මලාකි

මලාකිගේ දවසේදී, ඉශ්‍රායෙල් සෙනඟ ඒ වන විටත් යෙරුසලමේ දේවමාළිගාව නැවත ගොඩනඟා තිබුණත්, සෙනඟක් ලෙස ඔවුන්ට ස්වාමින්වහන්සේ සමඟ ඔවුන්ගේ සබඳතාව නැවත ගොඩනඟා ගැනීමට අවශ්‍ය වුණා. ඔබ මලාකි අධ්‍යයනය කරන විට, ස්වාමින්වහන්සේ ඉශ්‍රායෙල් සෙනඟගෙන් ඇසූ ප්‍රශ්න හෝ ඔවුන් උන්වහන්සේගෙන් ඇසූ ප්‍රශ්න සොයන්න. ස්වාමින්වහන්සේ සමඟ ඔබේ සම්බන්ධතාවය ඇගයීමට සහ උන්වහන්සේට සමීප වීමට ඔබට උපකාර කිරීම සඳහා ඒ හා සමාන ප්‍රශ්න (උදාහරණ කිහිපයක් පහත යෝජනා කර ඇත) ඔබගෙන්ම ඇසීම ගැන සලකා බලන්න.

• ස්වාමින්වහන්සේ මා කෙරෙහි දක්වන ආදරය මට දැනී ඇත්තේ කෙසේද? (බලන්න මලාකි 1:2).

• මම ස්වාමින්වහන්සේට කරන පූජා උන්වහන්සේට සැබවින්ම ගෞරව කරනවාද? (බලන්න මලාකි 1:6–11)

• මම ස්වාමින්වහන්සේ වෙතට “ආපසු යාමට” අවශ්‍ය වන්නේ කුමන ආකාරවලින්ද? (බලන්න මලාකි 3:7).

• මම යම් ආකාරයකින් දෙවියන්වහන්සේව සොරකම් කරනවාද? (බලන්න මලාකි 3:8–11).

• දුෂ්කර කාලවලදී මගේ ආකල්පය ස්වාමින්වහන්සේ කෙරෙහි මගේ හැඟීම් පිළිබිඹු කරන්නේ කෙසේද? (බලන්න මලාකි 3:13–15; තවත් බලන්න 2:17).

මලාකි 1 තුළ විස්තර කර ඇති පූජාවන් ගැන ඔබ කියවන විට, පූජකයන් පූජා කළ පරිත්‍යාගයන් ගැන ඔබට පෙනෙන්නේ කුමක්ද? පූජකයින් තුළ ස්වාමින්වහන්සේ කෙරෙහි ඇති හැඟීම් ගැන මෙම පරිත්‍යාගවලින් යෝජනා කරන්නේ කුමක්ද? (බලන්න මලාකි 1:13). ඔබ ස්වාමින්වහන්සේට කරන පූජා හෝ පරිත්‍යාග ලැයිස්තුවක් සෑදීම සලකා බලන්න. ලැයිස්තුවේ ඇති සෑම අයිතමයක් සඳහාම, එය “අපවිත්‍ර” පූජාවක් හෝ “පිරිසිඳු” පූජාවක් බවට පත් කළ හැක්කේ කුමක් දැයි සිතා බලන්න (මලාකි 1:7, 11).

ඔබ දසයෙන් කොටස ගෙවන බව ළඟදි දැනගත් මිතුරෙකු ඔබට සිටින බව සිතන්න. “ඇයි ඔයා එහෙම කරන්නේ?” ඔබේ මිතුරා අසයි. ඔබ මලාකි 3:8–12 කියවන විට මේ ගැන සිතන්න. ඔබේ මිතුරාගේ ප්‍රශ්නයට පිළිතුරු දීමට උපකාර වන කුමක් ඔබට එහි සොයාගත හැකිද? ඔබට අවශ්‍ය ඔබේ මිතුරා දසයෙන් කොටස ගැන තව කුමක් දැනගන්නවාටද? වැඩි උදවු සඳහා, ඔබට වැඩිහිටි නීල් එල්. ඇන්ඩර්සන්ගේ පණිවිඩය කියවන්න පුළුවන් “දසයෙන් කොටස: ස්වර්ගයේ කවුළු විවෘත කිරීම” (ලියහෝනා, නොවැ. 2023, 32–35), එමෙන්ම මෙවැනි ප්‍රශ්න වලට පිළිතුරු සොයන්න:

• අපි දසයෙන් කොටස ගෙවනවාට ස්වාමින්වහන්සේ කැමති ඇයි?

• දසයෙන් කොටස ගෙවීමෙන් කෙනෙකුව වළක්වන්නේ කුමක්ද, අපට එම බාධක ජයගත හැක්කේ කෙසේද?

• දසයෙන් කොටස ගෙවීම ස්වර්ගීය පියාණන්වහන්සේ සහ යේසුස් ක්‍රිස්තුස්වහන්සේ කෙරෙහි අපගේ ඇදහිල්ල ශක්තිමත් කරන්නේ කෙසේද?

ඔබ දසයෙන් කොටස ගෙවන විට ස්වාමින්වහන්සේ ඔබට ආශිර්වාද කර ඇති ආකාරය ඔබට ඔබේ මිතුරා සමඟ බෙදා ගත හැකිය. දසයෙන් කොටස ගෙවීමෙන් අප කෙබඳු පුද්ගලයන් බවට පත්වේද?

ඔබ සිතන ආකාරයට “නුඹලාට අහසේ කවුළු ඇර” (10 වෙනි පදය) යන වාක්‍ය ඛණ්ඩයේ තේරුම කුමක් විය හැකිද? සමහර විට ඔබට ජනේලයක් දෙස බලා ජනේල වල අරමුණු ගැන සිතා බලන්න පුළුවන්. අප දසයෙන් කොටස ගෙවන විට ස්වාමින්වහන්සේ අපට ආශිර්වාද කරන ආකාරය විස්තර කිරීමට “අහසේ කවුළු” හොඳ ක්‍රමයක් වන්නේ ඇයි?

මොරෝනි ජෝසෆ් ස්මිත්ට මලාකි 4:5–6 උපුටා දක්වන විට, ඔහු එසේ කළේ බයිබලයේ “කියැවෙන අයුරින් මඳක් වෙනස් ලෙසයි” (බලන්න ජෝසෆ් ස්මිත්–ඉතිහාසය 1:36–39). මෙම අනාවැකිය පිළිබඳ ඔබේ අවබෝධයට මොරෝනිගේ වෙනස්වීම එකතු කරන්නේ මොනවාද? විශේෂයෙන්, මෙවැනි ප්‍රශ්න ගැන මෙනෙහි කරන්න:

• “පියවරුන්” යනු කවුද? (බලන්න ද්විතීය කථාව 29:13). ඔවුන්ට දී ඇති පොරොන්දු මොනවාද? (බලන්න ආබ්‍රහම් 2:9–11). මෙම පොරොන්දු ඉටු කිරීමට ඔබ උදව් කරන්නේ කොහොමද?

• ඔබේ හදවත ඔබේ මුතුන් මිත්තන් වෙත යොමු කිරීමට උපකාරවත් වූ අත්දැකීම් මොනවාද? ස්වර්ගීය පියාණන්වහන්සේගේ සැලැස්මට එය එතරම් වැදගත් වන්නේ ඇයි?

එලියාගේ පැමිණීම සහ අද දින මෙම අනාවැකිය ඉටු වන ආකාරය ගැන වැඩි විස්තර දැනගැනීම සඳහා, බලන්න දහම සහ ගිවිසුම් 110:13–16 සහ ඩී. ටොඩ් ක්‍රිස්ටෝෆර්සන්, “මුද්‍රා තැබීමේ බලය” (ලියහෝනා, නොවැ. 2023, 19–22). එලියා පැමිණීම ගැන ඔබ ස්තූතිවන්ත වන්නේ ඇයි?

තවත් බලන්න ජෙරිට් ඩබ්. ගොන්ග්, “අප සැමටම කතාවක් ඇත,” ලියහෝනා, මැයි 2022, 43–46.

3:38

• මලාකි 1:2 තුළ ප්‍රශ්නයට ඔබ සහ ඔබේ දරුවන් පිළිතුරු දෙන්නේ කෙසේද—“ඔබවහන්සේ අපට ප්‍රේම කළේ කුමකින්ද?” උන්වහන්සේ ඔබට ආදරය කරන බව ඔබ දන්නා හේතු එකිනෙකා සමඟ බෙදා ගන්න. සමහරවිට ඔබේ දරුවන්ට උන්වහන්සේගේ ආදරය මතක් කර දෙන චිත්‍ර අඳින්න පුළුවන්.

• ඔබේ දරුවන්ට දසයෙන් කොටස ගැන ඉගෙන ගැනීමට ඔබ උපකාර කරන්නේ කොහොමද? මෙම සතියේ ක්‍රියාකාරකම් පිටුවේ ඇති කාසි වැනි කුඩා භාණ්ඩ 10ක් ගණන් කිරීමට ඔබට ඔවුන්ගෙන් ඉල්ලා සිටින්න පුළුවන්. එවිට ඔවුන්ට එක් භාණ්ඩයක් ඉතිරි භාණ්ඩයෙන් වෙන් කළ හැකිය—අපි දසයෙන් කොටස ලෙස ස්වාමින්වහන්සේට දෙන ප්‍රමාණය මෙයයි. මලාකි 3:8–12 ට අනුව, අප දසයෙන් කොටස ගෙවීම ස්වාමින්වහන්සේට අවශ්‍ය වන්නේ ඇයි?

  

  0:58

  

  1:18

• ඔබ එකට එක්ව මලාකි 3:10 කියවන විට, “අහසේ කවුළු” යන වාක්‍ය ඛණ්ඩය කියවන විට ජනේලයක් අසල සිටගෙන සිටින ලෙස ඔබට ඔබේ දරුවන්ට ආරාධනා කළ හැකිය. නැතහොත් “ඉඩ මදිවෙන තරම්” යන වාක්‍ය ඛණ්ඩය නිදර්ශනය කිරීම සඳහා කෝප්පයකට එය උතුරා යන තෙක් වතුර වත් කළ හැකිය. ඔබ දසයෙන් කොටස ගෙවන විට දෙවියන්වහන්සේ ඔබට දී ඇති ආශිර්වාද ගැන දරුවන්ට කියන්න. ඔබේ දරුවන්ට මෙම ආශිර්වාද නියෝජනය කරන පින්තූර ඇඳිය ​​හැකි අතර ඒවා ඔබේ නිවසේ ජනේලයක හෝ අසල එල්ලා තැබිය හැකිය.

• මලාකි 4:5–6 තුළ, ඔබේ දරුවන්ට මලාකිගේ අනාවැකිය පිළිබඳ පහත සඳහන් ප්‍රශ්නවලට පිළිතුරු සෙවිය හැකිය: ස්වාමින්වහන්සේ එවීමට පොරොන්දු වූයේ කාවද? මේ පුද්ගලයා එනවා යැයි කිව්වේ කවදාද? ස්වාමින්වහන්සේ පැවසුවේ මේ පුද්ගලයා කුමක් කරන බවද? මෙම පුද්ගලයා පැමිණිය යුත්තේ ඇයි? මෙම අනාවැකිය ඉටු වූයේ කොහේද? (බලන්න දහම සහ ගිවිසුම් 110:13–16).