Ralankil naru taawanq jo’ reetalil li Kristo. Naq xawil li Najter Chaq’rab’ chiru li chihab’ a’in, maare xak’e reetal k’iila reetalil li Kolonel. Tz’iib’anb’il wiib’ oxib’ reheb’ arin. Maare taawileb’ a’in ut taatz’iib’a li neke’xk’ut chawu chirix li Kolonel.

  • Chahim (Numeros 24:17; Mateo 2:2; Apokalipsis 22:16).

  • Aj ilol karneer (Salmos 23; Lukas 15:4–7; Jwan 10:11)

  • Karneer (Genesis 22:8; Exodo 12:5; 1 Pedro 1:18–20).

  • Ha’ (Exodo 17:1–6; Jeremias 2:13; Esekiel 47:1–12; Jwan 4:7–14).

  • Pek (1 Samuel 2:2; 2 Samuel 22:2–3; Salmos 118:22–23; Isaias 28:16; Efesios 2:20).

  • Ruq’ li che’ (Isaias 11:1–2; Jeremias 23:5; 33:15).

  • Saqen (Salmos 27:1; Isaias 9:2; 60:19; Mikeas 7:8; Jwan 8:12).

K’a’ chik li eetalil, raqal, ut seraq’ xataw sa’ li loq’laj hu li neke’xch’olob’ xyaalal li Jesukristo?

Chi’ilmanq ajwi’ 2 Nefi 11:4; Mosiah 3:14–15; Moises 6:63; “Eb’ li eetalil malaj li jaljookil ru aatin chirix li Kristo” ut “Jesukristo,” sa’ li K’utul Raqal reheb’ li Loq’laj Hu (Biblioteca del Evangelio).

“Ut tixk’ab’a’in: Xnimal ru aj k’ehol na’leb’.”

K’iheb’ lix k’ab’a’ li Jesukristo. Sik’eb’ li k’ab’a’ej sa’eb’ li raqal a’in: Salmos 23:1; 83:18; Isaias 7:14; 9:6; 12:2; 63:16; Amos 4:13; Sakarias 14:16; Moises 7:53. Ma wan xkomoneb’ chik li k’ab’a’ej nakanaw? Maare taawulaq chawu xtz’iib’ankil xk’ab’a’eb’ li Jesukristo li nakataw sa’eb’ li b’ich chirix li Ralankil. Chan ru naq li junjunq xk’ab’a’ naxk’e laa na’leb’ chirix a’an?

Naru nakasik’ ru junaq reheb’ lix k’ab’a’ malaj xk’anjel li Kolonel li tatxtenq’a chixjultikankil a’an chiru li chihab’ chal re.

Chi’ilmanq ajwi’ Quentin L. Cook, “Tuqtuukilal sa’eb’ li ch’a’ajkil kutankil,” Jolomil ch’utub’aj-ib’ re octubre 2021; “Ab’i! xbʼichebʼ li anjel,” Eb’ li B’ich, 132.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

reetalil li raqal reheb’ li kok’al

Li na’leb’ re xtzolb’aleb’ li kok’al

Li Najter Chaq’rab’ nikinixtzol chirix li Jesus.

  • Maare laa’at ut eb’ laa kok’al wan junjunq eerutz’u’uj re Ralankil li naru nekeroksi re aatinak chirix li Jesukristo. Maare naru nekeye chan ru naq jun chahim re Ralankil, jun saqen, malaj jun maatan naxjultika li Kolonel qe. Chirix a’an naru nekesik’ sa’ jun malaj sa’ junjunq reheb’ li raqal a’in junaq k’a’aq re ru nareetali li Jesukristo: Genesis 22:8; Numeros 24:17; Salmos 23:1; 27:1. Eb’ laa kok’al maare te’ruuq chixk’utb’al jun jalam-uuch malaj jun utz’u’uj li naxk’am rib’ rik’in li junjunq chi raqal naq te’ril. Chan ru naq li Jesus chanchan chik jun karneer, chahim, aj ilol karneer, malaj saqen? Naru nekeb’icha jun li b’ich re Ralankil, jo’ “Saʼ choxa xlemtzʼun taqʼa” (B’ichleb’aal choq’ reheb’ li Kok’al, 24).

  • Eb’ laa kok’al naru ajwi’ neke’ril li jalam-uuch sa’ xraqik li tusleb’ aatin a’in naq taayaab’asi Isaias 9:6 reheb’. Patz’ reheb’ laa kok’al naq te’xk’ut li k’uula’al Jesus naq te’rab’i li ch’ol aatin “nayo’la jun k’uula’al.” Wotz lix nawom aach’ool naq eb’ li profeet re li Najter Chaq’rab’ ke’xnaw naq taayo’laaq.

  • Naq taakawresi aawib’ re tzolok chirix lix yu’am li Jesukristo sa’ li Ak’ Chaq’rab’ sa’ li chihab’ chal re, naru nakat-aatinak rik’ineb’ laa kok’al chirix li xetzol chirix li Kolonel sa’ li Najter Chaq’rab’ chiru li chihab’ a’in. Naru taawileb’ li tusleb’ aatin sa’ li hu a’in ut li xatz’iib’a re taajultiko’q aawe li xatzol. Eb’ li kok’al toj kok’eb’ maare taawulaq chiruheb’ rilb’al li hu Eb’ li Esilal sa’ li Najter Chaq’rab’ malaj eb’ li jalam-uuch sa’ Kim, Taaqehin. Ma wan li profeetil aatin malaj seraq’ li xe’wulak chiqu? K’a’ru xqatzol chirix li Kolonel?

Li nab’aanuman sa’ li Ralankil naru taareetali li Jesukristo.

  • Ke’wan li k’anjel ke’xb’aanu li junkab’al aj Israelita, jo’ li Paswa ut xkomon chik li ninq’e, li ke’jayalin xch’ooleb’ ut xk’a’uxleb’ rik’in li Qaawa’ (chi’ilmanq Exodo 12). K’a’ru nakab’aanu laa’at ut eb’ laa kok’al sa’ li Ralankil li nekexxtenq’a chixjayalinkil eerib’ rik’in li Jesukristo? K’a’ru ke’xb’aanu lee xe’toonil? Naru tat-aatinaq rik’ineb’ laa kok’al chirix li teeraj xb’aanunkil sa’eb’ li Ralankil chalel. Maare texk’anjelaq chiru li ani wan sa’ rajom ru, maare teesik’ k’a’ru teek’e re li Kolonel jo “maatan,” maare teeb’oq junaq eeramiiw chirilb’al li Ch’utam re Ralankil re li Xb’eenil Awa’b’ejil (broadcasts.ChurchofJesusChrist.org), maare teetz’iib’a junaq eeb’ich chirix li Ralankil, malaj teek’uub’ chan ru xwotzb’al chi chaab’il li resil lix yo’lajik li Kristo.

Sa’ li ochoch, tzolok ut yu’amink ink’a’ jachb’ileb’ ru. “Li evangelio nim xwankil sa’ li ochoch. Eb’ li komon aawochb’eeneb’ chixtzolb’al li evangelio a’aneb’ li kristiaan li taayu’ami wi’—rajlal kutan. Chi yaal naq sa’ xk’ihal li hoonal, xyu’aminkil li evangelio naraj naxye chan ru naq naqatzol li evangelio. Naq nakatzol ut nakak’ut li evangelio sa’ li ochochnal, sik’ chan ru xjuntaq’eetankil li yookat chixtzolb’al rik’in li yookat chixb’aanunkil. K’anab’ naq sa’ laa junkab’al li evangelio a’anaq li taayal aaq’e chixyu’aminkil, ink’a’ ka’ajwi li tat-aatinaq wi’” (Li K’utuk jo’ li Kolonel, 31).

li Yo’lajik

Xjalam-uuch li Yo’lajik, xb’aan laj Ethan Brown

Li qaChoxahil Yuwa’ xmaatani we li Ralal re taawanq choq’ aj Kolol we.

  • Chan ru naru taatenq’aheb’ laa kok’al chireek’ankil li oxloq’ ut li sahil ch’oolejil chirix lix yo’lajik li Kristo? Naru teeril li video “El Niño Jesús” (Biblioteca del Evangelio) malaj teeril Mateo 1:18–25; 2:1–12; Lukas 1:26–38; 2:1–20. Li junjunq chi kok’al naru tixsik’ ru jun kristiaan sa’ li video malaj li seraq’, ut te’xye k’a’ru kireek’a li kristiaan a’an chirix li Kolonel. Chirix a’an naru nekewotz cherib’il eerib’ lee reek’ahom chirix li Kolonel.

    17:57

    The Christ Child

  • Maare laa’at ut eb’ laa kok’al tex’aatinaq chirixeb’ li maatan eek’ulum chiru xnumikeb’ li chihab’ li naxk’e xsahil eech’ool. Chirix a’an naru nekeril Isaias 25:9 ut teeye k’a’ut naq nasaho’ eech’ool xb’aan naq li qaChoxahil Yuwa’ kixtaqla chaq jun aj Kolonel. Re xtenq’ankileb’ laa kok’al chixtawb’al ru chi us lix k’anjel li Jesukristo jo’ li qaKolonel, patz’ reheb’ naq te’ril Isaias 25:8–9; 53:3–5; ut Oseas 13:14. K’a’ru neke’xk’ut chiqu li raqal a’in chirix li qakolb’al xb’aan li Kolonel?

  • Naru ajwi’ nekeb’icha jun li b’ich re Ralankil, jo’ “Saʼ xwaʼlebʼaal xul” (B’ichleb’aal choq’ reheb’ li Kok’al, 26–27) malaj “At chʼina tenamit Belen” (Eb’ li B’ich, 130). Tenq’aheb’ laa kok’al chixtawb’aleb’ ch’ol aatin sa’ li b’ich li taatenq’anq reheb’ chixnawb’al naq neke’rahe’ xb’aan li qaChoxahil Yuwa’ ut li Jesukristo.

Re xtawb’al xkomon chik li na’leb’, chi’ilmanq li hu Amigos re li po a’in.

li Yo’lajik

The Nativity [Li Yo’lajik], xb’aan laj N. C. Wyeth

Perel re kok’ k’anjel reheb’ li kok’al: Li Najter Chaq’rab’ nikinxtzol chirix li Jesus