Malakai

‘I he kuonga ʻo Malakaí, naʻe ʻosi toe langa ʻe he kakai ʻIsilelí ʻa e temipale ʻi Selusalemá, ka naʻe kei fie maʻu kinautolu ko e kakaí ke toe fokotuʻu honau vā fetuʻutaki mo e ʻEikí. ‘I hoʻo ako e tohi ʻa Malakaí, kumi e ngaahi fehuʻi naʻe fakahoko ʻe he ʻEikí ki he kakai ʻIsilelí pe naʻa nau fakahoko kiate Iá. Fakakaukau ke fehu‘i loto pē kiate koe ʻa e ngaahi fehuʻi tatau (ʻoku fokotuʻu atu ʻi lalo ha ngaahi sīpinga) ke tokoni ke ke vakaiʻi hoʻo vā fetuʻutaki mo e ʻEikí pea ʻunuʻunu ofi ange kiate Iá.

• Kuó u ongoʻi fēfē nai e ʻofa ʻa e ʻEikí ʻiate aú? (vakai, Malakai 1:2).

• ʻOku hanga nai ʻe heʻeku ngaahi foaki ki he ʻEikí ʻo fakalāngilangiʻi moʻoni Ia? (vakai, Malakai 1:6–11)

• Ko e hā ha ngaahi founga ʻoku fie maʻu ai ke u “tafoki” ki he ʻEikí? (vakai, Malakai 3:7).

• ʻOku ou kaihaʻa nai mei he ʻOtuá ʻi ha faʻahinga founga? (vakai, Malakai 3:8–11).

• ʻOku fakahaaʻi fēfē ʻe heʻeku tōʻonga fakakaukau lolotonga e ngaahi taimi faingataʻá ʻa e ngaahi ongo ʻoku ou maʻu ki he ʻEikí? (vakai, Malakai 3:13–15; vakai foki, 2:17).

ʻI hoʻo laukonga fekauʻaki mo e ngaahi foaki ʻoku fakamatalaʻi ʻi he Malakai 1, ko e hā e meʻa ʻokú ke fakatokangaʻi fekauʻaki mo e ngaahi feilaulau naʻe fai ʻe he kau taulaʻeikí? Ko e hā e meʻa ʻoku fokotuʻu mai ʻe he ngaahi feilaulaú ni fekauʻaki mo e ngaahi ongo ne maʻu ʻe he kau taulaʻeikí ki he ʻEikí? (vakai, Malakai 1:13). Fakakaukau ke ke faʻu ha lisi ʻo e ngaahi foaki, pe ngaahi feilaulau, ʻokú ke fai ki he ʻEikí. Fakalaulauloto ki he meʻa takitaha ʻi he lisí pe ko e hā ha meʻa te ne ʻai ke hoko ia ko ha feilaulau “fakalielia” pe ko ha feilaulau “maʻa” (Malakai 1:7,11).

Fakakaukauloto ʻoku ʻi ai haʻo kaungāmeʻa ʻokú ne toki ʻilo pē ʻeni ʻokú ke totongi vahehongofulu. ʻOku ʻeke atu hoʻo kaungāmeʻá, “Ko e hā e ʻuhinga ʻokú ke fai ai iá?” Fakakaukau ki he meʻá ni ʻi hoʻo lau ʻa e Malakai 3:8–12. Ko e hā ha meʻa ʻokú ke maʻu mei ai ʻe lava ʻo tokoni ke tali e fehuʻi ho kaungāmeʻá? Ko e hā mo ha toe meʻa te ke loto ke mahino ki ho kaungāmeʻá fekauʻaki mo e vahehongofulú? Ki ha tokoni lahi ange, te ke lava ʻo kumi ʻi he pōpoaki ʻa ʻEletā Niila L. ʻEnitaseni ko e “Vahehongofulú: Ko Hono Fakaava e Ngaahi Matapā ʻo e Langí” (Liahona, Nōvema 2023, 32–35), ʻo kumi e tali ki he ngaahi fehuʻi hangē ko ʻení:

• Ko e hā e ʻuhinga ʻoku finangalo ai e ʻEikí ke tau totongi vahehongofulú?

• Ko e hā ha meʻa te ne taʻofi ha taha mei heʻene totongi vahehongofulú, pea te tau ikunaʻi fēfē ʻa e ngaahi fakafeʻātungia ko iá?

• ʻOku fakamālohia fēfē ʻetau tui ki he Tamai Hēvaní mo Sīsū Kalaisí ʻi heʻetau totongi vahehongofulú?

Te ke lava foki ʻo vahevahe mo ho kaungāmeʻá ʻa e founga kuo tāpuekina ai koe ʻe he ʻEikí ʻi hoʻo totongi vahehongofulú. Te ke lava ʻo maʻu ha ngaahi fakakaukau ʻi he konga ʻoku ui ko e “Lēsoni Fika 1—Ngaahi Tāpuaki Mahuʻinga kae ʻIkai Fakatokangaʻi” ʻi he pōpoaki ʻa ʻEletā Tēvita A. Petinā “Ko e Ngaahi Matapā ʻo e Langí” (Liahona, Nōvema 2013, 17–18). ʻOku tau hoko nai ko e faʻahinga kakai fēfē ʻi heʻetau totongi vahehongofulú?

ʻOkú ke pehē ʻoku ʻuhinga ki he hā ʻa e kupuʻi lea “fakaava ʻa e ngaahi matapā ʻo e langí” (veesi 10)? Mahalo te ke lava ʻo sio ki tuʻa ʻi ha matapā luva pea fakakaukau ki he taumuʻa ʻo e ngaahi matapā luvá. Ko e hā e ʻuhinga ʻoku hoko ai ʻa e “ngaahi matapā ʻo e langí” ko ha founga lelei ke fakamatalaʻi e founga ʻoku tāpuakiʻi ai kitautolu ʻe he ʻEikí ʻi heʻetau totongi vahehongofulú?

ʻI he taimi naʻe lea ʻaki ai ʻe Molonai ʻa e Malakai 4:5–6 kia Siosefa Sāmitá, naʻá ne lau ia ka naʻe “kiʻi faikehekehe ia mei he meʻa ʻoku” ʻi he Tohi Tapú (vakai, Siosefa Sāmita—Hisitōlia 1:36–39). Ko e hā e meʻa ʻoku fakalahi mai ʻe he kiʻi faikehekehe naʻe lau mai ʻe Molonaí ke mahino kiate koe ʻa e kikite ko ʻení? Hangē ko ʻení, fakalaulauloto ki he ngaahi fehuʻi hangē ko ʻení:

• Ko hai ʻa e “ngaahi tamaí”? (vakai, Teutalōnome 29:13). Ko e hā ha ngaahi talaʻofa kuo fai kiate kinautolu? (vakai, ʻĒpalahame 2:9–11). ʻOkú ke tokoni fēfē ke fakahoko e ngaahi talaʻofa ko ʻení?

• Ko e hā ha ngaahi aʻusia kuó ne tokoniʻi koe ke liliu ho lotó ki hoʻo ngaahi kuí? Ko e hā e ʻuhinga ʻoku fuʻu mahuʻinga ai ia ki he palani ʻa e Tamai Hēvaní?

Ke ʻilo lahi ange ki he haʻu ʻa ʻIlaisiaá mo e founga ʻoku fakahoko ai ʻa e kikite ko ʻení he ʻaho ní, vakai, Tokāteline mo e Ngaahi Fuakava 110:13–16 mo e D. Todd Christofferson, “Ko e Mālohi Faisilá” (Liahona, Nōvema 2023, 19–22). Ko e hā e ʻuhinga ʻokú ke houngaʻia ai ʻi he haʻu ʻa ʻIlaisiaá?

Vakai foki, Gerrit W. Gong, “ʻOku ʻI Ai Hotau Hisitōlia Takitaha,” Liahona, Mē 2022, 43–46; “Liliu Homou Lotó,” Ngaahi Himí, fika 182; “The Sealing Power” (vitiō), ChurchofJesusChrist.org.

3:38

• ʻE fēfē haʻo tali mo hoʻo fānaú ʻa e fehuʻi ʻi he Malakai 1:2—“Kuo ʻofa [ʻa e ʻEikí] ʻi he hā kiate kimautolú?” Fevahevaheʻaki ʻa e ngaahi ʻuhinga ʻoku mou ʻiloʻi ai ʻokú Ne ʻofa ʻiate kimoutolú. Mahalo ʻe lava ke tā ʻe hoʻo fānaú ha ʻū fakatātā ʻokú ne fakamanatu kiate kinautolu ʻa ʻEne ʻofá.

• Te ke tokoniʻi fēfē hoʻo fānaú ke nau ako ki he vahehongofulú? Te ke lava ʻo kole ange ke nau lau ha fanga kiʻi meʻa iiki ʻe 10, hangē ko e koini ʻi he peesi ʻekitivitī ʻo e uike ní. Hili iá te nau lava ʻo fakamavaheʻi ha meʻa ʻe taha mei he toengá—ko e lahi ʻeni ʻo ʻetau vahehongofulu ʻoku foaki ki he ʻEikí. Fakatatau ki he Malakai 3:8–12, ko e hā e ʻuhinga ʻoku finangalo ai e ʻEikí ke tau totongi vahehongofulú? (vakai foki, “Ko e Palōfita ko Malakaí” ʻi he Ngaahi Talanoa ʻo e Fuakava Motuʻá, 171–72; “First Things First!” [vitiō], Gospel Library).

  

  0:58

  

  1:23

• ʻI hoʻomou lau fakataha ʻa e Malakai 3:10, te mou lava ʻo fakaafeʻi hoʻomou fānaú ke nau tuʻu ʻi ha veʻe luva ʻi he taimi te mou lau ai ʻa e kupuʻi lea “ngaahi matapā ʻo e langí.” Pe te ke huaʻi ha vai ki ha ipu kae ʻoua kuo fonu mahuohua ke fakatātaaʻi ʻa e kupuʻi lea “ʻe ʻikai ha potu ʻe faʻa hao ia ki ai.” Talaange ki he fānaú ʻa e ngaahi tāpuaki kuo foaki atu ʻe he ʻOtuá ʻi hoʻo totongi vahehongofulú. ʻE lava ke tā ʻe hoʻo fānaú ha ʻū fakatātā ʻokú ne fakafofongaʻi ʻa e ngaahi tāpuaki ko ʻení pea tautau kinautolu ʻi he veʻe luva homou ʻapí pe ofi ki ai.

• ʻE lava ke kumi ʻe hoʻo fānaú ʻi he Malakai 4:5–6, ʻa e tali ki he ngaahi fehuʻi ko ʻeni fekauʻaki mo e kikite ʻa Malakaí: Ko hai naʻe talaʻofa ʻa e ʻEikí te Ne fekauʻi maí? Ko e fē ʻa e taimi naʻá Ne pehē ai ʻe haʻu ʻa e tokotahá ni? Ko e hā e meʻa naʻe folofola ʻa e ʻEikí ʻe fai ʻe he tokotahá ni? Ko e hā e ʻuhinga ʻe fiemaʻu ai ke haʻu ʻa e tokotaha ko ʻení? Naʻe fakahoko ʻi fē ʻa e kikite ko ʻení? (vakai, Tokāteline mo e Ngaahi Fuakava 110:13–16).

• Ke ʻiloʻi ʻa e founga naʻe fakahoko ai ʻa e talaʻofa ʻi he Malakai 4:5, te ke lava foki ʻo toe vakaiʻi ʻa e “Ko Hono Foaki ‘a e [Lakanga Fakataulaʻeikí] kia Siosefa mo ‘Ōlivá” ʻi he Ngaahi Talanoa ʻo e Tokāteline mo e Ngaahi Fuakavá, 26–30. ʻE lava ke tokoni ha foʻi hiva hangē ko e “The Hearts of the Children” (Children’s Songbook, 92) ki hoʻo fānaú ke nau ʻiloʻi ʻa e ʻuhinga naʻe fuʻu mahuʻinga ai ke haʻu ʻa ʻIlaisiaá. Te ke lava foki ʻo ʻaʻahi ki he FamilySearch.org/discovery, ko e polokalama FamilySearch Tree, pe ko e kiʻi tohi Ko Hoku Fāmilí ki ha ngaahi ʻekitivitī ʻe lava ʻo tokoni atu kiate koe mo hoʻo fānaú ke liliu homou lotó ki hoʻomou ngaahi kuí.