Haggeo 1–2; Zacarias 1–4; 7–14

Adda dagiti napapateg a banag nga aramiden a mangbangon manen iti Jerusalem. Ngem kalpasan a napalabas dagiti 15 a tawen manipud pay idi nagsubli dagiti Israelita, saan a naragsakan ti Apo gapu ta saan a naikkan iti nangatngato a prayoridad ti panangbangon manen iti templo (kitaen iti Haggeo 1:2–5; kitaen met iti Esdras 4:24). Bayat ti panangbasam iti Haggeo 1; 2:1–9, ibilangmo dagiti saludsod kas kadagitoy:

• Ania dagiti bunga a naipasango kadagiti Israelita gapu ta dida pay nalpas ti templo?

• Ania dagiti bendision nga inkari ti Apo kadakuada no nalpasdan ti pannakabangon ti balayna?

• Ania ti mensahe ti Apo kenka iti Haggeo 1:5–7? Kasano a maitunosmo dagiti prayoridadmo kadagiti prayoridad ti Apo? Kaano a nabendisionanka gapu iti panangyun-unam iti Dios iti biagmo?

Naipasango dagiti immuna a Santo iti Ud-udina nga Aldaw iti umasping a kasasaad kadagiti Israelita idi aldaw ni Haggeo (kitaen iti Doktrina ken Katulagan 95). Ania ti masursurom manipud kadagitoy dua a pagarigan maipapan kadagiti rikna ti Apo maipapan kadagiti templo?

Kitaen met iti Dale G. Renlund, “Jesus Christ Is the Treasure,” Liahona, Nob. 2023, 96–99; Terence M. Vinson, “True Disciples of the Savior,” Liahona, Nob. 2019, 9–11; “We Love Thy House, O God,” Hymns, no. 247; “Provo City Center Temple Completed” (video), ChurchofJesusChrist.org.

7:17

Iti panagkunam, ania ti pateg ti kaadda ti “kinasantuan iti Apo” a naikitikit kadagiti inaldaw a banag a kas kadagidiay nadakamat iti Zacarias 14:20? (kitaen met iti Exodo 28:36–38). Ania ti pateg ti pannakaikitikit daytoy kadagiti templo ita? Ania ti kayat a sawen daytoy a ragup ti balikas kadakayo? Kasano a maaramidmo ti kinasantuan a paset ti inaldaw a panagbiagmo? Utobem dagitoy a saludsod bayat ti panangbasam kadagiti awis ti Apo kadagiti taona nga agbalin a nasansantuan iti Zacarias 1:1–6; 3:1–7; 7:8–10; 8:16–17.

Mabalinmo pay a basaen ti Zacarias 2:10–11; 8:1–8; 14:9–11, 20–21 tapno masursuro no ania ti kayariganto ti biag iti masanguanan nga aldaw no agindegtayo amin iti sidong ti Apo iti nasantuan a kasasaad. Ania ti pakaawisan ti riknam maipapan iti parmata ni Zacarias maipapan iti masakbayan ti Jerusalem? Ania ti masarakam ditoy a kayatmo a makita iti komunidadyo? Kasano a makapagsaganaka nga agbiag kadagiti kasasaad nga inladawan ni Zacarias?

Sumagmamano kadagiti sinurat ni Zacarias ti mangitudo iti agpada a naindagaan a panagministro ni Jesucristo ken ti agangay a Maikadua a Yaayna. Adda iti baba ti sumagmamano kadagiti padto ni Zacarias, agraman dagiti nasantuan a kasuratan maipapan iti pakaipatungpalanda. Bayat ti panagbasam kadagitoy a binatog, saludsodem iti bagim: “Ania ti isuro daytoy kaniak maipapan iti Pannakaisalakan?

• Zacarias 9:9–11 (kitaen iti Mateo 21:1–11; 1 Pedro 3:18–19)

• Zacarias 11:12–13 (kitaen iti Mateo 26:14–16; 27:1–7)

• Zacarias 12:10 (kitaen iti Juan 19:37; Apocalipsis 1:7)

• Zacarias 13:6–7; 14:1–9 (kitaen iti Mateo 26: 31; Doktrina ken Katulagan 45:47–53)

Ania koma ti panagkunam a kayarigan ti mairaman kadagiti tao a mangpasangbay ken ni Jesus iti Jerusalem kas nailadawan iti Zacarias 9:9–11? Kasano a mapasangbayyo Isuna iti biagyo, iti pagtaenganyo, ken iti komunidadyo?

Kitaen met iti Pangiwanwan iti Nasantuan a Kasuratan, “Mesias,” Gospel Library; “The Lord’s Triumphal Entry into Jerusalem” (video), Gospel Library; Ronald A. Rasband, “Hosanna to the Most High God,” Liahona, Mayo 2023, 108–12.

1:22

• Bayat ti panagbasam kadagiti paset ti Haggeo 1:2–5 a kaduam dagiti annakmo, tulongam ida a mangammo no apay a saan a naragsakan ti Apo kadagiti tao. Nalabit a mabalin dagiti annakmo ti mangala iti maysa a ragup ti balikas manipud iti bersikulo 6 ken mangidrowingda iti maysa a ladawan daytoy. Mabalinda nga ipakita daytoy iti tunggal maysa ken mangpugto no ania a ragup ti balikas ti ibagi ti tunggal drowing. No mangbubostayo iti panawen kadagiti banag malaksid iti kayat ti Apo, kasano a dayta ket maipada iti pannangan ngem saan a mabsog? Mabalin nga agsasaritakayo iti tunggal maysa maipapan iti no kasano a maaddaankayo iti panawen kadagiti banag a napateg iti Apo.

• Mabalinmo pay nga ibasa ti bersikulo 8 kadagiti annakmo, ket awisem ida nga agpammarang a “sumang-at iti bantay,” “mangala iti kayo,” ken “bangonen ti balay [ti Apo].” Mabalin dagiti annakmo a mangilista kadagiti banag nga aramidenda iti gagangay nga aldaw, agraman dagiti banag nga indawat ti Apo nga aramidenda. Kiddawen kadagiti annakmo nga “utoben[da] dagiti daldalan[da]” babaen ti panangtimbukel no ania ti mabalin a sawen ti Apo a kapatgan a bambanag iti listaanda.

• Iti maysa a parmata, nakita ni Zacarias ti kangatuan a saserdote a “sikakawes kadagiti narugit a pagan-anay” (Zacarias 3:3). Maysa nga anghel ti nangted kenkuana iti nadalus a kawes. Mabalinmo a tulongan dagiti annakmo a mangtakuat kadagiti napateg a kinapudno babaen ti panagbasa a sangsangkamaysa iti Zacarias 3:1–7 ken panagsarita maipapan iti mabalin nga ibagi ti narugit a kawes ken nadalus a kawes. Kasano nga agbalintayo a nadalus manipud kadagiti basbasoltayo, kalpasan a nabuniagantayo? Kasano a matulongannatayo dagiti katulagantayo iti panagbuniag tapno “magna kadagiti daldalan [ti Apo]?

• Mabalinmo ken dagiti annakmo a kumita iti maysa a ladawan ti panagbuniag, kas iti maysa iti daytoy a balabala. Apay nga agkawestayo iti puraw iti panagbuniagtayo? Mabalinyo ti agkansion iti kanta maipapan iti panagbuniag, kas iti “When I Am Baptized” (Children’s Songbook, 103); ania ti isuro ti kanta maipapan iti no apay a kayat ti Apo a mabuniagantayo?

• Mabalin a kayat dagiti annakmo nga iladawan iti panunot ti pasamak a naipadto iti Zacarias 9:9, idi immay ni Jesus iti Jerusalem bayat ti maudi a lawas ti mortal a biagna. Tapno makatulong iti daytoy, ipakitam kadakuada ti maysa a ladawan ti pasamak, kas iti maysa iti daytoy a balabala. Mabalinmo pay nga ibinglay kadakuada ti “Mapan ti Mangisalakan iti Jerusalem” (iti Dagiti Estoria iti Daan a Tulag, 110–12). Mabalin nga itudo dagiti annakmo dagiti tao kadagiti ladawan nga “agragrag-o unay.” Asino ti Ari iti Zacarias 9:9? Apay nga agyamantayo para Kenkuana?

  

  1:35

• Ibilangmo ti panangtulong kadagiti annakmo a mangidilig kadagiti padto manipud ken ni Zacarias kadagiti bersikulo ti Baro a Tulag a mangiladawan iti pannakaipatungpalda. Adtoy ti sumagmamano a pagarigan: Zacarias 9:9 ken Mateo 21:5–9; Zacarias 9:11 ken 1 Pedro 3:18–19; Zacarias 11:12 ken Mateo 26:14–16; Zacarias 13:7 ken Mateo 26:31. Ania ti masursurotayo maipapan iti Mangisalakan manipud kadagitoy a bersikulo?