Paskua

Maam-ammo ti Paskua a maysa a naragsak a panawen gapu iti rag-o nga isangbay ni Jesucristo iti lubong. Adu a siglo sakbay a nayanak ti Mangisalakan, narikna met dagiti propeta iti Daan a Tulag ti rag-o bayat ti panangisaoda iti yaay ti Mesias. Basaen ti sumagmamano kadagiti sumaganad a binatog, ket panunoten no apay a napateg dagitoy kadagiti mangpadpadaan iti mision ti Mangisalakan: Salmo 35:9; Isaias 25:8–9; 44:21–24; 51:11; Zofonias 3:14–20; Moises 5:5–11. Apay a napateg kenka dagitoy a binatog? Ania dagiti gapu nga ited dagitoy a binatog iti nasantuan a kasuratan tapno agbalin a narag-o?

Kitaen met iti Dallin H. Oaks, “Good Tidings of Great Joy” (First Presidency Christmas devotional, Dec. 4, 2022), Gospel Library; “Joy to the World,” Hymns, no 201.

Adu kadagiti tradision a mainaig iti Paskua iti mabalin nga addaan kadagiti simboliko a kaipapanan a mangitudo kadatayo ken ni Cristo. Bayat ti panangadalmo iti Daan a Tulag iti daytoy a tawen, mabalin a nakitamon ti adu a simbolo ti Mangisalakan. Sumagmamano ti nailista iti baba. Ibilangmo ti panangadal kadagitoy ken panangisuratmo no ania ti isuroda kenka maipapan Kenkuana.

• Bituen (Numero 24:17; Mateo 2:2; Apocalipsis 22:16).

• Pastor (Salmo 23; Lucas 15:4–7; Juan 10:11)

• Kordero (Genesis 22:8; Exodo 12:5; 1 Pedro 1:18–20).

• Danum (Exodo 17:1–6; Jeremias 2:13; Ezequiel 47:1–12; Juan 4:7–14).

• Bato (1 Samuel 2:2; 2 Samuel 22:2–3; Salmo 118:22–23; Isaias 28:16; Taga Efeso 2:20).

• Sanga (Isaias 11:1–2; Jeremias 23:5; 33:15).

• Lawag (Salmo 27:1; Isaias 9:2; 60:19; Mikias 7:8; Juan 8:12).

Ania dagiti dadduma pay a simbolo, binatog, ken salaysay a nasarakam kadagiti nasantuan a kasuratan a mangipaneknek maipapan ken ni Jesucristo?

Kitaen met iti 2 Nephi 11:4; Mosiah 3:14–15; Moises 6:63; “Dagiti Kita wenno Simbolo ni Cristo,” ken “Jesucristo,” agpada iti Pangiwanwan iti Nasantuan a Kasuratan (Gospel Library).

Ni Jesucristo ket nadakamat iti adu a nadumaduma a nagan ken pangawag (titles). Sapulen dagiti pangawag (titles) kadagiti sumaganad a bersikulo: Dagiti Salmo 23:1; 83:18; Isaias 7:14; 9:6; 12:2; 63:16; Amos 4:13; Zacarias 14:16; Moises 7:53. Ania dagiti dadduma pay a pangawag a mapanunotmo? Mabalin a magustuam pay ti panangilista kadagiti pangawag ken ni Jesucristo a masarakam kadagiti himno iti Paskua. Kasano a mangimpluensia ti tunggal pangawag iti wagas a panangpanunotmo maipapan Kenkuana?

Ibilang ti panangpili iti maysa a pangawag wenno akem ti Mangisalakan a mangtulongto kenka a manglagip Kenkuana iti unos ti umay a tawen.

Kitaen met iti Quentin L. Cook, “Personal Peace in Challenging Times,” Liahona, Nob. 2021, 89–92; “Hark! The Herald Angels Sing,” Hymns, no. 209.

• Mabalin nga addaanka ken dagiti annakmo iti sumagmamano a dekorasion iti Paskua a maaramatmo a pangirugi iti panagsasarita maipapan ken ni Jesucristo. Nalabit a mabalinyo a pagsasaritaan maipapan no kasano a mangipalagip kadatayo maipapan iti Mangisalakan ti maysa a bituen, silaw, wenno sagut iti Paskua. Kalpasanna mabalinmo a sapulen iti maysa wenno ad-adu pay kadagiti sumaganad a nasantuan a kasuratan para iti maysa a banag a mabalin a mangisimbolo ken ni Jesucristo: Genesis 22:8; Numero 24:17; Salmo 23:1; 27:1. Nalabit a mabalin dagiti annakmo ti mangitag-ay iti maysa a ladawan wenno dekorasion a maigiddan iti tunggal bersikulo bayat ti panangbasada iti daytoy. Kasano a mayarig ni Jesus iti maysa a kordero, bituen, pastor, wenno silaw? Ibilang ti aggigiddan a panangkansion iti maysa a kanta iti Paskua, kas iti “Stars Were Gleaming” (Children’s Songbook, 37).

• Mabalin pay dagiti annakmo ti kumita iti ladawan iti ungto daytoy a balabala bayat ti panangbasam iti Isaias 9:6 kadakuada. Kiddawen kadagiti annakmo a mangitudo iti maladaga a ni Jesus no mangngegda ti ragup ti balikas a “mayanak ti maysa nga ubing.” Ibinglaymo ti pammaneknekmo nga ammo dagiti propeta iti Daan a Tulag a mayanakto ni Jesus.

• Bayat ti panagsaganam nga agadal iti biag ni Jesucristo iti Baro a Tulag iti sumaruno a tawen, ibilangmo ti panangrebyum kadagiti annakmo no ania ti nasursuroda maipapan Kenkuana iti daytoy a tawen iti Daan a Tulag. Mabalinmo ti mangrebyu kadagiti balabala iti daytoy a resource ken ania man a personal study notes a mangtulong kenka a manglagip no ania ti nasursuromon. Mabalin a mairanud dagiti in-inaudi nga ubbing manipud iti panangkitada iti Dagiti Estoria iti Daan a Tulag wenno dagiti ladawan iti Umaykayo, Sumurot Kaniak. Ania dagiti padto wenno estoria a napateg? Ania ti nasursurotayo maipapan iti Mangisalakan?

• Adda dagiti kannawidan dagiti pamilia nga Israelita, kas iti Fiesta ti Paskua ken dadduma pay a fiesta, a naisangrat a mangitudo iti puspuso ken panunotda iti Apo (kitaen iti Exodo 12). Ania dagiti kannawidan nga adda kenka ken kadagiti annakmo iti panawen ti Paskua a makatulong kadakayo a pangipamaysaanyo ken ni Jesucristo? Ania dagiti kannawidan nga ammom manipud iti pakasaritaan ti pamiliam? Mabalin nga ibilangyo ti panangilawlawag kadagiti annakmo iti sumagmamano a kannawidan a kayatyo nga irugi. Mabalin nga iraman iti sumagmamano a kapanunotan ti panagserbim iti maysa a tao nga agkasapulan, panangpili iti maysa a banag nga idiayamto kas maysa a “sagut” iti Mangisalakan, panangawis iti maysa a gayyem a mangbuya iti First Presidency’s Christmas devotional a kaduanaka (broadcasts.ChurchofJesusChrist.org), panangisurat iti bukodmo a kanta iti Paskua, wenno panangsapul iti managpartuat a wagas a mangibinglay iti mensahe ti pannakayanak ni Cristo.

• Kasano a matulongam dagiti annakmo a makarikna iti panagraem ken rag-o ti pannakayanak ni Cristo? Mabalinyo a buyaen ti video a “The Christ Child” (Gospel Library) aggigiddan a basaenyo ti Mateo 1:18–25; 2:1–12; Lucas 1:26–38; 2:1–20. Mabalin a pumili ti tunggal ubing iti maysa a tao manipud iti video wenno salaysay iti nasantuan a kasuratan ket ibinglayna no kasano ti rikna dayta a tao maipapan iti Mangisalakan. Kalpasanna mabalinyo nga ibinglay iti tunggal maysa dagiti bukodyo a rikna maipapan Kenkuana.

  

  17:57

• Nalabit a mabalinyo a pagsasaritaan kadagiti annakmo maipapan kadagiti sagut a naited kadakayo wenno naawatyo kadagiti naglabas a tawen a nangisangbay iti rag-o. Kalpasanna mabalinyo a basaen ti Isaias 25:9 nga aggigiddan ken pagsasaritaan no apay nga agrag-okayo nga imbaon ti Nailangitan nga Ama ti maysa a Mangisalakan kadatayo. Tapno matulongam dagiti annakmo a nasaysayaat a maawatanda dagiti akem ni Jesucristo kas Mangisalakantayo, awisem ida a mangbasa iti Isaias 25:8–9; 53:3–5; ken Oseas 13:14. Ania ti isuro kadatayo dagitoy a nasantuan a kasuratan maipapan no kasano nga isalakannatayo ti Apo?

• Mabalinyo nga aggigiddan a kansionen ti maysa a kanta iti Paskua, kas iti “Away in a Manger” (Children’s Songbook, 42–43) wenno “O Little Town of Bethlehem” (Hymns, no. 208). Tulongam dagiti annakmo nga agsapul kadagiti ragup ti balikas iti kanta a mangtulong kadakuada a mangammo nga ay-ayaten ida ti Nailangitan nga Ama ken ni Jesucristo.