Lako Mai, Mo Muri Au
21–27 ni Tiseba. “Eda a Waraki Koya, Ena Vakabulai Keda ko Koya” Siganisucu

“21–27 ni Tiseba. ‘Eda a Waraki Koya, Ena Vakabulai Keda ko Koya’: Siganisucu,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)

“21–27 ni Tiseba. ‘Eda a Waraki Koya, Ena Vakabulai Keda ko Koya,’” Lako Mai, Mo Muri Au: Veiyalayalati Makawa 2026

moce tu na gonelailai o Jisu

For unto Us a Child Is Born [Sa Sucu Edua na Gone Me Noda], mai vei Simon Dewey

21–27 ni Tiseba: “Eda a Waraki Koya, Ena Vakabulai Keda ko Koya”

Siganisucu

Na Veiyalayalati Makawa e tu kina na Yalo ni nanamaki. Ena sala oqori, sa vaka na gauna ni Siganisucu. Tekivu mai vei Atama kei Ivi, ira na peteriaki ni Veiyalayalati Makawa, ira na parofita, na daunivucu, kei ira na tamata, era a namaka mai na veisiga vinaka, ka vakasinaiti ena inuinui me baleta na veivakavoui kei na veisereki ni Mesaia. Ka ra a gadreva vakawasoma na Isireli na inuinui oya—se ra tiko vakavesu mai Ijipita se Papiloni se vesuki tu ena nodra ivalavala ca se vukitani. Ena veigauna kece, o ira na parofita era dau vakananuma vei ira ni dua na Mesaia, na Dauveisereki, ena lako mai me “vunautaka na veisereki vei ira na bobula” (Aisea 61:1).

Na inuinui oya a mai vakavotukanataki ena gauna a sucu kina o Jisu Karisito e Peceliema. A sucu na Dauveisereki qaqa kei Isireli ena vale ni manumanu ka vakadavori ena nodra tikina na manumanu (raica na Luke 2:7). Ia o koya e sega walega ni nodra Dauveisereki na Isireli makawa. A lako mai ko Koya me mai sereki iko—me colata na nomu rarawa, me colata na rarawa ni lomamu, ka sa qaqi ena nomu caka cala, mo rawa ni vakabulai kina ena we ni Nona kuita. (raica na Aisea 53:4–5). Oqo na vuna e vakasinaiti kina na Siganisucu ena nanamaki kei na reki ena gauna mada ga oqo. A lako mai na Mesaia ena rauta na 2,000 na yabaki sa oti, ka se tomana tikoga na Nona lako mai ki na noda bula ena gauna eda vakasaqarai Koya kina.

ivakatakilakila ni vuli

Vakasama eso ni Vuli e Vale kei na Lotu

ivakatakilakila ni semineri
Au rekitaka na noqu Dauniveisereki.

E kilai na Siganisucu me gauna marautaki ena vuku ni reki e kauta mai ko Jisu Karisito ki vuravura. Ena vica na senitiuri ni bera na sucu ni iVakabula, era a vakila talega na reki na parofita ni Veiyalayalati Makawa nira tukuna tiko na lako mai ni Mesaia. Wilika eso na veitikina oqo, ka vakasamataka na vuna era na talei kina vei ira era nanamaki tiko ki na nona tadu mai na iVakabula: Same 35:9; Aisea 25:8–9; 44:21–24; 51:11; Sefanaia 3:14–20; Mosese 5:5–11. Na cava era talei kina vei iko na veitikina oqo? Na cava era tiko ena veitikina oqo ka na vakavu reki vei keda?

Raica talega na Dallin H. Oaks, “iTukutuku Vinaka Mo Dou Reki Vakalevu Kina” (Lotu ni Siganisucu ni Mataveiliutaki Taumada ni 2022, Tise. 4, 2022), Valenivola Vakosipeli; “Meda Marau,” Sere ni Lotu, naba 116.

edua na kalokalo ramase ena bogi

Sa vukei au na ivakatakilakila meu nanumi Jisu Karisito.

E vuqa na itovo ni bula e semati vata kei na Siganisucu e rawa ni tiko kina na ivakatakilakila e dusimaki keda vei Karisito. Nio vulica na veiyalayalati makawa ena yabaki oqo, o na raica beka e vuqa na veivakatakilakila baleta na iVakabula. E vica era sa volai toka e ra. Vakasamataka mo vulici ira oqo ka vola na veika era vakavulica vei iko me baleti Koya.

  • Kalokalo (Tiko Voli Mai na Lekutu 24:17; Maciu 2:2; Ai Vakatakila 22:16).

  • iVakatawa (Same 23; Luke 15:4–7; Joni 10:11)

  • Lami (iVakatekivu 22:8; Lako yani 12:5; 1 Pita 1:18–20).

  • Wai (Lako Yani 17:1–6; Jeremaia 2:13; Isikeli 47:1–12; Joni 4:7–14).

  • Uluvatu (1 Samuela 2:2; 2Samuela 22:2–3; Same 118:22–23; Aisea 28:16; Efeso 2:20).

  • Tabana (Aisea 11:1–2; Jeremaia 23:5; 33:15).

  • Rarama (Same 27:1; Aisea 9:2; 60:19; Maika 7:8; Joni 8:12).

Na ivakatakarakara cava tale, na malanivosa, kei na itukutuku cava o sa kunea ena ivolanikalou ka vakadinadinataki Jisu Karisito?

Raica talega na 2 Nifai 11:4; Mosaia 3:14–15; Mosese 6:63; “Mataqali kei na iVakatakilakila” kei “Jisu Karisito,” ena iDusidusi kina iVolanikalou (Valenivola ni Kosipeli).

“Ena vakatokai na yacana ko Veivakurabuitaki.”

E kilai o Jisu Karisito ena vuqa na yaca duidui kei na itutu. Vakaraica eso na itutu ena veitikina oqo: Same 23:1; 83:18; Aisea 7:14; 9:6; 12:2; 63:16; Emosi 4:13; Sakaraia 14:16; Mosese 7:53. Na cava eso tale na itutu o rawa ni vakasamataka? O na rairai taleitaka sara ga na lisitaki ni itutu i Jisu Karisito o kunea ena veisere ni Siganisucu. E veivakauqeti vakacava na vei itutu yadua kina ivakarau ni nomu vakasama me baleti Koya?

Vakasamataka mo digitaka edua na itutu se itavi ni iVakabula ka na vukei iko mo nanumi Koya ena yabaki ka tu mai.

Raica talega na Quentin L. Cook, “Na Vakacegu Yadudua ena Veigauna Veibolei,” Liaona, Nove. 2021, 89–92; “Agilosi! Era Sere,” Sere ni Lotu, naba 126.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

ivakatakilakila ni iwasewase ni gone

Vakasama eso ni Nodra Vakatavulici na Gonelalai

Na Veiyalayalati Makawa sa vakavulici au me baleti Jisu.

  • Ena rawa ni tiko beka vei kemudou vakaveiluveni eso na iukuuku ni Siganisucu dou rawa ni vakayagataka me tekivu kina e dua na veivosaki me baleti Jisu Karisito. De dua e rawa ni dou tukuna na sala e vakananuma kina vei kemudou na iVakabula, edua na kalokalo ni Siganisucu, na cina, se dua na iloloma. Oti dou qai wilika edua se sivia na ivolanikalou oqo me kunei kina edua na ka e rawa ni vakatakarakarataki Jisu Karisito: Nai Vakatekivu 22:8; Tiko Voli Mai na Lekutu 24:17; Same 23:1; 27:1. De dua e rawa nira taura cake na luvemu edua na iyaloyalo se iukuuku e salavata kei na veitikina yadua era wilika. E vakataki Jisu vakacava edua na lami, kalokalo, ivakatawa, se rarama? Vakasamataka mo dou lagata vata edua na sere ni Siganisucu, me vaka na “Veikalokalo Cila Mai” (Children’s Songbook, 24).

  • E rawa talega nira sarava na luvemu na iyaloyalo ena mua ni ituvatuva oqo nio wilika tiko na Aisea 9:6 vei ira. Kerei ira na luvemu mera dusia na gonelailai o Jisu ni ra rogoca na malanivosa “sa sucu e dua na gone.” Wasea na nomu ivakadinadina nira a kila tu na parofita ena Veiyalayalati Makawa ni na mai sucu o Jisu.

  • Nio vakavakarau mo vulica na bula nei Jisu Karisito ena veiyalayalati vou ena yabaki mai oqo, vakasamataka mo railesuva vata kei ira na luvemu na veika era sa vulica me baleti Koya ena yabaki oqo ena Veiyalayalati Makawa. E rawa mo raicalesu na ituvatuva ena ivurevure oqo kei na ivola ni vuli yadua, me vukei iko mo nanuma tiko na veika o sa vulica. E rawa ni yaga vei ira na gone sobu mera raica na iTalanoa ni Veiyalayalati Makawa se na iyaloyalo ena Lako Mai, Mo Muri Au. Na parofisai se italanoa cava soti e vakaibalebale vei keda? Na cava eda sa vulica me baleta na iVakabula?

Na ivakarau tudei ni Siganisucu e rawa ni dusi kivei Jisu Karisito.

  • Na veimatavuvale e Isireli e tu na kena ivakarau tudei, me vaka na Kana ni Lakosivia kei na kana magiti tale eso, ka a kena inaki me vagolea na yalodra kei na nodra vakasama vua na Turaga (raica na Lako Yani 12). Na ivakarau tudei cava e tiko vei kemudou vakaveiluveni ena gauna ni Siganisucu ka vukei kemudou mo dou vakanamata vei Jisu Karisito? Na ivakarau tudei cava o kila mai na itukutuku makawa ni nomu matavuvale? E rawa nio vakasamataka mo veivosakitaka kei iratou na luvemu eso na itovo tudei o via tekivutaka. Eso na vakasama e rawa ni oka kina, na qaravi ni dua e vakaleqai tu, digia edua na nomu “iloloma” vua na iVakabula, sureta edua na itokani me sarava vata kei iko na Lotu Kaburaki ni Siga ni Sucu ni Mataveiliutaki Taumada (ComeuntoChrist.org/light-the-world), vola vakai iko edua nomu sere ni Siga ni Sucu, se wasea na itukutuku ni sucu i Karisito ena dua na sala e veiuqeti.

E vale, na vuli kei na bulataka erau na sega ni wasei rawa. “Na kosipeli e veiganiti sara vakalevu kei na bula e vale. E keri o ira na tamata oni vulica vata tiko na kosipeli, sai ira sara ga oni na bulataka vata tiko—ena veisiga. Ia na kena dina, vuqa na gauna, na bulataki ni kosipeli sai koya na sala eda vulica kina na kosipeli. Nio vulica ka vakavulica na kosipeli e vale, vaqara na sala eso mo semata kina na veika o vulica tiko kei na veika o cakava tiko. E vale, vakalaiva na kosipeli me dua na ka o segata mo bulataka, ka kua ni tukuni wale tiko ga” (Veivakavulici ena iVakarau ni iVakabula, 31).

iVakatakarakara ni Sucu i Jisu

Droini ni iVakatakarakara ni Sucu i Jisu, mai vei Ethan Brown

Ea solia vei au na Tamada Vakalomalagi na isolisoli ni Luvena me noqu iVakabula.

  • E rawa vakacava mo vukei ira na luvemu mera vakila na rokovi kei na rekitaki ni sucu i Karisito? Ena rawa beka mo sarava na vidio “The Christ Child” (Gospel Library) se wilika vata na Maciu 1:18–25; 2:1–12; Luke 1:26–38; 2:1–20. Na gone yadua e rawa ni digia edua na tamata mai na vidio se italanoa mai na ivolanikalou, ka wasea na ka e nanuma na tamata oya me baleta na iVakabula. Oti sa na qai rawa mo ni veiwaseitaka vakai kemuni na nomuni nanuma me baleti Koya.

    17:57

    The Christ Child

  • De dua e rawa ni dou veivosakitaka vakaveiluveni eso na iloloma o solia se ciqoma ena veiyabaki sa oti ka dau kauta mai na reki. Oti dou qai wilika vata na Aisea 25:9 ka veivosakitaka na vuna o reki kina ni a tala mai vei keda na Tamada Vakalomalagi edua na iVakabula. Me vukei ira na gone mera kila vakamatata cake na itavi i Jisu Karisito vaka noda iVakabula, sureta mera wilika na Aisea 25:8–9; 53:3–5; kei na Osea 13:14. Na cava era vakavulica vei keda na ivolanikalou oqo ena sala edau vakabulai keda kina na Turaga?

  • E rawa talega ni dou lagata vata edua na sere ni Siganisucu, me vaka na “Mai Peceliema” (iVolanisere ni Gonelalai, 26) se “Koro Ko Peceliema” (Sere ni Lotu, naba 123). Vukei ira na luvemu mera kunea eso na malanivosa ena sere ka vukei ira mera kila nio Tamada Vakalomalagi kei Jisu Karisito e Rau lomani ira.

Me baleta na vakasama tale eso, raica na ilavelave ni mekasini na iTokani ni vula oqo.

iVakatakarakara ni Sucu i Jisu

The Nativity [Na Sucu i Jisu], mai vei N. C. Wyeth

Tabana ni itaviqaravi ni Lalai: Na Veiyalayalati Makawa e vakavulici au ena veika me baleti Jisu