“7–13 ni Tiseba. ‘Sa Tabu Me Nei Jiova”: Akeai 1–2; Sakaraia 1–4; 7–14,’ Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)

“7–13 ni Tiseba. ‘Sa Tabu Me Nei Jiova,’” Lako Mai, Mo Muri Au: Veiyalayalati Makawa 2026

Valetabu e Laie Hawaii

7–13 ni Tiseba: “Sa Tabu Me Nei Jiova”

Akeai 1–2; Sakaraia 1–4; 7–14

Ni oti e tini vakacaca na yabaki ni tiko vakavesu, edua na ilawalawa Isireli, e rairai rau oka kina na parofita o Akeai kei Sakaraia, a vakatarai mera lesu tale ki Jerusalemi. E so na lewe ni ilawalawa oqo era a nanuma tiko na irairai kei Jerusalemi ni bera ni vakarusai. Vei ira era a vakataroga se na tautauvata tale kei na vale ni Turaga “ena kena lagilagi eliu” (Akeai 2:3), a cavuta kina o Akeai na vosa ni veivakayaloqaqataki ni Turaga: “Dou gumatua kece talega, na lewe ni vanua, sa kaya ko Jiova, ia dou ia na cakacaka niu sa tiko vata kei kemudou, … dou kakua ni rere.” “Kau na vakasinaita na vale oqo e nai ukuuku, … ia e na yasana oqo kau na ia kina na veivinakati.” (Akeai 2:4–5, 7, 9).

Ia e sega walega ni valetabu savasava a gadrevi me tara tale. Ena vuqa na sala, o ira na tamata ni Kalou era a rusa tu vakayalo. Kei na nodra tarai cake tale edua na matatamata savasava, ena uasivi cake mai na kena ta na vatu ka biu donu me tara kina edua na vale savasava. E kena ibalebale ni malanivosa na “Sa tabu me nei Jiova”, e dodonu me kua ga ni volai ena lalaga ni valetabu, se ena “iqiriqiri kaukamea ni ose” kei na “kuro kece e Jerusalemi” (Sakaraia 14:20–21). E dodonu talega mera ceuti ena lomada vakayadua.

Me baleta na kena raici vakararaba na ivola nei Akeai kei Sakaraia, raica na “Akeai” kei na “Sakaraia” ena iDusidusi ki na iVolanikalou.

Vakasama eso ni Vuli e Vale kei na Lotu

Akeai 1; 2:1–9

“Dou vakananuma mada na nomudoui valavala.”

E a vuqa sara na ka bibi me caka me tarai tale kina o Jerusalemi. Ia ni sa oti e voleka ni 15 na yabaki mai na nodra lesu tale mai na Isireli, ea cudru sara kina na Turaga ni a sega ni vakaliuci taumada na tarai tale ni valetabu (raica na Akeai 1:2–5; raica talega na Esera 4:24). Nio wilika na Akeai 1; 2:1–9, vakasamataka na taro vakaoqo:

Na cava era a sotava na Isireli baleta nira a se sega ni tara vakaoti na valetabu?
Na veivakalougatataki cava a yalataka na Turaga vei ira kevaka era na tara vakaoti na Nona vale?
Na cava na itukutuku ni Turaga vei iko ena Akeai 1:5–7? O na cakava vakacava me salavata na veika o vakaliuca kei na ka e vakaliuca na Turaga? Na gauna cava o sa vakalougatataki kina ena nomu vakaliuca na Kalou ena nomu bula?

Era a sotava na painia ni Yalododonu Edaidai edua na ituvaki me vaka era a sotava na Isireli ena gauna nei Akeai (raica na Vunau kei na Veiyalayalati 95). Na cava o vulica mai na rua na ivakaraitaki oqo me baleta na nanuma ni Turaga me baleta na valetabu?

Raica talega na Dale G. Renlund, “Jisu Karisito Na iYau Talei,” Liaona, Nove. 2023, 96–99; Terence M. Vinson, “Tisaipeli Dina ni iVakabula,” Liaona, Nove. 2019, 9–11; “Na Vale Ni Kalou,” Sere ni Lotu, naba 148; “Provo City Center Completed” (vidio), ChurchofJesusChrist.org.

Sakaraia 1–3; 7–8; 14

Na Turaga e rawa ni vakatabui au.

Ena nomu nanuma, na cava na yaga ni kena ceuti na “sa tabu me nei Jiova” ena iyaya ni veisiga me vaka e tukuni tiko ena Sakaraia 14:20? (raica talega na Lako Yani 28:36–38). Na cava na yaga ni kena ceuti tu ena veivaletabu nikua? Na cava na ibalebale ni malanivosa oqo vei iko? O na cakava vakaevei me tiki ni nomu bula e veisiga na bula savasava? Vakasamataka vakatitobu na taro oqo ni o wilika na veisureti ni Turaga vei ira na Nona tamata mera yaco me savasava cake ena Sakaraia 1:1–6; 3:1–7; 7:8–10; 8:16–17.

E rawa ni o wilika na Sakaraia 2:10–11; 8:1–8; 14:9–11, 20–21 mo kila kina, se na vakacava tu na bula ena dua siga mai muri, nida bula vata kei na Turaga ena dua na ituvaki ni bula savasava. Na cava e vakauqeti iko me baleta na raivotu nei Sakaraia ena veisiga ni mataka kei Jerusalemi? Na cava o kunea eke ka ona vinakata mo raica ena nomu itikotiko raraba? O na vakarautaki iko vakacava mo bula ena ituvaki ea vakamacalataka o Sakaraia?

curu ki Jerusalemi ko Jisu ena dua na asa — “Raica, ena lako mai vei iko na nomu Tui, sa yalododonu, a sa ia na veivakabulai ko koya; sa yalomalua, ka sa vodo lako ena asa”(Sakaraia 9:9). Triumphal Entry [Curu Vakatui], mai vei Harry Anderson

Sakaraia 9:9–11; 11:12–13; 12:10; 13:6–7; 14:1–9

O Jisu Karisito na Mesaia yalataki.

E vica na ivola nei Sakaraia e dusia ruarua na veiqaravi vakayago i Jisu Karisito, ka vakakina na ikarua ni Nona Lako Mai. E koto e ra eso na parofisai nei Sakaraia, vata kei na ivolanikalou me baleta na kena vakayacori. Ni o vulica tiko na veitikina oqo, tarogi iko, “Na cava e vakavulica vei au oqo me baleta na iVakabula?

Sakaraia 9:9–11 (raica na Maciu 21:1–11; 1 Pita 3:18–19)
Sakaraia 11:12–13 (raica na Maciu 26:14–16; 27:1–7)
Sakaraia 12:10 (raica na Joni 19:37; Ai Vakatakila 1:7)
Sakaraia 13:6–7; 14:1–9 (raica na Maciu 26:31; Vunau kei na Veiyalayalati 45:47–53)

Na cava o nanuma se ena vakaevei tu ke o a dua vei ira na tamata a kidavaki Jisu ki Jerusalemi, me vaka e vakamacalataki ena Sakaraia 9:9–11? E rawa vakacava mo kidavaki Koya ki na nomu bula, nomu vale, kei na nomu itikotiko raraba?

Raica talega na iDusidusi ki na iVolanikalou, “Mesaia,” Valenivola ni Kosipeli; “The Lord’s Triumphal Entry into Jerusalem” (vidio), Gospel Library; Ronald A. Rasband, “Osana kivua na Kalou sa Cecere Sara,” Liaona, Me 2023, 108–12.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Akeai 1:2–8

“Dou vakananuma mada na nomudou ivalavala.”

Ni oni wilika vata vakaveiluveni na veitiki ni Akeai 1:2–5 vukei ira mera kila na vuna e a sega ni marautaki ira kina na tamata na Turaga. Ena rawa beka mera digia na luvemu edua na malaivosa mai na tikina e 6 ka droinitaka edua na kena iyaloyalo. E rawa nira vakaraitaka vei ira vakai ira, ka vakilakila se malanivosa cava e matataka na droini yadua. Nida vakayagataka na gauna ena veika tale eso ka sega ni ka e vinakata na Turaga, e vaka vakacava oya na kana ia e sega ni mamau? E rawa ni dou veivosakitaka vakai kemudou na sala mona solia kina na gauna ki na veika e bibi vua na Turaga.
E rawa mo wilika na tikina e 8 vei ira na luvemu, ka sureti ira mera matanataka nira “cabe cake ki na ulunivanua,” “ka kauta mai na kau,” ka “tara na vale [ni Turaga].” E rawa nira cakava na nomu gone edua na lisi ni veika era dau cakava ena dua na siga, ka okati kina na veika a kerea na Turaga mera cakava. Kerei ira na nomu gone mera “vakananuma mada na [nodra] ivalavala” ena nodra wirina na veika e na kaya na Turaga nira sa ka bibi duadua ena nodra lisi.

Veivakavulici e yavutaki e vale. A vakavuvulitaka o Peresitedi Russell M. Nelson ni itikotiko sa dodonu me “vanua ni vulici ni kosipeli” (“Yaco me iVakaraitaki Yalododonu Edaidai,” Liaona, Nove. 2018, 113). Ni vulica na nomu matavuvale na ivakasala nei Akeai mo “vakasamataka na nomu ivalavala,” dou rawa ni veitalanoataka na sala me vakaliuci kina na Kalou ena nomudou bula vakamatavuvale.

Sakaraia 3:1–7

Na caka kei na maroroi veiyalayalati, ena rawa ni vukei au meu vakataka vakalevu cake na Tamada Vakalomalagi kei Jisu Karisito.

Ena dua na raivotu, a raica kina o Sakaraia e dua na bete levu ka a “vakaisulu tu ena isulu dukadukali” (Sakaraia 3:3). A solia vei koya e dua na agilosi na isulu savasava. E rawa ni o vukei ira na luvemu mera kunea na veidina bibi ni dou wilika vata na Sakaraia 3:1–7 ka veivosakitaka na ka e rawa ni matataka na isulu dukadukali kei na isulu savasava. Eda na savasava vakacava mai na noda ivalavala ca, ni oti mada ga na noda papitaiso? Ena vukei keda vakacava na noda veiyalayalati ni papitaiso meda “muria na sala [ni Turaga]”?
Dou rawa ni sarava vata kei iratou na luvemu edua na iyaloyalo ni papitaiso, me vaka na kena e tiko ena ituvatuva oqo. Na cava na vuna eda vakaisulu vulavula kina ena noda papitaiso? E rawa talega ni dou lagata edua na sere me baleta na papitaiso, me vaka na “When I Am Baptized” (iVolanisere ni Gonelalai, 53); na cava e vakavulica na sere me baleta na vuna e vinakata kina na Turaga meda papitaiso?

tama e papitaisotaka tiko na luvena yalewa ena dua na uciwai

Sakaraia 9:9–11; 11:12; 13:6–7

O Jisu Karisito na Mesaia yalataki.

Era na vinakata beka na luvemu mera raitayaloyalotaka na veika a parofisaitaki tu ena Sakaraia 9:9, ena gauna a lako mai kina ki Jerusalemi o Jisu ena iotioti ni macawa ni Nona bula vakayago. Me veivuke ena ka oqo, vakaraitaka vei ira edua na iyaloyalo ni veika a yaco, me vakataka na kena ena ituvatuva oqo. E rawa talega ni o wasea vei ira “Sa Lako na iVakabula ki Jerusalemi” (e Na iTukuni ena Veiyalayalati Vou, 110–12). E rawa nira dusia na luvemu na tamata ena iyaloyalo era “reki vakalevu” tiko. O cei na Tui ena Sakaraia 9:9? Na cava na vuna eda vakavinavinakataki Koya kina?

1:35
Chapter 44: The Savior Goes to Jerusalem
Vakasamataka mo vukei ira na luvemu mera vakatauvatana na parofisai nei Sakaraia kei na veitikina ena Veiyalayalati Vou ka vakamacalataka na kedra vakayacori. Oqo eso na ivakaraitaki: Sakaraia 9:9 kei na Maciu 21:5–9; Sakaraia 9:11 kei na 1 Pita 3:18–19; Sakaraia 11:12 kei na Maciu 26:14–16; Sakaraia 13:7 kei na Maciu 26:31. Na cava eda vulica me baleta na iVakabula mai na veitikina oqo?

Me baleta na vakasama tale eso, raica na ilavelave ni mekasini na iTokani ni vula oqo.

iVakatakilakila ena vuqa na valetabu “Sa Tabu me Nei Jiova” kei na “Na Vale ni Turaga” ena veimataqali vosa — “Sa Tabu me Nei Jiova” e tiko ena veivaletabu kece sara.

Tabana ni itaviqaravi ni Lalai: Ko Jisu Karisito e rawa ni vakasavasavataka na yaloqu — “Sa Tabu me Nei Jiova” e tiko ena veivaletabu kece sara.