“14–20 ni Tiseba. ‘Au A Lomani Kemudou, sa Kaya ko Jiova’: Malakai,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)

“14–20 ni Tiseba. ‘Au A Lomani Kemudou, sa Kaya ko Jiova,’” Lako Mai, Mo Muri Au: Veiyalayalati Makawa 2026

14–20 ni Tiseba: “Au A Lomani Kemudou, sa Kaya ko Jiova”

Malakai

“Au a lomani kemudou,” a kaya na Turaga vei ira na Nona tamata mai na gusu i Malakai na parofita. Ia o ira na Isireli, era a sotava na veivakararawataki kei na tiko vakavesu ena vica na itabatamata, era a taroga, “Ko a lomani keitou vakaevei?” (Malakai 1:2). Mai na veika kece a lako curuma o Isireli, era na lomatarotarotaka beka se na kedra itukutuku makawa e italanoa dina beka ni Nona loloma na Kalou vei ira na Nona tamata ni veiyalayalati. Ena so na sala, e rawarawa cake meda raica me italanoa ni malumalumu kei na talaidredre ni tamata. Ia ena veika kece oqori, na Kalou a sega vakadua ni cegu ni dodoliga yani ena loloma. Ena gauna eratou a vakacacani Josefa kina na tacidratou o iratou na luve i Jekope tagane, na Turaga a maroroi iratou ga mai na dausiga (raica na iVakatekivu 45:4–8). Nira vosa kudrukudru ena lekutu na Isireli, a vakani ira na Kalou ena mana (raica na Lako Yani 16:1–4). Ena gauna mada ga era qarava kina na kalou tani ka veiseyaki, na Kalou a yalataka ni kevaka era veivutuni, o Koya ena vakasoqoni ira ka vueti ira “ena loloma levu” (raica na Aisea 54:7). Sa dina sara, ni Veiyalayalati Makawa e italanoa ni dauvosota, kei na Nona loloma tudei na Kalou. Ka tomani tiko nikua na italanoa oqo. O Jisu Karisito, “na Matanisiga ni Yalo Dodonu,” me vaka e vakatokai Koya kina o Malakai, ena “kauta lako e tabana na veivakabulai” (Malakai 4:2). Sai Koya na ivakadinadina cecere duadua ni Nona loloma na Kalou vei ira na Isireli ena gauna makawa kei keda kece sara.

Me laurai vakararaba na ivola ni Malakai, raica na “Malakai” ena iDusidusi ki na iVolanikalou.

Vakasama eso ni Vuli e Vale kei na Lotu

Malakai 1–4

“Dou lesu mai vei au, au na qai lesu yani vei kemudou.”

Ena gauna nei Malakai, era a tara vou tale na Isireli na valetabu e Jerusalemi, ia me vaka dua na matatamata ea gadrevi vei ira mera tara vou tale na nodra veiwekani kei na Turaga. Ni o vulica na Malakai, vakasaqara na taro e a taroga na Turaga vei ira na Isireli se era a tarogi Koya kina. Vakasamataka mo tarogi iko ena so na taro tautauvata (eso na kena ivakaraitaki sa vakaturi koto e ra) me vukei iko ena nomu dikeva na nomudrau veiwekani kei na Turaga ka toro voleka yani Vua.

Au sa vakila beka vakacava na loloma ni Turaga vei au? (raica na Malakai 1:2).
Au rokova vakaidina beka na Turaga ena veika au solia Vua? (raica na Malakai 1:6–11)
Na veisala cava beka e gadrevi vei au meu na “lesu” tale kina vua na Turaga? (raica na Malakai 3:7).
Au butakoca tiko beka na Kalou ena dua na ka? (raica na Malakai 3:8–11).
E dau vakaraitaka vakacava na noqu itovo ena veigauna dredre na veika au vakila me baleta na Turaga? (raica na Malakai 3:13–15; raica talega na 2:17).

Malakai 1:6–14

E kerea na Turaga “nai madrali savasava.”

Nio wilika na isoro e vakamacalataki ena Malakai 1, na cava o raica me baleta na isoro era vakacabora na bete? Na cava e vakaraitaka na vei isoro oqo me baleta na itovo ni yalodra na bete vua na Turaga? (raica na Malakai 1:13). Navuca mo cakava edua na lisi ni isolisoli, se solibula ka o cakava vua na Turaga. Me baleta na veika yadua ena lisi, vakananuma se cava era yaco kina mera isoro sa “sega ni savasava” se isoro “savasava” (Malakai 1:7, 11).

Malakai 3:8–12

Ena dolava na katuba ni lomalagi na Turaga niu vakaraitaka na noqu vakabauta ena noqu sauma na ikatini.

Raitayaloyalotaka mada ni tiko edua na nomu itokani ka se qai kila oqo nio dau saumi ikatini. “Na cava na vuna o dau cakava kina?” e taroga o nomu itokani. Vakasamataka oqo nio wilika na Malakai 3:8–12. Na cava o raica e kea ka rawa ni vukea na kena saumi na taro nei nomu itokani? Na cava tale ona vinakata me kila o nomu itokani me baleta na ikatini? Me baleta na veivuke tale eso, e rawa ni o vakasaqaqara ena itukutuku nei Elder Neil L. Andersen “Na iKatini: Dolava na Katuba ni Lomalagi” (Liaona, Nove. 2023, 32–35), ka vaqara na isau ni taro vakaoqo:

Na cava na vuna e vinakata kina na Turaga meda sauma na ikatini?
Na cava ena tarova beka edua me saumi ikatini, ka da na vorata rawa vakacava na veivakataotaki oqori?
E vaqaqacotaka vakacava na noda vakabauta na Tamada Vakalomalagi kei Jisu Karisito na saumi ikatini?

E rawa talega ni o wasea vua na nomu itokani na sala sa vakalougatataki iko kina na Turaga ena nomu saumi ikatini. E rawa nio kunea na veivakasama eso ena iwasewase ka kena ulutaga na “Lesoni Naba 1—Veivakalougatataki Bibi ia e Matailalai” ena itukutuku nei Elder David A. Bednar “Na Katuba ni Lomalagi” (Liaona, Nove. 2013, 17–18). Na mataqali tamata vakacava eda sa vakataka nida saumi ikatini?

Na cava e kena ibalebale beka vei iko na malanivosa na “dolava vei iko na katuba ni lomalagi” (tikina e 10)? De dua e rawa nio rai ki tautuba ena dua na katubaleka ka vakananuma se cava na inaki ni katubaleka. Na cava na vuna e vakamacalataka vakavinaka kina na “katubaleka ni lomalagi” na sala e vakalougatataki keda kina na Turaga nida saumi ikatini?

rairai vei Josefa Simici o Jisu ena Valetabu e Katiladi — Vision in the Kirtland Temple [Raivotu ena Valetabu e Katiladi], mai vei Gary E. Smith

Malakai 4:5–6

“Au na talai Ilaijia na parofita vei kemudou.”

Ena gauna a cavuta kina o Moronai na Malakai 4:5–6 vei Josefa Simici, e a “duidui vakalailai mai na sala eda wilika” kina ena ivola tabu (raica na Josefa Simici—Ai Tukutuku 1:36–39). Na cava e vakaikuritaka na itukutuku nei Moronai meda kila vinaka kina na parofisai oqo? Me kena ivakaraitaki, vakasamataka vakatitobu na veitaro vakaoqo:

O cei o ira na “qase”? (raica na Vakarua 29:13). Na yalayala cava sa caka vei ira? (raica na Eparaama 2:9–11). O na veivuke vakacava me vakayacori na vei yalayala oqo?
Na veika cava o sotava ka vukei iko mo vagolea na yalomu vei ira na nomu qase e liu? Na cava e rui bibi kina oya ki na ituvatuva nei Tamada Vakalomalagi?

Mo vulica eso tale na ka me baleta na lako mai nei Ilaija kei na kena sa vakayacori tiko nikua na parofisai oqo, raica na Vunau kei na Veiyalayalati 110:13–16 kei na D. Todd Christofferson, “Na Kaukauwa ni Veivauci” (Liaona, Nove. 2023, 19–22). Na cava o vakavinavinakataka ena nona lako mai o Ilaija?

Raica talega na Gerrit W. Gong, “E Tiko na Noda iTalanoa Yadudua,” Liaona, Me 2022, 43–46; “Mo Gole Vua,” Sere ni Lotu, naba 180; “The Sealing Power” (vidio), ChurchofJesusChrist.org.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Malakai 1:2

Na Turaga e lomani au.

Dou na sauma vakacava vakaveiluveni na taro ka tiko ena Malakai 1:2—“[Turaga] ko a lomani keitou vakaevei?” Dou veiwaseitaka na vuna o kila kina ni lomani iko o Koya. De dua e rawa nira droinitaka na luvemu na iyaloyalo ka vakananuma vei ira na Nona loloma.

Vakaitavitaki ira na gone ena veivosakitaki ni kosipeli. Kevaka o vakavulici ira tiko na gonelalai, ena gadrevi mo vakasamataka na sala veivakauqeti eso mo vakaitavitaki ira kina ena veivosaki vakosipeli. Me kena ivakaraitaki, e rawa nira veipasitaka wavoki na luvemu edua na polo, nira taura tiko na polo, e rawa nira wasea edua na vuna era kila kina nio Jisu e lomani ira.

eratou rai tiko ena katubaleka nai itubutubu kei na dua na gonetagane

Malakai 3:8–12

Ena vakalougatataki au na Turaga niu saumi ikatini.

O na vukei ira vakacava na luvemu mera vulica na veika baleta na ikatini? E rawa nio kerei ira me ra wilika e 10 na iyaya lalai, me vaka na ilavo siliva ena tabana ni itaviqaravi ni macawa oqo. Mera qai wasea tani edua vei ira na iyaya oya mai na kena vo—oqo na levu ni ka eda solia vua na Turaga me ikatini. Me vaka ena Malakai 3:8–12, na cava e vinakata kina na Turaga meda saumi ikatini? (raica talega na “Malakai na Parofita” ena iTalanoa ni Veiyalayalati Makawa, 171–172; “First Things First” [vidio], Gospel Library).

0:58
Malachi the Prophet

1:18
First Things First!
Ni dou wilika vata na Malakai 3:10 e rawa nio sureti ira na luvemu mera tucake e yasa ni dua na katubaleka nio wilika na malanivosa “katuba ni lomalagi.” Se e rawa ni o sovaraka na wai ki na dua na bilo me yacova ni sa vuabale me vakaraitaka na malanivosa “[mo dou] na sautu dina sara.” Tukuna vei ira na gone na veivakalougatataki sa solia vei iko na Kalou nio saumi ikatini. E rawa nira droinitaka na luvemu na iyaloyalo ka matataka na veivakalougatataki oqo ka vakaliligi ira volekata edua na katubaleka ena nomu itikotiko.

Malakai 4:5–6

A lako mai o Ilaija me vagolea na lomada vei ira na noda matavuvale.

Ena Malakai 4:5–6, e rawa nira vaqara na luvemu na isau ni taro oqo me baleta na parofisai nei Malakai: O cei a yalataka na Turaga mena tala mai? NaGauna cava a tukuna o Koya ni na lako mai kina na tamata oqo? NaCava a tukuna na Turaga ni na mai cakava na tamata oqo? Na cava naVuna e gadrevi me lako mai kina na tamata oqo? Evei a vakayacori kina na parofisai oqo? (raica na Vunau kei na Veiyalayalati 110:13–16).
Mo kila na sala a vakayacori kina na yalayala ena Malakai 4:5 sa rawa nio railesuva na “Lesi o Josefa kei Oliver kina iTutu Vakabete” ena iTukuni mai na Vunau kei na Veiyalayalati, 26–30. Na sere me vaka na “The Hearts of the Children” (Children’s Songbook, 92) ena rawa ni vukei ira na luvemu mera vulica na vuna e bibi kina na nona lako mai o Ilaija. E rawa tale ga nio sikova na FamilySearch.org/discovery, na app ni Vunikau ni FamilySearch, se na ivolalailai ni Noqu Matavuvale me baleta na itaviqaravi ka na rawa ni vukei iko kei ira na luvemu mo dou vagolea na yalomudou vei ira na nomudou qase e liu.

Me baleta na vakasama tale eso, raica na ilavelave ni mekasini na iTokani ni vula oqo.

yalovaka tiko na marama na itavoi vulavula — Mourning’s Hosanna [Na Vaka Osana nei Mourning], mai vei Rose Datoc Dall. E dua na marama na yacana o Mourning e tucake tu ena vuravura ni Yalo, ka ra vakavolivoliti koya tu o ira na nona qase e liu. E marautaka o koya na nodra sereki mai na tiko vakavesu vakayalo.

Tabana ni itaviqaravi ni Lalai: E vakalougatataki au na Turaga niu saumi ikatini — Mourning’s Hosanna [Na Vaka Osana nei Mourning], mai vei Rose Datoc Dall. E dua na marama na yacana o Mourning e tucake tu ena vuravura ni Yalo, ka ra vakavolivoliti koya tu o ira na nona qase e liu. E marautaka o koya na nodra sereki mai na tiko vakavesu vakayalo.